MIPETRAKA amy tanàna hely a Guatemala, i Marcelo ndreky Hiver avio Yomara anabavindro. Yomara antsendriky nianatra Baiboly tamy Vavolombelon̈o Jehovah. Fa baka tio niaraka nianatra taminany koa iro anadahiny aby io. Fa problemo fo, iro telo mianadahy samy gila. Iro koa tsy nahay namaky soratra braille. Ke olo nampianatra Baiboly iro fo mamaky fehintsoratra ndreky andininteny ianarandro.

Sarotro tamindro koa nan̈atriky fivorian̈a. Tsy vitandro manokan̈a baka nan̈ano dia 40 minity firaka avy tamy Tran̈o Fivorian̈a farany marikitry. Fa piaramanompo nan̈ampy iro hahavita han̈atriky fivorian̈a jiaby. Baka io, izikoa iro fa nanomboko nan̈ano anjara tamy fivorian̈a andavanandra, iro nampiandro rahalahy aby io han̈ano tsianjery anjarandro.

Tamy May 2019, nanomboko nisy fivorian̈a tamy tanàna nisy iro. Nisy olo fivadiany pisava lalan̈a koa nifindra tamindro tan̈y. Nataondro fivadiany io tanjon̈o hampianatra iro telo mianadahy hahay hamaky ndreky hanoratra braille. Kanefa iro fivadiany io tamy zen̈y mbala tsy nahay foeky akory atao man̈ano zen̈y. Ke iro nandeha tamy biblioteky nitady boky fianaran̈a soratra braille, baka hahaizandro karakory atao mampianatra izio olo.

Afaka fanjava vitsivitsy, nahay namaky soratra braille tsara iro telo mianadahy, ke loso nahainifandray tsarabe amy Jehovah. a Iro telo iziô samby pisava lalan̈a maharitry. Marcelo pikarakara fiangonan̈a. Iro ten̈a mazoto manompo, na andavanandra zen̈y na amy farany herin̈iandra, ke loso mafana fô karaha iro koa olo amy fiangonan̈a.

Iro telo mianadahy samby mankasitraka fitiavan̈a ndreky fan̈ampiany fiangonan̈a. Karaha ty nivolan̈iny Yomara: “Niaraka zahay nifanojy tamy Vavolombelon̈o Jehovah, efa naboakandro taminay fa zahay ten̈a tiandro.” Marcelo koa nivolan̈a: “Manan̈a naman̈a tsara zahay amy fiangonan̈anay. Avio zahay an̈isany fianakaviambe man̈erantany miray sain̈y ndreky mifankatia.” Efa tsy din̈indry Yomara ndreky anadahiny aby io hahita tany ty hanjary paradisa.​—Sal. 37:10, 11; Isaia 35:5.