Hitan’ny Filan-kevi-pitantan̈ana fa atsika mila tran̈o an̈ampian̈a atsika hahavita asa fitorian̈a momba Fanjakan̈an’ny Zan̈ahary. Ke ampiasaindrô an̈amboaran̈a tran̈o aby zen̈y vola fan̈amezan̈a sasany. Tamy taom-panompoan̈a 2023, ohatra, nandeha 500 tapitrisa dôlara mahery vola lanindrô fikambanan̈a ara-dàlan̈a ampiasain’ny birôn’ny sampan̈an’ny Vavolombelon̈on’i Jehovah. Natao ino? Nividianan̈a ndreky nan̈oren̈ana aviô nan̈avaozan̈a Tran̈o Fivorian̈a ndreky Tran̈o Fan̈anaovan̈a Fivoriambe, eran-tany. a Tiô koa vola lanin’ny fiangonan̈a eran-tany amy fikobabian̈a Tran̈o Fivorian̈a.

 Ankoatran’izen̈y, ampiasain̈y han̈oren̈ana ndreky hikobabian̈a birôn’ny sampan̈a koa vola fan̈amezan̈a aby io. Birô aby io baka mandamin̈y ndreky mikarakara asa fitorian̈a eran-tany. Marin̈y ndraiky fa efa nitsorin̈y asa atao amy birôn’ny sampan̈a amy zen̈y vola sasany afaka ampiasain̈y han̈oren̈ana aviô han̈avaozan̈a Tran̈o Fivorian̈a ndreky Tran̈o Fan̈anaovan̈a Fivoriambe. Fa ndray zen̈y, mbala be vola ilain̈a han̈amboaran̈a raha robaka ndreky han̈avaozan̈a sampan̈a aby io, aviô hamindran̈a birô aby io amy toeran̈a hafa. Nan̈ino raha aby zen̈y mila ato? Ino aby ma asa atao amy birôn’ny sampan̈a an̈y baka ampadianan̈a asa fitorian̈a? Alô hizahavantsika valin’izen̈y.

 Efa misy mandilatran’ny 30 na 40 taon̈o birôn’ny sampan̈a sasany. Miasa amy Sampan-draharaha Miandraikitry Fan̈oren̈ana Eran-tany i Nicholas, ho izy: “Ndray tran̈o voakobaby karakôry mbala mahaikay ndreky robaka fo koa fa ela ny ela. Ke mila avaozin̈y tran̈o aby io amy zen̈y mahadin̈y elaela ndreky mety ampiasain̈y fo.”

 Maro fan̈ovoan̈a ataon’ny fandaminan̈a, ke tsy maintsy man̈ano raha mifan̈araka amy zen̈y koa Betela. Efa maro, ohatra, birôn’ny sampan̈a nahôrin̈y, kanefa ny raha misy mahaimaro fo isan’ny mpitory. Ke mahaimaro fo mpiasa antsitra-pô ilain̈y hiasa amy birôn’ny sampan̈a, fa prôblemo fo, tsy tandry tran̈o sasany.

 Atsika amy ziôty efa an̈atin’ny andra farany, ke mahaimitombo fo antambo sady atahoran̈a hamono koa. Zen̈y mahavy atsika mila toeran̈a azo antoko (Lioka 21:11) Akôry ataon’ny fandaminan̈a iarovan̈a olo miasa amy Betela baka ho voaro lera misy raha mandalo? Fandaminan̈a mampiasa tekniky niboaka farany koa fa man̈avao tran̈o amy Betela. Raha zen̈y misy mahatsara izy fôtony toeran̈a aby io manjary mbala afaka ampiasain̈y fo ndray lôso antambo, ke ao mety atao toeran̈a han̈ampian̈a olo tatran’ny antambo sady hampandihanan̈a asa fitorian̈a.

 Tan̈atin’ny taom-panompoan̈a 2023, maro raha namboarin̈y tamy Betela mandeha 43, dikan’izen̈y efa marikitry antsasakan’ny Betela eran-tany. Filan-kevi-pitantan̈ana nan̈ara-maso asa aby io. Ten̈a nilain̈y asa fan̈oren̈ana aby io. Ty sasany amy zen̈y:

 Angola. Ho Matt, an̈isan’ny Kômitin’ny Sampan̈a an̈y: “Tanteraka taminay teto ankitin̈y faminanian̈a koran̈in’ny Hagay 2:7. Tan̈atin’ny folo taon̈o fo, nitombo 60 isan-jato isan’ny mpitory! Ke tsy maintsy nampitombosin̈y in-telon’ny tiô isan’ny fianakavian̈an’ny Betela. Kanefa Betela efa tsy tandry, ke Betelita sasany tsy maintsy nan̈ano asa mandilatran’ny tôkony hataondrô sady matetiky miasa fo ndray amy fotoan̈a efa tsy tôkony hiasan̈a.”

 Nisy rahalahy nitindren̈a handiniky fomba mety han̈itaran̈a birôn’ny sampan̈a io. Tamy voanalohany irô nieritreritry tsao tran̈o efa iô fo tôkony havaozin̈y. Zen̈y hitandrô farany tsotra sady malaky. Fa irô koa fa baka nandiniky tsarabe, tontohitry irô fa mety mandanilany vola fan̈amezan̈a atsika izikoa tran̈o efa iô fo havaozin̈y. Ke irô nan̈amia sôso-kevitry hividianan̈a trano araiky marikitry iô, izin̈y aviô havaozin̈y. Ho Matt: “Nisalasala hely Kômitin’ny Sampan̈a koa fa naharen̈y sôso-kevitry baka tamindrô rahalahy aby io nivolan̈a fa sitrany mividy tran̈o ndreky man̈avao izio, fôtony zahay nieritreritry fa tran̈o amboarin’ny fandaminan̈a ny ten̈a tsara. Fa iziôty hitanay tsarabe fa araiky navaozin̈y io ny ten̈a mety aminay. Nitahin’i Jehovah ankitin̈y fanapahan-kevitry in̈y.”

 Mety mbala mila tran̈o hafa koa sampan̈an’i Angola andro hafa an̈y. Fa efa nasian̈a tran̈o mety hitarin̈y amy Betela io ao sady efa namondro tran̈o hafa marikitry iô koa irô. Ke firaka iziô, tran̈o aby io mbala ampy amin’ny asa atao ao, mifan̈araka amy fitombosan̈a be misy an̈y amin’izôty.

 Japon. Efa marikitry 40 taon̈o lôso zay nan̈oren̈ana irô tran̈o voanalohany natao birôn’ny sampan̈a an̈y. Ankamarozany tran̈o aby io mbala tsiary navaozin̈y! Efa nifen̈y mare ndraiky irô nikobaby tran̈o aby io, fa izikoa fa ela ny ela, hita fa nanjary kay mare tran̈o aby io ke mila avaozin̈y aby irô jiaby.

 Koa fa nandeha fotoan̈a, niova koa fiain̈ana tamy Betela. Talohan’ny 2015 ziô, tsotra hely lakoziny tamy tran̈o tsiaraikiaraiky, fôtony tamy zen̈y Betela fo nandoky hanin̈in’ny Betelita. Fa amy ziôty kila olo mandoky hanin̈inany. Ke Betela koa fa navaozin̈y, sambra jiaby samby nasian̈a lakoziny pare tsara amy zen̈y tsy mijaly Betelita koa fa mandoky. Karaha ty nambaran’i Kumiko, ranabavy araiky manompo amy Betelan’i Japon: “Alaizy zaho mandoky amy lakoziny io. Aviô isaka zaho mampiasa izio man̈aboaka fa zaho man̈araka toromariky vaovao amy Betela eto.”

 Asa atao amy sampan̈an’i Japon an̈y ilain̈a mare amin’ny asa fitorian̈a ataontsika eran-tany. (Matio 28:19, 20) Sampan̈a aroe fo man̈ano pirinty Baiboly izy feno eran-tany, an̈atin’izen̈y Japon. Ke sampan̈a an̈y iziô an̈atin’ny man̈apetaka lamasìny mitsentsitry ndreky mamory potiky taratasy ndreky jomôko, baka iarovan̈a fahasalaman̈an’olo miasa amy tany fan̈anaovan̈a pirinty. Efa hely tsy ho araiky tapitrisa dôlara vola lany nividianan̈a ndreky nan̈apitahan̈a lamasìny io. Natao fo raha io amy zen̈y mitohy fo asa amy sampan̈an’i Japon, an̈isan’izen̈y fan̈anaovan̈a pirinty aviô fandifasan̈ana boky ndreky gazety, intsaka eky fa Baiboly.

 Tsiary tapaka fan̈anaovan̈a pirinty Baiboly ndray tiô asa fan̈oren̈ana. An̈isan’ny Kômitin’ny Sampan̈an’i Japon i Trey, ho izy: “Nahainaro fo isan’ny volan̈a nan̈aboahantsika Baiboly tan̈atin’ny fotoan̈a nan̈anaovantsika fan̈oren̈ana in̈y. Nahainaro fo koa Baiboly nilain̈a eran-tany. Ke tsy maintsy nalamin̈y tsara ombian̈a man̈apetaka lamasìny vaovao io, aviô ombian̈a man̈ano pirinty boky ndreky gazety. Naro sampan-draharaha ndreky olo nahay niaraka niasa nahavitan̈a raha jiaby zen̈y.” Tsy nora raha zeny! Fa ndray zen̈y, efa hely tsy ho 220 000 Baiboly vita pirinty isaka fanjava, rango tamy Marsy firaka tamin’ny Aoty 2023. Kanefa tamy fotoan̈a io ny ten̈a naro fan̈oren̈ana nila natao tamy tany fan̈anaovan̈a pirinty. Ny raha namparikian̈a koa, raha zen̈y tsy nampitombo vola lany tamy fan̈oren̈ana io.

 Han̈apitahan̈a panneaux solaires vaovao maromaro tran̈o aby io amy zen̈y mihen̈y vola lany amy koran. Hihen̈y mare vola lanin’ny koran ke kadirin’ny 120 000 dôlara vola ho voatsitsy isaka taon̈o. Baka amy zen̈y koa mahavy lafenaitran’ny tran̈o aby io han̈apitahan̈a vitra telo sôsony, ke kadiriny 10 000 dôlara vola ho voatsitsintsika isaka taon̈o. Marin̈y ndraiky fa lafo vidin’ny raha hatao amy tran̈o aby io baka hitsitsian̈a koran. Fa ny raha misy, fampiasantsika panneaux solaires ndreky lafenaitra vitra aby io hahavy atsika hahavita hitsitsy vola mandilatran’ny 3,5 tapitrisa dôlara, parapirobatany raha aby io! Tsy vitan’izen̈y fo fa raha aby io tsy mandrobaka tontolo iain̈ana.

 Irô tetikasa atao amy sampan̈a aroe io an̈isany ahitan̈a fa be ankitin̈y asa mila atao baka ho vita tsara Betela ke haharaka raha ilain̈y amin’ny asa fitorian̈a ndreky fampianaran̈a. Fa izy fo, mbala tsy vita asa jiaby. Ho Aaron, miasa amy Sampan-draharaha Miandraikitry Fan̈oren̈ana Eran-tany: “Efa maro asa vitantsika, fa mbala maro koa asa mila hatao.” Akôry hahavitan̈a asa jiaby zen̈y? Karaha ty koa nambarany: “Mahatariky mare mpiara-manompo fôtony be vola amezandrô han̈anaovan̈a tetikasa maventy aby io. Misy koa vôn̈ono han̈ano asa an-tsitrapô. Sasany ndraiky efa mandamin̈y prôgramondrô rango iziô baka irô afaka mandray anjara amy tetikasa aby io teteky iô. Raha jiaby zen̈y man̈aboaka tsarabe fa tahin’i Jehovah asa ty. Ke zahay mankasitraka mare ezaka jiaby ataonarô.”​—Salamo 110:3.

 Vola fan̈amezan̈a baka amindrô rahalahy ndreky ranabavy aby io ahavitan̈a man̈ano asa fan̈oren̈ana ndreky fan̈avaozan̈a aby io. Maro man̈ano fan̈amezan̈a baka amy donate.dan124.com. Mersy anarô fôtony anarô mifen̈y mahatariky fo.