Vavolombelon̈o Jehovah mino fa toro lalan̈a ndreky fitsipiky amy Baiboly ten̈a man̈ampy iro han̈ano fanapahankevitry tsara sady mamparavoravo Zan̈ahary. (Isaia 48:17, 18) Marin̈y fa tsy zahay namoron̈o toro lalan̈a ndreky fitsipiky aby zen̈y, kanefa zahay von̈ono han̈ano raha mifan̈araka amy zen̈y. Alo zahantsika ino ifandraisany raha aby zen̈y amy fiarahan̈a alohany fanambadian̈a. *

• Fanambadian̈a io raha natao haharitry. (Matio 19:6) Amy Vavolombelon̈o Jehovah, fiarahan̈a alohany fanambadian̈a io karazan̈a lalan̈a havian̈a amy vadian̈a. Ke aminay, izio tsy soma na raha atao kidikidy.

• Fiarahan̈a alohany fanambadian̈a io natao ninolo ampy taon̈o. Tsara izikoa olo efa “mandilatra fotoan̈a fivilarany fahatanoran̈a” man̈ano izio, fotony efa tsy maresaka fan̈irian̈a han̈ano firaisan̈a izikoa fa tapitry fotoan̈a io.—1 Korintianina 7:36.

• Olo aroe koa fa an̈atiny fiarahan̈a io, iro tokony efa von̈ono amy vadian̈a. Fa zen̈y tsy mivolan̈a fa olo araiky koa fa nisaraka na nan̈ano divorsy tamy vadiny efa mety manambady olo hafa edy. Soratra Masin̈y mivolan̈a mazava tsarabe fa fijangajangan̈a zaraiky fo antony mety hisarahan̈a amy vady.—Matio 19:9.

• Izikoa Kristianin̈y araiky man̈iry hanambady, olo finoan̈a araiky aminany fo tokony halainy vady. (1 Korintianina 7:39) Amy Vavolombelon̈o Jehovah, olo finoan̈a araiky zen̈y tsy raha olo man̈aja raha inoany fo fa olo mitovy raha inoan̈a aminany ndreky Vavolombelon̈o vita batisa. (2 Korintianina 6:14) Rango zay, Zan̈ahary efa nan̈iraka panomponany hanambady olo finoan̈a araiky amindro fo. (Genesisy 24:3; Malakia 2:11) Mbala mahatsara atsika fo man̈araka didy zen̈y. Mankamarin̈y zen̈y raha koran̈indro pikaroko aminandra izioty. *

• Tsaiky tokony han̈aja raimandreny. (Ohabolana 1:8; Kolosianina 3:20) Karaha ataony tsaiky mbala vilominy olobeny, anjarany raimandrenindro manapakevitry izikoa zanakandro io efa mety mampiaraka na tsendriky. Anjarandro koa manapakevitry firy taon̈o zanakandro io han̈ano raha zen̈y ndreky ino raha tiandro hataony.

• Izikoa toro lalan̈a baka amy Soratra Masin̈y zen̈y dinihin̈y, anjarany Vavolombelon̈o tsiaraikiraiky manapakevitry hampiaraka izy na tsy hampiaraka alohany izy hanambady, ndreky azovy olo tiany hiarahan̈a. Mifan̈araka tsarabe amy toro lalan̈a ty raha zen̈y: “Samy hitondra entan̈anany aby olo tsiaraikiaraiky.” (Galatianina 6:5) Fa ndray izy man̈ano zen̈y, maro aminolo man̈iry hanambady mangataka torohevitry baka amy Kristianin̈y matotro, fotony haindro fa olo karaha zen̈y tia iro sady mitady raha mahatsara iro.—Ohabolana 1:5.

• Maro amy raha ataonolo mampiaraka tsy mifan̈araka amy Soratra Masin̈y, sady an̈isany fahotan̈a maventy. Baiboly izio man̈iraka atsika hilefa raha jiaby mety hahavy fijangajangan̈a. Tsy firaisan̈a alohany fanambadian̈a fo tafiditry amy zen̈y, fa raha jiaby mety hahavy fiarahan̈andro haloto, karaha ataony mikasikasiky maha lelahy ndreky maha man̈angy aminolo tsy vadiny, na fan̈anovan̈a firaisan̈a amy vava ndreky lavabody. (1 Korintianina 6:9-11) Ndray fan̈anovan̈a raha mety hanaitaitry fan̈irian̈a han̈ano firaisan̈a fo efa “maloto” ndreky halany Zan̈ahary. (Galatianina 5:19-21) Baiboly koa mandrova atsika tsy han̈ano “koran̈a vetaveta.”—Kolosianina 3:8.

• Mamitaka koa fontsika. (Jeremia 17:9) Izio mety hitariky olo araiky han̈ano raha efa hainy fa ratsy. Baka atsika tsy ho voafitaka fontsika io, zay olo man̈ano fiarahan̈a alohany fanambadian̈a io tsy tokony hitokatokan̈a, fotony mety ho azony fakampan̈ahy iro izikoa man̈ano zen̈y. Tsara izikoa misy chaperon na olo atokisan̈a dia araiky amindro. (Ohabolana 28:26) Tsy dia tsara amy Kristianin̈y koa mitady vady aminy Internet, fotony mety tsy hampoiziny aby izy efa tia olo tsy hainy na tsiary hitany aby.—Salamo 26:4.