1-2. Nan̈ino atsika man̈atriky Fahatsiarovan̈a isaka taon̈o?

 EFA ho 2 000 taon̈o loso zay, nisy raha nataony Jesosy baka atsika afaka hahazo fiain̈ana mandrakizay. Ino eky zen̈y? Izy nan̈amia ain̈inany han̈avotan̈a atsika. Taminy alin̈y talohany nifatesany, izy nan̈iraka pan̈aradia izy hahatsiaro soron̈o nataony io. Ke iro nirahiny han̈ano fankalazan̈a tsotsotra. Misy mofo ndreky divain ampiasain̈y amizio.​—1 Kor. 11:23-26.

² Man̈araka didiny Jesosy io atsika fotony tiantsika mare izy. (Jaona 14:15) Isaka taon̈o, amy vanimpotoan̈any Fahatsiarovan̈a, aboakantsika fa atsika mankasitraka mare raha nataony. Ke atsika mangala fotoan̈a mandiniky ndreky mivavaka momba hatsaran̈a azontsika baka tamy nifatesany. Mifen̈y koa atsika mampitombo fanompoan̈antsika, ke mikaiky olo farany maro hiaraka han̈atriky fotoan̈a miavaka io amintsika. Tapakevitry koa atsika fa tsisy raha ambelantsika hanakan̈a atsika tsy han̈aton̈o Fahatsiarovan̈a.

3. Ino raha hidinihintsika amy lahatsoratra ty?

³ Vahoakany Jehovah nifen̈y fo hankalaza Fahatsiarovan̈a nifatesany Jesosy. Ke amy lahatsoratra ty, atsika handiniky raha telo nataondro: 1) Man̈araka modely namiany Jesosy, 2) mikaiky olo han̈aton̈o Fahatsiarovan̈a, avio 3) mankalaza Fahatsiarovan̈a fo ndray iô raha sarotro.

4. Isaka taon̈o, ino aby fan̈ontanian̈a valian̈a lera Fahatsiarovan̈a, avio nan̈ino fahamarin̈ana aby zen̈y ten̈a valera amintsika? (Lioka 22:19, 20)

⁴ Isaka taon̈o, koa fa Fahatsiarovan̈a, atsika mitandren̈y kabaro baka amy Baiboly mamaly fan̈ontanian̈a maro. Ianarantsika ohatra, nan̈ino olombelon̈o mila avotan̈a ndreky  amy karakory fahafatesanolo araiky mavoaefa fahotan̈anolo maro. Ampatsiarovin̈y atsika koa ino dikany mofo ndreky divain io, avio azovy olo tokony hihina iro io. (Vakia Lioka 22:19, 20.) Amizio koa atsika misaintsain̈y iro hatsaran̈a ho azonolo man̈anten̈a hiain̈y mandrakizay ambony tany. (Isaia 35:5, 6; 65:17, 21-23) Ten̈a valera fahamarin̈ana aby zen̈y. Andrivony tapitrisa olo tsy mahay iro io, sady tsy mahay nan̈ino soron̈o nataony Jesosy ten̈a valera. Salakady iro tsy man̈araka modely namiany Jesosy momba fomba tokony hahatsiarovan̈a andra nifatesany. Nan̈ino atsika mivolan̈a zen̈y?

5. Karakory nataonolo nankalaza nifatesany Jesosy koa fa naty ankamarozany apostoly?

⁵ Tsy ela tafarany nifatesany ankamarozany apostoliny Jesosy, nisy Kristianin̈y sandoko niditry tamy fiangonan̈a. (Mat. 13:24-27, 37-39) Iro nampianatra “raha diso, hitaomandro pianatra aby io han̈araka iro.” (Asa. 20:29, 30) An̈isany “raha diso” nampianariny Kristianin̈y sandoko aby io iziô, tsy indraiky fo zen̈y Jesosy nan̈amia ain̈inany hitondrasan̈a fahotan̈anolo maro. Fa soron̈o io zen̈y mila ampodimpody. Kanefa tsy zen̈y raha koran̈iny Baiboly. (Heb. 9:27, 28) Maro olo mino fampianaran̈a diso zen̈y amy zioty. Ke isaka herin̈iandra, na ndraikindraiky aby isanandra foeky, iro mandeha leglizy mankalaza nifatesany Jesosy. Amy fivavahan̈a katoliky izio kahian̈a “Soron̈o Masin̈y.” b Fa olo amy fivavahan̈a sasany ndraiky tsy mankalaza izio matetiky be karaha zen̈y. Ndray izy man̈ano zen̈y, ankamarozany pivavaka amindro ao tsy ten̈a mahay dikany soron̈o nataony Jesosy io. Sasany amindro mety loso diniky tsao tsy mahavita mamafa fahotan̈andro aby soron̈o nataony Jesosy in̈y. Nan̈ino iro mieritreritry karaha zen̈y? Fotony misy olo mivolan̈a fa soron̈ony Jesosy in̈y zen̈y tsy afaka man̈adoso fahotan̈a, ke iro mino zen̈y. Kanefa ndray tio raha zen̈y, ten̈a pan̈aradia Jesosy nan̈ampy olo hahay dikany soron̈o nataony Jesosy ndreky ten̈a fomba fankalazan̈a izio. Tamy fomba akory?

6. Ino raha nanjary haindro pianatra Baiboly aby io taminy 1872?

⁶ Tamy faramparany taonjato faha-19, nisy pianatra Baiboly vitsivitsy nandiniky tsarabe raha ampianariny Soratra Masin̈y. Charles Taze Russell nitariky iro. Nan̈ano zen̈y iro fotony tiandro ho hay ino marin̈y ten̈a dikany soron̈o nataony Jesosy, ndreky akory ten̈a tokony hankalazan̈a nifatesany. Taminy 1872, loso haindro fa Jesosy nan̈amia ain̈inany han̈avotan̈a olombelon̈o jiaby. Raha zen̈y tsy nitanandro nindro fo, fa nambarandro olo. Ke raha nianarandro io naparitakandro tamy boky ndreky gazety isankarazany. Tsy ela tafaranizen̈y, iro nangala tahaka raha nataony Kristianin̈y tamy taonjato voanalohany, ke iro nanomboko nankalaza Fahatsiarovan̈a indraiky isaka taon̈o.

7. Ino aby hatsaran̈a azontsika baka tamy fikarohan̈a nataondro pianatra Baiboly taloha tan̈y?

⁷ Atsika amy zioty mahazo hatsaran̈a baka tamy raha nianarandro Kristianin̈y aby io tan̈aty taon̈o maro rôso. Nampiany Jehovah atsika ke nanjary haintsika dikany soron̈o nataony Jesosy. Avio loso haintsika iro hatsaran̈a ho azontsika ndreky olombelon̈o jiaby. (1 Jaona 2:1, 2) Nanjary haintsika koa fa Baiboly mikoran̈a karazan̈a fan̈antinan̈a aroe miambin̈y olo man̈ano raha mamparavoravo Zan̈ahary. Hisy olo vitsivitsy han̈anten̈a hiain̈y mandrakizay andan̈itry, fa  ho hisy olo antapitrisany hafa ndraiky hahazo fiain̈ana mandrakizay ambony tany. Loso mahaimarikitry Jehovah fo atsika arakarakany ahaizantsika habezany fitiavany atsika ndreky iro hatsaran̈a jiaby azontsika baka tamy soron̈o nataony Jesosy. (1 Pet. 3:18; 1 Jaona 4:9) Ke karaha nataondro piaramanompo amintsika tsy nivadiky taloha tan̈y, atsika mikaiky olo hiaraka amintsika hankalaza Fahatsiarovan̈a, eraka modely namiany Jesosy in̈y.

8. Ino raha nataony panompony Jehovah hikahian̈a olo han̈aton̈o Fahatsiarovan̈a? (Zahava sary.)

⁸ Efa taon̈otaon̈o vahoakany Jehovah nikaiky olo han̈aton̈o Fahatsiarovan̈a. Tamy taon̈o 1881, nisy filazan̈a nalefa tamy Tilikambo Fiambesan̈a hikahian̈a rahalahy ndreky ranabavy ta Etazonỳ, hiaraka hankalaza fotoan̈a maventy io, antran̈ony rahalahy araiky tan Allegheny, a Pennsylvanie. Tafara tatỳ, fiangonan̈a tsiaraikiaraiky samy nan̈ano Fahatsiarovan̈a. Tamy Marsy 1940, pitory nirahin̈y nikaiky zay olo lian̈a tamy faritanindro hankalaza izio miaraka amindro. Avio sambany taminy 1960, Betela nan̈aboaka invitasiony Fahatsiarovan̈a irasainy fiangonan̈a. Ke rango tamy zen̈y, efa andrivony tapitrisa invitasion nirasain̈y taminolo. Nan̈ino ma atsika mandany fotoan̈a ndreky angovo ikahian̈a olo han̈aton̈o Fahatsiarovan̈a?

9-10. Azovy aby mahazo hatsaran̈a izikoa atsika miezaka mikaiky olo han̈aton̈o Fahatsiarovan̈a? (Jaona 3:16)

⁹ Atsika mikaiky olo hankalaza Fahatsiarovan̈a miaraka amintsika, fotony tiantsika ho hainolo vo sambany man̈aton̈o izio ino raha nataony Jehovah ndreky Jesosy taminolombelon̈o jiaby. (Vakia Jaona 3:16.) Man̈anten̈a  atsika fa raha ren̈indro ndreky hitandro amy fotoan̈a io handrisiky iro han̈iry hianatra raha maro ndreky han̈iry hanompo Jehovah. Fa misy olo hafa koa mahazo hatsaran̈a baka aminy invitasion io.

¹⁰ Kahiantsika koa iro olo efa nijanon̈o tsy nanompo Jehovah eky fotony tiantsika tsapandro fa iro mbala tiany Zan̈ahary. Maro amindro io avy koa fa kahiantsika, ke ravoravo mare atsika mahita iro. Lera iro man̈atriky Fahatsiarovan̈a, mimpody an̈aty jerindro ndraiky haravoan̈a tsapandro taminiro mbala nanompo Jehovah. Karaha zen̈y iziô Monica. c Tamy valan̈aretin̈y COVID-19, izy nimpody nitory ndraiky. Izy koa fa baka nan̈aton̈o Fahatsiarovan̈a taminy 2021 in̈y, izy nivolan̈a karaha ty: “Ten̈a hitako niavaka mare Fahatsiarovan̈a in̈y. Tan̈atiny 20 taon̈o zay, sambany taminizin̈y zaho nahavita nitory ndreky nikaiky olo han̈aton̈o Fahatsiarovan̈a. Nan̈ano erakany vitako zaho, fotony zaho ten̈a mankasitraka raha nataony Jehovah ndreky Jesosy taminaka.” (Sal. 103:1-4) Ke na avy olo na tsy avy, ravoravo fo atsika mikaiky olo han̈aton̈o Fahatsiarovan̈a, fotony haintsika fa Jehovah mankasitraka mare ezaka ataontsika.

11. Akory nataony Jehovah nitahy ezaka nataontsika hikahian̈a olo han̈aton̈o Fahatsiarovan̈a? (Hagay 2:7)

¹¹ Jehovah ten̈a nitahy ezaka nataontsika. Fotony ndray tio sakantsakan̈a nohony valan̈aretin̈y COVID-19, taminy 2021, mbala nisy olo mandeha 21 367 603 navy nan̈aton̈o Fahatsiarovan̈a. Zen̈y efa indroe sy sasany aminy isany Vavolombelon̈o Jehovah jiaby erantany! Kanefa tsy hamarozanolo raha ten̈a maventy amy Jehovah, fa olo tsiaraikiaraiky nan̈aton̈o izio. (Lioka 15:7; 1 Tim. 2:3, 4) Atsika matoky fa izikoa atsika mikaiky olo, Jehovah man̈ampy atsika hahita olo manan̈a fô tsara.​—Vakia Hagay 2:7.

12. Ino aby raha mety hahavy atsika tsy ho afaka hankalaza Fahatsiarovan̈a? (Zahava sary.)

¹² Jesosy efa nivolan̈a fa aminy andra farany, atsika hiatriky raha sarotro isankarazany. An̈isanizen̈y, fanoherany fianakavian̈a, fan̈injehan̈a, ady, valan̈aretin̈y, ndreky raha maro hafa koa. (Mat. 10:36; Mar. 13:9; Lioka 21:10, 11) Ndraikindraiky, nohony raha aby zen̈y, loso sarotro amintsika hankalaza Fahatsiarovan̈a nifatesany Jesosy. Akory nahavitandro rahalahy ndreky ranabavintsika aby io niatriky problemo karaha zen̈y? Avio akory fomba nan̈ampiany Jehovah iro?

13. Artem ndray nigadra mbala tapakevitry han̈ano Fahatsiarovan̈a fo. Akory nitahiany Jehovah ezakanany?

¹³ Gadrain̈a. Mitady fomba hankalazan̈a Fahatsiarovan̈a fo piaramanompo amintsika aby io ndray migadra nohony finoan̈andro. Karaha zen̈y iziô Artem. Nigadra izy tan̈atiny vanimpotoan̈any Fahatsiarovan̈a, taminy 2020 in̈y. Izy nafody niaraka tamy gadra dimy tamy toeran̈a maletry be. Efatra metara mahery hely fo andavany ndreky ampohonizio. Fa ndray izy nigadra, izy mbala nahita mofo ndreky divain han̈anaovan̈a Fahatsiarovan̈a. Nioman̈a han̈ano kabarony Fahatsiarovan̈a koa izy, amy zen̈y izy tsy very tombontsoa. Fa problemo fo, iro olo niaraka nigadra taminany aby io nisesitry avio niasa nan̈asaha fo. Akory nataony rahalahy io? Niangaviany iro tsy hisesitry ndreky tsy han̈asaha an̈atiny lera araiky fo. Ino raha niboaka? Tsy nampoiziny Artem fa iro nan̈eky. Hoizy: “Iro nan̈ontaniako tsao iro mety hikoran̈ako raha momba Fahatsiarovan̈a.” Fa ndray iro nivolan̈a fa iro tsy tihitandren̈y raha momba izio,  iro nan̈ontany izy raha momba Fahatsiarovan̈a izikoa fa hitandro ndreky ren̈indro raha nataony Artem tamy fankalazan̈a io.

14. Akory nataony vahoakany Jehovah nankalaza Fahatsiarovan̈a ndray tio valan̈aretin̈y COVID-19?

¹⁴ Valan̈aretin̈y COVID-19. Koa fa niparitaka valan̈aretin̈y io, vahoakany Jehovah tsy afaka niaraka nankalaza Fahatsiarovan̈a mivantan̈a. Fa raha zen̈y tsy nanakan̈a iro tsy han̈ano fankalazan̈a io. d Akory nataondro? Lan̈iany fiangonan̈a afaka nampiasa Internet nan̈ano Fahatsiarovan̈a tamy vidéoconférence. Fa akory ndraiky olo antapitrisany tsisy Internet? Tamy firenena sasany, nataony birony sampan̈a fomba handifasan̈a kabarony Fahatsiarovan̈a io tamy tele na radio. Nan̈ano raha hafa koa iro baka ho afaka han̈ano Fahatsiarovan̈a fo firaka aminolo tamy faritry mitokan̈a mare. Kabaro io nalaindro feo tamy volan̈a mandilatra 500, avio nisy rahalahy nirahin̈y nizara izio tamy lan̈iany olo nila zen̈y.

15. Ino raha ianaranao baka aminy ohatrany Sue?

¹⁵ Fanoherany fianakavian̈a. Io sakan̈a araiky maventy mahavy olo sasany tsy afaka  han̈atriky Fahatsiarovan̈a. Karaha zen̈y iziô pianatra Baiboly araiky kahian̈a Sue. Taminy 2021, andra araiky talohany Fahatsiarovan̈a, Sue nivolan̈a taminolo mampianatra Baiboly izy fa mety tsy ho afaka han̈atriky Fahatsiarovan̈a fotony manohitry izy mare fianakavian̈anany. Nivakiny ranabavy io taminany Lioka 22:44. Baka io izy nan̈azava fa lera atsika tojy raha sarotro, atsika mila man̈araka modeliny Jesosy, ke mivavaka amy Jehovah ndreky matoky Izy amy fô jiaby. Amarainizin̈y, nataony Sue pare tsara mofo ndreky divainy Fahatsiarovan̈a, avio izy nizaha Fotoampivavahan̈a Maraindrain̈y manokan̈a tamy jw.org. Taminy alin̈izio, lera izy nitokan̈a tamy tran̈o fandriany tan̈y, izy nitandren̈y Fahatsiarovan̈a tamy telefoninany. Kiakanandranizin̈y, Sue nanoratra taminolo papianatra Baiboly izy karaha ty: “Ten̈a nankahery zaho raha nivolan̈inao nomoaly, ke zaho nan̈ano erakany vitako han̈aton̈ana Fahatsiarovan̈a. Jehovah ten̈a nan̈ampy zaho. Tsy haiko volan̈iny foeky haravoan̈anaka. Zaho ten̈a mankasitraka Jehovah!” Afaka man̈ampy anao koa ma Jehovah izikoa anao tojy raha miramira amy zen̈y?

16. Nan̈ino atsika matoky fa Jehovah hitahy ezaka ataontsika han̈aton̈ana Fahatsiarovan̈a? (Romanina 8:31, 32)

¹⁶ Ten̈a ankasitrahiny Jehovah ezaka ataontsika hankalazan̈a Fahatsiarovan̈a nifatesany Jesosy. Afaka matoky atsika fa izy hitahy atsika izikoa aboakantsika fa ankasitrahintsika raha nataony tamintsika. (Vakia Romanina 8:31, 32.) Ke irarian̈a atsika ho tapakevitry han̈aton̈o Fahatsiarovan̈a amy taon̈o ty, avio hifen̈y mare hampitombo fanompoan̈antsika amy vanimpotoan̈any Fahatsiarovan̈a.