Bungwe ja United Nations jikusalimbikasya ŵandu kuŵa ŵakamulana, kuchimbichisya ufulu wa ŵane soni kusamalila yakupanganyikwa. Ligongo chichi jikusalimbikasya yeleyi? Mpela muŵaŵechetele Maher Nasser kuti, “Kuchenga kwa nyengo, kulagasidwa kwa ŵandu, ungaŵalanjilana, ngondo syangamala, kutupa kwa ŵandu ŵakutopoledwa msimangwawo, kuwulagana kwa pachilambo chosope, yilwele yakupelana soni yindu yine yakogoya yikwalagasya ŵandu m’chilambo chilichose.”—UN Chronicle.

Ŵandu ŵane ayikene pakusala pelanguka yakulepela ya maboma ga pachilambopa. Jemanjaji ayiche pakukolanga ya ŵandu mpela Albert Einstein jwele apano jwawile. Jwalakwe jwaliji jwamlijiganye ya lunda lwa ŵandu, jwandakatulo soni jwasayansi. Akusakolangasoni ya Dante jwele apanosoni jwawile. Jwalakwe jwaliji jwamkulungwa jwa yandale. Dante jwakulupililaga kuti mtendele ngaŵa mkusimanikwa m’chilambo changakamulana pa ndale. Jwalakwe jwasasile maloŵe ga Yesu Klistu kuti, “Mu uchimwene uliwose naga akutanda kwimuchilana, kumala kwa uchimwenewo kukusaŵa kukoko.”—Luka 11:17.

Pajagambile kupita ndaŵi jamnono chitendechele Ngondo Jaŵili ja Pachilambo Chosope, jaŵakamulichisye masengo mabomba gaŵili ga nyukiliya, Albert Einstein jwalembile chikalata chakwawula ku bungwe ja United Nations chakuti akaŵalanje ŵandu ŵajinji. Jwalakwe m’chikalatachi jwatite, “Bungwe ja United Nations jikusosekwa kutenda yindu mwachitema yakuyiwona kuti mpaka yikamuchisye, pakusaka kutamilikasya boma jisyesyene ja pachilambo chosope.”

Ana tuli ŵakusimichisya kuti ŵandu ŵandale ŵampaka aŵe kumbali ja bomaji mpaka aŵe ŵangali chinyengo, ŵakombola kwendesya yindu soni ŵangali ngalwe? Kapena mpaka aŵe ŵakusakala mpela ŵakulamulila ŵaneŵa? Yiwusyo yeleyi yikusatukumbusya maloŵe gaŵaŵechete jwakulemba mbili jwa ku Britain lina lyakwe Lord Acton. Jwalakwe jwatite, “Machili ga ulamusi gakusamtendekasya mundu kutenda yachinyengo soni naga gatupile mnope ni pakusatenda mnope ya chinyengoyo.”

Kuti tukole mtendele usyesyene tukusosekwa kuŵa ŵakamulana. Ana yeleyi yili yisyene? Naga yili yisyene, ana mpaka yikomboleche chamtuli? Baibulo jikusasalaga kuti yili yisyesyene soni yichikomboleka. Mwamtuli? Yeleyi nganiyiŵa yikomboleche ni boma jakulongoleledwa ni ŵandu ŵandale ŵachinyengoŵa. Nambo yichikomboleka ni boma jachatamilikasye Mlungu. Chakusangalasya mnope chili chakuti Bomaji jichilosya kuti jwalakwe ali jwakuŵajilwa kulamulila yakupanganyikwa yosope. Ana boma jeleji ni japi? Baibulo jikusasala kuti jili “Uchimwene wa Mlungu.”—Luka 4:43.

Yesu Klistu jwaganichisyaga ya Uchimwene wa Mlungu pajwasasile mu lipopelo lyakwe lyachisyasyo kuti, “Uchimwene wawo uyiche. Kusosa kwawo kutendechekwe . . . pachilambo chapasi.” (Mateyu 6:9, 10) Elo, Uchimwene wa Mlungu wuchilolechesya kuti chakulinga cha Mlungu chitendekwe pachilambo chapasi ngaŵaga cha ŵandu ŵakusasachilila udindo kapena ŵangaganichisya ya ŵane.

Uchimwene wa Mlungu ukusakolajidwasoni kuti, “Uchimwene wa kwinani.” (Mateyu 5:3) Ligongo chichi? Atamose kuti uchimwenewu uchilamulila pachilambo chosope chapasi nambo uchilamulilaga wuli kwinani ngaŵaga pachilambopa. Ana yeleyi yikugopolela chichi? Yikugopolela kuti bomaji ngasijisosechela yindu yine kapena chikamuchisyo cha mbiya mpela sya misongo. Yeleyi yichiŵa yakulimbikasya kwa ŵandu ŵachachiŵa mu bomaji.

Maloŵe gakuti “uchimwene” gakulosya kuti uchimwene wa Mlungu uli boma jisyesyene. Bomaji jikwete Mwenye jwali Yesu Klistu juŵapochele ulamusi wakwe kutyochela kwa Mlungu. Pakwamba ya Yesu Baibulo jikusasala kuti:

• “Uchimwene tiwuchiŵa m’miyala mwakwe . . . Uchimwene wakwe uchijendelechela soni mtendele ngasiwumala.”—Yesaya 9:6, 7, King James Version.

•   “Ŵapegwile ulamusi, lumbili ni uchimwene, kuti ŵandu ŵa mitundu josope, ngosyo syosope ni ŵa yiŵecheto yakulekanganalekangana amtumichileje jwalakwejo. Ulamusi wakwe uli wa mpaka kalakala.”—Danieli 7:14.

• “Sambano machili gakulamulila chilambo chapasi gali m’myala mwa Ambuje wetu [Mlungu] ni mwa jwakusagulidwa jwakwe jula.”—Chiwunukuko 11:15.

Mwakamulana ni maloŵe ga mu lipopelo lya Yesu lyachisyasyo, Uchimwene wa Mlungu uchikwanilisya chakulinga cha Mlungu pachilambo chapasichi. Ŵandu ŵachachiŵa pasi pa uchimwenewu chachilijiganya mwampaka asamalilile chilambo kuti chiŵesoni chambone soni chigumbale ni yaumi.

Kupunda yosope, Uchimwene wa Mlungu uchajiganya ŵandu ŵakwe. Jemanjaji chachilijiganya ndamo syakulandana syakusosekwa kola. Ngasipapagwa ungapikangana soni kugaŵikangana. Pa lilemba lya Yesaya 11:9 pakusati, “Tipachiŵa pangali soni china chilichose chakupweteka kapena chakonanga . . . Nipo ŵandu pa chilambo chosope chapasi tachiŵa ŵegumbale ni lunda lwakwamanyilila Ambuje, mpela mujikusagumbalila nyasa ni mesi.”

Ŵandu ŵapachilambo chosope chachitama mwakamulana soni mwamtendele. Yeleyi ni yakusasaka ŵa bungwe ja United Nations ali akwanilisye. Pa Salimo 37:11 pakusati, “Tachipochela chilambo kuti chiŵe chawo, ni tachiŵa pamtendele wakupundanganya.” Pandaŵi jelejo, yindu mpela “kasa malamusi,” “konasika kwa yindu” “usawuchi” soni “ngondo” yichiŵa mbili jakala. Ana yeleyi yichikwanilichikwa chakachi? Yichikwanilichikwa pawuchitanda kulamulila uchimwene wa Mlungu pa chilambo chapasi. Ana uchimwenewu uchitenda yeleyi mwamtuli? Soni ana ulamusi wa uchimwenewu mpaka wakamuchisye chamtuli wawojo? Kwende tulole.