Misy ranabavy tanora araiky a Kolombia an̈y, Nicole an̈arany, nivolan̈a karaha ty: “Tiako Tran̈o Fivorian̈anay! Ao baka tany hifankahitako amindrô anadahiko ndreky rahavaviko aby io.” Asa mba karaha zen̈y koa anao?

 Kadiriny 63 000 Tran̈o Fivorian̈an’ny Vavolombelon̈on’i Jehovah eran-tany. Izio tany tsara hahavitantsika manompo Zan̈ahary. Fa mbala misy raha beben’izen̈y koa. Karaha ty nikoran̈in’i David, mpisava lalan̈a maharitry baka a Kolombia an̈y: “Tran̈o Fivorian̈antsika io mampisanjy fampianaran̈antsika. Maro olo gaga mahita fomba ikarakaran̈a izio, ke karaha vao lalandava fo izio.” Tsy mandeha ho azy raha zen̈y. Miasa mare atsika man̈adio ndreky mikarakara Tran̈o Fivorian̈antsika. Akôry hahavitantsika zen̈y?

 Irô fiangonan̈a mampiasa Tran̈o Fivorian̈a io tômpin’andraikitry amy fikobabian̈a izio. Ke irô rahalahy ndreky ranabavy aby io man̈adio tsy tapaka Tran̈o Fivoriandrô, man̈amboatra koa raha madinidiniky robaka, baka izio tsy hanjary ho robaka be.

 Fa baka han̈ampian̈a fiangonan̈a hahavita hikobaby Tran̈o Fivorian̈andrô, Sampan-draharaha Mikarakara Fan̈oren̈ana An-toeran̈a (SFA), manendry rahalahy maromaro mampiofan̈a irô olo amy fiangonan̈a ao. Rahalahy mpampiofan̈a araiky miandraikitry Tran̈o Fivorian̈a tsiota faran’ny vitsy, folo faran’ny maro. Izy mitsidiky amy tany misy Tran̈o Fivorian̈a aby io ndreky mampiofan̈a irô mpitory amy fiangonan̈a aby io fomba fikarakaran̈a tany ivoriandrô io. Isaka telo taon̈o izy mizaha Tran̈o Fivorian̈a aby io, ndreky mizaha problemo momba raha mety han̈isy aksidan ndreky raha mila amboarin̈y ao.

 Irô rahalahy ndreky ranabavy aby io ten̈a mankasitraka fampiofan̈ana momba fikarakaran̈a Tran̈o Fivorian̈a io. Misy ranabavy araiky an Inde an̈y, Indhumathi an̈arany, nivolan̈a: “Ten̈a tsara fampiofan̈ana io. Ravoravo zaho nianatra fomba fikobabian̈a tran̈o fivorian̈anay baka izio ho tsara fo.” Karaha ty ndraiky ho Evans, rahalahy araiky baka a Kenya: “Nampianarin̈y zahay fa baka tsy handanian̈a vola be, izikoa fa misy raha hely robaka, efa amboarin̈y edy, amy zen̈y izio tsy hanjary problemo be.”

 Vola mandeha an-jatony firaka andrivony dolara a ampiasain̈a isaka taon̈o ndreky ikarakaran̈a Tran̈o Fivorian̈a araiky, arakaraka tany misy izio, taon̈o nivitany, ndreky isan’ny fiangonan̈a mampiasa izio. Aia ma ahitan̈a vola han̈anaovan̈a zen̈y?

 Baka amy fan̈amezan̈a an-tsitrapô azahoan̈a vola hikarakaran̈a Tran̈o Fivorian̈a. Misy rahalahy araiky baka a Kazakhstan an̈y, Alexander an̈arany, nan̈azava karaha ty: “Sasany amy vola io an̈ifan̈a Internet ndreky raha hafa fampiasain̈a ao, karaha ataon’ny rano ndreky jiro. Vola sasany ndraiky ivangan̈a taratasy fampiasain̈a ankabone ndreky gan, aviô raha fan̈adiovan̈a ndreky pentira.” Misy fikarakaran̈a maventy ndreky ilan̈a volabe koa atao eran-tany, ke fan̈amezan̈a sasany atao nin’ny asa eran-tany io hampiasain̈a amy zen̈y.

 Izikoa fikarakaran̈a Tran̈o Fivorian̈a araiky mandany vola tôkony hampiasain̈a an̈atin’ny fanjava aroe na telo, irô anti-pan̈ahy aby io mila mikoran̈a amy rahalahy mpampiofan̈a amy SFA antsendriky. Ke izikoa iken’ny SFA tetikasa io, volan’ny fan̈amezan̈a eran-tany fo an̈anaovan̈a izio. Tamy taom-panompoan̈a 2023 in̈y, 8 793 tamy tetikasa io vita, aviô vola mandilatran’ny 76, 6 tapitrisa dolara lany tamizio. Diniha baka aroe amindrô tetikasa aby io.

 Ta Angola tan̈y, nisy Tran̈o Fivorian̈a tan̈y, efa 15 taon̈o nivitany, ke naro problemo tamizio tao. Nila nisoloan̈a fily jiaby tao, aviô riba jiaby efa vakivaky, ke olo nipetraka tambadik’izio tao nitarain̈y fa nidiran-drano baka tao zen̈y tran̈ondrô. Ke SFA nandamin̈y tetikasa araiky nandaminan̈a problemo io. Mandeha 9 285 dolara vola nilain̈a tamy tetikasa io. Ravoravo mare irô jirany nitarain̈y in̈y salakady lany fan̈ahy koa irô tamy fomba nan̈anaovan̈a asa io.

 Ta Pologne ndraiky, nisy Tran̈o Fivorian̈a araiky nite tafony, aviô robaka tapi, ke efa tsy mety namboarin̈y eky. Ke SFA nan̈eky fa hamboarin̈y tafon-tran̈o io, aviô hisoloan̈a tapinany. Nandanian̈a vola 9 757 dolara izio. Ke vokany, tsy mila fan̈avaozan̈a maventy eky izio an̈atin’ny taon̈o maro.

 Fikarakaran̈a atao amy Tran̈o Fivorian̈a io tsy vitan’ny mitsitsy volan’ny fan̈amezan̈a fo fa man̈amia voninahitry Jehovah koa. Karaha ty nivolan̈in’i Shaun, rahalahy araiky a Tonga an̈y: “Nohon’ny asa fikarakaran̈a ataontsika io, atsika manompo Jehovah amy Tran̈o Fivorian̈a madio, milamin̈y, aviô mandeha tsara aby raha jiaby ao, ke raha zen̈y mahavy olo man̈amia voninahitry an̈aran’i Jehovah. Tsy men̈atra zahay mikaiky olo handeha hivory amy Tran̈o Fivorian̈a ao.”

 Atsika jiaby mety mitahitahy amy fan̈adiovan̈a ndreky fikobabian̈a tany ivavahantsika io. Misy mpampiofan̈a araiky baka an Australie an̈y, Marino an̈arany, nan̈ambara karaha ty: “Atsika jiaby samy mety mitahitahy, fôtony tombontsoa maventy mikarakara Tran̈o Fivorian̈antsika. Ten̈a ilain̈a fan̈anaovantsika raha zen̈y, fôtony mitsitsy volan’ny fan̈amezan̈a, baka izio hampiasain̈a amy tany ten̈a tôkony ilan̈a zen̈y.”

 Joel, rahalahy araiky an Inde, an̈isan’ny tia mikarakara Tran̈o Fivorian̈a. Ho izy: “Man̈ampy zaho himenimeny hatsaran̈an’ny fiain̈ana amy Paradisa fiarahan̈a miasa amindrô rahalahy aby io.” Nicole, araiky nivolan̈intsika taloha tarỳ in̈y ndraiky nivolan̈a: “Vo tsy ela zay, irô ranadahy aby io nanampin̈y tany nisy rano nitete tamy tran̈o fisehan̈a tao, ke zaho nan̈ano pasifon rapakan’ny tran̈o. Nata zaho tsy nahavita nanampin̈y tany nitete io, zaho mba nahavita nitahitahy baka tsy hisian’ny aksidan.”

 Izikoa anao tihan̈ano asa an-tsitrapô ke tihan̈ampy amy fikarakaran̈a Tran̈o Fivorian̈anarô, mivolàn̈a amin’ny anti-pan̈ahinarô. Mety man̈ano fan̈amezan̈a koa anao, fôtony izio han̈ampian̈a amy fikobabian̈a Tran̈o Fivorian̈anarô ndreky eran-tany koa. Ke izikoa anao tihan̈ano fan̈amezan̈a, mety halatsakanao amy boaty amy Tran̈o Fivorian̈a ao izio, na hatao amy donate.dan124.com. Ten̈a mankasitraka anao zahay, fôtony anao mazoto man̈ano fan̈amezan̈a.