Atsika tsy tôkony hieritreritry fa matoa irô mpianatra 70 aby in̈y, tsy tiô tamy Jesosy nanomboko nan̈ano Sakafo Harivan’ny Tômpo in̈y, dikan’izen̈y irô tsy nankasitrahany na efa niala izy. Tamin’io baka Jesosy tihiaraka tamindrô apostolinany aby io.

Samy mpianatran’i Jesosy irô 12 ndreky irô 70 in̈y. Maro mpianatran’i Jesosy, fa 12 lahy tamindrô io fo nifidiny, ke nataony apostoly. (Lioka 6:12-16) Ta Galilia izy tamin’izy ‘nikaiky irô 12 lahy aby io’ ndreky ‘nan̈iraka irô hitory vaovao tsaran’ny Fanjakan̈an’ny Zan̈ahary ndreky hampajanga olo.’ (Lioka 9:1-6) Tafara tatỳ, Jesosy koa fa ta Jodia “nifidy mpianatra 70 lahy hafa koa, aviô nan̈iraka irô io tsiaroeroe.” (Lioka 9:51; 10:1) Ke nisy mpan̈ara-dia Jesosy aby dikan’izen̈y tamy faritry samy hafa, aviô irô io nitory momba izy.

Irô Jiosy efa nanjary mpianatran’i Jesosy aby io mbala nankalaza Pasky fo isaka taon̈o. Irô mety niaraka tamy fianakavian̈andrô. (Eks. 12:6-11, 17-20) Izikoa efa nahainarikitry fotoan̈a hifatesan’i Jesosy, nandeha ta Jerosalema izy ndreky apostolinany aby io. Fa izy tsy nikaiky mpianatranany jiaby baka a Jodia, Galilia, aviô a Pere hiaraka hankalaza Pasky io taminany. Zen̈y man̈aboaka fa tamy fotoan̈a io, Jesosy tihiaraka tamindrô apostoly aby io. Ho izy tamindrô: “Efa fan̈irian̈anaka mare hiaraka aminarô hihina Pasky ty alohan’ny hijaliako.”​—Lioka 22:15.

Tsy maintsy nisy antony nahavy izy nan̈ano zen̈y. Jesosy baka “Zanaka Ôndrikôndrikin’ny Zan̈ahary, man̈adoso fahotan̈an’olombelon̈o”, ke izy efa tsy ho ela hofoaty. (Jaona 1:29) Aviô izy tôkony hofoaty a Jerosalema. Efa tao fo baka nan̈anaovan̈a sôron̈o nin’ny Zan̈ahary rango efa ela. Fifatesan’i Jesosy io hahavy famonjian̈a maventy, mbala beben’ny fan̈avotan̈a fianakavian̈a israelita izikoa fa nihina zanaka ôndrikôndriky andra alin̈y, tamin’irô nifindra baka ta Ezipty in̈y. (1 Kor. 5:7, 8) Ke sôron̈o nataon’i Jesosy io, hahavy irô 12 lahy io ho an̈isan’ny fôtotron’ny fiangonan̈a kristianin̈y. (Efes. 2:20-22) Sady Jerosalema tanàna masin̈y io misy “vato fôtotro 12” ke nisy “an̈aran̈a 12 nin’ny apostoly 12 nin’ny Zanakan’ny Ôndrikôndriky.” (Apok. 21:10-14) Ke irô apostoly tsy mivadiky aby io manan̈a anjara asa maventy amy fan̈atantirahan̈a fikasan̈an’ny Zan̈ahary. Haintsika baka amy zen̈y, nan̈ino Jesosy tihiaraka tamindrô, tamy Pasky farany nataony io, baka tiô direkty nan̈ano Sakafo Harivan’ny Tômpo.

Tsy irô mpianatra 70 io fo tsy niaraka tamy Jesosy tamy sakafo hariva io fa nisy hafa koa. Fa ndray zen̈y, mpianatranany jiaby tsy nivadiky hahazo hatsaran̈a baka amy Sakafo Harivan’ny Tômpo io. Aviô lan̈iany mpianatra jiaby nanjary Kristianin̈y voahosotro izikoa fa nandeha fotoan̈a, hiditry amy fifan̈ikian̈a momba fanjakan̈a, araiky nikoran̈in’i Jesosy tamindrô apostoly tamin’ny alin̈y in̈y.​—Lioka 22:29, 30.