JWAMKONGWE jwakusalalaju ali Maliya. Ali jwa Ciyisalayeli. Akusatama mu msinda wa Nasaleti. Jwalakwe akusamanyika kwa Mlungu kuti ali mundu jwambone. Ni ligongo lyakwe alitumisye Lilayika Gabuliyele kukuŵeceta ni Maliya. Ana akumanyilila yakuŵeceta Gabuliyele kwa Maliya? Kwende tulole.

Gabuliyele akuŵeceta kuti: ‘Mtunjelele uŵe ni m’mwe, Yehofa ali namwe.’ Maliya nganawoneganeje ni munduju citandile. Jwalakwe akutenda woga ligongo ngakumanyilila kugopolela kwa yakuŵeceta mundujo. Nambo mwacitema Gabuliyele akumtendekasya kuti akakola woga.

Jwalakwe akuti: ‘Mkajogopa Maliya. Yehofa akusangalala namwe. Ni ligongo lyakwe camtendele cindu cakusimonjesya. Pacangakaŵapa cimkole mwanace. Ni mkusosekwa kumkolanga lina lyakuti Yesu.’

Gabuliyele akwendelecela kuŵeceta acitiji: ‘Mwanaceju caciŵa jwamkulungwa, soni cacikolanjikwa Mwanace jwa Mlungu jwakwinani mnope, Yehofa cacimpa ucimwene mpela mwaŵaŵelele Daudi. Nambo Yesu caciŵa mwenye kwandaŵi jangamala, soni ucimwene wakwe ngasiwumala!’

Maliya akuwusya kuti: ‘Ana yeleyi yicikomboleka catuli, pakuŵa une ndili jwangalombegwa. Soni nganindameje ni jwamlume, ni sambano mpaka yikombolece catuli une kola mwanace?’

Gabuliyele akwanga kuti: ‘Macili ga Mlungu gaciyika pa mmwejo, ni ligongo lyakwe mwanacejo cacikolanjigwa kuti Mwanace jwa Mlungu.’ Kaneko jwalakwe akumsalila Maliya kuti: ‘Mkumbucile ya m’balegwenu Elisabeti. Ŵandu ŵasalaga kuti jwalakwe ngakomboleka kola mwanace ligongo akalambele mnope. Nambo sambano jwalakwe cakole mwanace jwamlume. Sambano komboleka kuyiwona kuti pangali cilicose campaka Mlungu alepele kucitenda.’

Pandaŵi jijojo Maliya akuŵeceta kuti: ‘Une ndili kapolo jwa Yehofa! Yitendekwe kwa une yasasile wawojoyo.’ Kaneko lilayika lila likutyoka.

Maliya akuwutucila kukuwonegana ni Elisabeti. Elisabeti papikene maloŵe ga Maliya, mwanace jwali m’matumbo mwa Elisabeti akuwulukuta mwakusangalala. Elisabeti akugumbalilwa ni msimu wa Mlungu, ni akuŵeceta kwa Maliya kuti: ‘Mwa acakongwe wosope m’mweji mli jwakujaliwa.’ Maliya akutama ni Elisabeti ciŵandika miyesi jitatu, kaneko akuwujila kumangwakwe ku Nasaleti.

Maliya agambile kusigala panandi kulombegwa ni mundu jwakolanjikwa Yusufu. Nambo Yusufu pamanyilile kuti Maliya akwete citumbo, jwalakwe akuganisya yakumleka ngamlomba. Kaneko lilayika lya Mlungu likumsalila kuti: ‘Mkasimjogopa kumjigala Maliya kuŵa ŵamkwenu. Pakuŵa ali Mlungu jwampele mwanace jwalakwe.’ M’yoyo Maliya ni Yusufu akulombana, soni wosopewo akulinda kupagwa kwa Yesu.