Ndamo syambone sili syakusosekwa kwa mundu jwalijose. Mwambone, ana akusasachilila kuti aŵe jwakuwona mtima mu yindu yosope? Mwangakayichila mpaka asachesoni kuti ŵanache ŵawo aŵe ŵakuwona mtima.

Ndamo syambone sikupwatikaposoni yindu yatukusatenda paumi wetu. Mwambone, mundu jwa ndamo syambone akusaŵaga jwakulipeleka, jwachilungamo soni jwakwaganichisya ŵane. Yeleyi yili yakusosekwa kuti mwanache alijiganyeje mkanakule.

MFUNDO JA M’BAIBULO: “Mumjiganyani chile mwanache litala lyambone lyakuti ajendemo, ni kuti atamose pati achekulwipe ngasatyoka mu lyele litalalyo.”—Misyungu 22:6.

Ligongo lyakuti chilambochi chigumbele ni yasayansi, ndamo syambone sili syakusosekwa. Jwamkongwe jwine jwali nangolo, lina lyakwe Karyn jwatite, “Ndamo syakusakala mpaka sisimanikwe m’mafoni. Ŵanache ŵetu pakulolela yindu yineyakwe tukusalolechesya kuti nombe m’we tuŵe papopo.”

MFUNDO JA M’BAIBULO: ‘Ŵandu ŵachikulile . . . pakukamulichisya masengo machili gawo gakuganisya alijiganyisye kuti akomboleje kulekanganya chambone ni chakusakala.’—Ahebeli 5:14.

Kwaganichisya ŵane kuli kwakusosekwa mnope. Yeleyi yikusapwatikapo kuŵecheta maloŵe gakuchimbichisya mpela gakuti “chonde” soni “sikomo,” nambosoni kola lung’wanu ni ŵandu ŵane. M’chilambochi ndamo syelesi sili syakusoŵa ligongo ŵandu masiku agano akutanganidwa mnope ni yindu mpela mafoni, m’malo mwakola lung’wanu ni ŵandu.

MFUNDO JA M’BAIBULO: “Yindu yimkusaka kuti ŵandu amtendele, jemanjasoni mwatendeleje yeleyo.”—Luka 6:31.

Ŵasalileje ŵachinyamata ŵawo ndamo syambone syakusosekwa kuya. Mwambone, yakuwungunya yikulosya kuti ŵachinyamata mpaka aŵambale kugonana mkanajinjile mu ulombela naga akwiganyidwa chenene kusakala kwakutenda yeleyi.

ALINJE KUTENDA AYI: Akamulichisye masengo yayigambile kutendekwa kwene kuti atagulilane ni ŵanache ŵawo pakwamba ya ndamo syambone. Mwambone, naga pachangakaŵapa papikaniche ngani syakwamba ya chiwawa, mpaka ajile kuti, “Ŵandu ŵane akusiŵatendela achimjawo yindu yakusakala. Ligongo chichi akusatenda yeleyi?”

Brandon jwatite, “ Kwa ŵanache yikusaŵa yakusawusya kuti asagule chambone kapena chakusakala naga ngakuchimanyilila chachili chambone ni chakusakalacho.”

Ŵajiganyeje ŵanache ŵawo kuti atendeje yambone. Atamose ŵanache ŵamwana mpaka alijiganye kuŵecheta kuti “chonde” soni “sikomo” nambosoni kwaganichisya ŵane. Buku jine jatite, “Ŵanache pakutenda yejinji yakupunda msingu wawo chinga pali mwiŵasa, kusukulu kapena m’musi, ni pakusatendasoni yejinji mwachinonyelo yampaka yakamuchisye ŵane, m’malo mwakutenda yakulisangalasya achimsyene.”—Parenting Without Borders

ALINJE KUTENDA AYI: Ŵapeje ŵanache ŵawo masengo ga pamlango gakuti atendeje kuti alijiganye kusosekwa kwa kwakamuchisya ŵane.

Tara jwatite, “Naga ŵanache ŵetu akutanda kamula masengo apanopano, ngasiyiŵa yachilendo kamula masengo pachachilijimila pajika. Yichiŵa kuti asyoŵelele kala kamula masengo.”