M’NYASA syekulungwakulungwa mwana somba sinesyakwe syakusalala soni syakutesya lung’wanu. Cakutesya lung’wanu mnope ni sombasi, cili malo gakwe gasikusatama. Sombasi sikusatama ni cinyama ca m’mesi cakuwoneka mpela maluŵa (anemone). Cinyamaci cikwete tuyindu twakusoma twakuwoneka mpela tuyala twakola poisoni. Sombasi sikusanonyela kutama mu tuyindu tweleto. Ni ligongo lyakwe yili yangasimonjesya kuti lina line lya sombasi (anemonefish) lyatyocele ku cinyamaci.

Ligongo lyakuti sombasi syangali sooni, nambosoni syangatilaga mnope pasyaweni ŵandu, yikusaŵa yangasawusya kuti ŵakusajambula yindu pasi pa mesi asijambule.

Nambo cakusimonjesya mnope ni sombasi cili kutamaga mu tuyindu twakusoma twa poisoni twakuwoneka mpela tuyala. Yeleyi yili yakogoya, yayili mpela kutama pasikati pa majoka. Nambope sombasi sikusatama cenene ni yinyama yakuwoneka mpela maluŵayi. Nambo ana sombasi sikusakombola catuli kutama cenene ni yinyamayi?

Mpela mwakusatendela ŵandu ŵakusakamulana mnope, somba ni yinyamayi yikusakamusyangana.  Mkamulano wa somba ni yinyama yakuwoneka mpela maluŵayi, uli wakamucisya kwa yosopeyo. Ŵandu ŵakulijiganya ya yinyama ya m’mesi ŵapatile kuti yili yangakomboleka kuti sombasi sitameje pali pangali yinyamayi. Sombasi sikusasyuga mwakulajilila, m’yoyo pali pangali cinyama cakuwoneka mpela maluŵaci mpaka yiŵe yangasawusya kuti yinyama yine yigambeje kusikamula. Sombasi sikusajegamila cinyamaci mpela malo gawo gakutama soni pakutilila naga pana cakogoya. Ligongo lya yeleyi, sombasi mpaka sitame ni umi kwa yaka 10.

Cinyamaci cikusaŵa malo gambone ga sombasi. Sombasi sikusatajila mandanda gakwe pasi pa cinyamaci. Somba jekongwe pajitajisile mandanda, jikusakamusyangana ni jelume kusamalila mandandago. Mkupita kwandaŵi sombasyo yalumo ni tuŵanace twakwe sikusasyugaga ciŵandika ni cinyamaci.

Ana cinyamaci cikusapataga umbone watuli kutyocela ku sombasi? Sombasi sikusateteya cinyamaci. Sikusatopolaga mtundu wine wa somba syasikusalyaga tuyindu twakuwoneka mpela tuyala twa cinyamaci. Mtundu wine wa cinyamaci ngaŵa mkutama pali pangali sombasi. Ŵakuwungunya ya yinyama ya m’mesi ali atyosisye sombasi, pagambile kumala lisiku limo cinyamaco nganiciwonekasoni. Mwangakayicila somba sine syalile cinyama cosopeco.

Yikuwonekasoni kuti sombasi sikusakamucisya kuti cinyamaci cikoleje macili. Ndotosi sya sombasi sikusakamucisya kuti cinyamaci cikuleje mwamacili. Soni sombasi pasikusyuga mcipitaga m’tuyindu twakuwoneka mpela tuyala twa cinyamaci, sikusakamucisya kuti cinyamaci cipateje mesi gakola lipuje lya oxygen.

Cindu cacikusasikamucisya sombasi kuti sikasomedwa mnope ni yinyamayi, cili cakuti pacilu pakwe pakusakopoka yindu yakutelesya yayikusasicenjela. Yindu yakutelesya yayikusakopoka pacilu ca sombasi yikusatendekasya kuti cinyamaci cisiwoneje sombasi kuŵa mpela cinyama cijakwe.

Ŵakuwungunya ŵane akusati, sombasi pasikusagula cinyama cakuti sitameje naco, sikusasosekwa kutenda yindu yakuti sisyoŵekane ni cinyamaci. Ŵakuwungunyaŵa ŵapatile kuti sombasi pasisimene kandanda ni cinyamaci, sikusacikwayaga ni kucilekaga mwakuwilisyawilisya kwa maawala gakuŵalanjika. Kucikwaya soni kucilekaku kukusakamucisya sombasyo kuti sikoposye yindu yakutelesya pacilu cakwe yakwilana ni poisoni jwa cinyamaco. Mwangakayicila, sombasyo pasikutenda yakuti sisyoŵekane ni cinyamaco sikusasomedwa panandi ni cinyamaco. Nambo kaneko sombasyo ni cinyamaci yikusatamaga mwakamulana.

Mkamulano wa cinyamaci ni sombasi ukutupa lijiganyo lyambone mnope patukukamula masengo ni ŵane. Pakusaŵaga yakuyicisya yambone naga ŵandu ŵandamo syakulekanganalekangana soni ŵakulekangana kwakutyocela akulingalinga mwamtawu kutendela yindu yalumo. Mpela mwasikusatendela sombasi, mpaka yitujigalile kandaŵi kuti tusyoŵelele kamula masengo mwakamulana ni ŵane, nambo yakuyicisya yakwe yikusaŵa yambone.