Yitendo yawo yili yakusosekwa mnope kulekangana ni lina lyawo nambosoni kawoneche kawo. Yitendoyi yikusapwatikapo ndamo, chikulupi nambosoni umundu wawo. Kusala yisyene, yitendo yawo yili chilichose chachikusichamanyikasya wawojo, kutandila umundu wawo wamkati mpaka wakusa.

Achimjetu mpaka agambeje kutusagulila yakutenda ligongo lyakuti nganitukola yitendo yambone. Yeleyi mpaka yitendekasye kuti tulepeleje kuyichenjela yatukusakulupilila.

Mnyamata jwine jwa yaka 18, lina lyakwe Adrian, jwaŵechete kuti, “Ŵandu ŵajinji ali mpela yidole yayikusasimanikwa m’masitolo. Jemanjaji ŵangasagula chenene yakuwala yakusosekwa kuti awale mpela mwakusatendela ŵandu ŵane.”

Msikana jwine jwa yaka 16, lina lyakwe Courtney, jwaŵechete kuti “Nalijiganyisye yampaka ndende kuti nalichenjeleje pa ngani ja kutenda yayili yambone atamose kuti ndaŵi jine yikusaŵa yakusawusya. Mwamti mpaka ngombole kwamanyilila ŵali achimjangu ŵasyesyene naga akusachimbichisya nganisyo syangu.”

MFUNDO JA M’BAIBULO: “Mkajigalilaga kaganisye ka ŵandu ŵa mu ndaŵi ajino, nambo mgalawuche mwakuchenga nganisyo syenu.”—Aloma 12:2.

Awumanyilileje umundu wawo soni kuti akusaka kuti chaŵe mundu jwamtuli, mwakulola yakusatenda chenene, yakusalepela soni chikulupi chawo. Kuti atende yeleyi akusosekwa kwanga kaje yiwusyo yakuyichisyayi.

Yakusatenda chenene: Ana ngwete lunda lwamtuli? Ana ni ndamo syekulungwa syapi syangusakuya? Mwambone ana ngusasunga ndaŵi, ngusalilekasya, kulimbichila masengo, soni ndili jwakoloŵa magasa? Ana pana yindu yine yambone yangusakombola kutenda?

ALINJE KUTENDA AYI: Ana yikusiyasawusyaga kumanyilila yindu yambone yatesile kapena yaŵechete? Naga yili myoyo, ŵawusye achinangolo ŵawo kapena mjawo jwapamtima kuti ŵasalile mbali syakusatenda chenene soni magongo gakwe.

MFUNDO JA M’BAIBULO: “Jwalijose agalinjeje masengo gakwe, soni naga gali gambone nikuti chachikola ligongo lyakusangalalila ni masengo gakwego, soni akalandanyaga masengo gakwego ni ga mundu jwine.”—Agalatia 6:4.

Yakusalepela: Ana ni mbali syapi syangusosekwa kuputila ngondo pa yitendo yangu? Ana ndaŵi japi jangusalinjidwa kuti ndende yakusakala? Ana ngusalilekasyaga?

MFUNDO JA M’BAIBULO: “Naga tukuŵecheta kuti, ‘Nganitukola ulemwa,’ nikuti tukulilambusya.”—1 Yohane 1:8.

Chikulupi chawo: Ana ngusakuyaga ndamo syamtuli soni ligongo chichi ngusasikuya? Ana ngusamkulupilila Mlungu? Ana ngwete maumboni gamtuli gakulupilila kuti Mlungujo apali? Ana yakutendekwa yapi yangusosekwa kuti ngayichenga soni ligongo chichi? Ana ngusakulupilila kuti msogolo yichitendekwa yamtuli?

MFUNDO JA M’BAIBULO: “Ganichisya chilepe ya msogolo tikuchimsunga m’mwejo soni kupikanichisya chenene yindu, tikuchimchenjela.”—Misyungu 2:11.