Nan̈ino ma Atsika Tokony Hanokanten̈a amy Jehovah?

‘Zan̈aharinaka nan̈iraka anjelinany araiky alin̈y in̈y. Ke anjely io nitsangana tankilanaka.’​—ASA. 27:23.

1. Ino ma raha efa nataonolo handeha hatao batisa, baka io ino fan̈ontanian̈a mipetraka?

 “MIORIN̈Y amy sorompan̈avotan̈any Jesosy Kristy, anao ma efa nibebaka tamy fahotan̈anao, ke nanokanten̈a han̈ano sitrapony Jehovah?” Zen̈y araiky amindro fan̈ontanian̈a aroe valindro olo hatao batisa, amy farany kabaro momba batisa. Ino ma antony mahavy Kristianin̈y mila manokanten̈a amy Jehovah? Ino hatsaran̈a azontsika izikoa atsika man̈ano zen̈y? Nan̈ino ma atsika tsy maintsy manokanten̈a amy Zan̈ahary, izikoa tihanompo izy amy fomba hankasitrahany? Baka hazava amintsika tsarabe valinizen̈y, alô zahavantsika antsendriky ino ma dikany manokanten̈a zen̈y.

2. Ino ma dikany manokanten̈a amy Zan̈ahary zen̈y?

² Ino ma dikany manokanten̈a amy Zan̈ahary zen̈y? Zahava raha nivolan̈iny apostoly Paoly momba fifandraisany tamy Zan̈ahary. Izikoa fa nitady ho dobo sambo niondran̈andro, “Zan̈aharinaka” ho Paoly nikaiky Jehovah, man̈oloan̈a olo jiaby sambo araiky taminany. (Vakia Asan’ny Apostoly 27:22-24.) Kristianin̈y marin̈y jiaby io niny Jehovah aby. Fa donia ty ndraiky “ambany fahifan̈any araiky ratsy in̈y.” (1 Jaona 5:19) Manjary niny Jehovah Kristianin̈y araiky lera izy efa manokanten̈a aminany amy vavaka. Io voady manokan̈a atao amy Zan̈ahary, alohany han̈anaovan̈a batisa izy.

3. Ino ma dikany batisany Jesosy in̈y, avio akory mety han̈arehany pan̈aradia izy raha nataony zen̈y?

³ Jesosy efa nan̈ambela modely arehantsika. Izy nifidy han̈ano sitrapony Zan̈ahary. Amy maha taranakany Israely izy, Jesosy efa voatokan̈a niny Zan̈ahary, fotony firenena io efa niny Zan̈ahary. Fa tsy raha nitakiny Lalàn̈a fo nataony, fa raha mandilatrany zen̈y koa. Izio naboakany tamy batisanany. Karaha ty raha nivolan̈iny: “Ty zaho Zan̈ahary, navy han̈ano sitraponao.” (Heb. 10:7; Lioka 3:21) Batisany Jesosy in̈y nan̈aboaka fa izy von̈ono han̈ano sitrapony Babany. Man̈ano karaha zen̈y koa pan̈aradia izy aby io izikoa fa man̈ano batisa. Fa batisa ataondro man̈oloan̈a olo maro io ndraiky man̈aboaka aminolo fa iro efa nanokanten̈a tamy Zan̈ahary tamy vavaka.

Fanokan̈anten̈a io mitondra hatsaran̈a amintsika

4. Ino raha ianarantsika momba fifan̈ikian̈a nataony Davida ndreky Jonatana?

⁴ Fanokan̈anten̈a ataony Kristianin̈y amy Zan̈ahary io ten̈a raha maventy. Izio tsy zisty fifan̈ikian̈a fo. Ke ino ma hatsaran̈a ho azontsika izikoa atsika manokanten̈a? Alo atsika hangala ohatra momba fifan̈ikian̈a ataonolo pikamarady. Zahavantsika ino hatsaran̈a ho azondro baka amy zen̈y. Izikoa tianao hahazo naman̈a, anao antsendriky mba mila mifen̈y hanjary naman̈a tsara. Ke misy fifan̈ikian̈a tafiditry amy zen̈y. Anao loso mahatsapa manan̈a adidy hikarakara kamaradinao io. Baiboly mikoran̈a momba olo aroe kamarady mare, Davida ndreky Jonatana. Iro nan̈ano fifan̈ikian̈a foeky. (Vakia 1 Samoela 17:57; 18:1, 3.) Mety mahalan̈a fo atsika mahita olo kamarady mare karaha zen̈y. Fa ndray zen̈y, loso pinaman̈a mare olo izikoa iro samby mahatsapa fa manan̈a adidy amy fikamaradianandro.​—Ohab. 17:17; 18:24.

5. Izikoa andevo araiky tihahazo hatsaran̈a maharitry baka amy tomponany tsara fan̈ahy, ino raha mila ataony?

⁵ Lalàn̈a namezany Zan̈ahary iro Israelita aby io mikoran̈a momba fifan̈ikian̈a ataony panompo ndreky tomponany. Azahoan̈a hatsaran̈a koa izio. Panompo araiky, ohatra, izikoa man̈ano fifan̈arahan̈a maharitry amy tomponany araiky tsara fan̈ahy, sady man̈eky hanjary fanan̈ananany mandrakizay, izy hahazo fiarovan̈a. Karaha ty nivolan̈iny Lalàn̈a: “Fa izikoa izy man̈izingizin̈y mare karaha ty: ‘Tiako tompoko ndreky vady amanjanako, ke zaho tsy tihanjary olo afaka’, izy hindesiny tompiny man̈oloan̈a Zan̈ahary marin̈y. Ke izy hahankiny tompiny amy varavaran̈a na pôtôny varavaran̈a, ke hilokany amy raha marangitry hely sofin̈inany. Ke izy hanjary panomponany firaka izy maty.”​—Eks. 21:5, 6.

6, 7. a) Amy karakory fan̈anaovan̈a fifan̈ikian̈a io mitondra hatsaran̈a aminolo? b) Ino raha ianarantsika baka amy zen̈y momba fifandraisantsika amy Jehovah?

⁶ Fifan̈ikian̈a ataonolo fivadiany koa an̈isany raha ten̈a maventy. Izio fifan̈ikian̈a atao aminolo fa tsy amy taratasy. Olo araiky man̈ano tran̈o araiky kanefa tsy vita mariazy aby, tsy ten̈a ho sambatra, firaka amy zanakandro koa. Fa olo aroe fivadiany vita mariazy arapanjakana ndraiky, ho von̈ono fo handamin̈y problemondro ampitiavan̈a, izikoa fa misy zen̈y, fotony zen̈y takiny Baiboly.​—Mat. 19:5, 6; 1 Kor. 13:7, 8; Heb. 13:4.

⁷ Taloha koa, nahazo hatsaran̈a koa olo izikoa nan̈ano fifan̈arahan̈a tamy resaka varotro ndreky asa. (Mat. 20:1, 2, 8) Mbala karaha zen̈y fo koa firaka izioty. Mahazo hatsaran̈a, ohatra, atsika izikoa fa misy fifan̈arahan̈a antaratasy atao, alohany han̈anaovan̈a varotro na alohany hiasan̈a amy sosiete araiky. Hitantsika baka amy zen̈y fa fan̈anaovan̈a fifan̈ikian̈a io mankafatatra fifandraisany pinaman̈a, olo fivadiany, baka io piasa ndreky olo mampiasa olo. Fanokan̈antsika ten̈a amy Zan̈ahary io ke? Izio mahaimankafatra fihavan̈antsika aminany fo! Handiniky ohatranolo taloha tan̈y atsika. Zahavantsika ino hatsaran̈a nazondro iro koa fa nanokanten̈a tamy Jehovah. Ho hitantsika koa nan̈ino fanokan̈anten̈a io tsy raha zisty fifan̈ikian̈a fo.

Nahazo hatsaran̈a Israelita aby io

8. Firenenany Israely voatokan̈a niny Jehovah. Ino ma dikanizen̈y tamindro?

⁸ Firenenany Israely io izikoa fa nan̈ano voady tamy Zan̈ahary, iro nanjary voatokan̈a ninany. Iro navoriny Jehovah marikitry Bongo Sinay tio, avio ho izy tamindro: “Izikoa arehanaro tsarabe volan̈anaka, ke hajainaro fifan̈ikian̈a hataoko aminaro, anaro hanjary fanan̈ako manokan̈a hifidiko baka amy firenena jiaby.” Ke vahoaka aby io niaraka namaly karaha ty: “Von̈ono zahay han̈ano raha jiaby nivolan̈iny Jehovah.” (Eks. 19:4-8) Iro izikoa fa nanjary voatokan̈a, iro tsy vitany nan̈eky han̈ano raha fo fa iro koa nanjary fanan̈any Jehovah. Ke tamy Jehovah, iro io ‘fanan̈any manokan̈a.’

9. Ino hatsaran̈a nazony Israelita nohoniro voatokan̈a niny Jehovah?

⁹ Nahazo hatsaran̈a iro Israelita aby io izikoa fa nanjary fanan̈any Jehovah. Karaha ataony baba be fitiavan̈a mikarakara zanany in̈y nataony tamindro. Izy koa tsy nivadiky tamindro foeky. Karaha ty nivolan̈iny Zan̈ahary tamindro: “Man̈angy ma mety han̈adin̈a zanany mbala minono, ke tsy hahinakinaka zaza tankibonany? Nata iro man̈angy aby io han̈adin̈a zanakandro, zaho ndraiky tsy han̈adin̈a anao foeky.” (Isaia 49:15) Iro koa namezany Jehovah Lalàn̈a nitariky iro, ndreky paminan̈y nankahery iro, avio anjely niaro iro. Karaha ty nisoratiny pan̈ano salamo araiky zay: “Koran̈iny amy Jakoba volan̈anany. Ambarany aminy Israely fitsipikinany ndreky didipitsaran̈anany. Izy tsy nan̈ano karaha zen̈y tamy firenena hafa.” (Sal. 147:19, 20; vakia Salamo 34:7, 19; 48:14.) Izioty koa, mira nataony Jehovah nikarakara firenena voatokan̈a ninany taloha io koa ataony mikarakara lan̈iany olo manokanten̈a aminany.

Nan̈ino atsika tokony hanokanten̈a amy Zan̈ahary?

10, 11. Atsika ma izikoa fa teraka manjary an̈isany fianakaviambeny Jehovah? Hazavà.

¹⁰ Misy olo izikoa fa mieritreritry hanokanten̈a ndreky atao batisa, karaha ty raha an̈aty jerinany: ‘Zaho koa ma tsy manonkaten̈a amy Zan̈ahary, tsy mety hanjary panomponany?’ Hazava amintsika tsarabe antony, izikoa fa haintsika ino toeran̈antsika man̈oloan̈a Jehovah. Tsaraova fa baka taminy Adama nanota nahavy atsika tsy an̈isany fianakavian̈any Zan̈ahary eky. (Rom. 3:23; 5:12) Ke izikoa tiantsika hikeny ho an̈isany fianakaviambenany io, atsika tsy maintsy manokanten̈a aminany. Nan̈ino?

¹¹ Tsisy baba afaka mamindra ain̈y lavorary amy zanany, kanefa tokony ho zen̈y raha io. (1 Tim. 6:19) Miaraka atsika teraka baka efa tsy an̈isany zanaka Zan̈ahary edy. Olo fivadiany voanalohany tambony tany teto baka izikoa fa nanota, taranakalombelon̈o jiaby nanjary loso lavitry Pamoron̈o, Baba be fitiavan̈a io. (Ampitovisa amy Deoteronomia 32:5.) Ke nanomboko tamy zen̈y, olombelon̈o efa tsy an̈isany fianakaviambeny Jehovah, sady loso lavitry izy.

12. a) Karakory mety hahavy olombelon̈o panota hanjary an̈isany fianakavian̈any Jehovah? b) Ino raha mila ataontsika, alohany batisa?

¹² Ndray zen̈y, atsika tsiaraikiaraiky afaka mangataka amy Zan̈ahary, mba han̈eky atsika hanjary fianakavian̈anany misy panomponany aby io. a Akory eky havitantsika zen̈y kanefa atsika panota? Apostoly Paoly nanoratra karaha ty: “Taminy atsika mbala fahavalo efa nampihavan̈iny tamy Zan̈ahary, baka tamy nifatesany Zanany.” (Rom. 5:10) Lera atsika man̈ano batisa, atsika mangataka amy Zan̈ahary han̈amia atsika eritreritry madio, baka atsika hankasitrahiny. (1 Pet. 3:21) Fa alohany batisa, misy dingana maromaro tsy maintsy ataontsika antsendriky. Atsika tsy maintsy mianatra hahay Zan̈ahary, mino izy, mibebaka, avio man̈ano fan̈ovoan̈a amy fiain̈anantsika. (Jaona 17:3; Asa. 3:19; Heb. 11:6) Fa mbala misy raha hafa koa mila hatao, zay atsika vo hikeny Zan̈ahary hanjary an̈isany fianakavian̈anany. Ino eky zen̈y?

13. Nan̈ino aradalàn̈a izikoa olo araiky tiho an̈isany fianakavian̈any Jehovah, man̈ano voady fa hanokanten̈a aminany?

¹³ Olo araiky lavitry Zan̈ahary izikoa tihanjary an̈isany panomponany hankasitrahiny, tsy maintsy man̈ano voady aminany antsendriky. Baka hampazava zen̈y tsarabe, atsika hangala ohatra: Misy lelahy araiky ten̈a tsara fan̈ahy, tihanangana tsaiky araiky hataony zanany. Lelahy io malaza ho olo tsara fan̈ahy. Fa alohanizy han̈eky tsaiky io ho zanany, tiany antsendriky tsaiky io mampan̈anten̈a izy raha. Ke karaha ty ho izy amy tsaiky io: “Alohany zaho han̈eky anao hatao zanako, tiako ho hay antsendriky asa anao von̈ono hankatia ndreky han̈aja zaho mira babanao in̈y fo.” Tsaiky io izikoa tsy von̈ono hampan̈anten̈a izy raha zen̈y, lelahy io tsy han̈eky izy hanjary an̈isany fianakavian̈anany. Mety zen̈y, sa karakory? Ke karaha zen̈y koa, ikeny Jehovah ho an̈isany fianakavian̈anany lan̈iany olo von̈ono han̈ano voady fa hanokanten̈a aminany. Ho Baiboly: “Ain̈inaro ameza atao soron̈o velon̈o, voatokan̈a niny Zan̈ahary sady ankasitrahiny.”​—Rom. 12:1, Dikanteny Iombonana Eto Madagasikara.

Izio porofony fitiavan̈a ndreky finoan̈a

14. Amy karakory fanokan̈anten̈a io marikiny fitiavan̈a?

¹⁴ Aboakanolo araiky man̈ano voady hanokanten̈a amy Zan̈ahary fa izy tiany mare. Izio koa miramira amy voady ataonolo fivadiany amy mariazy ro. Lelahy kristianin̈y araiky man̈aboaka fa tiany mare man̈angy araiky lera izy fa man̈ano voady ho tia izy ndreky tsy hivadiky aminany foeky, ndray ino raha mandalo. Izio tsy raha fampan̈antinan̈a fo fa vava natao aminolo araiky koa. Hainy lelahy io fa izy tsy afaka hanjary tran̈o araiky amy man̈angy io, izikoa izy tsy man̈ano voadiny vadian̈a. Atsika tsy hanjary an̈isany fianakavian̈any Jehovah foeky koa, izikoa atsika tsy manokanten̈a aminany. Tombontsoa maventy an̈isany fianakavian̈anany io. Ke manokanten̈a aminany atsika, ndray tsy lavorary, fotony tiantsika hanjary fanan̈ananany, sady atsika tapakevitry tsy hivadiky aminany foeky, na karakory na karakory.​—Mat. 22:37.

15. Amy karakory fanokan̈anten̈antsika io man̈aboaka fa atsika mino Jehovah?

¹⁵ Aboakantsika fa atsika mino Jehovah izikoa atsika fa manokanten̈a aminany. Nan̈ino? Baka amy finoan̈antsika io mahavy atsika mino fa mahatsara atsika mikamarady amy Jehovah. (Sal. 73:28) Haintsika fa tsy mora foeky man̈ano dia araiky amy Zan̈ahary zen̈y an̈ivony “taranaka maditry sady ratsy fan̈ahy” ty. (Fil. 2:15; 4:13) Fa atsika matoky fa Jehovah hanohan̈a ezaka ataontsika, karaha efa nampan̈antinainy. Haintsika fa atsika tsy lavorary, fa ndray zen̈y, atsika matoky fa Jehovah hamindra fô amintsika, aminy hadisovan̈a ataontsika. (Vakia Salamo 103:13, 14; Romanina 7:21-25.) Atsika matoky fa Jehovah mbala han̈amia hatsaran̈a atsika izikoa atsika tapakevitry tsy hivadiky aminany.​—Joba 27:5.

Ho sambatra anao izikoa manokanten̈a amy Zan̈ahary

16, 17. Nan̈ino ma sambatra atsika izikoa manokanten̈a amy Jehovah?

¹⁶ Olo araiky manokanten̈a zen̈y manokan̈a ain̈inany niny Jehovah. Ho sambatra mare olo man̈ano zen̈y. Marin̈y tsarabe raha nivolan̈iny Jesosy ty: “Man̈amia raha olo ten̈a mampasambatra toizay mahazo raha baka aminolo.” (Asa. 20:35) Jesosy farandraha tsy natity eky taminizy nan̈ano fanompoan̈anany tambony tany teto, ke sambatra mare izy. Nisy fotoan̈a izy tsy nangala kajo, tsy nihina, ndreky tsy nan̈ano raha hampiadan̈a fiain̈ananany foeky, fa nan̈ampy olo hafa hahazo fiain̈ana. (Jaona 4:34) Ten̈a namparavoravo izy nan̈ano raha mamparavoravo fôny Babany. Ho Jesosy: “Zaho man̈ano raha mamparavoravo izy fo.”​—Jaona 8:29; Ohab. 27:11.

¹⁷ Naboakany Jesosy pan̈aradia izy aby io fomba fiain̈ana ten̈a mahafapo zen̈y. Ho izy tamindro: “Izikoa misy olo mila han̈araka zaho, izy tsy mila man̈eky ain̈inany.” (Mat. 16:24) Hahaiharikitry Jehovah fo atsika izikoa man̈ano zen̈y. Azovy ankoatrany Jehovah ma ten̈a afaka hikarakara atsika tsarabe mandilatra zen̈y?

18. Nan̈ino ma manokanten̈a amy Jehovah ten̈a mampasambatra, fa tsy manokanten̈a aminolo na amy raha hafa?

¹⁸ Manokanten̈a amy Jehovah io tsy karaha manokanten̈a aminolo na amy raha hafa. Atsika baka izikoa fa manokanten̈a, avio mifen̈y miain̈y mifan̈araka amy voadintsika zen̈y ke man̈ano sitraponany, atsika hahatsiaro sambatra mare. Maro olo amy zioty, manokan̈a fiain̈anandro amy tady vola ndreky harian̈a, kanefa iro avio tsy ten̈a sambatra ndreky tsy ten̈a afapô. Olo manokanten̈a amy Jehovah ndraiky sambatra fo. (Mat. 6:24) Ravoravo iro fotony mahazo tombontsoa ho an̈isany “miaraka miasa amy Zan̈ahary.” Iro baka tsy nanokanten̈a taminy asa araiky, fa tamy Zan̈ahary ten̈a mahay mankasitraka. (1 Kor. 3:9) Tsisy eky ankoatrany Jehovah, ten̈a mahay mankasitraka fahafoizanten̈anolo tsy mivadiky aminany. Aminy amaray an̈y koa panomponany aby io hampodiny tanora ndraiky, amy zen̈y iro afaka hankafy hatsaran̈a mandrakizay.​—Joba 33:25; vakia Hebreo 6:10.

19. Ino tombontsoa azonolo manokanten̈a amy Jehovah?

¹⁹ Anao koa fa manokanten̈a amy Jehovah, anao loso marikitry izy mare. Baiboly mivolan̈a: “Man̈aton̈a Zan̈ahary anaro, fa izy han̈aton̈o anaro.” (Jak. 4:8; Sal. 25:14) Amy lahatsoratra man̈araka, atsika handiniky nan̈ino tsy hanen̈iny foeky atsika izikoa mifidy hanjary fanan̈any Jehovah.

[Lamariky amy pazy ambany]

Akory Hamalianao Ty?

• Ino ma dikany manokanten̈a amy Zan̈ahary zen̈y?

• Ino hatsaran̈a azontsika izikoa atsika manokanten̈a amy Zan̈ahary?

• Nan̈ino Kristianin̈y mila manokanten̈a amy Jehovah?

[Fan̈ontanian̈a]

[Sary]

Ho sambatra fo atsika izikoa miain̈y mifan̈araka amy fanokan̈anten̈antsika