Eraka didiny Jesosy, Vavolombelon̈o Jehovah erantany ndreky olo antapitrisany nikahiandro miaraka mankalaza Fahatsiarovan̈a andra nifatesany Jesosy, indraiky isaka taon̈o. (Lioka 22:19) Fankalazan̈a io man̈ampy zahay hangala onon̈o fa ten̈a maventy raha nataony Jesosy taminizy nan̈amia ain̈inany han̈avotan̈a olombelon̈o. Amizio koa ikoran̈ana vokatrany soron̈o nataony in̈y amy fiain̈anantsika amy zioty ndreky aminy amaray.​—Jaona 3:16.

 Na han̈atriky Fahatsiarovan̈a anao amy taon̈o ty na tsy han̈atriky, akory fomba mety azahoanao hatsaran̈a baka amy soron̈o nataony Jesosy? Misy raha aroe maventy nivolan̈iny Jesosy fa mila ataontsika:

1.  1. Mianara raha momba Zan̈ahary ndreky Jesosy. Tamy Jesosy nivavaka tamy Babany andan̈itry an̈y, izy nivolan̈a karaha ty: “Izikoa iro tihahazo fiain̈ana tsisy farany, iro mila mianatra baka mahay anao, Zan̈ahary tokana sady marin̈y, ndreky Jesosy Kristy irakanao.”​—Jaona 17:3.

2.  2. Areha raha nianaranao. Jesosy nivolan̈a fa raha nampianariny mila arehantsika amy fiain̈anantsika. Tamy volan̈anany farany tamy Toriteninany Tan̈abo Bongo in̈y, ohatra, izy nidera lan̈iany olo ‘mitandren̈y volan̈anany ndreky man̈araka zen̈y.’ (Lioka 6:46-48) Nisy fotoan̈a hafa koa izy nivolan̈a: “Izikoa hainaro raha aby zen̈y, ho sambatra anaro koa man̈ano zen̈y.”​—Jaona 13:17.

 Anao ma tihahay raha momba Zan̈ahary ndreky Jesosy? Tianao ma hahita sosokevitry amy fomba mety han̈arehanao raha nianaranao? Ty misy fomba sasany mety han̈ampy anao.

 Fianaran̈a Baiboly tsy man̈efa ataonay io efa nan̈ampy olo maro hahay raha koran̈iny Baiboly ndreky han̈araka izio amy fiain̈anandro.

•   Izikoa anao tihahay raha maromaro momba fianaran̈a zen̈y mandihana amy Taridalan̈a Momba Fianaran̈a Baiboly.

•   Zahava video Tongasoa amy Fianaran̈a Baiboly baka ahitanao karakory atao mianatra Baiboly miaraka amy Vavolombelon̈o Jehovah.

 Indroe isaka herin̈iandra, Vavolombelon̈o Jehovah mandeha mivory amy tran̈o fivavahandro, kahian̈a Tran̈o Fivorian̈a. Amy fivorian̈a aby io an̈y, zahay miaraka mandiniky Baiboly ndreky fomba han̈arehan̈a raha ampianarinizio amy fiain̈ananay.

 Olo jiaby mahazo mandeha amy fivorian̈a aby io fa tsy voatery Vavolombelon̈o Jehovah fo. Arakarakany raha misy amy toeran̈a iô, anao mety afaka mifidy na han̈atriky izio mivantan̈a na baka amy vidéoconférence.

•   Baka ahitanao fandehany raha mety ho hitanao amy fivorian̈a aby io an̈y, zahava video Ino ma Raha Atao amy Tran̈o Fivorian̈a An̈y?

•   Izikoa tianao hahita tany fivorian̈a marikitry anao zahava Fivorian̈any Vavolombelon̈o Jehovah.

 Amy tran̈onkala ty misy lahatsoratra ndreky video maro afaka man̈ampy anao hahay raha maro momba fampianaran̈any Jesosy ndreky nan̈ino ten̈a valera soron̈o nataony in̈y.

 Izikoa tianao ho hay, ohatra, amy karakory mampa posibla lelahy araiky maty ke olo antapitrisany ndraiky loso mahazo hatsaran̈a, vakia lahatsoratra “Nahoana no Lazaina fa Mpamonjy i Jesosy?” ndreky “Nahoana i Jesosy no Nijaly sy Maty?” na koa zahava video Nan̈ino ma Jesosy Naty?