Ilii a kɛ leŋ ilaoi ta a ɓɛlɛ-see-sɛŋ lɛlɛɛ ta tɛɛ ipɔ? Tɔ̃ya ma a ilii nɛ̃ɛ a ŋanaa, nyaŋ ya ŋwɛli I iyee-see-mui lɛ mɛlɛ-see ti mɛni ma. Ziova da Zisɛ di ɓɛlɛ-see-sɛŋ tɛɛ kupɔ nyii dɛɛi ɓɛlɛ-see-sɛŋ kelee ta ma kwa wɔlɔ zɔlɔ ɓoi. Le ɓa mɛlɛ-see-sɛŋ ti, nyaŋ kwa pɔri nɛi leŋ a gɛɛ kuyee seeɛ mu?

1. Kwa pɔri nɛi leŋ a gɛɛ kuyee seeɛ mɛnii mu Ɣala da Zisɛ di gɛ kuɛi?

Ŋala-kɔlɔi e mo a gɛɛ “nuui kelee a laa a [Zisɛ],” a pai kɛi ɣeniɛ wɔlɔ-wɔlɔ da wɔlɔ-wɔlɔ. (Zɔŋ 3:​16) Kwa pɔri nyiŋi kɛi leŋ? Ve nɔ a gɛɛ ku laa-la pu Zisɛ kponoi. Maa nɛ̃ɛi ŋɔnɔ kumɛni-kpɛtɛɛ-ŋai da mɛni-ŋai kwa gɛi, di nɛ a gɛɛ laa-la kaa kuyeei. (Zĩi 2:​17) Kwa kulaa-lai lɛ kulono pere da kutua-pere su, a kulaoi-lai su kpanaŋ a Zisɛ da Naŋ Ziova.​—Zɔŋ 14:​21 lono.

2. Kpɔŋ mɛni-kpanaŋɔɔ kɛɛ leŋ ɓe a pɔri kpɔnii kua a gɛɛ ku kuyee-see-mui lɛ mɛnii Ziova da Zisɛ di gɛ kuɛi mɛni ma?

Tãi dikɛ pa Zisɛ paai la maa ɣele-wulii, e ŋɔnɔ pere takpɛni lɛ ŋɔpolu-ɓelai dia nyii da pɔri diyee-see-mui lɛi la ŋɔsaai mɛni ma. E mo dia a gɛɛ di pa dikie ma kpɔŋ mɛni-kpanaŋɔɔ ta mɛni ma nyii Ŋala-kɔlɔi a doli a “Kunuu-namui Ŋɔɣele-wulii Mii-sɛŋ,” nyii kwa ŋɔnɔ doli a Korai Ŋɔsaa Kili-too-ŋa Kpɔŋ. (1 Kɔleŋtiɛŋ 11:​20) Zisɛ e nyiŋi kɛ a gɛɛ ŋɔsia-ɓelai da tɔ̃ya Korai-ɓela kelee di gɔlɔŋ a gɛɛ e ŋɔfulu-laai tɛɛ kumɛni ma. Zisɛ kɛɛ lonoi e pilaŋ gbɔŋ ŋi ma, e mo nyɛɛi: “Ka nyiŋi kɛ ŋgili e lɛɛ kaŋa.” (Luu 22:​19) Ya li gbɔŋ ŋi ma a tãi kelee, a nɛ a gɛɛ ŋwɛli-kɛ-maa kɛtɛi Ziova da Zisɛ di nɛ kumɛni mai kaa nii ikili-ŋa.

 MƐNI TAMAA MAA-KƆRI

3. Le ɓe kwa pɔri gɛi a gɛɛ ku kuyee-see-mui lɛ?

Ikili-ŋa sia a kɛ ikɛ pa lɛɛi yai, gɛ ni nuu ta e pa a gɛɛ e I ɓalo. Ya pai nĩai a maa felaa mɛnii nuui ti e gɛ yɛi mɛni ma? Kpaa ya pai pere kɔrii I nɛ a gɛɛ iyee seeɛi mɛnii mu nuui ti e gɛ yɛi?

Kwa pɔri wɔlɔ-wɔlɔ fulu-laa sɔlɔ ɓoi Ziova ŋɔɓɛlɛ-seei sarai. 1 Zɔŋ 4:​8-10 lono, gɛ ni ka lono e pilaŋ mare-kɛɛ-ŋai ŋi dia:

• Le ɓe Zisɛ ŋɔsaai kɛ a ɓɛlɛ-see-sɛŋ mɛni-kpanaŋɔɔi?

• Ilii kaa leŋ e pilaŋ mɛnii ma Ziova da Zisɛ di gɛ yɛi?

Kwa pɔri kuyee-see-mui lɛi leŋ mɛnii Ziova da Zisɛ di gɛ kuɛi mɛni ma? 2 Kɔleŋtiɛŋ 5:​15 da 1 Zɔŋ 4:​11; 5:3 lono. Ka kpɛɛ ŋala-kɔlɔ-kpua-ŋai lonoi tɛitɛi, ka lono e pilaŋ mare-kɛɛ ŋi ma:

• Yɛɛ berei ŋala-kɔlɔ-kpuai ti e mo lai, le ɓe kwa pɔri gɛi a gɛɛ ku kuyee-see-mui lɛ?

4. Zisɛ pɔɔ kɔɔŋ

Kwa ŋɔnɔ kuyee-see-mui lɛ a Zisɛ pɔɔ-kɔɔŋɔɔ. 1 Pitɛ 2:​21 lono, gɛ ni ka lono e pilaŋ mare-kɛɛ ŋi ma:

• Pere sii kɛɛ leŋ ɓe ya pɔri Zisɛ pɔɔ-kɔɔni la a nɛlɛɛ?

• Le ɓe a kɛ Zisɛ Ŋɔsaa Kili-too-ŋa Kpɔŋ ma?

 MƐNI-ŊUŊ-ŊAI YAA MAA-KƆRII

Kwa yee-see-mu lɛ mɛnii Zisɛ e gɛ kuɛi mɛni ma a kɛ kwa laa-la pu gbonoi, kukɛ li Ŋɔsaa Kili-too-ŋa Kpɔŋ ma.

Gili-too-ŋa mare-kɛɛ-ŋai

• Laa-la puɔɔ Zisɛ kponoi sukulai ɓa le?

• Ya pai ŋwɛlii I iyee-see-mui lɛ leŋ mɛnii Ziova da Zisɛ di gɛ yɛi mɛni ma?

• Le mɛni ɓe nɛlɛɛi la a gɛɛ I li Korai Ŋɔsaa Kili-too-ŋa Kpɔŋ ma?