Ŵandu yikusiyasawusya kuti amnonyeleje Mlungu. Jemanjaji akusaganisyaga kuti Mlungu ali jwakusawusya kumpikanichisya, patukulaga yangamkwayaga chilichose, kapenasoni kuti ali jwangasa. Alole yaŵaŵechete ŵandu ŵane:

• “Napopelaga kwa Mlungu kuti angamuchisye, nambo natandite kuyiwonasoni kuti jwalakwe nganaŵa ambikene ligongo ali kwakutalika, soni kuti jwangasamala ya une. Kwa une nayiwonaga kuti Mlungu agambile kuŵa chindu chinechakwe basi.”​—Marco jwa ku Italy.

• “Atamose kuti naliji jwakusachilila kumtumichila Mlungu, nambope nayiwonaga kuti jwalakwe jwangaŵalanjilaga ya m’weji. Nagambaga ganisya kuti jwalakwe ali Mlungu jwangasa, jwagamba kusaka kuti atupeje chilango basi. Nganingulupililaga yakuti jwalakwe ali jwachinonyelo.”​—Rosa jwa ku Guatemala.

• “Panaliji mwanache naganisyaga kuti Mlungu akusatamila kulola yindu yangatukutenda chenene ni chakulinga chakuti kaneko atupe chilango. Mkupita kwandaŵi natandite kumwona jwalakwe kuti ali bwana jwangasamala ya mundu. Namwonaga kuti ali mpela pulesidenti jwakusiŵasamalila ŵandu ŵakwe, atamose yili yakuti ŵanduwo ngakusiŵanonyelaga.”​—Raymonde jwa ku Canada.

Ana wawojo akuganisya uli? Ana Mlungu ali jwangali chinonyelo? Aklistu aŵele mkuwusya chiwusyo chelechi kwa yaka yejinji. Sonitu m’yaka ya mma 500 mpaka 1500 C.E., ŵandu ŵakusalikolanga kuti ali aklistu nganapopelaga kwa Mlungu Jwamachiligosope. Jemanjaji ŵatendaga yeleyi ligongo ŵamwonaga Mlungu kuti ali jwakutesya woga mnope. Jwakulemba mbili jwine lina lyakwe Will Durant jwalembile kuti, “Ana mpaka yikomboleche chamtuli kuti mundu wamba jwali jwakulemwa apopele kwa Mlungu jwali jwakogoya soni jwele akutama kwakutalika mnope?”

Ana ni chichi chachikutendekasya kuti ŵandu amwoneje Mlungu mpela kuti ali “jwakogoya” soni kuti ali “kwakutalika mnope.”? Ana Baibulo jikusajiganya yamtuli yakwamba Mlungu? Ana kulijiganya yisyesyene yakwamba Mlungu mpaka kwakamuchisye wawojo kuti amnonyeleje jwalakwe?