Numeli 5:1-31
5 Yehofa ŵapitilisye kuŵecheta ni Mose kuti,
2 “Mwalamule Ayisalayeli kuti amtyosye ku matenti gawo mundu jwalijose jwakwete ulwele wa matana soni jwalijose jwakwete ulwele wakusulula yindu kuyalo, nambosoni mundu jwalijose jwali jwangaswejela ligongo lyakuti akwayiye mundu jwam’we.
3 Mumtyosye jwalijose, chinga jwamlume kapena jwamkongwe. Mwatyosye ŵandu ŵelewo ni kwajawusya kusa kwa malo gakunjile matenti gawo ni chakulinga chakuti akasakasya matenti ga ŵandu ŵele une ngutama pasikati pawo.”
4 Pelepo Ayisalayeli ŵatyosisye ŵanduwo ni kwajawusya kusa kwa malo gaŵakunjile matenti gawo. Ayisalayeliwo ŵatesile yeleyi mwakamulana ni yele Yehofa ŵamlamwile Mose.
5 Yehofa ŵapitilisye kuŵecheta ni Mose kuti,
6 “Mwasalile Ayisalayeli kuti, ‘Naga jwamlume kapena jwamkongwe atesile yindu mwangakulupichika kwa Yehofa mwakumlemwechesya mjakwe, mundu jwelejo akwete magambo.
7 Mundu jwelejo asaleje pameso pa ŵandu ulemwa watesilewo. Kaneko jwalakwe amlipileje mundu jwamlemwechesyejo, soni yalipileyo yiŵeje yakwanila mwakamulana ni magambo gakwego nambosoni ajonjechesyepo panandi.*
8 Nambo naga mundu jwamlemwechesyejo awile soni nganakola mlongo mjakwe jwampaka apochele malipilogo, yindu yalipileyo yijawuleje kwa Yehofa kuti yiŵe ya jwakutaga mbopesi. Pakupeleka yinduyo ayicheje ni ngondolo jamkambako kuti jwakutaga mbopesi ajipeleche kwa Mlungu pakusimasya ulemwa wa mundujo.
9 “‘Yakupeleka yiliyose yakwawula kwa Mlungu yayiche nayo Ayisalayeli kwa jwakutaga mbopesi yiŵeje ya jwakutaga mbopesijo.
10 Yindu yiliyose yeswela yayiche nayo mundu, yiŵeje ya jwakutaga mbopesi. Chindu chilichose chapeleche mundu kwa jwakutaga mbopesi, chindu chelecho chiŵeje cha jwakutaga mbopesijo.’”
11 Yehofa ŵapitilisye kuŵecheta ni Mose kuti,
12 “Mŵechete ni Ayisalayeli. Mwasalile jemanjajo kuti, ‘Mpaka yitendekwe kuti ŵakongwe ngakwenda chenene soni nganaŵa ŵakulupichika kwa ŵamkwawo.
13 Nambosoni mpaka yitendekwe kuti ŵakongwewo agonene ni ŵalume ŵane nganijo ni kuŵa jakusisika atamosesoni kwa ŵamkwakwe. Yeleyi yatendekasisye ŵakongwewo kulisakasya, nambo pangali umboni wakusimichisya kuti atesile yeleyo kapena kwakamula ali mkutenda yeleyo.
14 Sambano naga yitendekwe kuti ŵalumewo akutenda wiwu soni akwakayichila ŵamkwawo kuti aŵele ŵangakulupichika, chinga ŵakongwewo alisakesye kapena nganalisakasya, pelepo mtendeje ayi:
15 Ŵalumewo ŵajigaleje ŵamkwawowo ni kwawula nawo kwa jwakutaga mbopesi. Pakwawula ajigaleje utandi wa balele kuti uŵe mbopesi ja ŵakongwewo. Utandiwo mlingo wakwe uŵeje mbali jimo kutyochela pa mbali 10 sya efa jimo.* Mu utandiwo ngakusosekwa kutaga mawuta kapena kuŵika ubani penani pakwe, pakuŵa jeleji jili mbopesi jambeju jakupeleka ligongo lya wiwu, jajili mbopesi jakumbusya naga jwamkongwejo ali jwakulemwa kapena iyayi.
16 “‘Jwakutaga mbopesijo ayicheje najo pasogolo jwamkongwejo ni kumjimika pameso pa Yehofa.
17 Jwakutaga mbopesijo ajigaleje mesi gapadela* m’chiŵiga. Kaneko jwalakwe akokoleje line mwa litaka lyapasi mkati mwa chitenti ni kulitaga m’mesimo.
18 Jwakutaga mbopesi amjimicheje jwamkongwejo pameso pa Yehofa ni kumgopola mpango mumtwe wakwe. Kaneko aŵicheje mmyala mwa jwamkongwejo mbopesi jambeju jakumbusya ulemwa wakwe, jajili mbopesi jakupeleka ligongo lya wiwu jila. Nambosoni jwakutaga mbopesijo ajigalejesoni mesi gala, gagalisoni gakuŵaŵa gakwikasya matembelelo.
19 “‘Kaneko jwakutaga mbopesijo amlumbilikasyeje jwamkongwejo. Jwalakwejo amsalileje kuti, “Naga nganimgona ni ŵalume ŵane chilombanilane* ni ŵamkwenuŵa soni mjesileje chenene mwamti nganimlisakasya, naga yili myoyo mesi gakuŵaŵa gakwikasya matembeleloga gakamwulasya.
20 Nambo naga chilombanile ni ŵamkwenuŵa nganimjendaga chenene mwamti mlisakesye mwakugona ni ŵalume ŵane chitamilecho mli paulombela ni ŵamkwenuŵa matembeleloga chigaŵe pa mmwejo.”
21 Kaneko jwakutaga mbopesijo amlumbilikasyeje jwamkongwejo kuti naga ŵatesile yeleyo matembelelogo gamgwile. Jwalakwe amsalileje jwamkongwejo kuti, “Yehofa atendekasye kuti ŵandu pakusala matembelelo soni kulumbila akamulichisyeje masengo lina lyenu mpela chisyasyo cha mundu juŵapochele matembelelo. Naga yili yisyene kuti mwatesile yeleyi, Yehofa amtendekasye mmwejo kuŵa ŵangaŵeleka* soni atendekasye kuti lutumbo lwenu luyimbangane.
22 Mesi gakwikasya matembeleloga gajinjile m’matumbo mwenu ni kutendekasya kuti lutumbo lwenu luyimbangane, soni gatendekasye kuti mŵe ŵangaŵeleka.” Pelepo jwamkongwejo ajanjeje kuti, “Elo yiŵe mmomo!”*
23 “‘Panyuma pakwe jwakutaga mbopesi alembeje matembeleloga m’buku, kaneko afufuteje matembelelogo pakamulichisya masengo mesi gakuŵaŵago soni matembelelogo gagwileje m’mesi mmomo.
24 Panyuma pakwe ampeje jwamkongwejo mesi gakuŵaŵa gakwikasya matembelelogo kuti amwe. Mesigo pachigajinjile m’matumbo mwakwe chapikane kupweteka.
25 Kaneko jwakutaga mbopesi ajigaleje mmyala mwa jwamkongwejo mbopesi jambeju jakupeleka ligongo lya wiwu jila. Mbopesijo ajikwesyeje mwinani ni kujiyuya aku nakuku pameso pa Yehofa. Kaneko jwalakwe ayicheje najo mbopesijo kugali malo gakupelechela mbopesi.
26 Jwakutaga mbopesijo asapuleje mbopesi jambejujo kugumbala ligasa limo ni kujitaga pamoto pamalo gakupelechela mbopesi kuti jikoposyeje lyosi. Mbopesi jasapwilejo chijijimile mbopesi jambeju josopejo. Pambesi pakwe amsalileje jwamkongwejo kuti amwe mesi gala.
27 Jwamkongwejo pamwele mesigo, naga jwalisakesye soni ŵatesile yangakulupichika kwa ŵamkwakwe mesi gakwikasya matembelelo gala pagajinjile m’matumbo mwakwe ni kumpweteka, pelepo lutumbo lwakwe luchiyimbangana soni chachiŵa ŵangaŵeleka* nambosoni ŵandu chachikamulichisyaga masengo lina lyakwe mpela chisyasyo cha mundu juŵapochele matembelelo.
28 Nambope naga jwamkongwejo nganalisakasya soni ali jwamswela, pelepo jwalakwe ngasapochela chilango* chelechi. Nambosoni chachipitilisya kuŵa jwakuŵeleka.
29 “‘Lyeleli lili lilamusi lyakuti mkuyeje naga jwamlume akutenda wiwu ligongo lyakuti ŵamkwakwe nganajenda chenene soni alisakesye pandaŵi jali nawo paulombela,
30 kapena naga ŵalume akutenda wiwu ligongo lyakwakayichila ŵamkwawo kuti atesile yindu mwangakulupichika, ŵalumewo ayicheje nawo ŵakongwewo pameso pa Yehofa. Kaneko jwakutaga mbopesi atendeje yosope yayili mu lilamusi lyeleli.
31 Ŵalumewo chachiŵa ŵangali magambo nambo ŵakongwe chachijanga magambo naga akwasimana kuti ali ŵakulemwa.’”
Maloŵe Gamwiŵanda
^ Kapena kuti, “Alipileje ni mbiya sya silifa mtengo wa chinducho, soni pa mbiya syachalipilesyo, pa mbiya msano silisyose ajonjechesyejepo mbiya jimo.”
^ Mlingo welewu uli chiŵandika kilogalamu jimo. Alole Yakumbesi B14.
^ Mu Chihebeli ŵatiga, “mesi geswela.”
^ Kapena kuti, “pandaŵi jamwaliji pasi pa ulamusi wa ŵamkwenuŵa.”
^ Mu Chihebeli ŵatiga, “atendekasye kuti chiga chenu chinyale.”
^ Mu Chihebeli ŵatiga, “Ame! Ame!”
^ Mu Chihebeli ŵatiga, “soni chiga chakwe chichinyala.”
^ Ŵane akusati “chamuko.”
