Davida nandresy Goliata fotony izy natoky Jehovah. (1Sa 17:45) Jehovah tia mampiasa angovonany hamonjian̈a panomponany. (2Ta 16:9) Akory hataontsika hatoky Jehovah fa tsy hatoky fahaizan̈antsika ndreky raha nandalovantsika tamy fiain̈ana? Misy raha telo ty:

• Mivavaha matetiky. Tsy lera anao tsy nahatohitry fakampan̈ahy ke mangataka familankeloko fo mila mivavaka fa aminy anao tojy fakampan̈ahy in̈y koa mila mangataka angovo amy Jehovah. (Mt 6:12, 13) Baka io koa, tsy lera anao efa nangala fanapahankevitry vo mangataka Jehovah hitahy fanapahankevitrinao, fa alohany anao hanapakevitry koa mila mangataka taridalan̈a aminany ndreky mangataka fahendrena aminany.​—Jk 1:5

• Manàn̈a fahazaran̈a mamaky ndreky mianatra Baiboly. Mamakia Baiboly isanandra. (Sl 1:2) Mangalà fotoan̈a misaintsain̈y iro ohatra amy Baiboly ao, baka io ampihara raha nianaranao tao. (Jk 1:23-25) Izikoa anao fa han̈ano fanompoan̈a, aza matoky raha efa nataonao taloha fa man̈anova preparasion fo. Karaha zen̈y koa amy fivorian̈a. Omàn̈a tsialohaloha raha hatao an̈y, baka anao hahazo hatsaran̈a be baka amizio

• Miaraha miasa amy fandaminan̈any Jehovah. Mila maharaka toromariky farany baka amy fandaminan̈a fo anao, baka io direkty man̈araka izio. (No 9:17) Tandrin̈esa tsarabe antipan̈ahy aby io, izikoa fa man̈amia torohevitry ndreky toromariky.​—He 13:17

ZAHAVA VIDEO TSISY RAHA TOKONY HAVOZOANTSIKA FAN̈INJEHAN̈A AVIO TADIAVA VALINY FAN̈ONTANIAN̈A ABY TY:

• Ino raha nampavozo iro rahalahy ndreky ranabavy aby in̈y?

• Ino raha nan̈ampy iro nandresy vozondro zen̈y?