“Nganituŵepe kukamulana yakuti tukolanjeje lina lya Mlungu. Atamose yili yiŵele yakuŵajilwa kolanga lina lya Mlungulyo, nambo ana mpaka tujileje kuti linachi?”​—Pulofesa David Cunningham, Theological Studies.

Mlungu jwatite, “Une ndili [Yehofa, NWT], lina lyangu ni lyelelyo.” (Yesaya 42:⁠8) Lina lyakuti Yehofa lili lyachihebeli, lyele likusagopolela kuti “Akusatendekasya Kuŵa.”​—Genesis 2:​4, NWT, maloŵe gamwiŵanda.

Yehofa akusasaka kuti tulikolanjeje lina lyakwe. Baibulo jikusati, “Mpopeleje mu lina lyakwe. Mwasalile ŵandu ŵamitundu josope yiŵatesile AMBUJE. Mlaliche kuti lina lyakwe lili lyakupunda mena gane gosope.”​—Yesaya 12:⁠4.

Yesu nombenajo jwakolangaga lina lya Mlungu. Pandaŵi jiŵapopelaga, ŵamsalile Yehofa kuti, “Une namanyisye wawojo kwa ŵanduŵa [kwambaga ŵakulijiganya ŵakwe].” Ligongo chichi Yesu ŵalimanyikasisye lina lya Mlungu kwa ŵakulijiganya ŵakwe? Jwalakwe jwapitilisye ni maloŵe gakuti, “Tinjipitilisyape kutenda myoyo, kuti chinonyelo chakwete wawo [Mlungu] pa une chiŵe mwa jemanjaji, nipo kuti unesoni mbe mwa jemanjaji.”​—Yohane 17:⁠26.

Mundu jwine jwakuyikuya mnope ya majiganyo ga yadini lina lyakwe Walter Lowrie jwatite, “Mundu jwangakusamanyilila lina lya Mlungu nikuti ngakummanyilila Mlungujo, soni mpaka yiŵe yakusawusya kuti amnonyeleje jwalakwe naga akusagamba kumwona kuti ali machili basi.”

Mundu jwine lina lyakwe Victor ŵajawulaga ku chalichi chakwe wiki jilijose, nambope jwayiwonaga kuti ngakummanyilila Mlungu yisyesyene. Munduju jwatite, “Kaneko nalijiganyisye kuti lina lya Mlungu lili Yehofa. Yalijitu mpela kutanda kummanyilila jwalakwe. Yaliji mpela simene ni Mundu jwele nagamba kupikana yejinji yakwamba jwalakwejo. Kaneko natandite kumwona Mlungu akuti ali jusyesye, soni natesile yakuti mbe najo paunasi.”

Nombenajo Yehofa akusiŵaŵandichila ŵandu ŵakusakamulichisyaga masengo lina lyakwe. Pakwamba ya ŵandu ‘ŵakusalichimbichisya lina lyakwe,’ Mlungu jwatite, “Tinjatendela chanasa mpela baba akusamtendela chanasa mwanagwe jwamlume jwakusamtumichila jwalakwejo.” (Malaki 3:​16, 17) Mlungu akusiŵapa yindu yambone ŵandu ŵakusaŵilanjila pa lina lyakwe. Paja Baibulo jikusati, “Jwalijose jutalikolanje lina lya [Yehofa], tachikulupuka.”​—Aloma 10:13.