Man̈ova Olo Baiboly

NISY lelahy araiky nahatsapa fa mbala misy raha mahatsara mandilatra fanan̈ana varotro mandeha tsara. Nisy lelahy hafa ndraiky nivolan̈a fa izy ratsy fitondranten̈a mare sady pifima jamala, kanefa niala raha aby zen̈y. Lelahy araiky fahatelo ndraiky pigiaka toaka mare, kanefa vitany fo niala tamizio.

“Karaha mba tsara in̈y fiain̈ananaka!”​—JOHN RICKETTS

TERAKA TAMINY: 1958

TANY FAVIAN̈A: EKOSY

FIAIN̈ANA TALOHA: PAN̈ANO AFERANY VAROTRO

FIAIN̈ANANAKA TALOHA: Tamy zaho mbala hely, niadan̈a mare zaho. Babanay baka manamboninahitry amy tafiky britaniky, ke zahay nifindrafindra fo. Zahay efa nipetraka ta Ekosy, Angletera, Allemagne, Kenya, Malésie, Irlandy, avio Chypre. Nianatra tamy lekaoly klasimandry ta Ekosy zaho, nanomboko zaho valo taon̈o. Izikoa fa nandeha fotoan̈a, zaho nahazo diplaomy taminy Iniversiteny Cambridge.

Niasa tamy lozìny pivarotro soliky zaho, tamy zaho 20 taon̈o. Valo taon̈o zaho niasa tao. Tamy voanalohany, tan Ameriky zaho niasa, baka io zaho tan Afriky, avio farany tan Australie Andrefa. Zaho koa fa tan Australie, zaho nanangana lozìny, fa raha io fo nalafo tafara tatỳ.

Nahazo vola mare zaho tamy zen̈y, ke tsy nila niasa eky zaho koa fa feno 40 taon̈o fa nandeha nitety tany fo. Indroe aby zaho nitety Australie tamy môtô, avio koa nitety tany jiaby. Karaha mba tsara in̈y fiain̈ananaka!

BAIBOLY NAN̈OVA FIAIN̈ANANAKA: Tamy zaho mbala niasa, zaho efa nitady fomba han̈anaovako mersy Zan̈ahary edy, fotony tiako fiain̈ananaka. Zaho nivavaka tamy leglizy Anglikany fotony tan̈y zahay nivavaka tamy zaho mbala hely. Kanefa, iro tan̈y tsy ten̈a nampianatra Baiboly. Nianatra tamindro Mormons aby io koa zaho, kanefa mbala nitovy fo.

Tandraraiky amy zay, nisy Vavolombelon̈o Jehovah navy nan̈aton̈o zaho. Raha jiaby nampianarindro hitako tamy Baiboly tao aby. An̈isany andininteny nikoran̈indro taminaka iziô 1 Timoty 2:3, 4. Karaha ty koran̈inizio ao: “Sitrapony Zan̈ahary hamonjian̈a karazan̈olo jiaby ndreky hahaizandro tsarabe ny marin̈y.” Nataondro mazava tsara taminaka fa tsy ampy mahaihay raha volan̈iny Baiboly, fa mila mahay tsarabe ny marin̈y koran̈inizio.

Nanjary nahay ny marin̈y tsarabe zaho koa fa nianatra Baiboly tamindro. Ohatra, nanjary haiko fa Zan̈ahary ndreky Jesosy io tsy mira, avio tsy marin̈y Zan̈ahary tokana olo telo zen̈y. (Jaona 14:28; 1 Korintianina 11:3) Somary neloko antsendriky zaho koa fa nahay zen̈y, fotony haiko fa diso sady tsy mazava foeky raha haiko taloha. Fa ten̈a ravoravo zaho baka tio, fotony nahay ny marin̈y!

Tafara helinizen̈y, zaho nivory tamy Vavolombelon̈o Jehovah. Masoko foeky nahita fa ten̈a tsara fan̈ahy iro, avio miavaka fitsipiky arehandro. Iro ten̈a mifankatia, ke resy lahatra zaho fa fivavahan̈andro io fivavahan̈a marin̈y.​—Jaona 13:35.

HATSARAN̈A NAZOKO: Nan̈ano batisa zaho. Tafaranizin̈y amy zay zaho tojy Diane. Raimandreninany Vavolombelon̈o Jehovah, ten̈a tsara fan̈ahy iro. Ke nan̈ano mariazy zahay roeny Diane. Ten̈a fitahian̈a baka amy Jehovah izy, fotony izy ten̈a tia zaho ndreky mahakarakara zaho.

Zahay roeny Diane ten̈a tihifindra amy tany mila pitory maro, ke zen̈y nahavy zahay taminy 2010, nifindra a Belize, an Ameriky Centrale atỳ. Eto zahay mitory aminolo ten̈a tia Jehovah ndreky tihahay raha koran̈iny Baiboly.

Zaho koa fa nahay ny marin̈y momba Zan̈ahary ndreky Volan̈anany, nanjary nilamin̈y sain̈inaka. Avio, zaho koa pitory manontolo andra, ke mahavita man̈ampy olo maro hianatra Baiboly. Maro olo karaha nataoko ty nanjary niova izikoa fa mahay raha koran̈iny Baiboly, ke ten̈a mamparavoravo zaho mahita zen̈y. Kaiky nahita fomba nan̈anaovan̈a mersy Zan̈ahary fo zaho in̈y tamy farany.

“Ten̈a tsara fan̈ahy taminaka iro.”​—MAURÍCIO ARAÚJO

TERAKA TAMINY: 1967

TANY FAVIAN̈A: BREZILY

FIAIN̈ANA TALOHA: RATSY FITONDRANTEN̈A MARE

FIAIN̈ANANANY TALOHA: Tamy zahay mbala hely, zahay nipetraka ta Avaré, tanàna hely milamindamin̈y, a São Paulo an̈y. Tsy sahiran̈a loatra olo mipetraka an̈y.

Zaho mbala tan̈atiny kibony mamako, naty papako. Karaha sarimbavy zaho mbala hely. Ohatra izio, mamako koa tsy tantran̈o, nisikiniko lambanany. Fivolan̈ananaka mira man̈angy, karaha zen̈y koa fihetsikinaka. Ke maro olo nivolan̈a fa zaho sarimbavy. Tafara tatỳ, zaho nanambady lelahy na tanora io na olo efa be taon̈o.

Nitsakaraka olo han̈ano firaisan̈a taminaka fo zaho na lelahy io na man̈angy, kanefa zaho mbala tsy ampy 20 taon̈o aby. Nandeha zaho nitady olo mety an̈anovako izio na tamy bara io, na tamy baly, firaka ta leglizy. Koa lera fety karaha ataony karnavaly, zaho man̈ano lambany man̈angy, baka io milahatra mitsinjaka miaraka amindrô olo pitsinjaka marobe in̈y. Nalaza mare zaho tamy zen̈y.

Olo nataoko kamaradinaka tamy zen̈y olo man̈ano sarimbavy, olo pivaroten̈a ndreky olo mifima jamala. Tsy ela zaho efa nanjary zatra nifima koa, fotony iro nandrisiky zaho han̈andran̈a jamala, kôkaìny an̈arany. Misy lera, mifima fo raha ataonay an̈atiny alin̈y araiky. Nisy fotoan̈a koa zaho zaraiky fo mifima manofotro andra. Nataonolo navoany SIDA aby zaho tamy zen̈y, fotony nivadiky nahia hely.

BAIBOLY NAN̈OVA FIAIN̈ANANAKA: Tamy fotoan̈anizen̈y zaho fanojy Vavolombelon̈o Jehovah. Iro tsara fan̈ahy mare. Namakiandro andininy amy Baiboly zaho, ke an̈isanizen̈y Romanina 10:13 ty: “Zay olo mikaiky an̈aran̈any Jehovah fo ho voavonjy.” Nan̈eky zaho fa ten̈a ilain̈a mampiasa an̈aran̈any Jehovah. Zaho koa fa tafimpody nifima kôkaìny nan̈iaka andra, natetiky zaho nivavaka tamy Jehovah baka nampiany. Nibiafiko lafenetra, avio nisan̈andra lan̈itry zaho sady nitomoan̈y nivavaka.

Niasaloha mare mamanay nahita zaho nandrobaten̈a tamy jamala, ke zaho in̈y nanjary navozo. Vôly nifima foeky zaho. Tafaranizen̈y zaho nan̈eky hianatra Baiboly tamy Vavolombelon̈o Jehovah. Nivolan̈indro taminaka fa zaho koa mianatra Baiboly, zaho hahaitsy ho tia mifima foeky. Narin̈y ankitin̈y volan̈andro in̈y.

Izikoa fa loso lavitry fianaranay Baiboly, hitako fa zaho mbala tokony hiova. Sarotro mare taminaka raha zen̈y, fotony rango mbala hely zaho efa nan̈ano sarimbavy. Fa nahavita niala tamizio fo zaho fotony efa tsy niaraka tamindro kamaradiko taloha in̈y eky. Tsy nandeha tan̈aty bara eky zaho, avio tsy nandeha baly eky.

Ten̈a nankahery zaho nahay fa Jehovah tia zaho. Hainy fa niady mare zaho. (1 Jaona 3:19, 20) Ke nanomboko taminy 2002, nialako raha jiaby fataoko tamy zaho nan̈ano sarimbavy in̈y, avio natao batisa zaho, ke nanjary Vavolombelon̈o Jehovah.

HATSARAN̈A NAZOKO: Nianatra Baiboly mamako, fotony lany fan̈ahy izy nahita zaho niova be in̈y. Fa tafaranizin̈y izy tapaka lalandio, ke ten̈a nampalahelo. Ndray tio raha zen̈y, izy mbala tia Jehovah ndreky tia fahamarin̈ana koran̈iny Baiboly ao fo.

Efa valo taon̈o amy ziô zaho nan̈ano pitory manontolo andra. Man̈ampy olo hianatra Baiboly fo zaho. Ndraikindraiky mbala misy fan̈irian̈a ratsy fo an̈atinaka ao. Ikeko raha zen̈y. Fa hitako ten̈a man̈ampy zaho mieritreritry fa zaho koa tsy man̈eky resinizio, ravoravo Jehovah.

Zaho taloha hitako nahatsiaro tsisy dikany be zay. Fa zaho izioty efa tsy karaha zen̈y, fotony zaho mifandray tsarabe amy Jehovah ndreky mamparavoravo izy. Ten̈a sambatra zaho.

“Zaho taloha karaha fa damozana in̈y.”​—LUKA ŠUC

TERAKA TAMINY: 1975

TANY FAVIAN̈A: SLOVENIA

FIAIN̈ANA TALOHA: PIGIAKA TOAKA BE

FIAIN̈ANANAKA TALOHA: Zaho teraka ta Ljubljana, kapitaliny Slovenia. Firaka zaho efatra taon̈o fo fiain̈ananaka mba tsara. Tafaranizin̈y baka papanay namono ten̈a, ke naty. Ke tsy maintsy niasa mare mamanay namelon̈o zahay roeny rahalahiko. Izio mbala zokiko.

Zaho koa fa 15 taon̈o, zaho nifindra tamy dadiko. Tiako taminany tan̈y, fotony ankamarozany kamaradiko nipetraka narikitry tan̈y. Avio zaho tan̈y nibanjainy dadiko fo fa tsy navoafehifehy karaha tamy mamako tan̈y. Zaho koa fa 16 taon̈o, zaho nikamarady taminolo pigiaka toaka be zay. Isaka sabotsy dimansy iro nigiaka fo. Zaho in̈y amy zay nanjary naditry. Nata sanjinaka fo ahitan̈a fa zaho olo nahery andra. Nanangana fan̈eva zaho, avio nanjary nifima koa.

Efa naro karazan̈a jamala nandramaniko, fa toaka fo ten̈a tiako. Nanjary zatra nigiaka toaka zaho. Tamy voanalohany, divain vera araiky fo figiahako. Tafaranizin̈y ndraiky, tsy ampy zaho koa tsy divain tavoangy araiky mandilatra. Nanjary haiko mare nanitriky zaho mamo. Izikoa olo tsy maharen̈y fofoko vavanaka, tsy haindro foeky zaho efa mamo. Ndraikindraiky aby divain na labiera efa mandeha dimy litra laniko, fa mbala tsy hainolo fo zaho nigiaka. Tsy basinizen̈y, fa zaho taminio mbala nigiaka toaka “vodka” an̈arany.

Zahay jiabiniry kamaradiko koa fa nandeha nigiagiaka tamy tany nisy baly, indroeny toaka lanindro toaka laniko. Fa kanefa zahay koa fa nody, zaho fo namampahan̈a iro, baka iro tsy lavo. Tandraraiky iro namako aby io nitsiko zaho, ke nataondro nira damozana tsy mety feno zen̈y zaho. Zen̈y baka fivolan̈anolo ta Slovenia olo tsy din̈y amy figiahan̈a. Tandraraiky sendra ren̈iko olo nivolan̈a zen̈y, zaho neloko mare.

Komansy nandiniky fiain̈ananaka zaho, ke nanjary tsapako fa karaha tsisy raha ilàn̈a zaho foeky. Hitako karaha tsisy dikany foeky raha jiaby nataoko.

BAIBOLY NAN̈OVA FIAIN̈ANANAKA: Tamy zen̈y, nisy olo lekoly araiky taminaka zay hitako niova nahaitsara toetry fo. Nitahomiko nandeha nihina tamy lotely hely zay izy. Zahay koa fa navy tan̈y, nan̈ontaniako izy raha nampiova izy. Izy ho izy mianatra Baiboly tamy Vavolombelon̈o Jehovah zen̈y. Nivolan̈iny taminaka raha sasany nianarany. Vaovao taminaka aby ankamarozany raha nivolan̈iny, fotony zaho tsy olo nitarimin̈y tamy fivavahan̈a foeky. Zaho amy zay nanomboko nianatra Baiboly tamy Vavolombelon̈o Jehovah, avio niaraka nivory tamindro.

Fianaran̈a Baiboly io nahaizako raha maro, ke zen̈y raha ten̈a nandrisiky zaho niova. Ohatra, nanjary haiko fa atsika io efa an̈atiny “andra farany”, haripakany Zan̈ahary olo ratsy fan̈ahy, avio olo marin̈y hiain̈y tsisy farany amy Paradisa. (Salamo 37:29; 2 Timoty 3:1-5) Tihiova mare zaho tamy zen̈y, fotony zaho mba tiako ho an̈isany olo marin̈y aby io.

Raha nianarako aby io nikoran̈iko tamindro kamaradiko aby io. Ankamarozandro nikotran̈a zaho, ke nahaitontohitry fo zaho fa iro io tsy tsara atao kamarady. Haiko tsarabe fa zaho koa mbala hikamarady amindro fo, zaho tsy mety ho vôly toaka. Efa tsy din̈indro aby haviany sabotsy dimansy higiahan̈a toaka be ndraiky koa.

Nikamarady tamindro Vavolombelon̈o Jehovah aby io zaho fa tsy nikamarady tamindro namako taloha aby io eky. Ten̈a tia Zan̈ahary ndreky mifen̈y man̈araka fitsipikinany iro, ke ten̈a nan̈ampy zaho raha zen̈y. Koa fa ela ny ela, tsy nigiaka be eky zaho.

HATSARAN̈A NAZOKO: Man̈ano mersy Jehovah zaho fotony efa tsy mila toaka eky zaho vo ravoravo. Efa tsy hay foeky nan̈ano karakory zaho hotrizay izikoa tsy niala tamy fiain̈ananaka taloha. Hitako fa ten̈a tsara fiain̈ananaka izioty!

Efa fito taon̈o zay zaho miasa amy birôny sampan̈any Vavolombelon̈o Jehovah a Slovenia. Fahaizan̈a Jehovah ndreky fanompoan̈a izy nahavy fiain̈ananaka ten̈a misy dikany.