Numeli 20:1-29
20 M’mwesi wandanda, Ayisalayeli wosope ŵayiche m’chipululu cha Sina ni kutanda kutamaga ku Kadesi. Kweleko ni kuŵawilile Miliyamu soni ni kuŵamsichile m’malembe.
2 Sambano kweleko ŵanduwo ŵasoŵile mesi mwamti ŵasongene pampepe ni kutanda kumjimuchila Mose soni Aloni.
3 Ŵanduwo ŵakanganaga ni Mose ali kumŵecheta kuti, “Yikaliji chenene tukagambile kuwa yimpepe ni achalongo achimjetu ŵaŵawile pameso pa Yehofa ŵala.
4 Ligongo chichi myiche nawo msongano wa Yehofawu m’chipululu muno? Ana mkusaka kuti m’weji tuwile amuno pampepe ni yilango yetu?
5 Soni ana ligongo chichi mmwejo mwatukopwesye m’chilambo cha Iguputo ni kutuyikasya kumalo gakusakala mpela agano? Pangali mbeju jilijose jampaka jimele akuno, atamose yitela ya nguju, ya mipeleya soni yimanga yachisungu* nganiyiŵa yimesile. Nambosoni akuno kwangali mesi gakuti tumweje.”
6 Kaneko Mose ni Aloni ŵatyosile pameso pa ŵandu ŵaŵasongenewo ni kwawula kumlango wa chitenti chakusimanilana. Paŵayiche kweleko jemanjajo ŵatindiŵele ni kwinama mpaka ngope syawo pasi. Kaneko kuŵala kwa uchimbichimbi wa Yehofa kwatandite kuwonechela kwa jemanjajo.
7 Sambano Yehofa ŵamsalile Mose kuti,
8 “Mjigale ndodo, soni mmwejo ni Aloni achimwene ŵenu mwasonganganye ŵandu wosopewo pampepe. Kaneko ŵanduwo ali mkulola mŵechete kwa lwala kuti lumkopochesye mesi, mwamti mesi chigakopoche kutyochela palwalapo gakuti ŵandu wosopewo amwe pampepe ni yilango yawo.”
9 Myoyo Mose ŵajigele ndodojo pameso pa Yehofa, mwakamulana ni yaŵatite Mlungu pakumlamula jwalakwejo.
10 Kaneko Mose soni Aloni ŵasongangenye ŵanduwo pampepe pasogolo palwalalo ni ŵasalile jamanjajo kuti, “Sambano mpikane jemanja ŵandu ŵakwimuchila. Ana mkusaka tumkopochesye mesi kutyochela mu lwalalu?”
11 Ali aŵechete maloŵe gelega, Mose ŵakwesiye ndodo jila mwinani ni kuputa lwalalo ni ndodojo kaŵili. Pelepo mesi gejinji gatandite kukopoka kutyochela palwalalo mwamti ŵandu wosopewo soni yilango yawo ŵatandite kumwa mesigo.
12 Kaneko Yehofa ŵamsalile Mose soni Aloni kuti, “Jemanja nganimungulupilila une soni nganimunjimbichisya pameso pa Ayisalayeli mwakulosya kuti ndili jwamswela. Paligongo lyeleli ngasimwujinjisya mpingo wosope wa ŵanduŵa m’chilambo chachinjapa jemanjaji.”
13 Gelega galiji mesi ga ku Meliba* kwele Ayisalayeli ŵakangene ni Yehofa. Palisiku lyeleli, Mlungu ŵalosisye kuti ali jwamswela pasikati pa ŵanduwo.
14 Kaneko Mose ŵatumisye ŵamitenga kutyochela ku Kadesi kwawula kwa mwenye ŵa ku Edomu kuti akapeleche utenga. Utenga wakwe waliji wakuti, “Achalongo achimjawo Ayisalayeli akuŵecheta kuti, ‘Wawojo akumanyilila chenene yipwetesi yosope yatusimene nayo.
15 Achinangolo ŵetu ŵapite ku Iguputo, ni twatemi kweleko kwa yaka yejinji mwamti Aiguputo ŵatulagasisye m’weji soni achinangolo ŵetuwo.
16 Pambesi pakwe twalisile pameso pa Yehofa, mwamti jwalakwe ŵapikene kulila kwetu ni ŵatumisye lilayika ni kutukoposya m’chilambo cha Iguputo. Sambano apano tuli ku Kadesi, msinda wawutesile malile ni chilambo chawo.
17 Chonde atukunde kuti tupite nawo m’chilambo chawochi. Ngatupita m’migunda jawo jilijose atamose ja mipeleya soni ngatumwa mesi ga m’chisima chawo chilichose. M’wejo chitugambeje kwenda mumsewu wakolanjidwa kuti Msewu wa Mwenye, ngatugalawuchila kumlyo kapena kumchiji mpaka tuli tumalisisye kupita m’chilambo chawochi.’”
18 Nambope mwenye ŵa ku Edomu ŵamjanjile jwalakwejo kuti, “Mkapitila m’chilambo chetu ligongo naga mkutenda yeleyo chimbiche kwa mmwejo ni upanga.*”
19 Pakwanga Ayisalayeliwo ŵatite, “M’wejo chitugambeje kwenda mumsewupe, naga m’wejo kapena yilango yetu yikumwa mesi gawo chitulipile. M’wejo ngatukusaka yejinji, tukusaka tugambe kupita nawo m’chilambo chawochi basi.”
20 Nambope mwenyewo ŵajanjile kuti, “Jemanjatu ngampitila m’chilambo chetu chino.” Paŵamalisisye kuŵecheta yeleyi, mwenyewo pampepe ni ŵandu ŵajinji soni asilikali ŵamachili ŵanyakwiche kuti akasimane ni Ayisalayeliwo.
21 Myoyo mwenye ŵa ku Edomu ŵakanile kuti Ayisalayeli apitile m’chilambo chawo. Pelepo Ayisalayeli ŵagalawiche ni kupitila litala line.
22 Ayisalayeli wosope ŵatyosile ku Kadesi ni kwawula ku Litumbi lya Holi.
23 Litumbi lya Holi lyatesile malile ni chilambo cha Edomu. Ali kweleko, Yehofa ŵamsalile Mose soni Aloni kuti,
24 “Aloni chawe soni kusichidwa m’malembe mpela mwayaŵelele ni achinangolo ŵakwe. Jwalakwe ngasajinjila m’chilambo changwapa Ayisalayeli ligongo lyakuti jemanjamwe nganimpikanila yanamlamwile yakwamba mesi ga ku Meliba.
25 Mumjigale Aloni soni mwanache jwakwe Eliyesala ni mkwele nawo mu Litumbi lya Holi.
26 Kweleko mkamwule Aloni yakuwala yakwe yakusawala mpela jwakutaga mbopesi ni kum’wecha Eliyesala mwanache jwakwe. Kaneko Aloni chakawile kukoko.”
27 Myoyo Mose ŵatesile mwakamulana ni yaŵatite Yehofa pakumlamula jwalakwejo. Jemanjajo ŵakwesile mu Litumbi lya Holi Ayisalayeli wosope ali mkulola.
28 Kaneko Mose ŵamwusile Aloni yakuwala yakwe yaŵawalaga mpela jwakutaga mbopesi ni kum’wecha mwanache jwakwe Eliyesala. Panyuma pakwe, Aloni ŵawilile penani pa litumbilyo. Pambesi pakwe Mose ni Eliyesala ŵatulwiche m’litumbilyo.
29 Ayisalayeliwo paŵayiweni kuti Aloni awile, ŵandu wosope ŵalisile malilo ga Aloni kwa masiku 30.
Maloŵe Gamwiŵanda
^ Yeleyi yili yisogosi yakola mbele syakuwoneka mpela yimanga.
^ Kugopolela kuti “Kangana.”
^ Upanga ukusawoneka mpela chipula chekulungwa chakutema kosekose.
