Pasaka jwakumalisya juŵatesile Yesu jwaliji jwakusosekwa mnope. Ligongo lyakuti Yesu jwamanyililaga kuti chawulajidwe pachangakaŵa, jwatesile Pasaka ni ŵandumetume ŵakwe. Soni ŵatandisye mwambo wa Chakulya cha Ligulo cha Ambuje, wawukusatendekwa chaka chilichose. Myoyo ŵamsalile Petulo ni Yohane kuti akalinganye chipinda chakutendela Pasaka (Luk. 22:7-13; Alole chiwulili chachili pa chikuto.) Yeleyi yikutukumbusya kuti tukusosekwa kukosechela Chikumbuchilo chele tuchitenda pa Malichi 27. Mpingo ukusalinganya yakupata mundu jwakuŵecheta ngani, yimanyilo ya Pachikumbuchilo, soni yine. Nambope ana jwalijose pajika akusosekwa kutenda chichi pakukosechela Chikumbuchilo?

Akosechelesye mtima wawo. Aŵalanje soni kuganichisya Malemba gagakusaŵalanjidwa pandaŵi ja Chikumbuchilo. Ndandanda ja Malembaga jikusasimanikwa mkabuku ka Kulijiganya Malemba Lisiku Lililyose. Soni mu Kabuku Kakamuchisya Pakulijiganya Maloŵe ga Mlungu, mtwe 16. (Alolesoni ngani jajikusimanikwa mu kabuku ka Yakutendekwa pa Msongano ni Umi Wetu Wachiklistu, wa Epulo 2020.) Maŵasa mpaka gakambilane pa kulijiganya kwawo Baibulo mpela liŵasa ya kusosekwa kwa mbopesi, mwakuwungunya m’buku ja Watch Tower Publications Index kapena mu Kabuku Kakamuchisya Kuwungunya Ngani.

Ŵaŵilanjile ŵane kuti chatende nawo Chikumbuchilo. Akamule nawo masengo gakuŵilanjila ŵandu ku Chikumbuchilo. Mpaka ŵaŵilanjile ŵandu ŵane mpela maulendo gawo gakuwilisya, ŵandu ŵaŵatendaga nawo lijiganyo lya Baibulo, ŵandu ŵatukwamanyilila, soni ŵachibale ŵetu. Achakulungwa ŵa mumpingo akusosekwa kwaŵilanjila ŵandu ŵaŵalesile kusongana. Naga pana mundu jwine jwangakusatama mu dela jawo, wawojo akusosekwa kumpatila ndaŵi soni malo gakutendela Chikumbuchilo mu dela jakwe, mwakutowanya palembile kuti YAKWAMBA M’WEJI pa peji jandanda pa jw.org ni asagule palembile kuti, “Chikumbuchilo cha Chiwa cha Yesu.”

Ana ni yine yapi yatukusosekwa kutenda kuti tukosechele Chikumbuchilo?