Kakamulichisye Masengo ka Mbiya
Ŵandu ŵajinji ŵakusakuya yiwundo ya m’Baibulo ŵangakola yakusawusya yejinji yakwayana ni mbiya.
TUTENDEJE PULANI JAMBONE
CHIWUNDO CHA M’BAIBULO: “Nganisyo sya mundu jwamtawu sikusapindula, nambo mundu jwakusatenda yakwe mwakuwutuka mkanaganichisye chenene, mbesi jakwe jikusaŵa kulaga.”—Misyungu 21:5.
ANA YELEYI YIKUGOPOLELA CHICHI?: Tukusosekwa kola pulani soni tujikuyeje. Tukoleje pulani mkanitusume chilichose. Tukumbuchileje kuti nganituŵa tukombwele kusuma chilichose chatukusaka. Myoyo tukamulichisyeje masengo mbiya mwalunda.
YATUKUSOSEKWA KUTENDA:
-
Tutendeje bajeti. Tulembeje yosope yatukusaka kusuma soni tuyiŵicheje m’magulu. Kaneko tuganichisyeje mtengo wa chindu chilichose chatukusaka kusuma. Naga tujonasile mbiya syejinji pachindu chimo, mpaka tujigale mbiya sine sya chindu chatusachileje kusuma. Mwachisyasyo, naga tujonasile mbiya syejinji pakusuma njinga, mpaka tujigale mbiya sitwasunjile kuti tusumile yindu yangasosekwa mnope mpela kulya ku malesitilanti.
-
Tuŵambaleje kongola mbiya mwachisawawa. Naga yili yakomboleka tuŵambaleje kutenda yindu yampaka yitundekasye kola ngongole. Mmalo mwakwe, tusunjeje mbiya kuti tusumileje yindu yatukusosechela. Naga akwasima mbiya, alinjije kuwusya mbiyasyo mwachitema kuti akakolasoni ngongole sine. Naga akwete kala ngongole ni mundu, atende yakomboleka kuti awusye ngongolejo.
Kuwungunya kwine kwalosisye kuti ŵandu ŵakusasumaga yindu pangongole, akusajonanga mbiya syejinji. Myoyo, naga akusasumaga yindu pangongole akusosekwa kuŵa ŵakusamala.
TUŴAMBALEJE NDAMO SYAKUSAKALA
CHIWUNDO CHA M’BAIBULO: “Mundu jwaulesi ngakusalimila chile mu ndaŵi jambone, mu ndaŵi jagungula tachipita mchisosasosa nambo ngasapata kandu kalikose.”—Misyungu 20:4.
ANA YELEYI YIKUGOPOLELA CHICHI?: Ulesi mpaka umtendekasye mundu kuŵa jwakulaga. Myoyo alimbichileje masengo soni akamulichisyeje masengo chenene mbiya syawo kuti chakole yindu yakuyisaka msogolo.
YATUKUSOSEKWA KUTENDA:
-
Tukamuleje masengo mwakulimbichila. Naga tukamula masengo mwakulimbichila, mabwana getu gachitunonyela soni tuchipitilisya kamula masengogo.
-
Tuŵeje ŵakulupichika. Tukajiŵilaga abwana ŵetu. Ungakulupichika wetu mpaka ujonaje mbili jetu yampaka yitendekasye kuti yitusawusyeje kupata masengo.
-
Tuŵambaleje umbombo. Naga ndaŵi syosope tukusatamila kusosasosa mbiya syejinji, mpaka yijonanje chilu chetu soni unasi wetu ni ŵane. Tukumbuchileje kuti mbiya nganisiŵa syakusosekwa mnope kupunda umi.
YIWUNDO YINE YA M’BAIBULO
Aŵalanjeje Baibulo pa Intaneti, jajikusimanikwa m’yiŵecheto yejinji pa jw.org
TUKAJONANGAGA NDAŴI SONI MBIYA PAKUTENDELA YAKUSAKALA.
“Ŵandu ŵakolelwa ni ŵandu ŵakunyela kapena kuti ŵakutunduka tachiŵa ŵakulaga, soni mundu jwaulesi tachisyuka jwakuwala yiwisa.”—MISYUNGU 23:21.
TUKADANDAULAGA MNOPE PANGANI JA MBIYA.
“Mkasimdandawulaga ya umi wenu, kuti timlye chichi, kapena tim’mwe chichi, pane soni ya chilu chenu, kuti tim’wale chichi.”—MATEYU 6:25.
TUŴAMBALEJE KUTENDA JELASI.
“Mundu jwa ubayili kapena kuti jwajelasi akusapunda mnope kusachilila kuti asichile mwachitema, nambo ngakusamanyilila kuti ulanda kapena kuti usawuchi tiwuchimsimana.”—MISYUNGU 28:22.
You May Also Like
NGANI SINE
Yampaka Yakamuchisye Naga Akusapata Mbiya Syangakwanila
Naga mundu ngakupata mbiya syakwanila akusalagasikaga nganisyo. Nambope kamulichisya masengo malangiso ga m’Baibulo mpaka kukamuchisye kuti akalagasikaga nganisyo.
