Msongano wakosechela utumiki uli wakulandana ni misongano jine josope. Yehofa akusatupa misonganoji ni chakulinga chakuti tukamusyanganeje jwine ni mjakwe pakulosyana chinonyelo ni kutenda yambone. (Ahe 10:24, 25) Msongano wakosechela utumiki uŵeje wa maminisi 5 kapena 7. Ndaŵiji jikupwatikapo kwagaŵa ŵandu, kwasalila dela jachakalalichile soni lipopelo. (Naga akukosechela utumiki panyuma pa misongano, ndaŵi jakosechelaji akusosekwa kujinandiya.) Jwakutendekasya msonganowu akusosekwa kukosechela chenene, ni chakulinga chakuti uŵe wakulimbikasya. Mwachisyasyo, pamsongano wakosechela utumiki wa Lyakuŵeluka, yikusaŵa kuti ŵandu ŵajinji nganajinjila mu utumiki mkati mwa wiki. Myoyo mpaka yiŵe chenene kwakumbusya yachakaŵechete. Ana ni yindu yapi yakamuchisya yampaka akambilane pa msonganowu?

• Yisyasyo ya kalalichile yayikusasimanikwa mu Utumiki ni Umi Wetu Wachiklistu—Pologalamu ja Misongano

• Yampaka atende pakamulichisya masengo ngani syasigambile kutendekwa kwene mu dela jawo

• Yampaka atende mundu pakukana kumlalichila

• Yampaka atende pakumlalichila mundu jwangakusakulupilila kuti kwana Mlungu, jwakusakulupilila kuti yaumi yatesile kuchenga, jwakusaŵecheta chiŵecheto chine kapena mundu jwali mu dini jangamanyika mnope kumangwawoko

• Yampaka atende pakamulichisya masengo yindu yayikusasimanikwa pa webusayiti ja jw.org, JW Library^® app kapena Baibulo

• Yampaka atende pakamulichisya masengo yayikusasimanikwa pa Yindu Yakwiganyila

• Yampaka atende pakamulichisya masengo matala gane gakalalichile mpela kulalichila pa foni, kulemba yikalata, kulalichila malo gakusimanikwa ŵandu ŵajinji, kutendesya maulendo gakuwilisya kapena majiganyo ga Baibulo

• Akusosekwa kwakumbusya kusosekwa kwakuŵa ŵakusamala mu utumiki, kusosekwa kwa kuchenga ulaliki wawo, kusosekwa kwakulosya ndamo syambone, kusosekwa kwakwawona mwakuŵajilwa ŵandu ŵa mudela jawo soni yindu yine

• Mpaka akambilane ya mu kabuku ka Ajongolele pa Kaŵalanje Soni Kajiganye kapena jimo mwa mafidiyo gakwe

• Yampaka atende kuti ŵalimbikasye ŵajinjile nawo mu utumiki

• Mpaka akambilane lilemba lyalikusasala ya utumiki kapena yaŵasimene nayo ŵane mu utumiki