Tamin’ny 24 Fevrie 1924 nanomboko fandaharan̈a voanalohany tamy WBBR, radion’ny Mpianatran’ny Baiboly. a Dimansy hariva tamin’io. Ino ma raha nalefandrô tamin’izio tao? Azôvy aby olo naharen̈y izio? Baka iô akôry nataon’ny Vavolombelon̈on’ny Jehovah nampiasa teknôlôzy farany han̈aparitahan̈a ‘vaovao tsara mikasiky Fanjakan̈an’ny Zan̈ahary amy tany jiaby’?​—Matio 24:14.

 Nanomboko tamin’ny 8:30 folakandra fandaharan̈a voanalohany. Nahadin̈y lera aroe izio! Tamy tran̈o vaovao fangalan̈a feo ta Staten Island, New York, nandifasan̈a fandaharan̈a io. Rahalahy Ralph Leffler nikarakara fandifasan̈a feo. Izy nivolan̈a fa “endrakendraka sady niasaloha mare olo” tao. Izy ho izy lôso diniky karaha ty: “Asa mba haharen̈y raha volan̈inay atỳ edy olo? Nivilômiko raha io, aviô nalefanay fandaharan̈a. Zahay nan̈anten̈a fa handeha tsara raha jiaby.”

 Rahalahy Victor Schmidt nanolotro fandaharan̈a miavaka io tamy zen̈y. Izy niandraikitry radio io. Izy nampiditry mpan̈ano lamoziky ndreky mpihira maro mahay aby io. Irô jiaby io samby Mpianatran’ny Baiboly. Nisy rahalahy araiky antsendriky nisoma piano. Baka iô Cora Wellman nan̈ano hira “Irô Sivampolo Sivy Amby.” Hira io miôrin̈y amy fan̈oharan̈a nataon’i Jesosy momba ôndrikôndriky araiky very. (Lioka 15:4-7) Nisy mpihira hafa koa nihira fan̈araka izy, an̈isan’izen̈y Frederick W. Franz. Izy nan̈ano hira “Azafady.” Izio hira momba zanaka very na zanaka adala.​—Lioka 15:11-25.

 Joseph F. Rutherford niandraikitry asan’ny Mpianatran’ny Baiboly tamy fotoan̈a zen̈y. Izy nan̈ano kabaro fitokanan̈a radio io baka ampiasain̈a “hampandihanan̈a asan’ny Fanjakan̈an’ny Mesia.” Karaha ty ho izy: “Jehovah nan̈ambela olombelon̈o niasa radio, ke azo antoko fa tiany atsika hampiasa izio hampianaran̈a olo fomba han̈atantirahiny faminanian̈anany.”

 Maro tamin’olo tavaratrantin̈ianan’ny Etazonỳ tan̈y naharen̈y fandaharan̈a io. Mandilatran’ny 320 kilometra miala amy tany misy radio io misy tanànan’ny Morrisville, Vermont. Tan̈y nisy lelahy araiky nivolan̈a karaha ty: “Ravoravo zaho naharen̈y tsara fandaharan̈a io. ... Nazava tsara feon’ny Rutherford. ... Tsisy latsaka foeky volan̈anany.” Firaka tamin’olo ta Monticello, ta Floride naharen̈y fandaharan̈a io koa! Ten̈a nahomby radio vaovao io. Maro olo nandefa taratasy fankasitrahan̈a.

 Radio io mbala nanohy nandefa fandaharan̈a momba hafatran’ny Fanjakan̈an’ny Zan̈ahary fo tan̈atin’ny 33 taon̈o. b Tavaratrantin̈ianan’ny Etazonỳ tan̈y ten̈a nandifasan̈a izio. Fa ndraikindraiky nisy radio hafa koa niaraka niasa tamin’ny WBBR, ke an-tapitrisany olo afaka naharen̈y fandaharan̈a tamin’izio ta Etazonỳ, ta Kanada, ndreky tan-tany hafa. Diarin’ny Vavolombelon̈on’i Jehovah tamin’ny 1975 mivolan̈a karaha ty: “Tamin’ny 1933, nahatakatra faran-tampony isan’olo naharen̈y fandaharan̈a tamy radio io. Nisy 408 radio nampiasain̈y nan̈aparitaka hafatra io tamy kontinan tsiota. Nandeha 23 783 kabaro nalefa tamin’ny radio aby io . . . Tamy fotoan̈a io, fandaharan̈a aby io niaraka nalefa tamy radio isan-karazany. Ke lan̈iany olo nitandren̈y radio, ndray aia ndray aia tany nisy izy, afaka naharen̈y fahamarin̈ana man̈amia voninahitry Zan̈ahary.”

 Nisy mpitory kadiriny 1 064 tiô ta Etazonỳ tamy fotoan̈a nanombohan’ny Mpianatran’ny Baiboly nampiasa radio WBBR. Radio io ten̈a nan̈ampy mpitory vitsivitsy aby io nitory vaovao tsara tamin’olo maro. Kanefa tamin’ny 1957, nisy mpitory kadiriny 187 762 ta Etazonỳ. Nisy 653 273 mpitory eran-tany tamy zen̈y. Salakady irô rahalahy ndreky ranabavy mazoto aby io nahainahay nitory isaka tran̈o fo sady nahay karazan̈a fanompoan̈a hafa, fôtony irô nahazo fampiofan̈ana tamy fivorian̈a.

 Irô rahalahy aby niandraikitry asan’ny fandaminan̈a koa fa nahita vokatra tsara aby zen̈y, irô nanapa-kevitry handiniky tsarabe aia ten̈a mahomby, radio sa fitorian̈a isaka tran̈o. Ino vokatran’izen̈y? Irô nanapa-kevitry handafo radio WBBR. Izio zaraiky fo radio mbala nanan̈an’ny Fikambanan̈a Tilikambo Fiambesan̈a sady mbala niasa. Radio io nalafo tamy 15 Avrily 1957. Andra araiky talohan’izio nandifasan̈a fandaharan̈a manokan̈a farany. Tamin’io, nan̈ontanian̈a Nathan H. Knorr nan̈ino radio io nalafo. Izy nan̈azava fa fitorian̈a isaka tran̈o ten̈a nampitombo isan’ny Vavolombelon̈on’i Jehovah. Karaha ty koa ho izy: “Ten̈a nan̈ampy olo maro fandaharan̈a nalefa tamy radio WBBR. Kanefa mitombo mare Vavolombelon̈on’i Jehovah amy faritry tsy maharen̈y fandaharan̈a amy radio izikoa ampitovisin̈y amin’olo amy faritry maharen̈y fandaharan̈a aby io.” Ke hitandrô rahalahy aby io fa fitorian̈a isaka tran̈o ahitan̈a vokatra mandilatran’ny fitorian̈a tamy radio. Fa ndray zen̈y, Vavolombelon̈on’i Jehovah mbala mampiasa teknôlôzy an̈aparitahan̈a vaovao tsara. Taon̈o maro tafara tatỳ, atsika nimpody nampiasa izio ndraiky fa tamy fomba hafa fo.

 Tamy 6 Oktobra 2014, nisy raha niavaka nataon’ny fandaminan̈an’i Jehovah. Nanomboko tamy zen̈y baka nisian’ny fandaharan̈a Tele JW amin’ny Internet. Isaka fanjava, misy fandaharan̈a miboaka amin’izio ao, ke samby afaka mizaha ndreky mitandren̈y izio aby na Vavolombelon̈on’i Jehovah na olo hafa. Irô afaka mizaha izio baka amin’ny Internet, na mampiasa application JW Library na application hafa fizahavan̈a video amin’ny Internet na koa baka amy satelity. c Fa amy toeran̈a sasany, Vavolombelon̈on’i Jehovah mbala mampiasa radio ndreky tele an̈aparitahan̈a vaovao tsara. Amy fomba karakôry?

 Taon̈o vitsivitsy tafara tato, fandaminan̈a nampiasa tele ndreky radion’olo tsy Vavolombelon̈on’i Jehovah handifasan̈a fandaharan̈a fivorian̈a isaka herin̈iandra ndreky fivoriambe amy toeran̈a ratsiratsy Internet. Maro olo tsy Vavolombelon̈on’i Jehovah afaka nahita fandaharan̈a aby io, an̈isan’izen̈y olo lian̈a. Tan̈elan̈elan’ny taon̈o 2021 ndreky 2022, ohatra, misy olo miandraikitry radio maromaro nivolan̈a tamin’ny birôn’ny sampan̈an’ny Afriky Antin̈iana fa maro olo tsy Vavolombelon̈on’i Jehovah nivolan̈a fa tiandrô mare fivorian̈antsika. Maro olo ta Kenia, ta Soudan Atsimo ndreky ta Tanzania nangataka hianatra Baiboly.

 Fa fitorian̈a isaka tran̈o fomba voanalohany an̈aparitahan’ny Vavolombelon̈on’i Jehovah vaovao tsara eran-tany. Tsy zen̈y fo, man̈ano fampirantian̈a ndreky mampiasa tranonkala jw.org koa irô. Olo lian̈a afaka mamaky Baiboly ndreky boky momba Baiboly amy volan̈a mandilatran’ny 1 080 amy tranonkalantsika io. Tsy man̈efa irô man̈ano zen̈y. Ao koa irô afaka mahazo valin’ny fan̈ontanian̈andrô momba Baiboly ndreky mitady tany misy fivorian̈a. Ke vokatran’ny raha aby zen̈y, manjary mahay mora amin’olo fo amy iziôty mahay vaovao tsara momba Fanjakan̈an’ny Zan̈ahary. Karaha raha efa nambaran’ny Baiboly in̈y, vaovao tsara io hambara “amy tany jiaby.”​—Matio 24:14.