TAMINDRO Hebreo tamy Tany Nampan̈antinain̈y tan̈y, nanomboko taon̈o izikoa iro efa nikomansy niasa tany ndreky namafy voandraha. Izikoa amy zioty edy zen̈y, ampisasahany fanjava Septambra ndreky Oktobra.

Fôhiky halavasany taon̈o amy kalandrie man̈araka fihodin̈any fanjava amy Tany (12 fanjava ke isaka fanjava misy 29 na 30 andra), izikoa ampiran̈iny aminy halavasany taon̈o amy kalandrie man̈araka fihodin̈any Tany amy masoandra. Ke tsy maintsy nampiasa fomba isankarazany iro baka hifananjò kalandrie aroe io. Ohatra iziô, tsy maintsy nampian̈a andra vitsivitsy na nampian̈a fanjava araiky foeky taon̈o sasany izikoa fa hanomboko taon̈o man̈araka. Ino antony? Amy zen̈y kalandrie io mifan̈araka amy fotoan̈a fambolian̈a na fijinjan̈a.

Fa taminy andrany Mosesy, Zan̈ahary nivolan̈a fa Abiba na Nisana fanjava voanalohany tamindro Israelita aby io. (Eks. 12:2; 13:4) Man̈odidin̈y Marsy ndreky Avrily izio. Nisy fety nataony Israelita tamy fanjava Nisana io, ke iro koa fa nan̈ano fankalazan̈a io, iro tsy maintsy nan̈amia voalohambokatrany vary orzy.​—Eks. 23:15, 16.

Nivolan̈a Emil Schürer, manampahaizan̈a momba tantara, fa “tsy sarotro foeky nahay lera karakory kalandrie io sosaohan̈a fanjava araiky.” Karaha ty ho izy amy boky nisoratiny, Tantarany Jiosy Taminy Andrany Jesosy Kristy, (175 T.K.–135 A.K.) amy teny angiley: “Isaka fanjava bory amy fanjava Nisana (14 Nisana) nan̈anaovan̈a fetiny Pasky. Tsy maintsy tafarany ekinôksy [mitovy fo halavasany andra ndreky alin̈y] tamy lohataon̈o izio natao. ... Izikoa fa hitandro Jiosy aby io fa mety ho latsaka alohany ekinôksy amy lohataon̈o fetiny Pasky io, direky iro nan̈aboaka didy fa ampian̈a fanjava [faha-13] alohany Nisana.”

Karaha zen̈y koa ataony Vavolombelon̈o Jehovah izikoa fa hizaha ombian̈a marin̈y tokony hankalazain̈y Sakafo Harivany Tômpo. Izio atao isaka 14 Nisana amy kalandrie hebreo. Lohataon̈o an Israely taminio. Efa hambara tsialohaloha amy fiangonan̈a jiaby erantany daty io. a

Akory fo basy nahaizandro Hebreo aby io fa tapitry fanjava avio nanomboko fanjava vaovao? Tsy sarotro amintsika foeky mahay zen̈y amy zioty, fotony atsika raha zisty mizaha kalandrie vita pirinty fo, na izy elektronìky. Fa taminy andrany Baiboly, raha zen̈y tsy nora!

Taminy andrany Noa, nisy 30 andra fanjava araiky. (Gen. 7:11, 24; 8:3, 4) Fa koa fa nandeha fotoan̈a, tsy voatery ho 30 andra fo fanjava araiky tamy kalandrie hebreo. Izikoa fa tondroen̈a fanjava, kadiriny 29 na 30 andra afarany nanombohany fanjava araiky talohanio, iro Hebreo aby io nanomboko nikônty fanjava vaovao.

Nisy fotoan̈a, Davida ndreky Jonatana nikoran̈a momba fanombohany fanjava. Ho iro: ‘Fanjava vaovao amaray.’ (1 Sam. 20:5, 18) Talohany taonjato faha-11 T.K., namandraha efa avoafaritry tsialohaloha ombian̈a mikomansy fanjava. Akory nahaizandro Israelita aby io raha zen̈y? Man̈azava momba zen̈y Mishnah, fitambarany lalàn̈a ndreky lovantsofin̈y jiosy. Koran̈inizio ao fa iro tamy Fitsaran̈a Avo Jiosy nan̈ambara raha zen̈y, tafarandro Jiosy aby io nody baka sesitany ta Babylony. Isaka le 30 amy fanjava, nivory fitsaran̈a io tan̈atiny fito fanjava nisiany fety. Iro namaritry ombian̈a hanomboko fanjava man̈araka. Akory nataondro?

Efa nasiandro olo pitily tamy tany an̈abo nan̈odidin̈y Jerosalema, ke asanolo io nandiniky lan̈itry taminy alin̈y. Izikoa fa hitandro indriô tondroen̈a fanjava, direkty iro nandefa hafatra malaky handeha tamy Fitsaran̈a Avo Jiosy. Dinihiny fitsaran̈a io porofo jiaby mankamarin̈y fa ten̈a niboaka marin̈y fanjava, iô iro vo nivolan̈a taminolo jiaby fa manomboko fanjava vaovao. Izikoa ndraiky sarotro tamindro pitily aby io nahita fanjava, fotony mety nisy rôndro matevin̈y  tamy lan̈itry na nisy zavon̈o, direkty iro nivolan̈a fa efa 30 andra fanjava nidiavindro io, ke nanomboko amarainizin̈y fanjava vaovao.

Akory fo basy nataony Fitsaran̈a Avo Jiosy io nan̈ambara taminolo fa nanomboko fanjava? Koran̈iny Mishnah fa nisy môtro nirihetin̈y tamy tendrony Bongo Olivy, marikitry Jerosalema. Nisy môtro nirihetin̈y koa tamy faritry an̈abo nan̈odidin̈y Israely, ke izio nindesin̈y nan̈ambaran̈a vaovao io. Fa izikoa fa nandeha fotoan̈a, iro nan̈iraka olo hitondra hafatra. Karaha zen̈y nahaizandro Jiosy ta Jerosalema avio tan Israely jiaby ndreky tantany hafa, ombian̈a nanomboko fanjava. Ke nitovy fo fotoan̈a nankalazandro fety, na taia na taia tany nisy iro.

Misy tablô ampiarasin̈y amy lahatsoratra ty, ke izio han̈ampy anao hahita ino ifandraisany fanjava hebreo ndreky fety aviô fizarany taon̈o tamy zen̈y.