Yakwinani soni yapachilambo yatemi mwakulondeka chenene. Magasini jine jakusala ya ndondwa, mapulaneti soni m’malele, jasasile kuti, “makuga ga ndondwa nganigagamba kutama mwachisawawa, nambo gatemi mwakulondeka chenene.” Ana yeleyi yikusakomboleka uli? Ŵasayansi akusakulupilila kuti yeleyi yikusakomboleka ligongo lya yindu yineyakwe yangawoneka. Yindu yangawonekayi “yikusakola machili gagakusatendekasya kuti makuga ga ndondwa gaŵeje m’malo gakwe.”

Ana yakomboleche uli kuti yindu yakwinani soni yapachilambo yitame mwakulondeka chenene? Ana mpaka tujile kuti yeleyi yagambile kutendekwa mwajika? Alole yaŵaŵechete Allan Sandage juŵakulupililaga kuti kwana Mlungu. Jwalakwe akusamanyika kuti ali “m’gulu ja ŵandu ŵaŵapali m’yaka 100 yipiteyo, ŵaŵamanyililaga kulola chenene ya mapulaneti, ndondwa soni m’malele.”

 Jwalakwe jwatite, “Nguyiwona kuti yili yangapikanika kuŵecheta kuti yindu yayatemi mwakulondeka chenene myiyi yagambile kupagwa mwajika. Apali juŵatendekasisye kuti yindu yiŵe myiyi.”

Yakwinani soni yapachilambo yikusakamuchisya yaumi. Agambe ganichisya mfundo jakuti lyuŵa likusakoposya mtukuta wambone. Yikaŵe kuti machili gagakusatendekasya lyuŵa kuti likoposyeje mtukuta, ganandipe panandi, nikuti lyuŵa ngamkanilipagwa. Nambosoni yikaŵe kuti machiliga gakwesile panandi nikuti lyuŵa likajonasiche.

Yindu yakwinani soni yapachilambo chapasi yikusakuya malamusi. Malamusiga gakusakamuchisya kuti yaumi yikombole kola umi. Jwa Sayansi jwine lina lyakwe, Anil Ananthaswamy jwasasile kuti yikaŵe kuti pangali malamusiga nikuti ngamkanitukola “ndondwa, mapulaneti nambosoni makuga ga ndondwa. Yeleyi yikatendekasisye kuti pachilambopa pakapagwa yaumi.”

Chilambo chapasi chili malo gambone gakutama ŵandu. Chilambo chapasi chikwete mpweya wambone, mesi gakwanila nambosoni mwesi wa sayisi jambone, wawukusakamuchisya kuti chilambochi chitamilichiche. Ŵakulola yachilengedwe ŵatite, “Chilambo chapasi chikwete yindu yambone yakusosekwa mnope, yakusasosechela ŵandu kuti aŵe ni umi.”—National Geographic. *

Jwakulemba ngani jwine jwatite, “Lyuŵa lili pakutalichila mnope” ni likuga lya ndondwa lya uchingausiku wetuwu. Ligongo lyakuti lyuŵa lyatalichile myiyi, yikusatukamuchisya kuti pachilambopa paŵe yaumi. Yikaŵe kuti lyuŵa lyaŵandichile mnope likuga lya ndondwa lya uchingausiku wetuwu kapena kuŵa pasikati kapenasoni kuŵa kumbesi kusyesyene, tukapochelaga mtukuta wejinji yayikatendekasisye kuti yindu yosope pachilambo chapasi yiwe. Mmalo mwakwe, chilambo chapasi chatemi pamalo gambone, mu uchingausiku wele ukusakamuchisya kuti yaumi yisimanikweje pachilambopa.

Mwakamulana ni yaŵamanyililaga Paul Davies pakwamba ya yindu yakwinani ni yapachilambo soni malamusi gele yindu yeleyi yikusakuya, yamtendekasisye kuŵecheta kuti, “Nganimba ngulupilile kuti ŵanduwe twagambile kusimanikwa mwaupile, yagambile kutendekwa mwangosi kapena yagambile kutendekwa jika kuti tusimanikwe. Ngukulupilila kuti pana magongo gagatendekasisye kuti paŵe yaumi.” Davies nganasala kuti Mlungu ni juŵapanganyisye yindu yakwinani ni yapachilambo soni ŵandu. Nambo ana wawojo akuganisya uli? Yakwinani soni chilambo chapasi yikusalosya kuti yapanganyidwe chenene kuti ŵandu akombole kutama ni umi. Ana yeleyi yikulosya kuti apali jwine jwakwe juŵayipanganyisye?