FOTOKEVITRY MAVENTY HITA ATO
Ratsy Aminy Ankitin̈y ma Mizaha Sary Vetaveta Io?
Amy zioty, efa antany jiaby ahitan̈a sary vetaveta. a Mety amy pibilisite zen̈y, na amy resaka lamaody, amy filma, hira, ndreky amy boky. Mety amy tele koa, na amy jeux, amy telefony, Internet, ndreky firaka amy sary koa misy izio. Efa tsy mampan̈ino olo eky zioty mizaha sary vetaveta zen̈y. Naronarony taloha sary vetaveta io iziôty ndreky olo tia mizaha izio.—Zahava efajoro “ Kontikonty Momba Filma Misy Sary Vetaveta.”
Miova koa fomba fahitanolo sary vetaveta io. Karaha ty nambarany profesera Gail Dines: “Efa nahainandombolombo fo sary vetaveta aboakanolo, amy zioty. Raha mba niverinolo fa fady taloha, nanjary efa tsy mampan̈ino eky amy zioty.”
Fa karakory ndraiky hevitrinao? Tsy mampan̈ino ma mizaha sary vetaveta io sa izio farandraha mandrobaka eky? Ty nambarany Jesosy: “Tsara voany kakazo tsara jiaby, fa kakazo ratsy ndraiky ratsy koa voany.” (Matio 7:17) Izikoa sary vetaveta io kakazo, tsara sa ratsy voanizio? Ahitantsika valinizen̈y, alô atsika handiniky fan̈ontanian̈a vitsivitsy mikasiky izio.
Ino vokatrany sary vetaveta io aminolo?
RAHA VOLAN̈INY MANAMPAHAIZAN̈A: Farandraha man̈andevo eky sary vetaveta io. Izio ampitovisiny manampahaizan̈a sasany amy jamala.
Bryan b an̈isanolo pizaha mare sary vetaveta io aminy Internet. Karaha ty ho izy: “Tsisy raha nahavita nisakana zaho tsy hizaha izio. Karaha raha nindesinolo in̈y baka zaho. Avio zaho koa fa baka nizaha izio, zaho nangôrohôro, avio lohanaka nangan̈a mare. Zaho fa nifen̈y ho voly tamizio fa mbala nandivozinizio fo firaka taon̈o maro tafara tatỳ.”
Matetiky, olo andivoziny sary vetaveta io manitriky raha fataondro. Iro miain̈y an̈atiny vandy ndreky sekire fo. Ke efa tsy mahagaga eky izikoa iro loso mitokantokan̈a, men̈atra, miasaloha, kivy mare, avio mahinihiny fo. Misy amindro aby tihamono ten̈a foeky. Ohatra, hely tsy ho isanandra Serge nampiditry sary vetaveta tan̈atiny telefoninany. Karaha ty nivolan̈iny: “Zaho efa tsy nahay olo hafa eky fa zaho fo, avio zaho nanjary kivy mare. Zaho loso nan̈ameloten̈a, nahatsapa ten̈a tsisy dikany, avio nahatsiaro latsatokan̈a ndreky voafandriky. Azony zaho men̈atra loatra, zaho nanjary tsy nasaky nangataka fan̈ampian̈a.”
Sary vetaveta io misy vokany ratsy fo, nata aminolo sendra nahita izio, na izy nizaha hely fo taminany io. Pr. Judith Reisman, pan̈ano fikarohan̈a mikasiky sary vetaveta iziô, nikoran̈a taminy Antenimierandoholona tan Etazonỳ. Karaha ty raha nivolan̈iny: “Sary tsy manjary hitanao in̈y tavela an̈aty jery ao, salakady mandrobaka sain̈y. Betibetiky iô betronao man̈aboaka raha simiky, ke baka amizio mahavy sary in̈y loso sarotro adin̈a na tsy miala an̈aty jery ao foeky.” Ty raha nambarany Suzane, 19 taon̈o, izy sendra nahita sary vetaveta taminy Internet: “Sary io tsy afaka an̈aty jeriko ao foeky. Iô fo koa izio tsaroako tampoko. Izio donko efa tsy ho afaka tanteraka an̈aty jeriko ao.”
IZIKOA FINTIN̈INY: Sary vetaveta io raha man̈andevo sady mandrobaka fiain̈ananolo mizaha izy.—2 Petera 2:19.
Ino vokatrany fizahan̈a sary vetaveta io amy tokantran̈o?
RAHA VOLAN̈INY MANAMPAHAIZAN̈A: “Sary vetaveta io mampisaraka olo fivadiany ndreky lafamỳ.”—Fandrikiny Sary vetaveta (angiley), nisoratiny Wendy ndreky Larry Maltz.
Sary vetaveta io mandrobaka tokantran̈o, fotony:
Loso mihen̈y fifampitokisan̈a ndreky fifankatiavanolo fivadiany.—Ohabolana 2:12-17.
Olo io manjary tia ten̈a fa efa tsy tia mare vadiny eky, avio izy manjary efa tsy afapô amy vadiny io eky.—Efesianina 5:28, 29.
Mahavy olo io manjary man̈inôfy man̈ano firaisan̈a mamoafady ndreky han̈iry mare han̈ano zen̈y.—2 Petera 2:14.
Olo io manjary tihiforse vadiny han̈ano firaisan̈a mamoafady.—Efesianina 5:3, 4.
Mahavy olo io manjary tihan̈ano firaisan̈a aminolo hafa ke loso mampirafy.—Matio 5:28.
Baiboly mivolan̈a fa olo fivadiany tsy tokotro ‘hivadiky’ amy vadiny. (Malakia 2:16) Mivadiky amy vadiny olo araiky izikoa mampirafy, ke raha zen̈y ten̈a mandrobaka tokantran̈o. Mety hampisaraka olo fivadiany foeky izio. Ary ten̈a misy vokany ratsy amy zanakandro raha zen̈y.
Sary vetaveta io koa farandraha mandrobaka tsaiky eky. Karaha ty ziô nambarany Bryan, araiky nikoran̈intsika taloha tarỳ in̈y: “Tamy zaho folo taon̈o, izikoa zaho fa nisaoma tsikàkaka misitriky, zaho sendra nahita bokiny papako misy sary vetaveta. Ke nanomboko tamy zen̈y, zaho nangalatra nizaha izio fo, nata tsy haiko aby ino ten̈a nitiavako izio. Firaka zaho be, zaho loso zatra nizaha izio.” Hita tamy fikarohan̈a fa baka amy sary vetaveta io mety mahavy tsaiky manjary tia man̈ano firaisan̈a. Ke izy manjary pan̈ano firaisan̈a aminolo maro isankarazany, sady kafiry izy izikoa fa man̈ano zen̈y, avio izy loso tsy salama sain̈y ndreky fô.
IZIKOA FINTIN̈INY: Sary vetaveta io mahavy olo tsy mifankatia eky, salakady mitondra ratrampô ndreky alahelo.—Ohabolana 6:27.
Ino raha volan̈iny Baiboly momba sary vetaveta?
BAIBOLY MIVOLAN̈A: “Ke vonia raha jiaby mety hitariky rantsambatan̈anaro hijangajanga, han̈ano fahalotoan̈a, han̈iry han̈ano raha tsy manjary, han̈iry han̈ano ny ratsy, ndreky han̈iry mare raha tsy mety ho azonaro, fotony manompo sampy olo man̈iry raha karaha zen̈y.”—Kolosianina 3:5.
Dikanizen̈y, farandraha halany Zan̈ahary Jehovah c eky sary vetaveta io. Tsy fan̈anaovan̈a firaisan̈a io halany, fotony izy namoron̈o raha mahalelahy na mahaman̈angy io. Salakady olo fivadiany koa nataony afaka man̈ano firaisan̈a, fotony tiany iro hahazo fahafinaretan̈a ndreky hahaihifankatia fo, baka io hiteraka.—Jakoba 1:17.
Ino basy mahavy atsika mivolan̈a fa farandraha halany Jehovah eky sary vetaveta io? Ty antony sasany:
Hainy fa sary vetaveta io mandrobaka olo.—Efesianina 4:17-19.
Tiany atsika ke tiany harovan̈a.—Isaia 48:17, 18.
Tiany Jehovah harovan̈a vadian̈anolo ndreky fianakavian̈anolo.—Matio 19:4-6.
Tiany atsika hadio fitondranten̈a ndreky han̈aja zonolo.—1 Tesalonianina 4:3-6.
Raha mahalelahy na mahaman̈angy io tiany hampiasaintsika amy fomba mihaja.—Hebreo 13:4.
Hainy Jehovah fa sary vetaveta io man̈aboaka hevitry diso ndreky feno fitiavanten̈a momba firaisan̈a. Amizio koa ahitan̈a fomba fihevitriny Satana momba firaisan̈a.—Genesisy 6:2; Joda 6, 7.
IZIKOA FINTIN̈INY: Sary vetaveta io mandrobaka fihavan̈anolo amy Zan̈ahary.—Romanina 1:24.
Fa ndray zen̈y, Jehovah mamindra fô aminolo andivoziny sary vetaveta ke tihiala amizio. Karaha ty volan̈iny Baiboly: “Jehovah mamindra fô ndreky tsara fan̈ahy, tsy mora meloko, be fitiavan̈a sady tsy mivadiky. Fotony hainy tsarabe raha niasany atsika, ke tsaroany fa atsika io fotaka.” (Salamo 103:8, 14) Izy mandrisiky olo manetry ten̈a mba han̈aton̈o izy baka ‘mahazo famindrampô ndreky han̈aboahan̈a hatsarampan̈ahy tsisy ambaka izy’ avio ‘hahazo fan̈ampian̈a amy fotoan̈a mety.’—Hebreo 4:16; zahava efajoro “ Fomba Hialan̈a amy Fahazaran̈a Mizaha Sary Vetaveta?”
Maro olo efa nan̈eky hampiany Zan̈ahary. Ke nahomby ma zen̈y? Karaha ty volan̈iny Baiboly momba iro: “Efa navoasasa madio tsarabe anaro, efa nankamasin̈iny, sady efa nambara fa olo marin̈y taminy an̈arany Jesosy Kristy Tompo ndreky tamy fan̈ahiny Zan̈aharintsika.” (1 Korintianina 6:11) Ke iro koa mba afaka mivolan̈a miran̈a apostoly Paoly: “Baka aminy araiky man̈amia angovo zaho in̈y mahavy zaho manan̈a angovo hindesin̈y hiatriky karazandraha jiaby.”—Filipianina 4:13.
Vitany Suzane nandresy fahazaran̈a ratsy nanan̈any. Karaha ty raha nivolan̈iny: “Efa Jehovah zaraiky fo afaka man̈ampy anao tsy handivoziny fizahan̈a sary vetaveta eky. Izikoa anao mangataka fan̈ampian̈a ndreky taridalan̈a baka aminany, anao loso madio man̈oloan̈a izy. Izy tsy hiala anao foeky.”
