Ŵandu ŵane ayikopochele kuti ŵachinyamata ŵakusamalila ndaŵi jejinji pamalo gakunguluchila ga pa intaneti akusatanda . . .

• kunonyela mnope yipangiso yawo yamakono.

• kwaŵechetela ŵane maloŵe gachipongwe kapena kwalagasya.

• kulolela yakuŵagula atamose ali ngakusaka.

KULIDALILA

Magemu soni yindu yine yayikusasimanikwa pa intaneti akusayipanganya m’litala lyakuti ŵandu ayinonyeleje mnope. Buku jine jasasile kuti, “Mapologalamu gagali m’mafoni mwetu, ŵagapanganyisye m’litala lyakuti tumalileje ndaŵi jejinji tuli pafoni.” Patukumalila ndaŵi jejinji tuli mkukamulichisya masengo pologalamu jakuŵilanjila malonda yikusatendekasya kuti achimsyene pologalamujo apateje mbiya syejinji.

YAKUSOSEKWA KUYIGANICHISYA: Ana ŵanache ŵawo akusaganonyela mnope mafoni gawo? Ana mpaka ŵakamuchisye chamtuli kuti akamulichisyeje masengo chenene ndaŵi jawo?—AEFESO 5:15, 16.

KWATENDELA ŴANE YACHIPONGWE

Ŵandu ŵane ŵakusasimanikwa pamalo gakunguluchila ga pa intaneti akusiŵaŵechetela achimjawo yindu yachipongwe soni kwalagasya.

Ŵane akusanonyela kwaŵechetela yindu yachipongwe achimjawo ligongo lyakusaka kumanyika soni kuti ŵandu ŵanonyeleje. Pamalo gakunguluchila ga pa intaneti, mundu mpaka aliwoneje kuti akutendeledwa ngasa kapena yachipongwe naga achimjakwe akutenda yakusangalasya nambo jwalakwe nganamsalila kuti asimanikwepo.

YAKUSOSEKWA KUYIGANICHISYA: Ana ŵanache ŵawo ngakusiŵaŵechetela yachipongwe ŵandu ŵane pali pamalo gakunguluchila ga pa intaneti? (Aefeso 4:31) Ana ŵanache ŵawo yikusapweteka mnope naga achimjawo akutenda yindu yine nambo jemanjajo nganiŵaŵilanga?

YAKUŴAGULA

Pa intaneti pali pangasawusya kulolela yindu yakuŵagula. Yipangiso yamakono yine yikusakomboleka kuwugala mawebusayiti gane kuti ŵanache akalolelaga yindu yakuŵagula. Nambope achinangolo akusosekwa kumbuchila kuti ndaŵi sine yeleyi yangakamulaga, mwamti ŵanache mpaka alolelepe yindu yakusakala.

Kutumisya kapena kupochela mameseji ga yindu yangaŵajilwa mpaka kuŵe kukasa malamusi. M’madela gane, ŵachinyamata ŵatumisye kapena kupochela mameseji ga yiwulili yakuŵagula akusajimbidwa magambo mwakamulana ni malamusi ga kumangwawoko soni msingu wa ŵandu ŵatesileje nawo yeleyo.

YAKUSOSEKWA KUYIGANICHISYA: Ana mpaka ŵakamuchisye chamtuli ŵanache ŵawo kuti aŵambale kulolela kapena kwatumichisya ŵane yiwulili yakuŵagula?—AEFESO 5:3, 4.

ŴAJIGANYEJE ŴANACHE ŴAWO

Atamose kuti yikusaŵa yangasawusya kwa ŵachinyamata kukamulichisya masengo yipangiso yamakono, nambope akusosekwa kwajongolelaga. Buku jine jasasile kuti kumpa mwanache foni jakola intaneti kapena yipangiso yamakono yine, nambo ngamjiganya kakamulichisye masengo kakwe kuli “mpela kumsalila mundu kuti aliponye m’mesi nambo ali ngakumanyilila kung’ambila.”

Alole pasipa yampaka atende, kapena alembe yine yakuganichisya kuti mpaka yakamuchisye.

• Kumsalila mwanache jwangu kuti akaŵechetaga yindu yachipongwe pali pamalo gakunguluchila ga pa intaneti

• Kumkamuchisya mwanache jwangu kumalana ni nganisyo syakuliwona kuti achimjakwe ngakumŵalanjila

• Kutenda yakomboleka kuti namchenjele mwanache jwangu ku yindu yangaŵajilwa yayikusimanikwa pa intaneti

• Kulola ndaŵi syosope mu foni ja mwanache jwangu kuti manyilile mtundu wa yindu yakusalolela

• Kumŵichila ulewu wandaŵi jakusosekwa kumalila ali pafoni

• Kumsalila mwanache jwangu kuti akang’andilaga foni ndaŵi jagona

• Kumsalila mwanache jwangu kuti akang’andilaga foni pandaŵi jakulya