Ligongo Chichi Ŵandu Ngakuchimbichisyana M’maŵasa?
LIGONGO CHICHI KUCHIMBICHISYANA KULI KWAKUSOSEKWA MWIŴASA?
Liŵasa likusaŵa pamtendele naga wosope mwiŵasamo akusachimbichisyana.
-
Buku jine jakamuchisya maŵasa jasasile kuti naga ŵalombane akusachimbichisyana, yikusakamuchisya kuti “lisiku lililyose aŵeje ŵakamulana payakutendekwa yamwanamwana kapenasoni yekulungwakulungwa.”—Jasasile myoyo buku jakuti The Seven Principles for Making Marriage Work.
-
Ŵakuwungunya ŵapatile kuti ŵanache ŵakusachimbichisya ŵandu ŵane ngakusatenda woga, akusakamulana mnope ni achinangolo ŵawo, soni ngakusalagasikaga mnope nganisyo.
YAMPAKA ATENDE PAKULICHIMBICHISYA LIŴASA LYAWO
Akambilane yindu ayi. Chandanda, jwalijose mwiŵasamo akusosekwa kumanyilila yagakusagopolela maloŵe gakuti “kuchimbichisyana.” Chaŵili, alembe ndamo syakusaka kuti jwalijose mwiŵasamo akole soni syakusosekwa kusiŵambala. Soni chatatu, liŵasa lyawo likusosekwa kukambilana yakusosekwa kutenda jwalijose pakulosya kuti akusamchimbichisya mjakwe.
Aŵeje chisyasyo chambone. Aŵambaleje kwanyosya ŵandu ŵamwiŵasa mwawo ligongo lya yindu yakusalepela kutenda soni akasisyaga mwachipongwe nganisyo syawo. Pakuŵecheta ni wawojo akakataga maloŵe kapena kutenda yindu yakulosya kuti ngakuyikosya yakuŵechetayo.
Yampaka atende: Ŵachimbichisyeje ŵamkwawo soni ŵanache ŵawo atamose pandaŵi jele akuganisya kuti kutenda yeleyo kuli kwakusawusya.
Achimbichisyaneje atamose patindene nganisyo. Pakuŵecheta mbali jawo aŵambaleje kuŵecheta maloŵe mpela gakuti “ndaŵi syosope mkusatenda yamti” kapena “nganimtendejepo yamti.” Maloŵe mpela gelega gakusaŵa gakupweteka kwa ŵamwiŵasa mwawo soni mpaka gatendekasye futo jamwana kuŵa jekulungwa mnope.
YATUKUTENDA ŴA MBONI SYA YEHOFA PAKUGAKAMUCHISYA MAŴASA KUTI GACHIMBICHISYANEJE
Ŵa Mboni sya Yehofa akusamlimbikasya jwalijose mwiŵasa kuti amchimbichisyeje mjakwe. Akusatenda yeleyi mwakukoposya ngani kupitila m’mabuku, mabulosha, soni m’mafidiyo. Yindu yosopeyi mpaka ayipate mwalulele.
NGANI SYA ŴALOMBANE: Ngani sya mtwe wakuti Yakamuchisya Liŵasa mpaka syakamuchisye ŵalombane kuti . . .
-
apikanileje mjawo pakuŵecheta
-
aŵambaleje ngaŵechetekasya ŵamkwawo
-
aŵambale kukangana
(Awungunye pa jw.org ngani syakuti “Yakamuchisya Liŵasa”)
NGANI SYA ACHINANGOLO: Ngani sya mtwe wakuti Yakamuchisya Liŵasa mpaka syakamuchisye achinangolo pakwajiganya ŵanache ŵawo kuti . . .
-
aŵe ŵakupikanila
-
akamuleje masengo ga pamlango
-
aŵendeje yindu “mwaulemu” soni aŵecheteje kuti “sikomo kwejinji”
(Awungunye pa jw.org ngani syakuti “Kulela Ŵanache” soni “Kulela Ŵanache Ŵachinyamata”)
Aŵalanjesoni ngani syakuti “Yindu 6 Yakusosekwa Kulijiganya Ŵanache” mu Ajimuche! Na. 2, 2019 soni “Yindu 12 Yakamuchisya Maŵasa Kuŵa Gakusangalala” mu Ajimuche! Na. 2, 2018 papeji 8-11 (Awungunye nganisi pa webusayiti ja jw.org)
NGANI SYA ŴACHINYAMATA: Mbali jakuti Ŵachinyamata Ŵachinandipile Soni Ŵachikulile jajili pa jw.org jikwete ngani, mafidiyo, soni yakusosekwa kutenda ŵachinyamata yampaka yakamuchisye kuti . . .
-
aŵechetaneje chenene ni achinangolo ŵawo soni ŵanache
-
aŵechetaneje mwaulemu ni achinangolo ŵawo pangani ja malamusi gaŵatamilikasisye
-
achinangolo ŵawo ŵadalileje
(Awungunye pa jw.org ngani syakuti “Ŵachinyamata Ŵachinandipile Soni Ŵachikulile”)
Ngakusasosekwa kulipila mbiya jilijose pakukamulichisya masengo webusayiti ja jw.org. Nambosoni ngakusasosekwa kutenda mkamulano wapadela ni achimsyene webusayitiji kuti ajinjilepo soni ngasiŵaŵenda kuti apeleche yindu yawo yachimsisi.
