ŴANDU ŵajinji akusaganisya kuti ngani sya misimu sigambile kuŵa syakuwanicisya, soni kuti mafidiyo gakulosya yamisimu gagambile kuŵa yindu yakwamba ganicisya. Nambo Baibulo jikusalosya kuti yamisimu yipali. Ni ligongo lyakwe jikusatukalamusya mwamacili ya nganiji. Mwambone, pa lilemba lya Deuteronomo 18:10-13, Baibulo jikusati, “Mwa jemanja mukasimanikwa . . . jwalijose jwakutenda yacisango, yamasenga, jwakusagamila yamsogolo, kapena msaŵi, kapena jwakwaloga ŵane, kapena jwakuŵecetana ni jwamisimu kapena jwakusala yindu ya msogolo, kapena jwakuwucisya kwa ŵandu ŵawe.” Ligongo cici? Ligongo lyakuti, “Jwalijose jwakutenda yeleyi Yehofa akusaŵengana najo . . . M’ŵe ŵangali cakulemwa pameso pa Yehofa Mlungu jwenu.”

Ligongo cici Baibulo jikusalekasya mwamacili yamisimu?

Baibulo jikusatusalila kuti Mlungu mkanapanganye cilamboci, jwapanganyisye malayika, kapena kuti yakupanganyikwa yausimu yejinji. (Yobu 38:4, 7; Ciunukuko 5:11) Mlungu ŵalipele lilayika lililyose ufulu wakusagula pasikati pa cindu cambone ni cakusakala. Nambo malayika gane gasagwile kumjimucila Mlungu, ni gayice pacilambo capasi kukutandisya yakusawusya. Ligongo lya yeleyi, cilambo capasi “cagumbele ni yakuwulasyana.”—Genesis 6:2-5, 11; Yuda 6.

Baibulo jikusati malayika gakusakalaga gatandite kwasokonasya ŵandu. (Ciunukuko  12:9) Ligongo lyakuti ŵanduwe tukusasacilila kumanyilila yamsogolo, malayikaga gapatile upile wakwalambusya ŵandu kuti gasalileje yamsogolo.—1 Samueli 28:5, 7; 1 Timoteo 4:1.

Ndaŵi sine, yamisimu yikusawoneka mpela yakamucisya. (2 Akolinto 11:14) Nambope, yisyene yakwe ni yakuti, malayika gakusakalaga gakwatendekasya ŵandu kuti akamanyilila yisyesyene yakwamba Mlungu.—2 Akolinto 4:4.

M’yoyo, mwakamulana ni yajikusasala Baibulo, kusangalala ni yamisimu kapena kutenda nawo yamisimu kuli kwakogoya. Ni ligongo lyakwe ŵandu ŵaŵasakaga kuŵa ŵakulijiganya ŵa Yesu “ŵaŵatendaga yamisimu, ŵasongangenye mabuku gawo ni kugacoma moto.” Ŵatesile yeleyi, atamose kuti mabukugo galiji gakatala.—Masengo 19:19, Byington.

Masiku aganosoni, ŵandu ŵajinji akusasagula kuti akatendaga nawo cilicose cakwayana ni yamisimu, soni akusaŵambala yakusangalasya yakwayana ni yamisimu. Mwambone, Maria * paŵaliji ni yaka 12, yawonekaga kuti jwakombolaga kusala yindu yaciyitendekwe msogolo. Jwalakwe jwalolaga pa yiganda yamasenga ni kombola kumanyilila yaciyatendecele acimjakwe. Ligongo lyakuti yaŵasalagayo yatendekwaga, jwatandite kunonyela mnope yamisimu.

Maria jwaganisyaga kuti Mlungu ni juŵampele lunda lwakumanyilila yeleyi kuti ŵakamucisyeje ŵane. Nambo jwalakwe jwatite, “Cinecakwe casimonjesyaga. Nagambaga kombola kusala yaciyatendecele ŵane. Nambo kuti manyilileje ya unejo, yalepelekaga.”

Maria jwakwete yiwusyo yejinji yanganapataga kwanga kwakwe. Kaneko, jwapopesile kwa Mlungu. Pambesi pakwe,  Ŵamboni sya Yehofa ŵatandite kumjiganya Baibulo. Maria jwalijiganyisye m’Baibulo kuti yaŵatendagayi nganiyiŵa yakutyocela kwa Mlungu. Jwalijiganyisyesoni kuti, jwalijose jwakusaka kuŵa paunasi ni Mlungu akusosekwa kwasa cilicose cakwayana ni yamisimu. (1 Akolinto 10:21) Yakuyicisya yakwe, Maria jwajasile cilicose cakwayana ni yamisimu. Apano, jwalakwe akusiŵasalila ŵane usyesyene waŵalijiganyisye m’Baibulo.

Michael pajwaliji jwacinyamata, jwaŵalangaga mnope mabuku ga yamisimu. Jwalakwe jwatite, “Nasakaga kuŵa m’likuga lya ŵandu ŵakumanyika pangani sya yamisimu syakwamba ganicisya.” Mwapanandipanandi, Michael jwasyoŵelele kuŵalanga mabuku ga yamasenga soni ga sataniki. Jwalakwe jwatite, “Naŵalangaga mnope mabuku ga yamisimu, soni kulolela mafidiyo ga yamisimu ligongo nasacililaga kuyipikanicisya yinduyi.”

Nambo Michael pajwatandite kulijiganya Baibulo, jwayiweni kuti akusosekwa kulola cenene yakusaŵalangayo. Jwalakwe jwatite, “Nalembile yosope yakwayana ni yamisimu yanakwete, kaneko nayijasile. M’Baibulo nalijiganyisye yindu yambone. Mwambone, pa lilemba lya 1 Akolinto 10:31, Baibulo jikusati, ‘Mtendeje yosope kuti mumcimbicisye Mlungu.’ Apano panguŵalanga mabuku ngusaliwusya kuti, ‘Ana yinguŵalangayi yili yakupeleka ucimbicimbi kwa Mlungu?’ Naga ngayikupeleka ucimbicimbi kwa Mlungu ngusayileka.”

Baibulo jili mpela nyali. Jikusatumulicila kuti tumanyilileje kogoya kwa yamisimu. (Salimo 119:105) Baibulo jikusatusalilasoni cindu cine. Jikusatusalila yalinganyisye Mlungu kuti cacityosya misimu jakusakala pa cilambo cosope. Yeleyi yicitendekasya kuti paŵe yakuyicisya yambone mnope kwa ŵandu, mwambone, lilemba lya Salimo 37:10, 11 likusati, “Kasigele kandaŵi panondi, ŵakutenda yakusakala cacimala. Cimcasosasosa paŵatamaga, mwamti ngasimwawonasoni. Nambo ŵakulinondiya cacapa cilambo capasi. Soni cacisangalala ni mtendele wejinji.”