Atamose kuti nganituŵa pasi pa Cilamusi ca Mose, nambope malamusi gaŵili gekulungwa mnope gakuti tumnonyeleje Mlungu nambosoni acimjetu, gakusalosya yakusasaka Yehofa kuti tutendeje. (Mat. 22:37-39) Cinonyelo celeci nganiciŵa cakupagwa naco. Tukusasosekwa kucikusya. Ana mpaka tucikusye camtuli? Litala limo lyakamucisya mnope lili kuŵalanga Baibulo lisiku lililyose. Patukuganicisya ndamo syakulekanganalekangana sya umundu wa Mlungu syasikusimanikwa m’malemba tukusawuwona “umbone wa Yehofa.” (Sal. 27:4) Yakuyicisya yakwe, cinonyelo cetu pa jwalakwe cikusakula nambosoni tukusaganisya mpela jwalakwejo. Yeleyi yicitukamucisya kuti tupikanileje malamusi ga Mlungu, kupwatikapo lilamusi lyakwaya kulipeleka pakulosya cinonyelo kwa ŵane. (Yoh. 13:34, 35; 1 Yoh. 5:3) Kwende tulole matala gatatu gampaka tukuye kuti tukuwoneje kuŵalanga Baibulo kuŵa kwakusangalasya:

• Tujiwoneje nganijo munganisyo mwetu. Tuliwanicisyeje tuli kumaloko. Ana munganisyo mwawo akuciwona cici? Ana akupikana cilicose kapena kununjila kulikose? Ana ŵajikwatendecela nganijo akupikana uli?

• Tucenjeje matala gakuŵalanjila. Kwende tulole matala gakuyicisyaga: Aŵalanjeje mwakwesya maloŵe, akuyeje m’Baibulo mwawo pakupikanila mbali ja m’Baibulo jakwamba kupikanila. Aŵalanje ya mundu jwine jwakwe jwa m’Baibulo kapena ngani jine jakwe mmalo mwa kwamba kuŵalanga mwakuya macaputala. Mwambone alinje kuŵalanga ya umi wa Yesu kutyocela mu Kabuku Kothandiza Kuphunzira Mawu a Mulungu mbali 4 kapena 16. Mmalo mwakwamba kuŵalanga ndime jimo ja m’Baibulo palityocele lilemba lyesiku, tulinjeje kuŵalanga caputala cosope. Aŵalanjeje Baibulo pakuya ndaŵi soni yaka yele mabuku ga m’Baibulogo galembedwele.

• Tuŵalanjeje m’litala lyakuti tujipikanicisyeje. Atamose kuŵalanga caputala cimo pa lisiku ni kucipikanicisya cenene kuli kwakamucisya kulekangana ni kuŵalanga macaputala gejinji pakusaka kwamba kumalisya buku josope. Aloleje cacatendekasisye soni yayatendekwe. Mpaka tukamulicisyesoni masengo mapu soni malemba gakonjecesya. Tukusosekwa kuwungunya ciwundo cangatukucipikanicisya cenene. Naga kuli kwakomboleka aganicisyeje yaŵalasileyo kwa ndaŵi jakulandana ni jamalile pakuŵalanga.