1-2. Ino raha mila ataontsika baka fanompoan̈a ataontsika ikeny Jehovah?

 INO raha avy amy jerinao, anao koa fa maharen̈y volan̈a “fanompoan̈a” Zan̈ahary zeny? Rahalahy araiky mandohaliky ankilany fandrian̈anany, mivavaka alohany hoandry? Sa fianakavian̈a araiky ravoravo miaraka mianatra Baiboly harivariva?

² Samby fanompoan̈a Jehovah aby raha nataondro io. Fa ikeny Jehovah ma fanompoan̈a nataondro? Ankasitrahiny izio izikoa iro tia sady man̈aja izy, avio miezaka man̈ano sitrapônany. Tiantsika mare Jehovah. Haintsika fa izy zaraiky fo vain̈y tompoen̈a, ke zen̈y mahavy atsika tihan̈amia izy ny farany tsara vitantsika amy fanompoan̈a izy.

3. Ino raha hidinihintsika ato?

³ Hidinihintsika ato fanompoan̈a karakory nikeny Jehovah taminy andrany Baiboly, baka io ino aby raha valo tiany Jehovah hataontsika koa fa manompo izy. Lera atsika mandiniky raha aby zen̈y, diniha akory mety hankatsarànao fanompoan̈anao. Hikoran̈intsika ato koa nan̈ino ho ravoravo ndreky ho sambatra fo atsika, izikoa aminany tsarabe fomba hanompoantsika Jehovah.

4. Akory nan̈aboahany panompony Jehovah taloha tan̈y fa iro tia Jehovah sady nan̈aja izy?

⁴ Maro lelahy tsy nivadiky talohany Jesosy navy tambony tany teto. An̈isanizen̈y i Abela, Noa, Abrahama, ndreky Joba. Naboakandro tsarabe fa iro tia Jehovah sady nan̈aja izy. Tamy  fomba akory? Narehandro volan̈a Zan̈ahary, iro natoky izy, avio iro nan̈ano sôron̈o namezan̈a izy. Tsy tantarainy Baiboly ino aby raha tsy maintsy nataondro, iro koa fa nanompo Jehovah. Fa ny raha azo antoko, nifen̈y fo iro nan̈ano ny farany tsara vitandro nan̈amezan̈a voninahitry Jehovah, ke nikeny Jehovah fanompoan̈andro. Koa fa nandeha fotoan̈a, namezany Jehovah Lalàn̈any Mosesy iro taranakany Abrahama aby io. Tamizio tao nisy toromariky mazava tsarabe mikasiky fomba tiany Jehovah hanompoan̈a izy.

5. Karakory ma fomba tiany Jehovah hanompoan̈a izy, tafarany nifatesany Jesosy ndreky nitsanganany tamy maty?

⁵ Tafarany nifatesany Jesosy ndreky nitsanganany tamy maty, Jehovah efa tsy nan̈iraka panomponany han̈araka Lalàn̈any Mosesy. (Rom. 10:4) Nisy lalàn̈a vaovao ndraiky nirahin̈y nitandremany Kristianin̈y, tsy ino zen̈y fa “lalàn̈any Kristy.” (Gal. 6:2) Tsy koran̈iny “lalàn̈a” io ino aby raha tokony hatao ndreky tsy tokony hatao, avio izio tsy nila nianaran̈a tsianjery. Fa nan̈araka raha voakoran̈a tamizio tao iro, izikoa fa nangala tahaka Jesosy ndreky nan̈araka raha nampianariny. Amy zioty koa, mifen̈y angovo jiaby atsika man̈araka diany Kristy, ke ravoravo i Jehovah. Atsika lastiô mahatsiaro “velombelon̈o” koa fa man̈ano zen̈y.​—Mat. 11:29.

6. Ino raha tokony hataonao baka anao hahazo hatsaran̈a koa fa mandiniky lahatsoratra ty?

⁶ Atsika iziô handiniky raha valo fataontsika amy fanompoan̈a Jehovah. Ke isaka atsika mandiniky araiky amizio, diniha: ‘Ino ezaka efa vitako?’ Avio, ‘Ino raha mbala mety hankatsaraiko?’ Mety efa afapô anao amy fandrosoan̈a vitanao, kanefa mivavaha baka Jehovah han̈ampy anao hahita raha mbala mila ankatsarainao.

7. Akory fahitany Jehovah vavaka baka amy fô ataontsika?

⁷ Manompo Jehovah atsika izikoa fa mivavaka. Vavaka ataontsika io ampiran̈iny Baiboly aminy emboko man̈itry voamboatra tsara findesin̈y amy tran̈olay masin̈y ndreky amy tempoly. (Sal. 141:2) Ten̈a tiany Jehovah fôfoko emboko man̈itry io. ‘Mamparavoravo fôny’ Jehovah koa vavakantsika, ndray raha tsotra fo volan̈intsika aminany. (Ohab. 15:8; Deot. 33:10) Ravoravo Jehovah maharen̈y atsika mivolan̈a aminany fa atsika tia izy sady mankasitraka raha ataony amintsika. Tiany izikoa koran̈intsika aminany raha mampiasaloha atsika, raha irintsika, avio raha antin̈aintsika. Ke alohany anao hivavaka, nan̈ino izikoa anao mba mangala fotoan̈a hely mandiniky raha handeha hikoran̈inao aminany? Anao koa man̈ano zen̈y, hanjary miran̈a ‘emboko man̈itry’ farany tsara in̈y vavaka ataonao amy Babanao andan̈itry an̈y.

8. Lera karakory aby atsika faka midera Zan̈ahary?

⁸ Manompo Jehovah atsika izikoa fa midera izy. (Sal. 34:1) Midera Jehovah atsika lera mikoran̈a aminolo momba toetrinany miavaka ndreky raha nataony. Hahavita hikoran̈a raha maro momba izy atsika, izikoa mankasitraka izy amy fô jiaby. Hahita antony maro hideran̈a Jehovah koa atsika, izikoa misaintsain̈y raha jiaby nataony han̈ampian̈a atsika. Lera atsika mitory, atsika ten̈a afaka ‘man̈ano soron̈o fideran̈a Zan̈ahary, tsy ino zen̈y, fa vokatrany son̈intsika.’ (Heb. 13:15) Erakany raha efa hitantsika tiô, efa tokony hidinihintsika tsialohaloha raha hivolan̈intsika lera atsika mivavaka. Tokony hidinihintsika tsara koa zay raha hivolan̈intsika aminolo itoriantsika. Tiantsika ho tsara mare baka  ‘soron̈o fideran̈a’ ataontsika. Zen̈y mahavy atsika mazoto mitory fahamarin̈ana.

9. Karaha iro Israelita aby io, ino aby raha mila ataontsika beky atsika hahazo hatsaran̈a izikoa fa mivory? Tantarà hatsaran̈a nazonao.

⁹ Manompo Jehovah atsika izikoa fa mivory. Ty lalàn̈a namezany Jehovah iro Israelita aby io: “Intelo isaka taon̈o, lelahy jiaby aminao ao hiboaka man̈oloan̈a Jehovah Zan̈aharinao amy toeran̈a fidiny.” (Deot. 16:16) Koa fa navy fotoan̈a io, tsy maintsy nialandro tran̈ondro ndreky vilondro, ke tsisy olo niambin̈y tanànandro. Fa Jehovah efa nampan̈anten̈a iro fa ‘tsisy olo foeky han̈iry tanindro, lera iro manonga hizaha saorany Jehovah Zan̈aharindro.’ (Eks. 34:24) Niezaka iro Israelita navozo Zan̈ahary aby io nandeha nan̈aton̈o fety fataondro isaka taon̈o io, fotony iro natoky Jehovah tamy fôndro jiaby. Maro hatsaran̈a nazondro, iro koa fa nan̈ano zen̈y. Nanjary nazava tamindro Lalàn̈any Zan̈ahary, nahavita nisaintsain̈y raha tsara nataony Jehovah koa iro, avio afaka nifankahery taminolo hafa tia Jehovah. (Deot. 16:15) Hahazo hatsaran̈a mitovy amy zen̈y koa atsika, izikoa atsika man̈ano zay vitantsika han̈ataon̈ana fivorian̈a alamin̈iny fiangonan̈a. Ke izikoa atsika miezaka man̈amia valinteny fôhiky salakady avoaoman̈a tsarabe, hahaiho ravoravo fo Jehovah.

10. Nan̈ino ma hira an̈isany ten̈a raha maventy amy fanompoan̈antsika?

¹⁰ Manompo Jehovah atsika izikoa fa mihira miaraka amy piaramanompo. (Sal. 28:7) Hira anisany nitana plasy maventy tamy fanompoan̈a nataony Israelita. Nisy Levita 288 iziô nataony Panjaka Davida pihira tamy tempoly. (1 Tan. 25:1, 6-8) Mihira koa atsika avahizo. Atsika koa fa mihira fideran̈a Jehovah, atsika mikoran̈a fitiavantsika izy. Akory ndraiky basy izikoa atsika tsy mahay mihira na ratsy feo? Zen̈y ma tamban̈a? Diniha baka ty! ‘Matetiky man̈ano hadisovan̈a’ atsika izikoa fa mivolan̈a, fa zen̈y tsy ataontsika tamban̈a tsy hivolan̈ana, ohatra, lera atsika mivory ndreky manompo. (Jak. 3:2) Karaha zen̈y koa, man̈ano hira fideran̈a Jehovah fo atsika, ndray karakory ndray karakory feontsika.

11. Koa zahan̈a Salamo 48:13, nan̈ino ma atsika tokony hanokan̈a fotoan̈a hianaran̈a Baiboly miaraka amy fianakavian̈antsika?

¹¹ Manompo Jehovah atsika izikoa fa mianatra Volan̈anazy ndreky mampianatra zanakantsika raha momba izy. Koa fa Sabata, iro Israelita aby io tsy nan̈ano asa fataondro andavanandra, fa nan̈araraotro fotoan̈a io iro nankatsaran̈a fihavanan̈andro amy Jehovah. (Eks. 31:16, 17) Lan̈iany Israelita tsy nivadiky nan̈araraotro nampianatra zanakandro raha momba Jehovah ndreky toetry tsaranany. Tsy maintsy manokan̈a fotoan̈a hamakian̈a ndreky hianaran̈a Volan̈any Zan̈ahary koa atsika tsiaraikiaraiky. An̈isany fanompoan̈a Jehovah raha zen̈y salakady man̈ampy atsika hahaiharikitry izy fo. (Sal. 73:28) Avio, atsika koa mianatra Baiboly miaraka amy fianakavian̈antsika ho vitantsika han̈ampy zanakantsika hifandray tsara amy Jehovah, Babantsika be fitiavan̈a andan̈itry an̈y.​—Vakia Salamo 48:13.

12. a) Akory fahitany Jehovah asanolo pikobaby tran̈olay masin̈y? b) Ino raha ianarantsika baka amy zeny?

¹² Manompo Jehovah atsika izikoa fa man̈ôrin̈y ndreky mikobaby tran̈o fivavahantsika. Baiboly mivolan̈a fa ‘asa masin̈y’ fan̈amboaran̈a ndreky fikobabian̈a tran̈olay masin̈y. (Eks. 36:1, 4) Amy zioty koa, konteny Jehovah ho an̈isany fanompoan̈a masin̈y koa fan̈oren̈ana Tran̈o Fivorian̈a ndreky tran̈o hafa ampiasainy fandaminan̈a. Mahafoe fotoan̈a be han̈anaovan̈a asa aby zen̈y  rahalahy ndreky ranabavy sasany. Atsika ten̈a mankasitraka asa ataondro io, fotony izio mampandeha tsara asany Fanjakan̈any Zan̈ahary. Fa ndray zen̈y, mandeha mitory koa iro. Mety tihan̈ano pisava lalan̈a foeky sasany amindro io! Tsy tokony hisalasala foeky antipan̈ahy hanendry iro rahalahy ndreky ranabavy mazoto miasa aby io ho pisava lalan̈a, izikoa iro mahafeno fepetra. Na manan̈a fahaizan̈a manokan̈a momba fiasàn̈a tran̈o atsika na tsy manan̈a, atsika jiaby samby tokony han̈adio ndreky hikobaby tran̈o aby io.

13. Akory tokony fiheverantsika fan̈amezan̈a ataontsika hanohanan̈a asany Fanjakan̈any Zan̈ahary?

¹³ Manompo Jehovah atsika izikoa fa man̈ano fan̈amezan̈a hanohanan̈a asany Fanjakan̈any Zan̈ahary. Iro Israelita aby io koa fa nandeha nan̈aton̈o fety fatao isaka taon̈o aby in̈y, iro tsy tokony hitondra tan̈ampolo. (Deot. 16:16) Tsy maintsy nitondra raha hely fo iro, arakaraka raha nanan̈andro. Zen̈y nan̈aboaka fa iro mankasitraka raha nataony Jehovah tamindro. Akory ndraiky atsika? Efa man̈ano raha koa Jehovah baka atsika ho tsara fihavanan̈a aminany. Ke asa anao mba mankasitraka raha jiaby ataony? Fomba araiky mety han̈anaovanao zen̈y iziô, lera anao man̈amia vola hanohanan̈a fiangonan̈a misy anao ndreky asa fitorian̈a erantany. Karaha ty ho apostoly Paoly: ‘Fa izikoa misy olo von̈ono han̈amia raha, ten̈a tsara izikoa raha zen̈y ataony mifan̈araka amy raha anan̈any, fa tsy amy raha tsy anan̈any.’ (2 Kor. 8:4, 12) Ke na be na hely raha amezantsika, tsy zen̈y zahavany Jehovah fa fôntsika man̈amia izio.​—Mar. 12:42-44; 2 Kor. 9:7.

14. Akory fiheverany Jehovah fan̈ampian̈a ataontsika amy piaramanompo? (Ohabolana 19:17)

¹⁴ Manompo Jehovah atsika izikoa fa man̈ampy piaramanompo sahiran̈a. Jehovah nampan̈anten̈a fa hahazo hatsaran̈a baka aminany lan̈iany Israelita mazoto man̈ampy olo sahiran̈a. (Deot. 15:7, 10) Amy Jehovah, isaka atsika man̈ampy namantsika sahiran̈a, atsika mira man̈amia raha Izy koa. (Vakia Ohabolana 19:17.) Nisy fotoan̈a iziô iro Kristianin̈y ta Filipỳ nandefa fan̈ampian̈a tamy Paoly, fotony izy nigadra. Akory fiheverany Paoly fan̈ampian̈a nazony io? Nivolan̈a Paoly fa ‘ten̈a ankasitrahiny Zan̈ahary salakady mamparavoravo Zan̈ahary’ raha nataondro han̈ampian̈a izy. (Fil. 4:18) Diniha fiangonan̈a misy anao, baka io man̈ontania ten̈a karaha ty: ‘Azovy olo azoko ampian̈a?’ Ravoravo Jehovah izikoa atsika mampiasa fotoan̈antsika, angovontsika ndreky fahaizan̈antsika, avio fanan̈anantsika han̈ampian̈a olo sahiran̈a. Fanompoan̈a masin̈y fiheverany Jehovah raha jiaby ataontsika amy fanompoan̈a izy.​—Jak. 1:27.

15. Mitaky fotoan̈a ndreky angovo fanompoan̈a Jehovah, kanefa nan̈ino raha zen̈y tsy mavesatra amintsika?

¹⁵ Mitaky fotoan̈a ndreky angovo fanompoan̈a Jehovah, fa izio tsy mavesatra. (1 Jaona 5:3) Ino antony? Fotony atsika tia Jehovah. Miniminia hely baka tsaiky araiky tihiasa sary, hataony kadôny babany. Mety handany lera maro tsaiky io hiasan̈a sary io, fa izy tsy mitseky foeky. Fotony nan̈ino? Tiany baka babany, ke ravoravo izy han̈amia izio babany. Karaha zen̈y koa, ravoravo mare atsika mampiasa fotoan̈antsika ndreky angovontsika hanompoan̈a Jehovah, fotony atsika tia izy.

16. Akory fahitany Jehovah ezakantsika tsiaraikiaraiky, izikoa atsika mifen̈y man̈ano raha mamparavoravo izy? (Hebreo 6:10)

¹⁶ Raimandreny be fitiavan̈a tsy man̈anten̈a fa ho miran̈a aby kadô mety amezany zanakandro  tsiaraikiaraiky. Haindro baka fa samby isany zanakandro aby io, avio tsy mitovy raha mety ho vitandro. Karaha zen̈y koa, hainy Jehovah fa tsy miran̈a raha mety ho vitantsika tsiaraikiaraiky. Ohatra iziô, anao mety hahavita raha be mandilatrany vitanolo hainao ndreky olo tianao. Mety hifanohitry amy zen̈y ndraiky ny raha misy. Mety tsy hahavita be eky anao, fotony anao efa matoe na tsy salama na manan̈a andraikitry arapianakavian̈a. Fa anao aza kivy! (Gal. 6:4) Jehovah tsy han̈adin̈a raha nataonao. Ho ravoravo fo anao izikoa anao mifen̈y man̈ano ny farany tsara vitanao, sady tsara antony mahavy anao man̈ano izy. (Vakia Hebreo 6:10.) Tsy ezakanao fo hitany Jehovah, fa fan̈irian̈a an̈atiny fônao koa. Anao tiany ho ravoravo ndreky ho afapô amy raha ataonao amy fanompoan̈a izy.

17. a) Ino raha mety ataonao, izikoa tsy mora aminao man̈ano raha sasany tokony hataontsika amy fanompoan̈a? b) Tantarà hatsaran̈a nazonao, anao koa fa nan̈ohatra nan̈ano araiky amindro raha aby amy sary aminy efajoro “ Raha Hampitombo Haravoan̈anao.”

¹⁷ Akory fo basy izikoa sarotro amintsika man̈ano raha sasany tokony hataontsika amy fanompoan̈a, karaha ataony fianaran̈a manokan̈a na fitorian̈a? Hahaiho ho tiantsika fo han̈ano raha aby zen̈y izikoa atsika mifen̈y mare han̈ano iro io matetitetiky. Salakady hahazo hatsaran̈a atsika izikoa man̈ano zen̈y. Fanompoan̈a ataontsika io mety ampiran̈iny amy spaoro na amy fisomàn̈a raha man̈aina. Tsy dia hitombo fahaizan̈antsika, izikoa mahalan̈a atsika vo man̈ano izio. Akory ndraiky izikoa atsika mifen̈y man̈ano izio isanandra? Amy voanalohany, mety tsy be loatra fotoan̈a ho lanintsika han̈anaovan̈a izio. Kanefa izikoa tsapantsika fa misy vokany tsara ezakantsika, tsy ho din̈intsika foeky tsy han̈ano izio, sady ankafizintsika mare. Ke tsao mba mety hataonao karaha zen̈y koa fanompoan̈anao?

18. Ino antony niasàny Jehovah atsika, avio ino vokany izikoa atsika man̈ano zen̈y?

¹⁸ Hanompo Jehovah amy fô jiaby antony niasàny atsika. Ke izikoa zen̈y raha ataontsika, ho ravoravo ndreky ho afapô edy atsika, sady hahavita hanompo izy mandrakizay. (Ohab. 10:22) Avio rango iziô, milamin̈y eritreritrintsika fotony Jehovah man̈ampy atsika lera atsika mandalo raha sarotro. (Isaia 41:9, 10) Maro ankitin̈y antony mamparavoravo atsika, atsika koa fa manompo Babantsika be fitiavan̈a io. Vain̈y ‘hahazo voninahitry ndreky fan̈ajan̈a’ baka amy raha jiaby namboariny izy!​—Apok. 4:11.