1. Nan̈ino mahatsara atsika mikoran̈a aminolo fomba nahitantsika “fahamarin̈ana”?

 “AKORY nahitanao fahamarin̈ana?” Mety efa matetiky anao namaly fan̈ontanian̈a io. Miaraka atsika mitraotro voanalohany amy piaramanompo, efa io edy raha han̈ontaniandro atsika. Tiantsika ho hay fomba nahaizandro Jehovah ndreky nahavy iro ho tia izy. Karaha zen̈y koa, mba tiantsika ho haindro koa fa ten̈a ravoravo atsika nanjary an̈isany Vavolombelon̈o Jehovah. (Rom. 1:11) Izikoa fa mandeha koran̈a, manjary tsy adin̈antsika foeky fa fahamarin̈ana io ten̈a raha maventy amintsika. Mahaitapakevitry fo koa atsika ‘tsy hiala amy fahamarin̈ana’, ke hiezaka hanan̈a fomba fiain̈ana hahavy atsika hahazo fitahiany Jehovah ndreky hahazo sitraka aminany.​—3 Jaona 4.

2. Ino ma raha hidinihintsika ato?

² Hidinihintsika ato antony sasany nahavy atsika ho tia fahamarin̈ana. Kadô baka amy Jehovah izio, ke hizahavantsika koa fomba mety han̈aboahantsika fa ten̈a tiantsika izio. Hay be fa han̈ampy atsika hankasitraka Jehovah raha zen̈y, fotony izy nitaon̈o atsika amy fahamarin̈ana. (Jaona 6:44) Zen̈y koa hahavy atsika han̈iry mare hampianatra olo ny marin̈y amy Baiboly ao.

3. Ino antony maventy mahavy atsika tia fahamarin̈ana?

³ Maro antony nitiavantsika fahamarin̈ana. Fa ty ny ten̈a maventy amy jiaby: Tiantsika i Jehovah Zan̈ahary, Loharanony fahamarin̈ana io. Atsika koa fa nianatra Baiboly, nanjary haintsika fa Jehovah tsy raha farany mahery sady Pamôn̈oro lan̈itry ndreky tany fo fa, izy koa Babantsika be fitiavan̈a andan̈itry an̈y, fotony izy ten̈a mitady raha mahatsara atsika. (1 Pet. 5:7) Haintsika fa Zan̈aharintsika io “mamindra fô, mahay  mahinakinaka, tsy mora meloko, ten̈a be fitiavan̈a ndreky tsy mivadiky, sady ten̈a tia fahamarin̈ana.” (Eks. 34:6) Jehovah koa tia rariny. (Isaia 61:8) Malahelo izy mahita atsika mijaly, sady efa tsy din̈iny haviany fotoan̈a han̈adosoany raha jiaby mampijaly atsika. (Jer. 29:11) Zen̈y raha antin̈aintsika mare! Zen̈y antony araiky mahavy atsika tia Jehovah mare.

4-5. Nan̈ino ma fan̈antinan̈a anan̈antsika io nampitovisiny apostoly Paoly tamy vatofantsiky?

⁴ Ino koa antony hafa mahavy atsika tia fahamarin̈ana? Izio mahatsara atsika mare. Diniha baka ty: An̈isany fahamarin̈ana nianarantsika baka tamy Baiboly iziô fan̈antinan̈antsika momba ny hoavy. Baka ho tsapantsika karakory marin̈y valerany fan̈antinan̈antsika io, karaha ty nambarany apostoly Paoly: “Fan̈antinan̈a anan̈antsika zen̈y vatofantsikiny ain̈intsika. Izio salakady azo antoko ndreky miôrin̈y tsarabe.” (Heb. 6:19) Karaha ataony vatofantsiky miaro sambo araiky tsy hihetsiky, fan̈antinan̈antsika miôrin̈y amy Baiboly koa man̈ampy atsika ho kalma fo lera atsika mandalo raha sarotro.

⁵ Iô i Paoly mikoran̈a momba fan̈antinan̈andro Kristianin̈y voahosotro handeha andan̈itry an̈y. Ndray zen̈y, mety hampiharin̈y amy Kristianin̈y man̈anten̈a hiain̈y tsisy farany amy tany paradisa koa izio. (Jaona 3:16) Ho hisy dikany fiain̈anantsika izikoa mazava amintsika tsarabe raha jiaby mifôtotro fan̈antinan̈a fiain̈ana mandrakizay.

6-7. Ino hatsaran̈a nazony Yvonne, izy koa fa nahay ny marin̈y momba ny hoavy?

⁶ Diniha baka tantarany Ranabavy Yvonne. Izy tsy tombo tamy fahamarin̈ana; mbala hely izy efa navozo hofoaty. Nisy soratra navy nivakiany zay tsy mety nadin̈any. Karaha ty izio: “Andra araiky an̈y anao tsy hahita ny amaray eky.” Ho izy: “Tavela tan̈atiny jeriko volan̈a aby io, ke tsy tafandry foeky zaho nandiniky han̈ano akory ny amaray. Tsy mino foeky zaho fa efa karaha zen̈y fiain̈ana. Ke ho zaho tamy jeriko tan̈y ‘Nan̈ino fo basy zaho nisy?’ Zaho tsy tihofoaty!”

⁷ Yvonne koa fa nanjary tsaiky man̈angy, izy nifanôjy tamy Vavolombelon̈o Jehovah. Karaha ty nambarany: “Nanjary nino zaho fa zaho afaka hiain̈y mandrakizay amy Paradisa ambony tany.” Nahatsara ranabavy io ma fahaizany ny marin̈y zen̈y? Ho izy: “Iziô milamin̈y tsara toromasonaka; zaho efa tsy miasaloha eky momba ny hoavy avio zaho efa tsy mavozo hofoaty eky.” Hita be fa ten̈a tiany Yvonne fahamarin̈ana nianarany tamy Baiboly, ke ravoravo izy mikoran̈a aminolo momba fan̈antinan̈anany aminy hoavy.​—1 Tim. 4:16.

8-9. a) Lelahy tamy fan̈oharan̈a nataony Jesosy in̈y koa fa nahita harian̈a nasitriky in̈y, akory fahitany valeranizio? b) Akory fahitanao fahamarin̈ana nianaranao tamy Baiboly?

⁸ An̈isany fahamarin̈ana nianarantsika tamy Baiboly, vaovao tsara momba Fanjakan̈any Zan̈ahary. Nampitovisiny Jesosy taminy harian̈a nasitriky ny marin̈y momba Fanjakan̈a io. Karaha ty ho izy amy Matio 13:44 ao: “Fanjakan̈any lan̈itry io mira harian̈a nasitriky tamy vilo araiky, ke izio baka tiô hitanolo araiky avio nasitriny ndraiky koa. Ravoravo mare izy, ke lôso izy nandafo fanan̈ananany jiaby, baka io nivangainy vilo io.” Aleva onon̈o fa lelahy io tsy nitady harian̈a. Fa izy ndraiky koa fa nahita izio, izy nahafoe raha tsy saomasaoma baka izio ho azony. Nalafony zay raha nanan̈any. Nan̈ino? Fotony hainy fa valera ankitin̈y harian̈a hitany io. Izio mbala valera mandilatra raha nafoeny.

⁹ Asa karaha zen̈y koa fahitanao fahamarin̈ana io? Hay be fa zen̈y ankitin̈y! Haintsika fa, na ino na ino raha mety amezany donia ty atsika, tsisy dikany foeky raha aby zen̈y izikoa  ampiran̈iny aminy haravoan̈antsika manompo Jehovah amy zioty, ndreky fiain̈ana tsisy farany lera Fanjakan̈any Zan̈ahary mitondra. Ravoravo koa atsika fotony afaka mifandray tsara amy Jehovah. Ndray ino ndray ino raha mety hafoentsika, tsisy dikany foeky zen̈y izikoa ampitovisin̈y amy tombontsoa anan̈antsika io. Ny raha ten̈a mamparavoravo atsika, ‘han̈ano raha mamparavoravo izy amy lafiny jiaby.’​—Kol. 1:10.

10-11. Ino raha nandrisiky Michael han̈ova fomba fiain̈ananany?

¹⁰ Maro amintsika iziô nahafoe raha maventy fotony atsika tihahazo sitraka amy Jehovah. Sasany niala plasy an̈abo amy donia ty. Misy ndraiky vôly nan̈ano raha hazahoan̈a volabe. Misy koa olo nan̈ova fomba fiain̈anandro foeky izikoa fa nianatra momba Jehovah. Zen̈y iziô nataony Michael. Tsy nibiazin̈y tamy fahamarin̈ana rahalahy io. Mbala tanora izy, efa nampianarin̈y karaté. Karaha ty nambarany: “Niezaka zaho baka ho salama ndreky hatanjaka arabatan̈a. Ten̈a raha maventy taminaka raha zen̈y. Ke tsisy olo naharesy zaho tamy fotoan̈anizen̈y.” Kanefa, Michael koa fa nanomboko nianatra Baiboly, hainy fa halany Jehovah olo kafiry. (Sal. 11:5) Karaha ty nambarany Michael momba olo fivadiany nampianatra izy Baiboly: “Iro tsiary nivolan̈a taminaka ‘Voleza anao amy karaté io’, fa iro nifen̈y fo nampianatra zaho ny marin̈y amy Baiboly.”

¹¹ Izikoa fa nitombo raha hainy Michael momba Jehovah, nitomboko koa fitiavany Izy. Ten̈a nanohin̈y fônany nahay fa Jehovah mamindra fô amy panomponany. Tamy zen̈y, tsapany Michael fa nila niova izy. Ho izy: “Ten̈a nafy taminaka tsy han̈ano karaté. Kanefa, haiko fa zen̈y raha tokony hataoko beky Jehovah ravoravo. Resy lahatra zaho fa tsisy raha bebe mandilatra manompo Jehovah.” Nanjary ten̈a raha valera tamy Michael fahamarin̈ana hitany io, ke zen̈y nahavy izy vôn̈ono han̈ano fan̈ovoan̈a tamy fiain̈ananany.​—Jak. 1:25.

12-13. Karakory nan̈ampiany fahamarin̈ana amy Volan̈a Zan̈ahary i Mayli?

¹² Baka hazava amintsika tsarabe fa ten̈a valera marin̈y fahamarin̈ana io, ampitovisiny Baiboly amy jiro mazava aminy alin̈y izio. (Sal. 119:105; Efes. 5:8) Mipetraka a Azerbaïdjan i Mayli. Ten̈a valera taminany raha nianarany tamy Baiboly, fotony tsapany fa izio ten̈a nan̈ampy izy. Iro tran̈o araiky tsy nitovy finoan̈a. Babany baka Silamo, fa mamany ndraiky Jiosy. Ho izy: “Zaho mino fa misy Zan̈ahary. Kanefa maro fan̈ontanian̈a man̈itikitiky sain̈inaka. Ohatra, ‘Nan̈ino ma Zan̈ahary niasa olombelon̈o? Nan̈ino ma olo mijaly fo firaka iro maty, kanefa mbala hijaly tsisy farany amy môtrobe?’ Maro olo mivolan̈a fa raha jiaby zen̈y efa lahatra Zan̈ahary. Ke ho zaho tamy jeriko tan̈y ‘Dikanizen̈y, ataony Zan̈ahary raha hampisy problemo amy fiain̈anany zanakolombelon̈o, baka io izy ravoravo mahita iro mijaly?’ ”

¹³ Mayli tsy vôly nitady valiny fan̈ontanian̈anany. Koa fa nandeha fotoan̈a, izy nianatra Baiboly, avio izy nanjary Vavolombelon̈o Jehovah. Karaha ty ho izy: “Namparesy lahatra zaho raha nianarako tamy Baiboly, ke izioty niova fahitako fiain̈ana. Nanjary nilamin̈y jerinaka.” Karaha Mayli, atsika jiaby midera Jehovah, fotony ‘izy nikaiky atsika hiala baka tan̈atiny hiziky handeha aminy hazavan̈anany mahagaga.’​—1 Pet. 2:9.

14. Akory hahavy atsika ho tia fahamarin̈ana tsarabe? (Zahava “ Raha Hafa Mety Ampitovisin̈y amy Fahamarin̈ana amy Baiboly.”)

¹⁴ Hitantsika baka tamy tantara vitsivitsy in̈y fa ten̈a valera ankitin̈y fahamarin̈ana. Mety mbala mahita tantaranolo hafa  mankamarin̈y zen̈y koa anao. Ke nan̈ino izikoa ataonao fianaran̈a manokan̈a raha zen̈y? Izikoa anao man̈ano zen̈y, anao hahita antony hafa mahavy atsika tokony ho tia fahamarin̈ana. Arakarakany itiavantsika fahamarin̈ana hahavy atsika hahita fomba maro han̈aboahan̈a fa tiantsika marin̈y izio.

15. Ino fomba araiky ahitan̈a fa tiantsika fahamarin̈ana io?

¹⁵ Tia fahamarin̈ana atsika izikoa mianatra tsy tapaka Baiboly, baka io boky ndreky gazety aboakany fandaminan̈a. Sady, na efa ela nahitantsika fahamarin̈ana, mbala mila mianatra fo atsika. Karaha ty nambarany gazety Tilikambo Fiambesan̈a voanalohany niboaka: “Fahamarin̈ana io karaha folera hely araiky efa kalikaly saraon̈any ahidratsy van̈ono mare. Tsy ho hitanao folera io izikoa anao tsy mitsakaraka izio tsarabe. ... Mila miezaka anao baka hahita izio. Ary ndray efa hitanao izio, anao tsy tokony ho afapô fa tokony hitady folera hafa. Karaha zen̈y koa, atsika tsy tokony ho afapô amy raha araiky haintsika amy Baiboly ao, fa tokony hianatra raha hafa koa.” Tsy mandeha ho azy mianatra zen̈y, fa atsika tsy hanen̈iny izikoa mifen̈y fo.

16. Karakory ataonao izikoa fa mamaky Baiboly na mianatra manokan̈a? (Ohabolana 2:4-6)

 ¹⁶ Tsy atsika jiaby tia mamaky teny ndreky mianatra. Kanefa Jehovah man̈iraka atsika ‘hitady fo’ ndreky ‘tsy vôly hitsakaraka’, amy zen̈y ho haintsika tsara ny marin̈y amy Volan̈anany ao. (Vakia Ohabolana 2:4-6.) Hahita hatsaran̈a atsika izikoa miezaka man̈ano zen̈y. Nazoto namaky Baiboly i Corey. Isaka izy baka namaky andininy araiky, alainy onon̈o tsarabe raha tianizio hambara. Karaha ty ho izy: “Nivakiako aby andininy hafa mifandray amizio ndreky lamariky amy pazy ambany. Zaho baka io nan̈ano fikarohan̈a hafa. Nanjary maro raha haiko!” Asa anao mba man̈ano karaha zen̈y? Sa ino mahazatra anao? Na ino na ino ataontsika, ho hita fa mankasitraka fahamarin̈ana atsika, izikoa manokan̈a fotoan̈a ndreky angôvo hianaran̈a Baiboly.​—Sal. 1:1-3.

17. Karakory ma miain̈y mifan̈araka amy fahamarin̈ana zen̈y? (Jakoba 1:25)

¹⁷ Marin̈y ndraiky fa tsy ampy mianatra ny marin̈y amy Baiboly. Izikoa tiantsika hahazo hatsaran̈a baka amizio, mila iain̈antsika koa izio. Dikanizen̈y, mila arehantsika raha nianarantsika tao. Iô fahamarin̈ana io vo hitondra haravoan̈a amintsika. (Vakia Jakoba 1:25.) Akory azahoantsika antoko fa ten̈a manjary fomba fiain̈anantsika fahamarin̈ana io? Misy rahalahy araiky nivolan̈a fa tsara mandininten̈a, misy ahitantsika ino raha efa ataontsika avio ino raha mbala mila ankatsaraintsika. Momba zen̈y, karaha ty nambarany apostoly Paoly: “Na ino na ino fandrosoan̈a efa vitantsika, atsika mbala mila miezaka mandroso karaha zen̈y fo.”​—Fil. 3:16.

18. Ino mahavy atsika mifen̈y angôvo jiaby ‘tsy hiala amy fahamarin̈ana’?

¹⁸ Ino hatsaran̈a azontsika izikoa atsika mifen̈y angôvo jiaby ‘tsy hiala amy fahamarin̈ana’? Hahaiho tsara fo fiain̈anantsika, avio ho ravoravo amintsika Jehovah ndreky iro piaramanompo amintsika aby io. (Ohab. 27:11; 3 Jaona 4) Ke zen̈y ten̈a antony mahavy atsika tia fahamarin̈ana ndreky hiain̈y mifan̈araka amizio.