1-2. Ino han̈ampy atsika hahay raha tsapan’i Jehovah, izikoa fa nilotovin̈y an̈aranany?

 MINIMINIA hely baka ty. Misy olo araiky ten̈a tia anao, mivolan̈a raha ratsy momba anao amin’olo. Hainao tsarabe fa raha io vandy. Fa ny ten̈a ratsy aminany, irô olo jiaby naharen̈y izin̈y man̈aparitaka vandy io, ke mahaimaro fo olo manjary man̈eky izin̈y marin̈y. Akôry eky ho anao? Izikoa anao men̈atra olo aby io ndreky mandiniky lazanao, misora malahelo mare anao, sa karakôry?​—Ohab. 22:1.

² Ohatra io han̈ampy atsika hahay karakôry raha tsapan’i Jehovah, koa fa nankaratsin’olo lazanany. Nisy anjelinany araiky navandy tamin’i Eva, man̈angy voanalohany niasainy. Ke nanjary nivadiky tamy Jehovah irô raimandrenintsika voanalohany io. Zen̈y nahavy olombelon̈o jiaby nanjary nanota ndreky maty. (Gen. 3:1-6; Rom. 5:12) Baka amy vandy nataon’i Satana tamy zaridain̈y Edena tan̈y in̈y koa mahavy prôblemo jiaby hitantsika eran-tany, karaha ataon’ny fahafatesan̈a, ady, ndreky olo masikiny. Ke nalahelo ma Jehovah izikoa fa nahita vandy ndreky prôblemo jiaby baka amizio? Tsy maintsy nalahelo izy. Fa izy tsy nivadiky ratsy toetry, aviô izy tsy namaly faty, fa izy mbala Zan̈ahary “ravoravo fo.”​—1 Tim. 1:11.

3. Ino ma tombony anan̈antsika?

³ Ten̈a manan̈a tombony atsika, fôtony atsika afaka man̈aboaka fa Satana io mpavandy ankitin̈y. Man̈araka volan̈an’i Jehovah ty atsika koa man̈ano zen̈y: “Deray an̈aran’i Jehovah.” (Sal. 113:1) Man̈ano zen̈y atsika, izikoa man̈ambara amin’olo ny marin̈y momba Jehovah. Hidera an̈aran’i Jehovah  ma anao? Alô atsika handiniky raha telo handrisiky atsika hidera an̈aran’i Jehovah amy fôntsika jiaby.

MAMPARAVORAVO JEHOVAH ATSIKA KOA MIDERA AN̈ARANANY

4. Nan̈ino ma Jehovah ravoravo, izikoa atsika midera izy? Hazavà amin’ny ohatra. (Zahava koa sary.)

⁴ Mamparavoravo Babantsika an-dan̈itry an̈y atsika koa midera an̈aranany. (Sal. 119:108) Fa zen̈y ma mivolan̈a fa Zan̈ahary Faran’ny Mahery io mila atsika olombelon̈o tsy lavorary hidera izy, zay izy vo ravoravo? Ehe, diniha baka ohatra ty. Misy tsaiky man̈angy araiky milomoay man̈aton̈o babany, mitolon̈o babany aviô mivolan̈a aminany karaha ty: “Tiako anao papa! Ravoravo mare babany io maharen̈y zen̈y. Fôtony nan̈ino? Aviô, izio ma babany io tsy ho ravoravo foeky, izikoa zanany io tsy midera izy? Ehe. Fa raha ten̈a mamparavoravo izy, zanany io man̈ambara aminany fa ten̈a tia izy ndreky mankasitraka izy. Hainy baka fa tsaiky io koa zatra man̈ano zen̈y, ho sambatra izy lera izy be an̈y. Tsisy ny hafa amy zen̈y koa Jehovah Babantsika an-dan̈itry an̈y. Ho ravoravo mare izy izikoa atsika midera izy.

5. Atsika koa midera an̈aran’ny Zan̈ahary, ino raha ho hita fa vandy ankitin̈y?

⁵ Atsika koa midera Babantsika an-dan̈itry an̈y io, aboakantsika amy zen̈y fa, tsy marin̈y vandin’i Satana momba atsika tsiaraikiaraiky. Izy baka nivolan̈a fa, tsisy amintsika hahavita tsy hivadiky amy Jehovah, izikoa atsika tôjy raha sarotro. Aviô, izy nivolan̈a koa fa hiala amy Zan̈ahary aby atsika jiaby, izikoa zen̈y hitantsika fa mahatsara atsika. (Joba 1:9-11; 2:4) Fa Joba tsy nivadiky tamy Zan̈ahary foeky, ke naboakany tamy zen̈y fa Satana io mpavandy ankitin̈y. Ke anao ke? Atsika tsiaraikiaraiky afaka mifidy hiaro Babantsika io, ndreky han̈ano raha mamparavoravo izy, ke manompo izy ndreky tsy mivadiky aminany. (Ohab. 27:11) Ten̈a voninahitry maventy fan̈anaovan̈a zen̈y.

6. Akôry hangalantsika tahaka Mpanjaka Davida ndreky irô Levita aby io? (Nehemia 9:5)

⁶ Fitiavantsika Zan̈ahary mandrisiky atsika hidera an̈aranany, amy fôntsika jiaby. Karaha ty nisoratin’ny Mpanjaka Davida: “Zaho hidera an̈aran’i Jehovah. Hidera an̈aranany masin̈y, amy fônaka jiaby zaho.” (Sal. 103:1) Hain’i Davida baka fa, izikoa izy midera an̈aran’i Jehovah, dikan’izen̈y izy midera Jehovah. Atsika koa fa maharen̈y an̈aran’i Jehovah zen̈y, efa toetrinany maro tsara ndreky raha maro tsara vitany edy raha avy an̈aty jerintsika. Davida tihankamasin̈y an̈aran’ny Zan̈ahary, ndreky tihidera izy amy fônany jiaby. Karaha zen̈y koa irô Levita aby io. Irô nitariky  tamy fideran̈a Jehovah. Nanetry ten̈a irô nan̈eky fa, raha nivolan̈indrô jiaby tsisy nahavolan̈a fideran̈a an̈aran̈a masin̈in’i Jehovah. (Vakia Nehemia 9:5) Vavaka feno fanetren-ten̈a ndreky tamy fôndrô jiaby io, ten̈a namparavoravo fôn’i Jehovah.

7. Akôry hataontsika midera Jehovah lera atsika mitory ndreky amy fiain̈anantsika andavanandra?

⁷ Amin’ny andra iziôty koa, mamparavoravo Jehovah atsika, izikoa mafana fô mikoran̈a raha momba izy, mankasitraka izy ndreky tia izy. Atsika koa fa mitory, tanjon̈ontsika voanalohany, hisariky sain̈in’olo amy Jehovah, ndreky hahavy olo ho tia Jehovah karaha ataontsika koa. (Jak. 4:8) Ravoravo atsika man̈aboaka amin’olo, ino raha volan̈in’ny Baiboly momba Jehovah: Izy be fitiavan̈a, man̈ano ny rariny, hendry, manan̈a angôvo, ndreky manan̈a toetry maro tsara hafa koa. Midera Jehovah koa atsika ndreky mamparavoravo izy, ke mifen̈y mangala tahaka izy. (Efes. 5:1) Hahavita hanohitry donia ratsy ty atsika izikoa man̈ano zen̈y. Fa mety ho gaga olo amy donia ty, izikoa mahita atsika tsy man̈ano raha karaha fataondrô. Ke irô mety ho lôso diniky, nan̈ino atsika karaha zen̈y. (Mat. 5:14-16) Ke arakarakan’ny hifanojoantsika amindrô isan’andra, atsika mety hahavita han̈azava amindrô, nan̈ino atsika karaha zen̈y. Baka amy zen̈y mahavy olo maro ho voasariky hanompo Jehovah. Mamparavoravo fôn’i Jehovah atsika izikoa mikoran̈a momba izy, ndreky man̈aboaka amy fiain̈anantsika isan’andra fa atsika midera izy.​—1 Tim. 2:3, 4.

MAMPARAVORAVO JESOSY ATSIKA KOA MIDERA AN̈ARAN’I JEHOVAH

8. Akôry ataon’i Jesosy mitariky lalan̈a amy fideran̈a an̈aran’i Jehovah?

⁸ Amy raha jiaby niasain’i Jehovah na an-dan̈itry an̈y na ambony tany, tsisy mahay izy mandilatra Jesosy. (Mat. 11:27) Jesosy tia Babany io, ke izy mitariky lalan̈a amy fideran̈a an̈aran’i Jehovah io. (Jaona 14:31) Tamy vavaka nataony tamin’ny alin̈y talohan’ny nifatesany, karaha ty nivolan̈any fanompoan̈a nataony tambony tany teto: “An̈aranao efa nampianariko irô.” (Jaona 17:26) Ino ma raha tiany havian̈a amy zen̈y?

9. Ino fan̈oharan̈a nampiasain’i Jesosy, baka hazava amin’olo tsarabe toetrin’ny Babany?

⁹ Irô Jiosy aby nampianarin’i Jesosy tamin’io efa nahay an̈aran’ny Zan̈ahary. Ke dikan’izen̈y, tsy an̈aran’ny Zan̈ahary fo raha nampianarin’i Jesosy irô. Jesosy nan̈azava raha momba Jehovah. (Jaona 1:17, 18) Karaha ataon’ny amy Soratra Hebreo ao man̈ambara fa Jehovah io “Zan̈ahary mamindra fô ndreky mahay mahinakinaka olo. (Eks. 34:5-7) Nazavain’i Jesosy mazava tsarabe raha zen̈y, tamin’izy nan̈ano fan̈oharan̈a momba zanaka adala, ndreky babany in̈y. Ambaran’ny Baiboly fa, baban’ny tsaiky io nahita izy baka lavitry tarỳ, nilomoay izy nandeha nan̈aton̈o tsaiky io, nitolon̈o izy, aviô namela helokonany. Hita baka amy zen̈y fa Jehovah ten̈a mamindra fô ndreky mahinakinaka ankitin̈y. (Lioka 15:11-32) Hain’olo baka tamy raha nazavain’i Jesosy zen̈y, karakôry marin̈y Jehovah io.

10. a) Akôry hahaizantsika fa Jesosy nampiasa an̈aran’ny Zan̈ahary, aviô tiany koa olo han̈ano karaha zen̈y? (Marka 5:19) (Zahava koa sary.) b) Ino koa raha tian’i Jesosy hataontsika amin’ny andra iziôty?

¹⁰ Tian’i Jesosy koa ma olo hahay an̈aran’ny Zan̈ahary? Nisy sasany tamindrô pitariky fivavahan̈a tamy zen̈y, nivolan̈a fa an̈aran’ny Zan̈ahary io tsy mety tonotonon̈iny, fôtony izio masin̈y. Fomba tsy baka amy Soratra Masin̈y raha zen̈y, ke tsy nataon’i Jesosy tamban̈a tsy han̈ambaran̈a an̈aran’ny Zan̈ahary tamin’olo. Diniha baka tamin’izy nitaha lelahy araiky nazon’ny demony, tamy faritry nisy irô Gerasianin̈y aby io. (Mar. 5:16, 17) Nivadiky navozo irô olo aby io, ke nan̈iraka Jesosy niala tao, ke Jesosy  tsy nidôko tamy faritry io. Fa tian’i Jesosy an̈arana Jehovah io ho hainolo tan̈y. Ke izy nan̈iraka lelahy baka nitahany io, nivolan̈a tamin’olo fa tsy baka tamy raha nataon’i Jesosy nampahivan̈a izy, fa baka tamy raha nataon’i Jehovah. (Vakia Marka 5:19.) a Karaha zen̈y koa amin’ny andra iziôty. Tian’i Jesosy atsika han̈ambara amin’olo an̈aran’ny Babany io, eran-tany! (Mat. 24:14; 28:19, 20) Ke izikoa atsika man̈ano zen̈y, atsika hamparavoravo Jesosy Mpanjakantsika io.

11. Ino ma raha nirahin’i Jesosy nangatahin’ny mpan̈ara-dia izy aby io? Nan̈ino ma zen̈y ten̈a raha maventy? (Ezekiela 36:23)

¹¹ Hain’i Jesosy fa an̈isan’ny fikasan̈an’i Jehovah hankamasin̈y an̈aranany amy raha tsy marin̈y jiaby volan̈in’olo momba izy. Zen̈y nahavy Jesosy nampianatra mpianatranany hivavaka karaha ty: ‘Anao Babanay an-dan̈itry an̈y, irarian̈a an̈aranao hankamasin̈iny.’ (Mat. 6:9) Hain’i Jesosy tsarabe fa zen̈y adihevitry faran’ny maventy, amy raha jiaby. (Vakia Ezekiela 36:23.) Tsisy zavaboary manan-tsain̈y ke nahavita nankamasin̈y an̈aran’i Jehovah karaha nataon’i Jesosy. Fa tamy Jesosy nisambôrin̈y, ino fahotan̈a nivolan̈andrô izy? Nanevateva Zan̈ahary zen̈y izy, ho irô. Hain’i Jesosy tsarabe tamy zen̈y fa tsy man̈isy fôtiny an̈aran’ny Babany io fahotan̈a faran’ny ratsy. Nampiasaloha izy mare, izy natao tsy nan̈isy fôtiny an̈aran’ny Zan̈ahary zen̈y. Mety zen̈y koa nahavy izy niasaloha mare, tamy lera vitsivitsy talohan’ny nanamborandrô izy, andra alin̈y in̈y.​—Lioka 22:41-44.

12. Akôry nataon’i Jesosy nankamasin̈y an̈aran’ny Babany tan̈atin’ny raha farany sarotro?

¹² Baka hankamasin̈ana an̈aran’ny Zan̈ahary, Jesosy niaritry fampijalian’olo izy, tihitihy, ndreky vandy jiaby natao taminany. Hainy baka fa izy mila man̈araka volan̈a Babany io amy raha jiaby. Tsy nampan̈ino izy foeky ho voabaraka zen̈y. (Heb. 12:2) Hainy koa fa Satana nanafiky izy tamin’ny andra faran’ny sarotro tamin’ny fiain̈ananany io. (Lioka 22:2-4; 23:33, 34) Tian’i Satana baka han̈ano raha hampivadiky Jesosy, kanefa Satana tsy nahavita nan̈ano raha nampivadiky Jesosy foeky. Naboakan’i Jesosy fa Satana io ten̈a mpavandy ankitin̈y, aviô naboakan’i Jesosy koa fa Jehovah manan̈a mpanompo maro tsy mivadiky  aminany, ndray an̈atin’ny raha sarotro karakôry!

13. Izikoa tianao hamparavoravo Mpanjakantsika efa mitondra io, ino raha tôkony hataonao?

¹³ Izikoa tianao hamparavoravo Mpanjakantsika efa mitondra io, ino raha tôkony hataonao? Aza vôly midera an̈aranany, ke olo ampianara raha momba Jehovah. Man̈ara-dia Jesosy anao koa man̈ano zen̈y. (1 Pet. 2:21) Karaha nataon’i Jesosy, aboakanao amy zen̈y fa anao mamparavoravo fôn’i Jehovah, aviô man̈aporofo fa mpavandy ankitin̈y Satana fahavalon’ny Zan̈ahary io!

MITAHITAHY AMY FAMONJIAN̈A FAHIN̈ANAN’OLO

14-15. Izikoa atsika mampianatra olo raha momba Jehovah, ino aby raha tsara mety hiboaka?

¹⁴ Nan̈ino ma mitahitahy amy famonjian̈a fahin̈anan’olo atsika koa midera an̈aran’i Jehovah? ‘Man̈ajamba sain̈in’olo tsy mino aby io’ baka Satana iziôty. (2 Kor. 4:4) Baka amy zen̈y mahavy olo manjary mino vandin’i Satana aby ty: Zan̈ahary zen̈y tsisy, izy lavitry atsika, izy tsy mijery atsika, Zan̈ahary zen̈y mampijaly mandrakizay olo ratsy fan̈ahy. Araiky fo raha tian̈a havian̈a amy vandy aby zen̈y: Handoto an̈aran’i Jehovah ndreky lazan’i Jehovah, baka olo tsy tihan̈aton̈o izy foeky. Fa izikoa atsika mitory, tsy ho tatran’i Satana tanjon̈onany aby zen̈y. Atsika baka mampianatra olo ny marin̈y momba Jehovah Babantsika ndreky midera an̈aranany masin̈y. Ke ino vokatran’ny raha zen̈y?

¹⁵ Mahery irô fahamarin̈ana aby amy Baiboly ao. Atsika koa mampianatra olo raha momba Jehovah, ndreky ny marin̈y momba izy, tsy ho jamba eky irô, ke ho hitandrô tsara toetrin’i Jehovah maro tsara aby io. Ho gaga mare irô izikoa mahay fa tsisy farany angôvon’i Jehovah. (Isaia 40:26) Hahaihatoky Jehovah fo irô koa fa mahay fa izy Zan̈ahary tia rariny. (Deot. 32:4) Ho haindrô koa fa Jehovah ten̈a hendry. (Isaia 55:9; Rom. 11:33) Hahatsiaro mahazo angôvo koa irô, koa fa mahay fa Jehovah io fitiavan̈a. (1 Jaona 4:8) Arakarakan’ny an̈aton̈andrô Jehovah, hahaiho azo antoko fo fan̈antinan̈andrô hiain̈y tsisy farany, ke hanjary zanakanany koa. Ten̈a voninahitry maventy nintsika, fôtony atsika mitahitahy irô olo aby io han̈aton̈o Babandrô! Ke atsika koa man̈ano  zen̈y, Jehovah mihevitry atsika “mpiara-miasa” aminany.​—1 Kor. 3:5, 9.

16. Ino aby vokatran’ny fahaizan’olo an̈aran’ny Zan̈ahary? Man̈ameza ohatra.

¹⁶ Atsika koa fa mitory, matetiky atsika mivolan̈a amin’olo fa Jehovah an̈aran’ny Zan̈ahary. Nata zen̈y fo efa malaka amin’olo tsara fô edy. Karaha zen̈y iziô Aaliyah. b Izy tsy olo nitaizain̈y tamy fivavahan̈a kristianin̈y. Fa izy tsy ten̈a afa-pô tamy fivavahan̈anany, aviô tsy nahatsapa narikitry Zan̈ahary zen̈y foeky. Fa niova raha jiaby zen̈y, izy koa fa nanomboko nianatra Baiboly tamy Vavolombelon̈on’i Jehovah. Nanjary tsapany fa izy lôso kamaradin’i Zan̈ahary. Aviô lany fan̈ahy izy koa fa nahay fa kaiky amy Baiboly maro, nadoso an̈aran’ny Zan̈ahary io aviô nisoloan̈a an̈aran̈a fan̈ajan̈a, karaha ataon’ny Tômpo. Ten̈a nan̈ova fiain̈ananany fahaizany fa Jehovah an̈aran’ny Zan̈ahary io. Ho izy: “Kaiky kamaradiko ten̈a tiako io misy an̈aran̈a!” Ino vokany? Karaha ty nambarany: “Ren̈iko milamin̈y tsara fônaka iziôty. Ren̈iko misy hajany tsarabe zaho.” Misy lelahy araiky koa, Steve an̈arany. Izy mpisoma lamoziky sady Jiosy araiky mentitry mare amy fan̈arahan̈a fomba in̈y. Tsy tia fivavahan̈a foeky izy fôtony maro mpivavaka hitany mihatsaravelatsihy. Fa tafaran’ny nifatesan’ny mamany, izy nipetraka nitandren̈y Vavolombelon̈on’i Jehovah nampianatra Baiboly olo. Ten̈a nanohin̈y fônany nahay an̈aran’ny Zan̈ahary. Ho izy: “Sambako nahay an̈aran’ny Zan̈ahary. Sambako nahay koa fa Zan̈ahary io misy ankitin̈y! Ikeko tsarabe raha zen̈y. Haiko eky fa nahazo Kamarady maventy zaho.”

17. Nan̈ino ma anao tapa-kevitry fa hidera an̈aran̈a Jehovah io fo? (Zahava koa sary.)

¹⁷ Anao koa fa mitory ndreky mampianatra olo, asa anao mba mikoran̈a Jehovah, an̈aran̈a masin̈y io? Koran̈inao amindrô ma karakôry tsarabe Zan̈aharintsika io? Anao koa man̈ano zen̈y, midera an̈aran’ny Zan̈ahary anao. Ke irarian̈a anao hidera Jehovah, an̈aran̈a masin̈y io, ke hampianatra olo ny ten̈a toetrin’i Jehovah. Anao koa man̈ano zen̈y, hamonjy olo maro koa anao, sady man̈eky Kristy Jesosy Mpanjakantsika io hitariky anao. An̈abon’ny raha jiaby, hamparavoravo Jehovah Babantsika ten̈a tia atsika io koa anao. Ke irarian̈a anao ‘hidera an̈aran’i Jehovah mandrakizay!’​—Sal. 145:2.