Maloŵe gakuti chamuko gakusagopolela kulongolela kapena kwiganya. Gakusagopolelasoni kumkamuchisya mwanache kuti aleche ndamo syakusakala. Nambosoni yikusapwatikapo kumjiganya ndamo syampaka simkamuchisye kusagula yindu mwalunda.

Yaka yapachangakaŵapa, maŵasa gejinji galesile kupeleka chamuko kwa ŵanache ŵawo pakogopa kuti chalipikaneje kuŵa ŵangali mate. Nambope, achinangolo ŵalunda akusiŵapa ŵanache ŵawo malamusi gakwakamuchisya soni kwajiganya kuti agakuyeje.

Pamela jwatite, “Ŵanache akusasosekwa kwasalila malile ga katende ka yindu kuti akule ni ndamo syambone. Ŵanache naga ngakupedwa chamuko mpaka asaguleje soni kutenda yakusakala.”

Akachengagachengaga. Naga mwanache jwawo ngakukuya malamusi gaŵatamilikasisye pamlangopo, ampeje chamuko. Nambope naga mwanache jwawo atesile chenene, aŵeje ŵakoseka kum’yamichila.

Christine jwatite, “Ndaŵi syejinji ngusinayamichila ŵanache ŵangu ligongo lyakuŵa ŵakupikanila atamose kuti tukutama m’chilambo cha ŵandu ŵangapikanila. Kwayamichilaku kukusakamuchisya kuti yiŵeje yangasawusya kwajongolela naga pakusosechela.”

MFUNDO JA M’BAIBULO: “Chilichose chapandile mundu chachigowolasoni chichocho.”—Agalatiya 6:7.

Aŵeje ŵaganisya chenene. Pakupeleka chamuko, alolejesoni yaka ya mwanachejo, mwakusatendela yindu, nambosoni ukulu wa chakulemwa chatesilecho. Chamuko chikusakamula masengo chenene naga chipelechedwe mwakamulana ni mtundu wa chakulemwacho. Mwambone, naga mwanache jwawo ngakupikanila malamusi ga kakamulichisye masengo ka foni, mwine mpaka agambe kumsumula fonijo kwa kandaŵi kamnono kapena kumŵichila malile. Tukusosekwasoni kuŵambala kutumbila ni yiliyose mwine ligongo lyakuti ngayikutusangalasya.

Wendell jwatite, “Ngusalinga kuti manyilile naga mwanangu atesile mwamele kuti akambikanila. Mundu jwine mpaka akole chisyoŵe chakutenda yindu yakulemwa mwine ligongo lya kaganisye kakwe. Naga yili myoyo mpaka tugambe kumkamuchisya. Nambo jwine mpaka atende chakulemwa mwangosi, champaka chisosekwe kumkamuchisya mwamachili.”

MFUNDO JA M’BAIBULO: “Mkasimwatumbilikasyaga ŵanache ŵenu, kuti akatenguka.”—Akolose 3:21.

Aŵeje ŵachinonyelo. Ŵanache akusaŵa ŵangasawusya kupochela chamuko naga akumanyilila kuti chakulinga cha achinangolowo pakupeleka chamukocho chili chinonyelo.

Daniel jwatite, “Mwanache jwetu palepele kutenda chenene yindu yineyakwe, tukusamlimbikasya mwakum’yamichila pa yakusagula ya lunda yajwatesile munyumamu. Tukusamsalilasoni kuti kulepela kutenda yineyakwe nganikuŵa kujonasile mbili jakwe mnopemnope naga alinganyisye yinduyo. Nambosoni tukusamsimichisya kuti m’weji mpela achinangolo tuli ŵakoseka kumkamuchisya.”

MFUNDO JA M’BAIBULO: “Chinonyelo chili chakuwusimana mtima soni chaumbone mtima.”—1 Akolinto 13:4.