Enoka Niaraka Nandeha Tamy Zan̈ahary Fo Ndray Ratsy Fan̈ahy Olo Tamy Zen̈y

MITEFATANY Devoly mivolan̈a fa izy zen̈y mahavita mitaon̈o olo jiaby tsy hanompo Zan̈ahary. Ndrainkindraiky karaha mahomby marin̈y izy. Kadirin’ny diman-jato taon̈o tafaran’ny nifatesan’i Abela, tsisy ndray olo araiky mba nan̈aboaka tsarabe fa izy mpanompon’i Jehovah tsy mivadiky. Fitondran-ten̈a ratsy zen̈y baka efa nanjary fomba fiain̈anan’olo foeky.

Tan̈atin’ny fotoan̈a nanjakan’ny raha ratsy be zen̈y Enoka teraka, dikan’izen̈y tamy taon̈o 3404 T. K., izikoa Baiboly zahan̈a. Enoka lelahy nankasitrahan’ny Zan̈ahary, fa tsy karaha zen̈y ndraiky olo tamin’ny andranany. Apostoly Paoly nitanisa Enoka an̈isan’ny mpanompon’i Jehovah fatatra finoan̈a ke modely amy Kristianin̈y. Azôvy ma Enoka? Ino aby raha sarotro natrefiny? Karakôry nataony niatriky raha aby zen̈y? Nan̈ino ten̈a raha maventy amintsika tsy fivadihan̈anany?

Tamin’ny andran’ny Enosa, kadiriny 400 taon̈o talohan’ny nahatirahan’i Enoka, olo vo ‘nanomboko nikaiky an̈aran̈an’i Jehovah.’ (Genesisy 4:26) Fa ny raha nisy, efa nampiasain’olo fo an̈aran̈an’ny Zan̈ahary rango nisian’olombelon̈o. Ke dikan’izen̈y, fikahian̈a an̈aran̈an’i Jehovah tsy tamy finoan̈a ndreky tsy tamy fivavahan̈a madio izy nanomboko tamin’ny andran’i Enosa io. Misy manampahaizan̈a hebreo nivolan̈a fa tôkony karaha ty amakian̈a Genesisy 4:26 io: “Nanomboko tsy nan̈isian̈a fôtiny” na “nanomboko tsy nan̈isy fôtiny.” Tamy zen̈y mety naro olo nan̈ano ain̈indrô Jehovah, na nan̈apetaka an̈aran̈a io tamin’olo niritriretindrô fa nan̈elan̈elan̈a irô tamy Zan̈ahary, lera irô nivavaka. Mety nataondrô an̈aran̈an’ny sampindrô koa izio.

‘Niaraka Nandeha tamin’ny Zan̈ahary i Enoka’

Maro tsy manjary olo nan̈odidin̈y Enoka, fa ndray zen̈y izy nifen̈y fo ‘niaraka nandeha tamin’ny araiky ten̈a Zan̈ahary’, Jehovah. Fa iry Seta, Enosa, Kenana, Mahalalila ndreky Jareda razambenany tsy voakoran̈a niaraka nandeha tamy Zan̈ahary. Na koa mety tsy niran̈a tamy fomba nan̈aboahandrô nindrô nan̈anaovany ninany. Hafa tamy nindrô baka fomba fiain̈anan’i Enoka.​—Genesisy 5:3-27.

Olo miaraka mandeha amy Zan̈ahary zen̈y tsy maintsy mahay izy ndreky mifandray marikitry aminany. Tsy nahavita zen̈y Enoka izikoa tsy nan̈ano sitrapôn’ny Zan̈ahary. Izy tsy niala tamy Jehovah foeky ke nankasitrahiny mare. Fandikan-teny grikan’ny Fitopolo mivolan̈a fa ‘nankasitrahan’ny Zan̈ahary mare i Enoka.’ Karaha zen̈y koa nambaran’ny apostoly Paoly.​—Genesisy 5:22; Hebreo 11:5.

Finoan̈an’i Enoka ny ten̈a nahavy izy nifandray marikitry tamy Jehovah. Azontsika antoko fa naboakany tamy raha nataony fa izy nino fampan̈antinan̈an’ny Zan̈ahary momba ‘taranakan’ny man̈angy.’ Izikoa Enoka efa navy nifandray tamin’i Adama, hay be fa mety hainy hely koran̈a nataon’ny Zan̈ahary tamin’i Adama ndreky Eva ta Edena. Fahaizan’i Enoka raha momba Jehovah nahavy izy ‘nazoto nitady izy mare.’​—Genesisy 3:15; Hebreo 11:6, 13.

Tsy fahaizan̈a Zan̈ahary zaraiky fo raha nilain’i Enoka na ilaintsika baka atsika hindrandray marikitry amy Zan̈ahary. Izikoa atsika tia olo araiky, fomba fihevitrinan’olo io hisy vokany amin’ny eritreritrintsika ndreky raha ataontsika. Tsy zen̈y fo, mifen̈y koa atsika tsy hivolan̈a na han̈ano raha mety handrobaka fifandraisan̈antsika aminany. Aviô, izikoa atsika mieritreritry han̈ova fiainan̈antsika, atsika tsy maintsy mandiniky fiantraikan’izen̈y aminarô aroe.

Izikoa atsika tihifandray marikitry amy Zan̈ahary fo, atsika lôso mitandrin̈y amy raha ataontsika. Tsy maintsy ataontsika hay koa raha tiany ndreky tsy tiany. Fahaizantsika raha tiany ndreky tsy tiany han̈ampy atsika han̈ano raha mamparavoravo izy amy raha iritriretintsika ndreky raha ataontsika.

Ke izikoa atsika tihiaraka handeha aminany, atsika tsy maintsy man̈ano raha mamparavoravo izy. Zen̈y ziô raha nataon’i Enoka tan̈atin’ny anjatony taon̈o. Volan̈a hebreo “nandeha” io man̈ambara fan̈anaovan̈a raha mitohy ndreky mimpodimpody. Nisy lelahy tsy nivadiky hafa koa ‘niaraka nandeha tamy Zan̈ahary’, tsy azôvy zen̈y fa Noa.​—Genesisy 6:9.

Enoka nanan̈a vady sady ‘niteraka lelahy ndreky man̈angy maro’, an̈isan’izen̈y Metosela. (Genesisy 5:21, 22) Azo antoko fa nifen̈y eraka ny vitany izy nitondra fianakavian̈anany amy fomba tsara. Feno olo ratsy fan̈ahy nan̈odidin̈y irô, ke mety tsy nora taminany nanompo Zan̈ahary. Mety Lameka baban’i Noa zaraiky fo mba olo nanompo Jehovah tamy fotoan̈a zen̈y. (Genesisy 5:28, 29) Fa ndray zen̈y Enoka tsy navozo nan̈araka fivavahan̈a marin̈y.

Ino raha nan̈ampy Enoka tsy hivadiky amy Zan̈ahary? Azontsika antoka fa izy tsy nihôsihôsy tamin’olo tsy nan̈isy fôtony an̈aran̈an’i Jehovah sady tsy nikamarady tamin’olo tsy nanompo Jehovah. Tsy zen̈y fo, Enoka nivavaka tamin’i Jehovah nangataka fan̈ampian̈a, ke raha zen̈y mety nahavy izy nahaitapa-kevitry tsy han̈ano raha tsy tian’ny Mpamôron̈o izy.

Faminanian̈a momba irô olo ratsy fan̈ahy aby io

Tsy mora mifen̈y ho tsara fitondran-ten̈a fo izikoa feno olo ratsy fan̈ahy man̈odidin̈y atsika. Fa ndray tiô raha karaha zen̈y, Enoka mbala nahavita nan̈ambara hafatra mahery nan̈ameloko olo ratsy fan̈ahy. Fan̈ahy masin̈y nitariky izy, ke izy naminan̈y karaha ty: ‘Efa avy Jehovah miaraka amin’ny anjelinany mandeha folo arivo ampitombosin̈y folo arivo, hitsara olo jiaby ndreky han̈asazy lan̈ian’olo tsy mavozo Zan̈ahary. Hisazin’ny Zan̈ahary irô mpanota aby io nohon’ny raha tsy manjary jiaby nataondrô ndreky volan̈a fankaratsian̈a jiaby nivolan̈indrô.’​—Joda 14, 15.

Karakôry nataondrô tsy mpino mierin̈olo aby io koa fa naharen̈y zen̈y? Hay be fa halan’olo mare izy fôtony izy nivolan̈a hafatra mahery io, ke izy mety nadroedroendrô ndreky nirahon̈indrô. Mety nisy olo tihamono izy foeky! Fa izy tsy navozo. Hain’i Enoka raha nahazo Abela olo marin̈y. Izy vôn̈ono hanompo Zan̈ahary karaha nataon’i Abela, ndray ino ndray ino raha hahazo izy.

‘Nalain’ny Zan̈ahary izy’

Mety efa tseky hivonen’olo Enoka tamin’izy ‘nalain’ny Zan̈ahary.’ (Genesisy 5:24) Jehovah tsy mety han̈ambela mpanomponany tsy mivadiky hampijalian’ny fahavalo rômotro. Apostoly Paoly nivolan̈a fa “Enoka nafindra toeran̈a baka tsy hahita fahafatesan̈a.” (Hebreo 11:5) Maro olo mivolan̈a fa Enoka tsy naty fa nalain’ny Zan̈ahary aminany an-dan̈itry an̈y, ke izy zen̈y mbala velon̈o an̈y. Kanefa mazava raha nivolan̈in’i Jesosy: “Tsisy olo nanonga tan-dan̈itry tan̈y izikoa tsy araiky nijotso baka tan̈y, tsy azovy zen̈y fa Zanakolo.” Dikan’izen̈y Jesosy ‘mpitari-dalan̈a’ olo jiaby handeha an-dan̈itry.​—Jaona 3:13; Hebreo 6:19, 20.

Ke aia zen̈y Enoka? Mety karaha ty dikany volan̈a “Enoka nafindra toeran̈a baka tsy hahita fahafatesan̈a”: Nataon’ny Zan̈ahary varian̈a nizaha fahitan̈a momba faminanian̈a araiky izy, aviô nadoson’ny Zan̈ahary fahin̈ananany. “Tsy hita foeky tany nisy izy” fôtony fatinany nasitriky Zan̈ahary, karaha nataony tamy fatin’i Mosesy.​—Deoteronomia 34:5, 6.

Enoka velon̈o tan̈atin’ny 365 taon̈o, fa tsy ela zen̈y izikoa ampiran̈iny tamin’ny taon̈on’ny ankamarozan’olo tamy zen̈y. Fa mivadiky amy Zan̈ahary mandra-pahafaty raha ten̈a matomboko amin’olo tia Jehovah. Tsy hisalasalan̈a fa zen̈y ankitin̈y nataon’i Enoka, fôtony “talohan’izy nafindra, nambara izy fa izy nahazo sitraka tamy Zan̈ahary.” Soratra Masin̈y tsy mikoran̈a fomba nivolan̈an’ny Zan̈ahary raha zen̈y tamin’i Enoka. Fa ny raha haintsika fo, talohan’izy naty, izy nahazo toky tamy Zan̈ahary fa izy nankasitrahany. Ke azontsika antoko fa ho tsaroan’i Jehovah izy koa fa avy lera ananganan̈a olo maty.

Aleva tahaka finoan̈an’i Enoka

Vain̈y alain̈a tahaka finoan̈an’olo tsy mivadiky amy Zan̈ahary. (Hebreo 13:7) An̈isan’izen̈y niny Enoka. Fatatra finoan̈an’ny mpaminan̈in’i Jehovah tsy mivadiky voanalohany io. Olo tamin’ny andran’i Enoka kafiry, tsy man̈isy fôtony Zan̈ahary sady ratsy fan̈ahy, karaha olo amin’iziô fo. Fa Enoka tsy nan̈araka raha nataondrô. Finoan̈anany fatatra fo ke izy môdely amy tsy fivadihan̈a amy Zan̈ahary. Izy nirahin’i Jehovah nan̈ambara hafatra mahery salady man̈ameloko. Fa Enoka tsy nambelan’i Jehovah karaha io fo fa namezany angôvo nahavitany nan̈ambara hafatra io. Enoka nisikiny korazy nan̈ano raha nirahin̈y nataony, ke Zan̈ahary niaro izy tamy fan̈oheran̈a nataony fahavalonany.

Izikoa atsika mifen̈y man̈aboaka finoan̈a karaha nataon’i Enoka, atsika hamezan’i Jehovah angôvo hahavitantsika man̈ambara hafatranany amin’ny andra farany iziôty. Atsika hampiany hanan̈a korazy hiaritry fanoheran̈a. Izikoa atsika mifen̈y mare tsy mivadiky aminany, ho hita fa atsika tsy miran̈a amin’olo ratsy fan̈ahy aby io. Finoan̈a han̈ampy atsika hahavita hiaraka handeha amy Zan̈ahary ndreky hanan̈a fitondran-ten̈a mamparavoravo fônany. (Ohabolana 27:11) Finoan̈a nahavitan’i Enoka, lelahy marin̈y, niaraka nandeha tamy Jehovah ndray ratsy fan̈ahy olo nan̈odidin̈y izy. Afaka man̈ano karaha izy koa atsika.

[Efajoro]

Baiboly ma Nangala Volan̈a Baka Tamy Bokin’i Enoka?

Bokin’i Enoka tsy boky nazo baka tamy tsindrimandrin’ny Zan̈ahary sady tsy an̈isan’ny Baiboly. Tsy Enoka nanoratra boky io. Mety tamy taonjato voanalohany na faharoe talohan’i Jesosy nanoratan̈a izio. Boky io fitamban’ny angano nitarin̈y, nanosaohan̈a tantara fôhiky momba Enoka amy Genesisy. Ndray zen̈y fo efa ampy hahavy olo tia Volan̈a Zan̈ahary tsy hamaky boky io.

Bokin’i Joda zaraiky fo misy faminanian̈a nambaran’i Enoka ty, amy Baiboly ao: ‘Efa avy Jehovah miaraka amin’ny anjelinany ampolony arivo, hitsara olo jiaby ndreky han̈asazy lan̈ian’olo tsy mavozo Zan̈ahary. Hisazin’ny Zan̈ahary irô mpanota aby io nohon’ny raha tsy manjary jiaby nataondrô ndreky volan̈a fankaratsian̈a jiaby nivolan̈indrô.’ (Joda 14, 15) Maro manam-pahaizan̈a man̈izingizin̈y fa faminanian̈an’i Enoka momba olo ratsy fan̈ahy tamin’ny andranany io zen̈y nalain̈a direkty baka tamy bokin’i Enoka. Mba pôsibla ndraiky Joda nangala volan̈a baka tamy boky tsy baka amy Zan̈ahary sady tsy mety atokisan̈a?

Baiboly tsy mikoran̈a fomba nahazahoan’i Joda faminanian̈an’i Enoka. Mety volan̈a nahazatra olo tamin’ny andran’i Joda izio na koa lovantsofin̈y mafatoky niampitampita rango taloha be tan̈y, ke nisoratiny. Karaha zen̈y koa baka nahaizan’i Paoly fa Jana ndreky Jambra an̈aran̈an’ny moasy tsy hay an̈aran̈a nanohitry Mosesy tamy lapan’ny Farao in̈y. Izikoa mpanoratra bokin’i Enoka afaka nizaha loharanon-kevitry karaha zen̈y, Joda tsy mba afaka nan̈ano karaha zen̈y koa? a​—Eksodosy 7:11, 22; 2 Timoty 3:8.

Tsy ten̈a ilain̈a mahay fomba nazahoan’i Joda hafatran’i Enoka handeha amy ratsy fan̈ahy. Azo atokisan̈a raha nivolan̈iny fôtony baka tamy fan̈ahy masin̈in’ny Zan̈ahary nahavitany nanoratra boky io. (2 Timoty 3:16) Ke fan̈ahy masin̈in’ny Zan̈ahary tsy maintsy nanakana izy tsy hivolan̈a raha tsy marin̈y.

[Lamariky amy pazy ambany]

[Sary]

Enoka nisikiny korazy nivolan̈a hafatra baka tamy Jehovah