ŴANDU ALI ŴAPAJIKA LIGONGO AKUSAKOMBOLA KULEMBA, KWAMBULA, KUPANGANYA YINDU SONI KUGANICISYA YIWUSYO YAKUSOSEKWA MNOPE YAKWAMBA UMI: Yiwusyo yakwe mpela yakuti, Ana ligongo cici Mlungu ŵapanganyisye kwinani soni cilambo capasi? Ana ŵanduwe twatyocele kwapi? Ana cakulinga ca umi cili camtuli? Soni ana tukwete sogolo jamtuli?

Ŵandu ŵane ngakusasaka kuganicisya ya yiwusyo yeleyi, ligongo akusayiwona kuti yili yakusawusya mnope kupata kwanga kwakwe. Ŵanesoni akusati yiwusyo yeleyi yili yangasosekwa ligongo yaumi yatesile kucenga kutyocela ku yindu yine. Mundu jwine jwamlijiganye ya mbili soni yasayansi lina lyakwe William Provine, jwasasile kuti, “Ligongo lyakuti kwangali milungu, m’yoyo umi nganiwukola cakulinga cilicose.” Jwalakwe jwajonjecesye kuti, “Pakuŵa nganitukola malamusi galigose gakutulongolela paumi wetu, m’yoyo umi wetu wangali cakulinga cilicose.”

Nambope, ŵandu ŵane ŵangakamulana ni yakuti yaumi yagambile kupagwa jika. Jemanjaji akusayiwona kuti yakupanganyikwa ya mwinani soni pacilambo capasi yapanganyikwe mwakamulana ni malamusi ga m’cipago. Akusajima mtwe ni kusalala kwa yindu yakupanganyikwa mwamti ŵandu apanganyisye yindu yejinji pakujigalila yakupanganyikwayi. Yakusimonjesya yakusayiwona mu yakupanganyikwa lisiku lililyose, yikusiyasimicisya kuti apali jwine jwakwe jwalunda juŵapanganyisye yeleyi.

Yeleyi yitendekasisyesoni kuti ŵandu ŵane ŵaŵakulupililaga kuti yaumi yacenjile kutyocela ku yindu yine acenje nganisyo syawo. Kwende tulole ŵane mwa ŵeleŵa.

DR. ALEXEI MARNOV, jwakusatenda opaleshoni ja ututu soni mitasi jwatite, “Kusukulu, nalijiganyisye kuti kwangali Mlungu soni kuti yaumi yatesile kucenga kutyocela ku yindu yine. Jwalijose juŵakulupililaga kuti kwana Mlungu twam’wonaga kuŵa jwangali lunda.” Nambope mu 1990, jwalakwe jwatandite kucenga kaganisye kakweka.

Alexei jwasasile kuti, “Naŵele ndili mkulingalinga kuti manyilile kapanganyidwe ka yindu kupwatikapo ututu wa mundu. Nayiweni kuti ututu uli cimo mwa yindu yakusimonjesya mnope mwa yakupanganyidwa. Ni naliwusyaga kuti, ‘Ana ututu ukusagamba kutukamucisya kola lunda soni kulijiganya yindu kaneko ni kuwa?’ Yeleyi yaliji yangapikanika kwa une, soni yandendekasisye kusacilila kupata kwanga kwa yiwusyo yakuti, ‘Ligongo cici twapali? Ana cakulinga ca umi cili cici?’ Panyuma pakuganicisya yiwusyoyi, namanyilile kuti kwana Mkupanganya.”

Pakusaka kumanyilila ya cakulinga ca umi, Alexei jwatandite kulijiganya Baibulo. Mkupita kwa ndaŵi, ŵamkwakwe ŵalisoni dokotala, soni ŵaŵakulupililaga kuti kwangali Mlungu, ŵatandite kulijiganya Baibulo. Pandanda cakulinga cawo caliji cakuti ŵasisyeje ŵamkwawo. Sambano wosopeŵa akusakulupilila kuti kwana Mlungu, soni akusapikanicisya cakulinga ca Mlungu kwa ŵandu mwakamulana ni yajikusasala Baibulo.

DR. HUABI YIN jwalijiganyisye ya sayansi, nambosoni kwa yaka yejinji jwaŵele mkuwungunya mwayikusaŵela kuti lyuŵa liŵaleje soni kuti paŵeje lipujungu lya mtukuta.

Dr. Huabi jwasasile kuti, “M’weji ŵasayansi, patukulijiganya yindu yakusimonjesya yayikusatendekwa m’cipago mpela lyuŵa, tukusayiwona kuti yikusatendekwa mwadongosolo mnope, soni mwakuya cenene malamusi ga m’cipago. Ni naliwusyaga kuti, ‘Ana malamusi gelega gatyocele kwapi?’ ‘Atamose moto usyesyene ukusasosekwa malamusi ga m’cipago gelega kuti ukoleleje cenene mpela mwayikusaŵela ni lyuŵa.’ Mkupita kwandaŵi nayiweni kuti Maloŵe gandanda gakusimanikwa m’Baibulo gali gasyesyene. Gakusati, ‘Pandanda, Mlungu ŵapanganyisye kwinani ni cilambo capasi.’”—Genesis 1:1.

Kusala yisyene sayansi jitukamucisye kupata kwanga kwa yiwusyo yakuti, ana ututu ukusakamula masengo camtuli? Ana lyuŵa likusakombola camtuli kukoposya lilanguka soni mtukuta wamoto? Nambope mpela mwatuyiwonele kwa Alexei ni Huabi, Baibulo jikusatukamucisya kumanyilila kwanga kwa yiwusyo yakusosekwa mnope mpela yakuti, ana ligongo cici Mlungu ŵapanganyisye kwinani soni cilambo capasi? Ana ligongo cici yindu mwacipago yikusatendekwa mwadongosolo, soni mwakuya malamusi? Soni ana ligongo cici twapali?

Pakwamba ya cilambo capasi, Baibulo jikusasala kuti, ‘[Mlungu] nganacipanganya pali pangali cakulinga cilicose, nambo ŵacipanganyisye ni cakulinga cakuti atameje ŵandu.’ (Yesaya 45:18) Kusala yisyene, Mlungu akwete cakulinga ni cilambo capasi, soni ngani jakuyicisya jikulosya kuti cakulinga cakweci cili cakamulana mnope ni cembeceyo cetu ca msogolo.