Ino Leson Azonao Baka amy Fahagagan̈a Nataony Jesosy?

METY ho gaga anao mahay fa volan̈a griky ivolan̈ana “fahagagan̈a” io tsy hita an̈atiny tantarampiain̈any Jesosy amy Baiboly ao foeky. Volan̈a griky (dyʹna·mis) ndraikindraiky adika “fahagagan̈a” io izikoa adika arabakiteny, dikany “angovo.” (Lioka 8:46) Izio koa mety adika “fahaizan̈a.” (Matio 25:15) Misy manampahaizan̈a mivolan̈a fa volan̈a griky io “man̈asongadin̈y asa maventy araiky natao, sirto angovo nan̈anaovan̈a izio. Baka amy volan̈a io ahitan̈a raha vitany angovony Zan̈ahary.”

Misy volan̈a griky araiky hafa (teʹras) adika matetiky “raha mivolandraha ho avy.” (Jaona 4:48; Asan’ny Apostoly 2:19) Izio man̈asongadin̈y vokany amy pizaha. Matetiky baka vahoaka ndreky pianatra Jesosy aby io lany fan̈ahy izikoa fa nahita raha mahagaga vitany Jesosy.​—Marka 2:12; 4:41; 6:51; Lioka 9:43.

Volan̈a griky fahatelo (se·meiʹon) ivolan̈ana fahagagan̈a nataony Jesosy ndraiky, dikany “famantaran̈a.” Manampahaizan̈a araiky, Robert Deffinbaugh nivolan̈a fa izio “mifantoko aminy hevitry lalin̈y fon̈osiny fahagagan̈a io.” “Famantaran̈a” zen̈y ho izy, “fahagagan̈a man̈ambara ny marin̈y momba Jesosy Tompo.”

Fitaka sa angovo baka amy Zan̈ahary?

Baiboly tsy mivolan̈a fa fahagagan̈a nataony Jesosy aby io fitaka na afitsian̈a indesin̈y hamparavoravo olo. Iro io man̈aboaka “angovo mahery anan̈any Zan̈ahary”, karaha tamy Jesosy nandroaka demony tamy tsaiky lelahy araiky in̈y. (Lioka 9:37-43) Azo antoko fa vitany Zan̈ahary Farany An̈abo sady matanjaka be io, man̈ano raha karaha zen̈y, sa karakory?​—Isaia 40:26.

Filazantsara aby io mitantara fahagagan̈a kadiriny 35 nataony Jesosy. Ndray zen̈y, tsy nambara ao firy fahagagan̈a jiaby nataony. Ohatra, Matio 14:14, mivolan̈a: “[Jesosy] nahita olo maro oe. Izy nahinakinaka iro, ke nampahivan̈a lan̈iany olo narary.” Tsy nambara iô firy olo marary nitahany Jesosy taminio.

Ten̈a nilainy Jesosy nan̈ano fahagagan̈a aby in̈y, han̈aporofoan̈a fa izy ankitin̈y Zanaka Zan̈ahary salakady Mesia araiky nampan̈antinain̈y in̈y. Baiboly lastio efa man̈ambara fa baka taminy angovo namezany Zan̈ahary izy, nahavitany Jesosy nan̈ano fahagagan̈a. Apostoly Petera nivolan̈a fa Jesosy io “lelahy naboakany Zan̈ahary tsarabe taminaro, taminy alalany asa maventy maro ndreky fahagagan̈a ndreky famantaran̈a. Zan̈ahary nampiasa izy nan̈ano zen̈y taminaro. Hainaro tsarabe raha zen̈y.” (Asan’ny Apostoly 2:22) Tandraraiky zay koa izy nivolan̈a fa ‘Jesosy namezany Zan̈ahary fan̈ahy masin̈y ndreky angovo. Ke izy nitety toeran̈a jiaby mba han̈ano ny tsara aminolo ndreky hampahivan̈a lan̈iany nampijaliny Devoly, fotony Zan̈ahary niaraka taminany.’​—Asan’ny Apostoly 10:37, 38.

Isaka Jesosy nan̈ano fahagagan̈a, izy nampianatra koa. Hitantsika amy Marka 1:21-27 ao fihetsikindro vahoaka aby io, izikoa fa naharen̈y fampianarany Jesosy ndreky nahita fahagagan̈a nataony. Marka 1:22 mivolan̈a fa ‘vahoaka aby io lany fan̈ahy tamy fomba fampianarany.’ Avio aminy andininy 27 koa mivolan̈a fa iro “gaga” nahita izy nandroaka demony. Fahagagan̈a nataony Jesosy ndreky fampianaran̈anany io samby man̈aporofo fa izy ankitin̈y Mesia nampan̈antinain̈y in̈y.

Jesosy tsy vitany nivolan̈a izy Mesia fo, fa ankoatrany raha nivolan̈iny ndreky raha nataony, hita tamy fahagagan̈a nataony aby in̈y koa angovony Zan̈ahary. Ke izio ten̈a nan̈aporofo fa izy ankitin̈y Mesia. Izikoa fa nisy olo nisalasala momba fahifan̈a nanan̈any, Jesosy nasaky namaly karaha ty: “Fa zaho manan̈a porofo maventy mandilatra porofo namiany Jaona, fotony zaho man̈ano asa nan̈irahany Babako zaho. Iro asa ataoko aby io man̈ambara fa iraka Babako ankitin̈y zaho.”​—Jaona 5:36.

Porofo fa ten̈a nisy fahagagan̈a nataony Jesosy

Nan̈ino atsika matoky fa ten̈a nisy ankitin̈y fahagagan̈a nataony Jesosy aby in̈y? Ty misy porofo vitsivitsy.

Jesosy tsiary nisariky sain̈inolo taminany, izy koa fa nan̈ano fahagagan̈a. Nalainy antoko fa Zan̈ahary fo mahazo dera ndreky voninahitry baka tamizio. Ohatra, talohanizy nampahivan̈a lelahy jamba araiky zay, nankamafisiny Jesosy fa antony han̈anaovany izio “mba han̈aboahan̈a baka aminany, asany Zan̈ahary.”​—Jaona 9:1-3; 11:1-4.

Jesosy tsy karaha iro pan̈ano mazỳ ndreky iro pan̈ano fan̈asitran̈ana aminandra zioty io. Izy baka tsiary nampiasa hypnôtisma, fitaka, volan̈a fampiasanolo pan̈ano mazỳ, fombafomba mampihetsipô, avio tsy naresaka foeky. Izy koa tsy nampiasa finoanoampoan̈a na nampiasa raha hiverin̈y fa masin̈y zen̈y. Tsotra fo raha nataony Jesosy, izy koa fa nampahivan̈a lelahy jamba aroe zay. Tantara amy Matio 20:29-34 mivolan̈a fa Jesosy “nahinakinaka iro mare ke nikasihiny masondro. Tio fo nimpody nahita ndraiky iro, ke iro nan̈araka izy.” Izy tsy nan̈ano fombafomba na raha misariky masonolo. Jesosy izikoa fa nan̈ano fahagagan̈a, nataony hitanolo fo. Matetiky aby maro olo nahita izy nan̈ano izio. Fa izy tsy nanonga tan̈abony sehatra sady tsy nampiasa jiro manokan̈a nan̈azava izy. Fa amy zioty koa misy olo mivolan̈a fa mahavita man̈ano fahagagan̈a, kanefa iro tsy manan̈a porofo aby.​—Marka 5:24-29; Lioka 7:11-15.

Ndraikindraiky, hitany Jesosy fa nanampinoan̈a ankitin̈y iro olo nahazo hatsaran̈a tamy fahagagan̈a nataony aby io. Fa nata olo aby io tsy nanampinoan̈a, zen̈y tsy nisakan̈a izy tsy hahavita fahagagan̈a. Ohatra, taminizy ta Kapernaomy, “nindesinolo taminany tio olo maro nisy demony. Volan̈a araiky fo nataony, direkty niboaka fan̈ahy ratsy io. Izy koa nampahivan̈a olo jiaby narary.”​—Matio 8:16.

Fahagagan̈a nataony Jesosy aby io natao han̈amezan̈a raha ten̈a ilainolo, fa tsy natao han̈amezan̈a fahafahampô olo tia raha. (Marka 10:46-52; Lioka 23:8) Sady Jesosy tsiary nan̈ano fahagagan̈a baka azahoany tombony zen̈y.​—Matio 4:2-4; 10:8.

Mety atokisan̈a ma tantara an̈atiny Filazantsara?

An̈atiny Filazantsara efatra aby io ahitantsika iro fahagagan̈a aby nataony Jesosy. Izio ma misy porofo ahaizan̈a asa raha koran̈indro io mety atokisan̈a ankitin̈y? Ia misy.

Karaha efa hitantsika tio, maro olo nahita iro fahagagan̈a nataony Jesosy aby in̈y. Ankamaraozanolo aby io mbala velon̈o tamy fotoan̈a nanomboko nanoratan̈a Filazantsara. Boky Fahagagan̈a Ndreky Familoman̈a Olo Maty (angiley) mivolan̈a fa ten̈a marin̈y ankitin̈y raha nikoran̈indro panoratra Filazantsara aby io. Karaha ty volan̈inizio: “Tsy rariny foeky olo mivolan̈a fa panoratra Filazantsara aby io namoromporon̈o tantara maro momba fahagagan̈a, baka io izio naharondro tamy tantara ten̈a nisy, baka hampalaza finoan̈andro zen̈y. … Marin̈y ankitin̈y raha jiaby nivolan̈iny Filazantsara aby io.”

Iro Jiosy nanohitry fivavahan̈a Kristianin̈y io koa tsiary nifamatra fa ten̈a nisy ankitin̈y fahagagan̈a koran̈iny Filazantsara aby io. Angovo nahavitan̈a nan̈ano izio fo raha nampisalasala iro. (Marka 3:22-26) Tafara tatỳ koa, mboany iro olo pikritiky Kristianin̈y aby io koa mba tsy afaka nan̈aporofo fa Jesosy tsy nan̈ano fahagagan̈a. Ndray tamy taonjato voanalohany ndreky faharoe aby, nisy boky nikoran̈a momba fahagagan̈a aby io. Hitantsika baka amy zen̈y fa ten̈a mety atokisan̈a raha koran̈indro Filazantsara aby io momba fahagagan̈a nataony Jesosy.

Toetrinolo nan̈ano fahagagan̈a io

Tsy ampy izikoa iro porofo mankamarin̈y fa ten̈a nisy ankitin̈y fahagagan̈a nataony Jesosy fo dinihintsika. Fotony nan̈ino? Iro Filazantsara aby io koa baka mba man̈ambara amintsika fa Jesosy io olo nisy fihetsehampo salakady ten̈a nahay nahinakinaka, baka io niasaloha tamy raha mavoa olo.

Asa tsaroanao tamy lelahy boka araiky nan̈aton̈o Jesosy, ke nangataka mare: “Izikoa tianao han̈adio zaho, ten̈a ho vitanao zen̈y” in̈y? Jesosy ‘nahinakinaka izy mare’, ke nikasiky izy tamy tan̈anany, avio nivolan̈a: “Tiako. Anao madiova” zen̈y in̈y? Direkty lelahy io janga. (Marka 1:40-42) Naboakany Jesosy taminin̈y fa izy ten̈a nahinakinaka. Ke zen̈y nahavy izy nampiasa angovo namezany Zan̈ahary izy io, han̈anaovan̈a fahagagan̈a.

Ino raha nataony Jesosy taminizy fanojy iro olo handeha handevin̈y, niboaka baka tamy tanànany Naina in̈y? Tsaiky lelahy naty io fo zanaka reniny, ary man̈angy io aminio efa maty vady koa. “Nahinakinaka” man̈angy io Jesosy ke nan̈aton̈o izy, avio nivolan̈a: “Aza mitoman̈y eky.” Baka io nimpody nivilominy zanaka man̈angy io.​—Lioka 7:11-15.

Misy fianaran̈a ten̈a mankahery azontsika baka amy fahagagan̈a nataony Jesosy aby io. Tsy ino zen̈y fa izy “nahinakinaka”, ke nan̈ano raha han̈ampian̈a olo. Fahagagan̈a aby io tsy raha tantara fo. Hebreo 13:8 mivolan̈a fa “Jesosy Kristy tsy miova, na nomoaly, na niany, ary ho mandrakizay.” Izy ziô efa Panjaka andan̈itry an̈y. Izy efa von̈ono hampiasa angovo mahagaga namezany Zan̈ahary izy io, han̈anaovan̈a raha maromarony nataony taminizy tambony tany tatỳ. Tsy ho ela, angovo io handeha hampiasainy Jesosy hampajanga lan̈iany olombelon̈o man̈araka volan̈a Zan̈ahary. Ravoravo Vavolombelon̈o Jehovah han̈ampy anao hahay raha maro momba fiain̈ana tsarabe miambin̈y atsika aminy amaray io.

[Sary]

Fahagagan̈a nataony Jesosy in̈y nan̈aboaka “angovo mahery anan̈any Zan̈ahary”

[Sary]

Jesosy ten̈a nahinakinaka olo