Tamy zaho mbala helihely, zahay nipetraka marikitry Leipzig, izio an Allemagne Antin̈iana. Izio tsy lavitry Tsekôslôvakỳ ndreky Pologne. Tamy zaho tsiota taon̈o, zahay nanjary nifindra azony asany papako. Zahay antsendriky nifindra ta Brezily, avio tan Ekoatera.

Tamy zaho 14 taon̈o, zaho nalefa nianatra, tamy lekoly tan Allemagne, nan̈ano kilasimandry tan̈y. Tsy maintsy zaho foeky nikarakara ain̈inaka, fotony baka ry olobeko nipetraka tan Ameriky Atsimo tan̈y. Ke nanjary raha tiako fo nataoko. Tsy niasako loha foeky ino vokatrany raha ataoko io taminolo.

Nimpody tan Allemagne ry olobeko tamy zaho 17 taon̈o. Tamy voanalohany zaho mbala niaraka nipetraka tamindro. Fa baka tio, hitako sarotro taminaka be zay himpody han̈araka bekoniry olobeko fotony zaho efa zatra tsisy pikomandy. Ke nialako tao tamy zaho 18 taon̈o.

Nanjary tsy nilamin̈y foeky jerinaka fotony hitako karaha tsisy dikany fiain̈ananaka. Ke zaho izikoa fa baka nandiniky raha ataonolo ndreky raha ataony fikambanan̈a, ho zaho: ‘Sitrany titeziko sandra tany tsarabe ty diany mbala tsendriky robaka baka amy raha ataonolo.’ Hitako fa zen̈y raha farany tsara nety ataoko.

Zaho niala tan Allemagne. Baka tio zaho nivanga môtô, ke zaho nandeha tan Afriky. Tsy ela tafaranizen̈y, zaho nila nan̈amboatra môtônaka tan Erôpy, ke zaho tsy maintsy nimpody tan̈y. Tandraraiky zay, tsy ela helinizen̈y, zaho nandeha tamy laplaziny Portigaly. Tapakevitry zaho tamy zen̈y fa efa tsy handeha vôiazy tamy môtô eky, fa sitrany amy sambo koa.

Zaho niaraka tamy tanora maromaro handeha hivoiazy taminy Osean Atlantiky. Araiky tamindro tanora aby io Laurie. Izy nanjary vadiko tafara tatỳ. Ke tamy fotoan̈a zen̈y zahay roe fanojy. Zahay antsendriky nandeha tamy nosiny Caraïbe. Avio zahay nidôko hely ta Porto Rico. Vita zen̈y, zahay nimpody tan Erôpy. Zahay baka nan̈anten̈a hahita sambo misy lay, araiky mety asian̈a tran̈otran̈o hely mety hipitrahan̈a in̈y. Fa tsy tanteraka aby programonay in̈y, fotony zahay koa fa baka nitaditady vola hely tan̈atiny telo fanjava, zaho avoakaiky hiditry maramilany aliman.

Tan̈atiny 15 fanjava zaho tamy tafiky maramila andranomasin̈y. Tan̈atiny fotoan̈a zen̈y, zahay roeny Laurie nan̈ano mariazy, avio zahay nan̈ano programo hanohy ndraiky dianay tamy sambo in̈y. Taloha heliny zaho navoakaiky han̈ano maramila baka, zahay efa nivanga sambo hely zay. Fa lera zaho nan̈ano maramila in̈y amy zay, zahay nivanga araiky maventiventy. Tan̈aty dinikinay baka hipetraka amizio ndreky hitety tany tsarabe ty. Izikoa fa vita servisinaka tamy maramila tao, mbala tsendriky ten̈a vita tsarabe sambo io. Tamy fotoan̈a zen̈y, zahay fanojy Vavolombelon̈o Jehovah, ke zahay nanomboko nianatra Baiboly tamindro.

Tsendriky hitako tamy voanalohany, ino raha mila ivoako amy fiain̈ananaka. Zaho ndreky vadiko baka efa vita mariazy, avio zaho efa tsy nifima eky. (Efesianina 5:5) Baka io hitako tsisy maharatsy izy foeky mandeha mitety tany zen̈y, misy hankafizan̈a tsarabe raha niasainy Zan̈ahary.

Kanefa, mbala nisy raha fo kaiky nila nivoako. Zaho nila nan̈ova toetrinaka. Zaho baka olo poerapoera mare salakady tia ten̈a koa, ke fahaizan̈anaka ndreky raha vitako fo raha nijireko. Zaho taloha tia ten̈a mare.

Zaho tandraraiky zay namaky Toriteny malaza nataony Jesosy tan̈abony Bongo in̈y. (Matio toko 5-7) Tsy ten̈a nazoko tamy voanalohany, raha tiany Jesosy volan̈iny momba fahasambaran̈a io. Izy, ohatra, nivolan̈a fa sambatra olo izikoa mosary ndreky sakara. (Matio 5:6) Gaga zaho amy karakory koa ma raha karaha zen̈y mampasambatra. Fa izikoa fa nitohizako fianaran̈anaka, hitako fa atsika jiaby io kaiky samby mila raha arapan̈ahy, fa tsara atsika manetry ten̈a ke man̈eky raha zen̈y avio mifen̈y han̈ano raha hazahoan̈a izio. Zen̈y raha nivolan̈iny Jesosy: “Sambatra lan̈iany mahatsiaro fa mila Zan̈ahary.”​—Matio 5:3.

Mbala vo tsy elany nanampaonany fianaran̈a Baibolinay tan Allemagne tan̈y, zahay roeny Laurie nifindra ta France, avio tsy elanizin̈y zahay nifindra tan Italy koa. Zay tany nandihananay, zahay fanojy Vavolombelon̈o Jehovah fo. Rikian̈a mare zaho mahita iro mifankatia amy fô salakady miray sain̈y. Hitako fa iro io ten̈a pirahalahy man̈erantany. (Jaona 13:34, 35) Ke zahay roeny Laurie natao batisa, ke nanjary Vavolombelon̈o Jehovah.

Tafarany batisanaka, zaho mbala niezaka fo han̈ova toetrinaka. Zahay roeny Laurie nanapakevitry handeha sambo han̈araka sisiny Afriky, avio hitety Osean Atlantiky firaka zahay avy an Etazonỳ. Zahay roe fo tan̈atiny sambo hely tao, osean be man̈odidin̈y zahay. Tiô zaho tontohitry fa tsisy dikany foeky atsika izikoa ampiran̈iny amy Pamoron̈o Be Voninahitry io. Tsisy raha firy mety atao izikoa fa an̈abo rano zen̈y, ke zaho nanapakevitry hamaky Baiboly. Nanohin̈y fônaka mare tantara momba fiain̈anany Jesosy tambony tany tatỳ. Izy olo lavorary, olo ten̈a nahay raha, kanefa izy tsy nipoerapoera foeky. Tsy ain̈inany fo raha nijireny fa izy nifantoko tamy Babany andan̈itry an̈y.

Ke zaho izikoa fa nandiniky modeliny Jesosy, hitako fa zaho mila man̈ano Fanjakan̈any Zan̈ahary voalohantoeran̈a amy fiain̈ananaka, fa tsy mifantoko amy raha tiako hatao fo. (Matio 6:33) Zahay roeny Laurie izikoa fa navy tan Etazonỳ, tapakevitry zahay fa efa tsy handeha eky fa hidoko eto, ke hifantoko amy fanompoan̈anay.

Zaho taloha izikoa fa hanapakevitry, zaho miasaloha fo. Fa amy zioty ndraiky, zaho efa mahazo taridalan̈a ten̈a tsara. (Isaia 48:17, 18) Nanjary nisy dikany koa fiain̈ananaka, fotony zaho ziô manompo Zan̈ahary sady man̈ampy olo hahay raha momba izy.

Nahaifatatra fo koa vadian̈anay, izikoa zahay roeny Laurie fa nan̈araka toro lalan̈any Baiboly. Ravoravo mare koa zahay fotony nahazo tsaiky man̈angy hely tia Jehovah, sady mahay izy.

Tsy nora fo fiain̈ananay. Fa baka amy fan̈ampiany Jehovah, zahay tapakevitry tsy ho rivan̈a foeky fa hatoky izy fo.​—Ohabolana 3:5, 6.