Jwamlume jwine jwatite, “Panalombele, une ni ŵamkwangu twayiwonaga yindu mwakulekangana. Pandesile yineyakwe yakulosya kwacimbicisya ŵamkwangu, ŵalakwe ŵayiwonaga kuti nganikuŵa kwacimbicisya. Nombe nawo ŵamkwangu patesile yindu yakuganisya kuti akunjimbicisya, une nganinayiwonaga m’yoyo. Nayiwonaga kuti ŵamkwangu akusosekwa kunjimbicisya mnope pakuŵeceta.”

Ŵamkwakwe ŵatite, “Kunakulile, ŵandu akusanonyela kuŵeceta mwakwesya maloŵe, soni kwakata maloŵe acimjawo. Unesoni nasyoŵelele yeleyo. Kutenda yeleyi nganitukuwonaga mpela mwano. Nambo kuŵakulile ŵamkwangu ŵangatenda yeleyi.”

Ŵalombane akusosekwa kucimbicisyana ndaŵi syosope. Ana mpaka ŵalosye catuli ŵamkwawo kuti akusiŵacimbicisya?

Mwacipago, acalume akusasosekwa kwacimbicisya. Baibulo jikusati, “Jwamlume jwalijose amnonyeleje jwamkongwe jwakwe mpela mwakusalinonyelela jwalakwe msyene.” Nambo kwa acakongwe jikusati, “Jwamkongwe jwalijose amcimbicisyeje jwamlume jwakwe.” (Aefeso 5:33) Yili yisyene kuti ŵalombane akusasaka kulipikana kuti mjawojo akusiŵanonyela soni akusamcimbicisya, nambo mwacipago, acalume akusasacilila mnope kuti jwamkongwe jwacimbicisyeje. Jwamlume jwine jwamlombele lina lyakwe Carlos * jwatite, “Acalume akusasacilila kuti aciŵamkwawo alosyeje kuti jemanjajo akusakombola kulongolela yindu, kumasya yakusawusya, soni kusamalila liŵasa.” Naga jwamkongwe akusiŵacimbicisya ŵamkwakwe ligongo lya yindu yakusakombola kutendayi, wosope akusaŵa ŵakusangalala. Jwamkongwe jwine jwapeŵasa lina lyakwe Corrine jwatite, “Ŵamkwangu akusanonyela mnope naga ngulosya kwacimbicisya.”

Acakongwe akusasosekwasoni kwacimbicisya. Yeleyi yili yakuwona ligongo jwamlume akusamnonyela yisyene jwamkongwe jwakusamcimbicisya. Daniel jwatite, “Ngusasosekwa kucimbicisya nganisyo sya ŵamkwangu. Ngusasosekwasoni kupikanicisya mwakupikanila mumtima. Atamose ndili ngangupikanicisya mwakupikanila mumtima ŵamkwanguwo, nambope ngusinakosya.”

Jwalijose akusayiwona yindu mwakulekangana ni mjakwe. Ngani jekulungwa nganijigona pa yakutenda wawojo pakumcimbicisya mjawo jwa mu ulombelajo, nambo mwakupikanila mjawojo. Jwamkongwe jwatumkolasile pa mbali jakuti “Yakusawusya Yayipali” jwalijiganyisye yeleyi. Jwalakwe jwatite, “Panguganisya kuti ngwacimbicisya ŵamkwangu, nambo ŵamkwanguwo ngayiwonaga m’yoyo, nikuti unejo ni jwangusosekwa kucenga.”

• Alembe yindu yitatu yambone yakusatenda ŵamkwawo. Pelepo mpaka paŵe pakutandila kwacimbicisya.

• Kwa cijuma cimo, alolesoni mwakusatendela yindu wawojo pa mbali asi:

Kaŵecete kawo. Ŵakuwungunya ya m’maŵasa ŵapatile kuti “maŵasa gele pakumasya ungapikangana gakusanonyela kusala yambone ya mjawo jwa mu ulombela gakusaŵa gakulimba, soni gakusangalala. Nambo maŵasa gejinji gagakusanonyela kusala yakulepela ya mjawo pakumasya ungapikangana gakusamalaga.” *—Lilemba lyakamucisya: Miyambo 12:18.

Aliwusye kuti: ‘Ana ngusaŵeceta mwakwacimbicisya ŵamkwangu? Ana ngusanonyela kwajamuka kapena kwayamicila? Pangusala madandausi kapena mwanguyiwonela yindu, ana ngusaŵeceta mwaukali?’ Pambesi pakulijanga yiwusyoyi, ana ŵamkwawo mpaka ajiticisye yajanjileyo?—Lilemba lyakamucisya: Akolose 3:13.

Alinje kutenda ayi: Aliŵicile cakulinga cakuti ŵayamicileje ŵamkwawo, atamose kamo palisiku. Kuti akombole kutenda yeleyi, akumbucileje yindu yambone yakusatenda ŵamkwawo yalembile yila. Kaneko, ŵayamicileje ligongo lya yeleyo.—Lilemba lyakamucisya: 1 Akolinto 8:1.

Ndamo syawo. Jwamkongwe jwine jwapeŵasa lina lyakwe Alicia jwatite, “Ngusamalila ndaŵi jejinji pakamula masengo gapamlango. Sano, naga ŵamkwangu akusaŵika yindu yawo pambone, soni kungamucisya kucapa mbale, ngusalipikana kuti akunjimbicisya, soni kuti ndili jwakusosekwa mwiŵasa mwetu.”

Aliwusye kuti: ‘Ana mwangusatendela yindu yikusalosya kuti ngwacimbicisya ŵamkwangu? Ana ngusakola ndaŵi jakwanila jakunguluka ni ŵamkwangu, soni kwapikanila pakuŵeceta?’ Pambesi pakulijanga yiwusyoyi, ana ŵamkwawo mpaka ajiticisye yajanjileyo?

Alinje kutenda ayi: Alembe yindu yitatu yakusasaka kuti ŵamkwawo ŵatendeleje wawojo pakulosya kwacimbicisya. Ŵasalile ŵamkwawowo kuti alembesoni yindu yitatu. Kaneko acengane yipepala yalembileyo kuti jwalijose alole yalembile mjakwe. Aŵice nganisyo syawo mnope pa yakusosekwa kutenda pakwacimbicisya ŵamkwawo. Naga jumo akutanda kumcimbicisya mjakwe, mjakwejo cacimcimbicisyasoni.