ŴANDU akusasaka kutama ni umi wakusangalala. Nambo m’masiku gakumalisya gano, jwalijose akusimana ni ‘yakusawusya.’ (2 Tim. 3:1) Yindu mpela, yangali cilungamo, kulwala, kusoŵa kwa masengo, yindu yakutesya canasa, kapena yakulagasya nganisyo soni ciwa mpaka yatendekasye ŵane mwapanandipanandi ngakola cisangalalo. Atamose ŵakutumicila ŵa Mlungu mpaka atenguce soni cisangalalo cawo mpaka citande kunandipa. Wawojo ali asimene ni yakusawusya mpela yeleyi, ana mpaka atende wuli kuti cisangalalo cawo cikamala?

Kuti tupate kwanga kwambone kwa ciwusyoci, tukusosekwa candanda tumanyilile kuti cisangalalo cisyesyene cili cici, soni mwatendele ŵane kuti akolepe cisangalaloci atamose paŵasimene ni yakusawusya. Kaneko citumanyilile yampaka tutende kuti tuŵepe ŵakusangalala soni konjecesya cisangalaloco.

Kola cisangalalo kuli kwakulekangana ni kwamba kusangalala kwa ndaŵi jamnono. Kwende tuganicisye cisyasyo aci. Mundu jwakolelwe mpaka agambeje kuseka mnope. Nambo ukanawo pawummalile mumtwe jwangaseka, soni akusatanda kumbucila yakusawusya yakwete. Celecitu nganiciŵa cisangalalo cisyesyene.—Miy. 14:13.

Mwakulekangana ni yeleyi, cisangalalo cisyesyene cikusatyocela mumtima. Cisangalalo cili “ndamo jakusalosya mundu naga apocele kapena akwembeceya yindu yambone.” Mundu akusajendelecela kulosya ndamoji yindu payili cenene kapena payisawisye. (1 Ates. 1:6) Mundu mpaka asimane ni yakusawusya nambo ni kolape cisangalalo mumtima mwakwe. Mwambone, pandaŵi jine ŵandumetume ŵakwapwile ligongo lyakuŵeceta ya Klistu. Nambo jemanjaji “ŵatyosile pameso pa Luŵala Lwekulungwa lwa Ayuda, ali mkusangalala ligongo Mlungu ŵaweni kuti ali ŵakuŵajilwa kutendeledwa cipongwe ligongo lya lina lya Yesu.” (Mase. 5:41) Ngaŵa kuti jemanjaji ŵasangalalaga ligongo lya kukwapulidwaku. Nambo mpela ŵakutumicila ŵa Mlungu, ŵaliji ŵakusangalala ligongo lya kulupicika kwawo kwa jwalakwe.

Cisangalalo nganijiŵa ndamo jakupagwa najo soni jangayika jika. Ligongo cici tukuti m’yoyo? Ligongo lyakuti cisangalalo jili jimo mwa ndamo syawukusakoposya msimu weswela wa Mlungu. Ni cikamucisyo ca msimu wa Mlungu, mpaka tukole “umundu wasambano,” wawukupwatikapo cisangalalo. (Aef. 4:24; Aga. 5:22) Naga tukwete cisangalalo, tucikombola kupilila yakusawusya yampaka tusimane nayo.

Yehofa ŵasakaga kuti pacilambopa paŵe yindu yambone, ngaŵa yindu yakusakala yayitupile masiku agano. Atamose kuti pakutendekwa yakusakala, nambo cisangalalo ca Yehofa cangamala ligongo lya yeleyi. Maloŵe ga Mlungu gakusati, “Macili soni cisangalalo yili pakutama pakwe.” (1 Mbiri 16:27) Nambosoni, yindu yambone yakutenda ŵakutumicila ŵakwe ‘yikusasangalasya mtima wa [Yehofa].’—Miy. 27:11.

Naga yindu ngayikutendekwa mpela mutwajembeceyaga, mpaka tumsyasye Yehofa mwakuŵambala kudandawula mnope. Kuti tuŵepe ŵakusangalala, tukusosekwa kuganicisya yindu yambone yatukwete soni kwembeceya  mwakulitimalika yindu yambone mnope yayikwika msogolo. *

M’Baibulo mwana yisyasyo ya ŵandu ŵaŵaŵele ŵakusangalala paŵasimanaga ni yakusawusya. Cisyasyo cimo cili ca Abulahamu. Jwalakwe jwapilile yindu yakogoya mnope soni yakusawusya yakutyocela kwa ŵandu ŵane. (Gen. 12:10-20; 14:8-16; 16:4, 5; 20:1-18; 21:8, 9) Mwangasamala kandu ya yakusawusyayi, Abulahamu jwakwetepe cisangalalo mumtima mwakwe. Ana jwakombwele wuli yeleyi? Jwalakwe jwaganicisyaga mnope ya cembeceyo cakutama m’cilambo casambano mu ulamusi wa Mesiya. (Gen. 22:15-18; Ahe. 11:10) Yesu jwaŵecete kuti, “Abulahamu mtati jwenu ŵasangalele mnope pakwembeceya kulola lisiku lyangu.” (Yoh. 8:56) M’weji mpaka tumsyasye Abulahamu mwakuganicisya yindu yambone yatukwembeceya msogolo.—Alo. 8:21.

Mwakulandana ni Abulahamu, nombenajo ndumetume Paulo ni mjakwe, lina lyakwe Sila, ŵaganicisyaga mnope ya yilanga ya Mlungu. Jemanjaji ŵakwete cikulupi cakulimba, soni ŵaŵelepe ŵakusangalala atamose paŵasimanaga ni yakusawusya. Mwambone, pambesi pakwaputa mnope ni kwaponya mu ndende, “pasikati pa cilo, [jemanjaji] ŵaliji mkupopela soni kwimba nyimbo syakumlumba Mlungu.” (Mase. 16:23-25) Paulo ni Sila ŵakwete cisangalalo ligongo lya cembeceyo cawo nambosoni pakumanyilila kuti akulagasidwa ligongo lya lina lya Klistu. M’wejisoni mpaka tumsyasye Paulo ni Sila mwakwendelecela kuganicisya yindu yambone yatucipata ligongo lya kutumicila Mlungu mwakulupicika.—Afi. 1:12-14.

Masiku agano abale ni alongo ŵajinji akwendelecela kuŵa ŵakusangalala atamose pasimene ni yakusawusya. Mwambone, mu November 2013, mbungo jamacili jajonasile yindu m’cilambo ca Philippines, kupwatikapo nyumba sya maŵasa ga Mboni gakupunda 1,000. George jwele nyumba jakwe jagwile, pandaŵijo jwasasile kuti, “Mwangasamala kandu ni yayatendekweyo, abale ali ŵakusangalala. Ngulepela kusala mwatukusangalalila.” Patusimene ni yakusawusya yekulungwa, mpaka tuŵepe ŵakusangalala naga tukuganicisya, soni kuyamicila yindu yatutendele Yehofa. Ana Yehofa atutendele yindu yine yapi yampaka yitutendekasye kuŵa ŵakusangalala?

Ana pana ligongo line lyekulungwa lyakututendekasya kuŵa ŵakusangalala kupunda unasi wetu ni Mlungu? Agambe ganisya, tukummanyilila cenene Jwakulamulila jwa Jakupanganyikwa Yosope. Jwalakwe ali Atati ŵetu, Mlungu jwetu, soni Mjetu!—Sal. 71:17, 18.

Tukusayamicilasoni kuti Yehofa jwatupele umi soni upile wakusangalala ni umiwo. (Mlal. 3:12, 13) Mpela yakupanganyikwa ya Yehofa, tukusamanyilila lisosa lyakwe kwa m’weji. (Akolo. 1:9, 10) Ligongo lya yeleyi, Mlungu akusatusalila yindu yakutukamucisya kola umi wambone soni tukusamanyilila cenene cakulinga ca umi. Nambo mwakulekangana ni m’weji, ŵandu ŵajinji pacilambopa ngakumanyilila cakulinga cisyesyene ca umi. Pagombelecesya kulekanganaku, Paulo jwalembile kuti, “‘Pangali mundu juŵakombwele kuyiwona kapena kupikana kapenasoni kuganicisya yindu yele Mlungu ŵalinganyicisye ŵandu ŵakusiŵanonyela.’ Pakuŵa Mlungu ŵatujuwulile yeleyi kupitila mwa msimu wakwe.” (1 Akoli. 2:9, 10) Kumanyilila lisosa lya Yehofa ni cakulinga cakwe, kukusatutendekasya kuŵa ŵakusangalala.

Kwende tuganicisyesoni yindu yine yatesile Yehofa kwa ŵandu ŵakwe. Tukusaŵa ŵakusangalala pakumanyilila kuti Yehofa ŵalinganyisye yakuti tukululucidweje yakulemwa. (1 Yoh. 2:12) Ligongo lya canasa cakwe, Mlungu atupele cembeceyo cakutama m’cilambo casambano cacikwika pacangakaŵapa. (Alo. 12:12) Atamose apano, Yehofa atupele acimjetu ŵatukusalambila nawo yimpepe. (Sal. 133:1) Maloŵe ga Mlungu gakusatusimicisya kuti Yehofa akusiŵacenjela ŵandu ŵakwe kwa Satana ni yiŵanda yakwe. (Sal. 91:11) Patukuganicisya ya majali gatupele Mlungu, tukusaŵa ŵakusangalala mnope.—Afi. 4:4.

Ana Mklistu jwali kala jwakusangalala mpaka ajonjecesye cisangalalo cakwe? Yesu jwatite, “Mbecete yindu yeleyi kwa jemanja, kuti cisangalalo cangu ciŵe mwa jemanja soni kuti cisangalalo ca jemanja ciŵe cakwanila.” (Yoh. 15:11) Ana maloŵe gelega ngagakulosya kuti cisangalalo cetu mpaka cikule? Yatukusatenda pakonjecesya cisangalalo mpaka tuyilandanye ni kwisilila sasu pa moto. Tukusasosekwa kuŵika sasu kuti moto ujendelecele kolela. Mwakulandana ni yeleyi, m’weji tukusasosekwa kulilisya mwausimu kuti tujonjecesye cisangalalo cetu. Tukumbucileje kuti msimu wa Mlungu ni wawukusatukamucisya kuti tuŵeje ŵakusangalala. M’yoyo, kuti tujendelecele kuŵa ŵakusangalala, tukusosekwa kuŵenda msimu weswela wa Yehofa kuti utukamucisyeje. Tukusosekwasoni kuŵalanga ni kuganicisya maloŵe ga Mlungu gagali gakusalilidwa ni msimu weswela.—Sal. 1:1, 2; Luk. 11:13.

Cindu cine campaka citukamucisye konjecesya cisangalalo cetu, cili kulimbicila pakumtumicila Yehofa. (Sal. 35:27; 112:1) Ligongo cici? Ligongo lyakuti twapanganyidwe kuti ‘tumjogopeje Mlungu, soni tusunjeje malamusi gakwe. Pakuŵa yeleyi ni yakusosekwa kutenda ŵandu wosope.’ (Mlal. 12:13) Kuŵeceta kwine, m’weji twapanganyidwe kuti tutendeje lisosa lya Mlungu. M’yoyo patukutumicila Yehofa, tukusakola cisangalalo cisyesyene paumi wetu. *

Kusya cisangalalo cakutyocela kwa Mlungu kukwete maumbone gejinji. Mwambone, tucasangalasya mnope Atati ŵetu ŵakwinani patukwatumicila mwakusangalala mwangasamala kandu ya yakusawusya yampaka tusimane nayo. (Deut. 16:15; 1 Ates. 5:16-18) Nambosoni, kola cisangalalo cisyesyene mpaka kutukamucisye kuŵambala umi wakunonyela yindu yakucilu. M’malo mwakwe, tucikola nganisyo syakusaka kutenda yejinji pakamucisya Ucimwene wa Mlungu. (Mat. 13:44) Patukuwuwona umbone wakutenda yejinji pakutumicila Mlungu, tuciŵa ŵakusangalala, tuciyiwona kuti tukutenda yambone, soni tucatendekasya ŵane kuŵa ŵakusangalala.—Mase. 20:35; Afi. 1:3-5.

Mundu jwine jwakuwungunya yindu, paŵalijiganyisye yakwamba umi jwalembile kuti, “Naga mundu akuŵa jwakusangalala soni jwakwikutila apano, nikuti caciŵa ni umi wambone msogolo.” Yeleyitu yili yakamulana ni yajikusasala Baibulo kuti, “Mtima wakusangalala wuli mtela wambone.” (Miy. 17:22) Kusala yisyene, naga tukukusya cisangalalo cetu, mpaka tukole umi wambone.

Atamose kuti tukutama mundaŵi jakusawusya, nambope msimu weswela mpaka utukamucisye kola cisangalalo cisyesyene soni cangamala. Mpaka tupocele msimuwu kupitila mu kupopela, kulijiganya, soni kuganicisya Maloŵe ga Yehofa. Tukusakusyasoni cisangalaloci patukuganicisya majali gatupele Yehofa, kusyasya cikulupi ca ŵane, soni kulingalinga kutenda lisosa lya Mlungu. Patukutenda yeleyi, maloŵe ga pa Salimo 64:10 gacikwanilicikwa kwa m’weji. Maloŵega gakusati, “Ŵakulungama cacisangalala mwa Yehofa soni cacitilila kwa jwalakwe.”