1-2. Akôry fahitan’olo fiarasan̈a alohan’ny vadian̈a io?

 MAMPARAVORAVO ndreky tsara fotoan̈a fiarasan̈a alohan’ny vadian̈a io. Izikoa anao iziô am-pan̈anaovan̈a izio, hay be fa tianao handeha tsara izio. Maro koa olo mivolan̈a fa mamparavoravo izio. Ho Ranabavy Tsion a, baka a Ethiopie: “Tamy zahay roen’ny vadiko nan̈ano fiarasan̈a alohan’ny vadian̈a, io an̈isan’ny fotoan̈a ten̈a namparavoravo zaho. Zahay baka nahavita nikoran̈a raha maro matomboko, aviô koa nitokiky. Ravoravo zaho izikoa fa nahay fa zaho nahita olo tiako sady tia zaho.”

² Fa Alessio, rahalahy araiky baka a Holandy ndraiky nivolan̈a: “Namparavoravo zaho nifankahay tamy vadiko tamy zahay niaraka talohan’ny vadian̈a, fa ndray zen̈y nisy raha sarotro koa.” Amy lahatsoratra ty, atsika handiniky sasany amindrô raha sarotro zen̈y, ndreky torolalan̈an’ny Baiboly han̈ampy olo man̈ano fiarasan̈a alohan’ny vadian̈a hangala fanapahan-kevitry mety tsara. Hidinihintsika koa akôry mety han̈ampian’ny olo amy fiangonan̈a irô.

TANJON̈ON’NY FIARASAN̈A ALOHAN’NY VADIAN̈A

3. Ino ma antony nan̈anaovan̈a fiarasan̈a alohan’ny vadian̈a io? (Ohabolana 20:25)

³ Ndray raha ten̈a mamparavoravo fiarasan̈a alohan’ny vadian̈a io, izio koa dingana maventy hidiran̈a amy vadian̈a. Amin’ny andran’ny mariazindrô baka olo aroe io han̈ano voady man̈oloan̈a Jehovah fa irô hifankatia ndreky hifan̈aja, irô roe koa samy mbala velon̈o. Fa na ino na ino voady ataon’olo, izy tôkony handiniky tsarabe fo, alohan’ny han̈anaovan̈a izio. (Vakia Ohabolana 20:25.) Karaha zen̈y koa raha mila atao amy voadin’ny vadian̈a. Fiarasan̈a alohan’ny vadian̈a io man̈ampy olo aroe hifankahay ndreky hangala fanapahan-kevitry mety tsara. Ndraikindraiky han̈ano mariazy  fanapahan-kevitry io, fa ndraikindraiky koa hanapaka fiarasan̈a ataondrô io izio. Tsy nahomby ma fiarasan̈a alohan’ny vadian̈a io, izikoa irô misaraka ke tsy tody amy vadian̈a? Ehe, tsy zen̈y. Tanjon̈on’izio baka hahafahandrô hahay tsara ino fanapahan-kevitry ten̈a hahatsara irô.

4. Ino raha mila halaintsika onon̈o, izikoa fa misy olo miditry amy fiarasan̈a alohan’ny vadian̈a?

⁴ Lan̈iany olo selibatera, mila mangala onon̈o fa olo aroe koa fa miaraka alohan’ny vadian̈a zen̈y, mila efa vôn̈ono hiditry amy vadian̈a. Dikan’izen̈y anao tsy tôkony han̈ano fiarasan̈a alohan’ny vadian̈a amin’olo araiky tsy iritriretinao halain̈a vady. Aviô, tsy olo selibatera fo tôkony hangala onon̈o tanjon̈on’ny fiarasan̈a alohan’ny vadian̈a io, fa atsika jiaby koa. Ohatra, misy olo mihevitry koa fa olo aroe koa fa miaraka alohan’ny vadian̈a, irô tsy maintsy han̈ano mariazy. Ino vokatran’ny toetsain̈y zen̈y amy Kristianin̈y selibatera? Ho Melissa, ranabavy araiky selibatera baka a Etazonỳ: “Izikoa fa misy ranadahy ndreky rahavavy mifampizaha toetry, sasany amy mpiara-manompo efa man̈anten̈a fa irô ho lôso fivadiany. Ke misy olo sasany man̈ano fiarasan̈a alohan’ny vadian̈a mavozo hanapaka fiarasan̈andrô, ndray irô efa tsy mifandanja. Selibatera sasany ndraiky mavozo foeky han̈ano fiarasan̈a alohan’ny vadian̈a io. Mampijaly jery mare raha karaha zen̈y.”

ATAOVA RAHA IFANKAHAIZAN̈A TSARABE

5-6. Ino raha tôkony ho hain’olo man̈ano fiarasan̈a alohan’ny vadian̈a io momba ny andan̈iny ndreky ankilany? (1 Petera 3:4)

⁵ Izikoa anao man̈ano fiarasan̈a alohan’ny vadian̈a io, ino raha han̈ampy anao hangala fanapahan-kevitry na han̈ano mariazy anarô na hanapaka fiarasan̈a io? Ataova raha ifankahaizanarô tsarabe. Mety efa maromaro raha hainao momba olo miaraka aminao io talohan’ny anao hanomboko hiaraka aminany. Fa iziôty anao hahavita hahay tsarabe ‘toetry misitriky an̈atin’ny fônany an̈y.’ (Vakia 1 Petera 3:4.) Tafiditry amy zen̈y momba ara-pan̈ahin’olo io, toetrianany, aviô toetsain̈inany. Eraka fandehan’ny fotoan̈a, ho vitanao koa hamaly irô fan̈ontanian̈a aby ty: ‘Olo ty ma ten̈a ho vady mety tsarabe aminaka?’ (Ohab. 31:26, 27, 30; Efes. 5:33; 1 Tim. 5:8) ‘Zahay ma mba ten̈a hifankatia tsarabe edy? Mora aminaka ma mandefitry toetry ratsinany?’ b (Rom. 3:23) Aviô aminarô efa mifankahay io, aleva onon̈o ty: Tsy raha mampitovy anarô ny raha ten̈a maventy fa anarô mba mahay mifan̈araka amy raha tsy mampitovy anarô.

⁶ Ino koa raha hafa mila hainao momba olo io? Alohan’ny anao ho tia mare olo io, mety ho tianao hay raha sasany matomboko, karaha ataon’ny ino tanjon̈onany. Fa akôry fo basy raha manokana, an̈atin’izen̈y fahasalaman̈anany, prôblemo  ara-bola, na koa raha ratsy niain̈any taloha tan̈y? Amy voanalohany, tsy raha jiaby zay ho voakoran̈a amy fiarasan̈anarô io. (Ampiràn̈a amy Jaona 16:12.) Izikoa anao mahatsapa fa bonera loatra aminao hamaly fan̈ontanian̈anany sasany momba anao, volàn̈a aminany raha zen̈y. Fa ndray zen̈y, arakaraka handihanan’ny fotoan̈a, olo miaraka aminao tôkony hahay valin’ny fan̈ontanian̈anany zen̈y, baka hahaizany hanapa-kevitry tsara. Ke anao tsy maintsy mikoran̈a ny marin̈y aminany momba raha aby tiany ho hay io.

7. Ino koa fomba hafa hahavitandrô olo man̈ano fiarasan̈a alohan’ny vadian̈a io hifankahay tsarabe? (Zahava koa efajoro “ Olo Aroe Miaraka Alohan’ny Vadian̈a Kanefa Mifankalavitry.”) (Zahava koa sary aby io.)

⁷ Akôry hahavy anao hahay tsarabe olo miaraka aminao io? Fomba araiky hahaizanao zen̈y, tsy mihafahafa mikoran̈a raha an̈aty fô, man̈ontany aviô mitandren̈y tsara. (Ohab. 20:5; Jak. 1:19) Mety han̈ampy anarô miaraka man̈ano raha hahavitanarô hifampikoran̈a tsara, karaha ataon’ny miaraka mihina, mitsangatsangana amy tany maro olo, aviô miaraka mitory. Hahavita hifankahay koa anarô, izikoa mangala fotoan̈a iarahan̈a amy naman̈a ndreky fianakavian̈a. Ankoatran’izen̈y, man̈anaova raha hahafahanao hahita akôry ataony lera izy miatriky raha isan-karazany ndreky lera misy olo isan-karazany iô. Aleva onon̈o baka raha nataon’i Aschwin baka a Holandy. Karaha ty ho izy lera izy nikoran̈a fiarasan̈andrô ndreky Alicia: “Zahay nan̈ano raha nahavy zahay hifankahay tsarabe. Matetiky raha tsotra fo izio, karaha ataony miaraka mandoky na koa miaraka man̈ano asa hafa. Tamy zahay nan̈ano raha aby zen̈y, zahay nanjary nifankahay toetry tsara ndreky toetry ratsy.”

8. Akôry hahafahan’olo aroe man̈ano fiarasan̈a alohan’ny vadian̈a hahazo hatsaran̈a, izikoa irô miaraka mianatra?

⁸ Lôso hifankahay koa anarô roe izikoa anarô miaraka mianatra foto-kevitry amy Soratra Masin̈y. Anarô koa baka lôso fivadiany, anarô mila manokan̈a fotoan̈a han̈anaovan̈a fotoam-pivavahan̈an’ny fianakavian̈a, baka Zan̈ahary ho raha ten̈a maventy amy vadian̈anarô. (Mpito. 4:12) Ke nan̈ino izikoa aminarô mbala man̈ano fiarasan̈a alohan’ny vadian̈a ziôty, manokan̈a fotoan̈a hiarahan̈a mianatra? Ndray izy man̈ano zen̈y, anarô roe ndraiky mbala tsendriky fianakavian̈a araiky. Ke rahalahy io mbala tsendriky lohan’ny ranabavy io. Fa izikoa anarô miaraka mianatra tsy tapaka, zen̈y hahaizanarô karakôry fifandraisan’ny tsiaraikiaraiky aminarô amy Jehovah. Max ndreky Laysa, olo fivadiany baka Etazonỳ nahita hatsaran̈a hafa koa. Ho Max: “Tamy somilany zahay nanomboko fiarasan̈a alohan’ny vadian̈a, zahay nianatra boky ndreky gazetintsika mikoran̈a momba olo aroe mifampizaha toetry, momba vadian̈a, aviô fiain̈anan’ny fianakavian̈a.  Irô raha nianaranay tamy bokintsika aby io nahafahanay nikoran̈a raha maro maventy, nety ho sarotro taminay hikoran̈a izy.”

RAHA HAFA MILA DINIHIN̈Y KOA

9. Ino raha mila dinihin’olo aroe man̈ano fiarasan̈a alohan’ny vadian̈a, izikoa irô hanapa-kevitry azôvy hikoran̈andrô izio?

⁹ Azôvy tôkony hivolan̈anarô momba fiarasan̈a alohan’ ny vadian̈anarô io? Aminarô vo somilany manomboko fiarasan̈a alohan’ ny vadian̈a io, mety tsy olo jiaby han̈ambaranarô izio. (Ohab. 17:27) Fan̈anaovanarô raha zen̈y han̈ampy anarô tsy ho drodroko fan̈ontanian̈a, ndreky tsy hitiren’olo han̈ano fanapahan-kevitry. Fa ndray zen̈y ndraiky, izikoa anarô tsy mikoran̈a izio amin’olo foeky, anarô mety ho tafitokantokan̈a ke mety hahavy anarô haloto fitondran-ten̈a raha zen̈y. Ke tsara izikoa izio koran̈inarô amin’olo afaka han̈amia torohevitry tsara ndreky han̈ampy anarô. (Ohab. 15:22) Ohatra, anarô mety mikoran̈a izio amin’olo sasany amy fianakavian̈anarô, na namanarô matotro, na koa amindrô anti-pan̈ahy aby io.

10. Ino raha tôkony harehan’olo aroe man̈ano fiarasan̈a alohan’ny vadian̈a, baka fitondran-ten̈andrô han̈amia voninahitry Zan̈ahary fo? (Ohabolana 22:3)

¹⁰ Akôry hahavy fiarasan̈anarô io han̈amia voninahitry Zan̈ahary? Arakaraka hifankahaizanarô, ara-dalàn̈a izikoa anarô hahaihifankatia fo. Ino han̈ampy anarô hadio fitondran-ten̈a fo? (1 Kor. 6:18) Aza mikoran̈a raha vetaveta, aza mitokantokan̈a, na migiaka toaka be. (Efes. 5:3) Raha aby zen̈y mety hampiaho fan̈irian̈anarô han̈ano firaisan̈a, ke mety hahavy anarô tsy ho tapa-kevitry han̈ano ny tsara. Ke tsara izikoa koran̈inarô matetiky ino raha hataonarô baka anarô hahavita hifan̈aja fo ndreky han̈araka fitsipikin’i Jehovah. (Vakia Ohabolana 22:3.) Aleva onon̈o baka ino raha nan̈ampy Dawit ndreky Almaz baka a Ethiopie. Karaha ty ho irô: “Zahay koa fa niaraka, zahay nandeha tamy tany nisy olo maro, na koa nisy kamaradinay maromaro niaraka taminay. Zahay tsiary ndraiky nidôko manokan̈a tan̈atin’ny tomabily ndreky tan̈atin’ny tran̈o zen̈y. Fan̈anaovanay raha zen̈y nahavy zahay tsy resin’ny fakam-pan̈ahy.”

11. Ino raha mila dinihin’olo aroe man̈ano fiarasan̈a alohan’ny vadian̈a, lera irô manapa-kevitry fa irô han̈ano fihetsiky han̈aboahan̈a fitiavan̈a?

¹¹ Akôry fo momba fihetsiky han̈aboahan̈a fa mifankatia olo aroe? Arakaraka itombosan’ny fifankatiavanarô, anarô mety hanapa-kevitry han̈ano raha han̈aboahan̈a fa anarô mifankatia, amy fomba mety tsarabe. Fa ndray zen̈y, izikoa maresaka fan̈irian̈anarô han̈ano firaisan̈a, mety ho sarotro aminarô han̈ano fanapahan-kevitry tsara. (Tonon. 1:2; 2:6) Baka iô koa, man̈ano fihetsiky han̈aboahan̈a fifankatiavan̈a io mety hahavy anarô tsy hahafehy ten̈a, ke han̈ano raha tsy hamparavoravo Jehovah. (Ohab. 6:27) Dikan’izen̈y, aminarô vo manomboko fiarasan̈a alohan’ny vadian̈a io, tsara izikoa efa dinihinarô torolalan̈an’ny Baiboly, aviô koran̈inarô ino raha hataonarô ndreky tsy hataonarô lera man̈ano fihetsiky man̈aboaka fifankatiavan̈a io. c (1 Tes. 4:3-7) Ke tsara izikoa anarô man̈ontany ten̈a: ‘Akôry honolo amy tany misy zahay izikoa mahita zahay man̈ano fihetsiky karaha io? Mety hampiaho fan̈irian̈anay han̈ano firaisan̈a ma raha aby zen̈y?’

12. Tôkony hangala onon̈o ino irô olo man̈ano fiarasan̈a alohan’ny vadian̈a, izikoa misy prôblemo ndreky tsy fan̈arahan̈a an̈atin’izio?

¹² Akôry handaminanarô prôblemo ndreky tsy fifan̈arahan̈a? Akôry izikoa matetiky misy raha tsy mampifan̈araka anarô? Zen̈y ma mivolan̈a fa tsy pare fiarasan̈anarô io? Olo fivadiany ndraikindraiky tsy mitovy hevitry aby. Olo manan̈a vadian̈a maharitry ela zen̈y, olo aroe vôn̈ono hifan̈aja ndreky hifandefitry amy raha tiandrô tompiny. Fomba hamahanarô prôblemonarô amy ziôty mety han̈aboaka hahomby vadian̈anarô sa tsy hahomby. Ke tsara anarô roe man̈ontany  ten̈a: ‘Izikoa misy raha tsy mampifan̈araka zahay, vitanay ma mikoran̈a milamin̈y ndreky am-pan̈ajan̈a? Zahay ma malaky man̈eky hadisovan̈anay ndreky vôn̈ono hiova? Zahay ma mora milefitry, malaky man̈ano azafady, aviô man̈ambela hadisovan̈a?’ (Efes. 4:31, 32) Izikoa anarô matetiky tsy mifan̈araka ndreky mimalomalo lava fo an̈atin’ny anarô man̈ano fiarasan̈a alohan’ny vadian̈a io, aza man̈anten̈a fa ho vitanarô fo hifandamin̈y, lera anarô vita mariazy. Ke izikoa anao mahatsapa fa tsy mifandanja aminao olo io, manapaka fiarasan̈a ataonarô io fanapahan-kevitry ten̈a mahatsara anarô roe. d

13. Ino raha han̈ampy irô hahay halavasan’ny fotoan̈a iarasandrô io?

¹³ Tôkony zisk’ombian̈a ma fiarasan̈a alohan’ny vadian̈a io? Izikoa atsika tsy mandiniky tsara alohan’ny hanapa-kevitry, matetiky ratsy fo vokany. (Ohab. 21:5) Ke fotoan̈a han̈anaovan̈a fiarasan̈a alohan’ny vadian̈a io tôkony hatao ampy tsara, hahafahanao hahay tsarabe olo miaraka aminao io. Fa ndray zen̈y, tsy tôkony hambela ela be izio, izikoa tsy raha misy antony maventy. Baiboly koa mivolan̈a: “Raha antinain̈y koa tsy mety tanteraka, mamparary fô.” (Ohab. 13:12) Fan̈ampin’izen̈y koa, arakarakan’ny mampaela fotoan̈a iarasanarô, mety hahaiho sarotro aminarô fo hanohitry fakam-pan̈ahy han̈ano firaisan̈a. (1 Kor. 7:9) Ke aza mifantoko amin’ny halavasan’ny fotoan̈a han̈anaovanarô fiarasan̈a alohan’ny vadian̈a io. Man̈ontania ten̈a karaha ty: ‘Ino ma raha mbala mila haiko momba olo io, misy hahaizako manapa-kevitry?’

AKÔRY METY HANOHAN̈AN’OLO HAFA IRÔ?

14. Karakôry fomba mety han̈ampian’olo hafa irô olo man̈ano fiarasan̈a alohan’ny vadian̈a io? (Zahava koa sary.)

¹⁴ Izikoa atsika mahay olo man̈ano fiarasan̈a alohan’ny vadian̈a, akôry mety han̈ampiantsika irô? Atsika mety mikaiky irô miaraka mihina amintsika, man̈ano fotoam-pivavahan̈an’ny fianakavian̈a, na koa man̈ano fiarahan̈a. (Rom. 12:13) An̈atin’ny raha karaha zen̈y mety hahafahandrô hifankahay tsarabe. Irô ma mila olo fahatelo, sa mila indesin̈y amy tomabily na toeran̈a mitokan̈a hahafahandrô mikoran̈a? Izikoa zen̈y, asa atsika mbala mety man̈ampy irô fo? (Gal. 6:10) Alicia, araiky nikoran̈intsika taloha tarỳ, nahazo onon̈o raha nankasitrahindrô roen’ny Aschwin mare. Ho izy: “Ravoravo mare zahay izikoa fa nisy ranadahy ndreky rahavavy nivolan̈a taminay fa zahay mety mandeha amindrô an̈y fo izikoa zahay roe tihikoran̈a, ndray zahay tsy nivolan̈a tsialohaloha tamindrô.” Izikoa misy olo man̈ano fiarasan̈a alohan’ny vadian̈a mikaiky anao hiaraka amindrô, manohan̈a irô anao izikoa man̈eky han̈ampy  irô. Tandrema tsao irô hambelanao irô roe zaraiky fo, fa kanefa aza adin̈a koa fa misy raha mba tiandrô hifampikoran̈ana manokan̈a.​—Fil. 2:4.

15. Ino koa raha mety han̈ampian’ny naman̈a irô olo man̈ano fiarasan̈a alohan’ny vadian̈a io? (Ohabolana 12:18)

¹⁵ Atsika koa mety man̈ampy irô olo aby man̈ano fiarasan̈a alohan’ny vadian̈a io izikoa mivolan̈a raha tôkony hivolan̈iny ndreky tsy mivolan̈a raha tsy tôkony hivolan̈iny momba irô. Ndraikindraiky atsika mila mifehy ten̈a. (Vakia Ohabolana 12:18.) Ohatra, atsika baka mety ho mekimeky han̈aboely amin’olo hafa fa misy olo haintsika man̈ano fiarasan̈a alohan’ny vadian̈a, kanefa mety ho irô tompiny fo tiandrô han̈ambara izio amin’olo. Aviô koa, atsika tsy tôkony hitsiko olo man̈ano fiarasan̈a alohan’ny vadian̈a. Atsika koa tsy tôkony hankaratsy fanapahan-kevitrindrô. (Ohab. 20:19; Rom. 14:10; 1 Tes. 4:11) Aviô atsika koa tsy tôkony hivolan̈a na han̈ano raha hahavy irô hahatsiaro ho voatery han̈ano mariazy. Karaha ty raha nivolan̈in’ny Ranabavy Elise ndreky vadiny: “Zahay gaga izikoa fa nisy olo nan̈ontany zahay momba daty han̈anaovanay mariazy, kanefa zahay roe mbala tsendriky nandiniky raha momba zen̈y aby.”

16. Izikoa misy olo nanapaka fiarasan̈andrô, akôry tôkony hataontsika?

¹⁶ Akôry izikoa misy olo aroe man̈ano fiarasan̈a alohan’ny vadian̈a, nanapaka fiarasan̈andrô io? Atsika tsy tôkony hitsokoriky antony nahavy irô nan̈ano zen̈y, baka iô koa atsika tsy tôkony han̈amia tsin̈y irô foeky. (1 Pet. 4:15) Karaha ty nivolan̈in’ny ranabavy araiky, Lea an̈aranany: “Ren̈iko fa nisy olo nan̈ontany nan̈ino zahay roen’ny ranadahy io nanapaka fiarasan̈anay alohan’ny vadian̈a. Nahinihiny mare zaho naharen̈y zen̈y.” Karaha efa nikoran̈intsika taloha tarỳ in̈y, izikoa nisy olo efa nan̈ano fiarasan̈a alohan’ny vadian̈a ke nisaraka, zen̈y tsy mivolan̈a fa ratsy fanapahan-kevitry nataondrô zen̈y, fôtony baka efa nahatakatra tanjon̈onany fiarasan̈a alohan’ny vadian̈a io. Izin̈y nan̈ampy irô hangala fanapahan-kevitry mety tsarabe. Ndray zen̈y ndraiky, fanapahan-kevitrindrô nanapaka fiarasan̈andrô io mety hampalahelo fôndrô, baka iô mety hahavy irô hahatsiaro latsa-tokana koa. Ke atsika mila mitady fomba hahafahantsika man̈ampy.​—Ohab. 17:17.

17. Tôkony hifen̈y han̈ino ma olo aroe man̈ano fiarasan̈a alohan’ny vadian̈a?

¹⁷ Erakany hitantsika tiô, fiarasan̈a alohan’ny vadian̈a io mety hisy raha sarotro, fa mety hisy raha mamparavoravo koa. Jessica nivolan̈a: “Tsy vôntro mora fiarasan̈a alohan’ny vadian̈a io. Fa ny raha mamparavoravo zaho, zahay nahavita nampiasa fotoan̈anay ndreky angôvonay nahavitanay nifankahay tsarabe.” Ke izikoa anao man̈ano fiarasan̈a alohan’ny vadian̈a, mifen̈a han̈ano raha hahavy anarô hifankahay tsarabe. Izikoa anarô man̈ano karaha zen̈y, fiarasan̈a alohan’ny vadian̈a io han̈ampy anarô han̈ano fanapahan-kevitry tsara tsarabe.