Ana ŵasayansi akusamanyilila mwayatandile yindu yakwinani ni yapachilambo soni umi? Kwanga mwakata iyayi. Ŵandu ŵane akusati ŵasayansi ŵakusalijiganya yakwayana ni yindu yakwinani soni pachilambo ni ŵampaka ajanje muyatandile yinduyi. Nambo apikane yiŵaŵechete pulofesa Marcelo Gleiser jwa pa koleji ja Dartmouth. Jwalakwe akusawungunya ya ndondwa, mapulaneti soni m’malele. Nambosoni akusakulupilila kuti yili yakusawusya kumanyilila naga kwana Mlungu. Jwalakwe jwatite, “Nganiyiŵa yikomboleche ata panandi kulondesya mwayatandile yakwinani soni yapachilambo.”

Mwakulandana ni yeleyi magasini jine jakusala yasayansi jatite, “Yili yakusawusya mnope kusala muwatandile umi pachilambopa. Yindu yakutukamuchisya kumanyilila yayatendekwaga pachilambopa pandanda pene, ngayikusimanikwa lelojino.” Yeleyi yikulosya kuti ŵasayansi nganaŵepe kwanga chiwusyo chakuti, ana yindu yakwinani ni pachilambo soni umi yatandite uli?

Mwine akusaliwusya kuti, ‘naga yindu pachilambopa yatesile kupanganyidwa, ana ŵani juŵayipanganyisye?’ Komboleka mpaka aliwusyesoni yiwusyo ayi: ‘Naga kwana jwine jwakwe jwalunda soni jwachinonyelo juŵapanganyisye yindu yosopeyi, ligongo chichi akusakunda kuti ŵandu ŵaŵapanganyisye alajeje? Ligongo chichi akusakunda kuti pachilambopa paŵe dini syejinji? Ligongo chichi akusakunda kuti ŵandu ŵakusamtumichila atendeje yakusakala?’

Ŵasayansi nganaŵa akombwele kwanga yiwusyoyi. Nambo yeleyi ngayikugopolela kuti wawojo nganaŵa apatile kwanga kwa yiwusyoyi. Sonitu ŵandu ŵajinji apatile kwanga kwa yiwusyoyi kupitila m’Baibulo.

Naga akusaka kumanyilila yayatendekasisye ŵasayansi ŵane kulijiganya Baibulo mpaka kwikana pakusala kuti apali juŵapanganyisye yindu yosopeyi, ajawule pa jw.org. Ni awungunye kuti “yakwamba muwatandile umi.”