Ngatukusosekwa ganisya kuti ŵakulijiganya ŵane 70 ŵala ŵamlesile Yesu ligongo lyakuti jemanjajo nganasimanikwa nawo pandaŵi jele jwalakwejo jwatandisyaga mwambo ŵa Chakulya cha Ligulo cha Ambuje. Yesu jwagambile kusaka kuti pandaŵiji agambe kuŵa ni ŵandumetume wakwepe.

Yesu jwasangalalaga ni ŵandumetume wakwe 12 pampepe ni ŵakulijiganya ŵane 70 ŵala. Kutyochela pasikati pa ŵakulijiganya ŵakwe ŵajinji, Yesu jwasagwile achalume 12 ŵaŵakolasile kuti ŵandumetume. (Luk. 6:​12-16) Jwalakwe jwaliji ali ku Galileya paŵaŵilasile “ŵakulijiganya ŵakwe 12 ŵala,” mwamti “ŵatumisye jemanjajo kuti akalalichile ya Uchimwene wa Mlungu soni kuti akaposyeje ŵandu.” (Luk. 9:​1-6) Kaneko pajwaliji ku Yudeya, Yesu, “ŵasagwile ŵandu ŵane 70 ni kwatumisya ŵaŵiliŵaŵili.” (Luk. 9:51; 10:1) Mwamti Yesu jwakwete ŵakumkuya ŵakwe m’madela gejinji ŵaŵalalichilaga yakwamba jwalakwejo.

Komboleka kuti Ayuda ŵaŵaŵele ŵakumkuya ŵa Yesu ŵapitilisye kutenda Pasika chaka chilichose pampepe ni maŵasa gawo. (Eks. 12:​6-11, 17-20) Pajaŵandichile ndaŵi jakuti awulajidwe, Yesu pampepe ni ŵandumetume ŵakwe ŵapite ku Yelusalemu. Nambo jwalakwe nganajiŵilanga gulu ja ŵakulijiganya ŵakwe ŵajinji kutyochela ku Yudeya, ku Galileya soni ku Peleya kuti atendele pampepe Pasika. Pandaŵiji Yesu ŵasakaga kuti agambe kuŵa ni ŵandumetume ŵakwepe. Mwamti jwalakwe jwasalile jemanjajo kuti, “Mbele ndili mkusachilila mnope kulya Pasikaji yimpepe ni jemanja mkanindande kusimana ni yakusawusya.”—Luk. 22:15.

Ngatukukayichila kuti Yesu jwakwete magongo gambone gakutendela yeleyi. Kwaliji kuli kusigele kandaŵi kamnono kuti Yesu awulajidwe mpela “Mwanache Jwangondolo jwa Mlungu jwakutyosya ulemwa wa chilambo.” (Yoh. 1:29) Yeleyitu yasosekwaga kutendechela ku Yelusalemu kukwaliji malo gakupelechela mbopesi. Mwanache jwangondolo jwaŵalyaga Ayisalayeli pa Pasika, jwakumbusyaga jemanjaji kuti Yehofa jwakopwesye ku Iguputo. Nambo mbopesi ja Yesu jatesile yejinji kupunda yeleyi. Yaliji yakuti mbopesi jakwe chijawombole ŵandu wosope ku ulemwa soni chiwa. (1 Akoli. 5:​7, 8) Myoyo, ligongo lya mbopesi jiwapeleche Yesu yakamuchisye kuti ŵandumetume 12 ŵala aŵe fendeshoni ja mpingo ŵa Chiklistu. (Aef. 2:​20-22) Yili yakutesya chidwisoni kuti msinda weswela wa Yelusalemu ukwete “maganga 12” ga fendeshoni papalembedwe “mena 12 ga ŵandumetume 12 ŵa Mwanache Jwangondolo.” (Chiw. 21:​10-14) Yeleyitu yikwamba kulosya kuti ŵandumetume ŵakulupichika ŵakwete udindo wekulungwa pakukwanilisya chakulinga cha Mlungu. Ayitu niyayatendekasisye kuti Yesu alinganye yakuti aŵe yimpepe ni ŵandumetume ŵakwe pa Pasika jwakumalisya soni pajwatandisyaga mwambo ŵa Chakulya cha Ligulo cha Ambuje.

Ŵakulijiganya ŵakwe 70 ŵanewo nganaŵa yimpepe ni Yesu pachakutendekwachi. Nambope ŵakulijiganya wosope ŵa Yesu ŵaliji ŵakuti chachipindula ni mwambo ŵa Chakulya cha Ligulo cha Ambuje. Mwamti ŵakulijiganya wosope ŵa Yesuwo ŵakwete upile ŵakwinjila mu chilanga cha uchimwene cha ŵachikolasile Yesu pajwatandisyaga mwambo ŵa Chakulya cha Ligulo cha Ambuje.—Luk. 22:​29, 30.