Chikalata Chakwawula kwa Aloma 15:1-33
15 M’weji ŵatuli ŵakulimbangana tukusosekwa kwakamuchisya ŵele ŵali ŵangalimbangana, mmalo mwakwamba kulisangalasyaga achimsyewe.
2 Jwalijose atendeje yambone yakumsangalasya mjakwe kuti amlimbikasye mjakwejo.
3 Pakuŵa atamose Klistu nganalisangalasya msyene, mpela muyalembedwele kuti, “Chipongwe cha ŵandu ŵakwanyosya ŵalakwe chingwilile une.”
4 Pakuŵa yindu yosope yayalembedwe m’Malemba kalakalako, yalembedwe kuti yitujiganye. Soni tukwete chembecheyo ligongo Malembaga gakusatukamuchisya kupilila soni gakusatulimbikasya.
5 Sambano Mlungu jwakusatulimbikasya soni kutukamuchisya kupilila amkamuchisyeje jemanja kuti mkole nganisyo mpela syaŵakwete Klistu Yesu,
6 ni chakulinga chakuti jemanja mŵe ŵakamulana pakumchimbichisya Mlungu, jwali Atati ŵa Ambuje ŵetu Yesu Klistu.
7 Myoyo mpochelaneje chenene, mpela muŵatupochelelesoni Klistu, kuti Mlungu achimbichikwe.
8 Pakuŵa ngumsalila jemanja kuti Klistu jwaŵele mtumiki jwa ŵandu ŵawumbale pakusaka kulosya kuti Mlungu ali jwakuwona, soni pakusaka kusimichisya kuti yaŵasasile Mlungujo kwa achinangolo ŵawo yichikwanilichikwa.
9 Nambosoni kuti ŵandu ŵamitundu jine amchimbichisye Mlungu ligongo lya chanasa chakwe. Mpela mwagakusaŵechetela Malemba kuti, “Ni ligongo lyakwe chinjakwesya ŵalakwe pasikati pa ŵandu ŵamitundu jine, soni chinjijimba nyimbo syakuchimbichisya lina lyawo.”
10 Malemba gakusasalasoni kuti, “Jemanja ŵandu ŵamitundu jine, msangalale pampepe ni ŵandu ŵakwe.”
11 Lilemba linesoni likusati, “Mumchimbichisye Yehofa jemanja ŵandu ŵamitundu josope, soni ŵandu wosope amchimbichisye jwalakwe.”
12 Nambosoni Yesaya ŵatite, “Pachiŵa jwinejwakwe kutyochela m’liŵasa lya Jese juchachilamulila ŵandu ŵamitundu josope, mwamti mitundu josope jichijembecheya yambone kutyochela kwa jwalakwejo.”
13 Mlungu jwakusapeleka chembecheyo ampe jemanja chisangalalo chosope soni mtendele ligongo mkusimumkulupilila. Jwalakwe atende yeleyi kuti mkole chembecheyo chisyesyene mwamachili ga msimu weswela.
14 Sambano achalongo achimjangu, une ndili jwakusimichisya kuti jemanja mkutenda yindu yambone yejinji, soni mkumanyilila yindu yosope nambosoni mkupakombola kwajiganya ŵane.
15 Atamose yili myoyo, une namlembele jemanja yindu yine mwangapita mumbali ni chakulinga chakuti namkumbusyesoni. Ndesile yeleyi ligongo lya umbone mtima wekulungwa wambele Mlungu.
16 Napochele umbone mtima welewu kuti mbe mtumiki jwa Klistu Yesu jwakutumichila ŵandu ŵamitundu jine. Une ngulipeleka pa masengo geswela gakulalichila ngani syambone sya Mlungu, ni chakulinga chakuti ŵandu ŵamitundu jineŵa aŵe mpela mbopesi jakumsangalasya Mlungu, jeswejele ni msimu weswela.
17 Une ngusangalala ligongo ndili jwakumkuya jwa Klistu Yesu soni ligongo ngutenda masengo ga Mlungu.
18 Ngangusaka kuŵecheta chilichose chandesile namsyene, nambo chingambe kuŵecheta yatesile Klistu kupitila mwa une kuti ŵandu ŵamitundu jine ampikanile jwalakwejo. Jwalakwe atesile yeleyi kupitila m’maloŵe soni yitendo yangu.
19 Ligongo lya yakusimonjesya yamachili yawutesile msimu wa Mlungu, jemanjajo apikanile ngani syambone syakwamba Klistu syambele ndili mkulalichila kutandila ku Yelusalemu mpaka ku Iluliko.
20 Chakulinga changu chaliji kuŵambala kulalichila ngani syambone m’madela gele ŵandu akumanyilila kala yakwamba Klistu. Natesile yeleyi kuti ngatanda kutaŵa pamalo pele jwine ŵapatandite kala.
21 Yeleyi ni yagakusasala Malemba kuti, “Ŵandu ŵele nganasalilidwe yakwamba jwalakwejo chachimwona, soni ŵele nganapikaneje yakwamba jwalakwejo chachimanyilila.”
22 Ni ligongo lyakwe ndaŵi syejinji nalepelaga kwika kwa jemanja.
23 Nambo sambano malisisye masengo gangu gakulalichila m’madela gelega, soni kwa yaka yejinji mbele ndili mkusachilila kwika kumangwawoko.
24 Myoyo ngukulupilila kuti chituwonegane paulendo wangu wakwawula ku Sipaniya. Paulendowu chinjijima kweleko kuti tukunguluche kwakandaŵi, kaneko jemanja chimchimbechesya panandi.
25 Nambo apano ngusaka kwawula ku Yelusalemu kuti ngatumichile ŵaswelawo.
26 Pakuŵa achalongo achimjetu ŵa ku Makedoniya soni ku Akaya apeleche yindu yawo ni mtima wosope kuti yikakamuchisye ŵaswela ŵane ŵali ŵakulaga ku Yelusalemu.
27 Jemanjaji atesile yeleyi ni mtima wosope ligongo yaliji mpela akwete ngongole ni jemanjajo. Pakuŵa naga achalongo achimjetu ŵa ku Yelusalemu ŵagaŵile jemanjajo yindu yakutyochela kwa Mlungu, jemanjajosoni ŵasosekwaga kwakamuchisya achalongo achimjetuwo pa yakusoŵa yawo.
28 Myoyo pachingayiche nayo yinduyi ku Yelusalemu ni kusimichisya kuti jwalijose apochele, chinjipitila kumangwawoko paulendo wangu wa ku Sipaniya.
29 Nambosoni ngumanyilila kuti pakwika kweleko chinjiyika ni upile wekulungwa wakutyochela kwa Klistu.
30 Sambano achalongo achimjangu, kupitila mwa Ambuje ŵetu Yesu Klistu soni kupitila mu chinonyelo chakwika ni msimu, ngumŵenda kuti mlimbichile kupopela pampepe ni une kuti Mlungu angamuchisye.
31 Mumbopeleleje kuti Mlungu angulupusye kwa ŵandu ŵangakulupilila ŵali ku Yudeya soni kuti achalongo achimjetu ku Yelusalemu akapochele chenene mtuka wachinjigale.
32 Chakulinga changu chili chakuti, naga Mlungu akusaka, mbiche kwa jemanja mwakusangalala soni kuti tulimbikasyane.
33 Mlungu jwakusapeleka mtendele aŵe ni jemanja wosope. Ame.
