1, 2. M’caka acino ca 2018, ana cakutendekwa capi cacicitendekasye kuti tuŵe ŵakamulana mnope, soni ligongo cici? (Alole ciwulili cacili penanipa.)

PA March 31, 2018, lyuŵa lili mkapila, ŵandu ŵa Mlungu pampepe ni ŵandu ŵane ŵalung’wanu cacisongana ku mwambo wa Cakulya Caligulo ca Ambuje. Mwambowu ukusatendekwa kamo pa caka. Ŵanduŵa cacisongana kuti akumbucile ciwa ca Klistu. Caka cilicose, Cikumbuciloci cikusatutendekasya kuŵa ŵakamulana pa cilambo cosope.

² Yehofa ni Yesu akusasangalala pakutuwona tuli tusongene pa cakutendekwa capajikaci. Baibulo jalocesye kuti, “Likuga lyekulungwa lya ŵandu, lyele pangali mundu jwalijose [jucacikombola] kuliŵalanga, lyakutyocela ku mitundu josope, lukosyo lulilose soni ciŵeceto cilicose” licigumila kuti, “Cikulupusyo cikusatyocela kwa Mlungu jwetu jwatemi pacitengu ca Ucimwene, soni kwa Mwanace jwa Ngondolo.” (Ciu. 7:9, 10) Yili yakusangalasya kuti Yehofa ni Yesu akusapocela  ucimbicimbi kupitila mu Cikumbucilo ca ciwa ca Yesu.

3. Ana mungani ajino citupate kwanga kwa yiwusyo yapi?

³ Munganiji, citupate kwanga kwa yiwusyo mpela yakuti, (1) Ana jwalijose pajika mpaka akosecele wuli kuti akapindule pa Cikumbucilo? (2) Ana Cikumbucilo cikusakamucisya wuli ŵandu ŵa Mlungu kuŵa ŵakamulana? (3) Ana jwalijose pajika mpaka atende wuli kuti ayikasye mkamulano? (4) Ana lisiku line tucitenda Cikumbucilo cakumalisya? Naga yili m’yoyo, ni cakaci?

4. Ligongo cici tukusosekwa kutenda yiliyose yakomboleka kuti citusimanikwe pa Cikumbucilo?

⁴ Tukusosekwa kuganicisya mwakusokoka umbone wakusimanikwa pa Cikumbucilo. Wosope tukusamanyilila kuti kusimanikwa pa misongano kuli mbali ja kulambila kwetu. M’yoyosoni, Yehofa ni Yesu akusasangalalaga pakum’wona jwalijose ali mkutenda mtawu kuti akasimanikwe pa cakutendekwa cakusosekwa mnopeci. Tukusaka citumlosye Yehofa ni Yesu kuti naga ngasitusimana ni yakusawusya yekulungwa mnope, tucisimanikwa pa Cikumbucilo. Naga tukulosya mu yakutenda yetu kuti misongano jili jakusosekwa kwetuwe, nikuti Yehofa cacikola magongo gakumtendekasya kulemba lina lyetu ‘m’buku ja cikumbucilo.’ Bukuji jikusakolanjikwasoni kuti ‘buku ja umi’ ligongo jikwete mena ga ŵandu ŵacakapocele umi wangamala.—Mal. 3:16; Ciu. 20:15.

5. Cikumbucilo paciŵandicile, ana mpaka ‘tulilinje camtuli kuti tulole naga tukwete cikulupi’?

⁵ Paciŵandicile Cikumbucilo, tukusosekwa kola ndaŵi jakupopela soni kuganicisya mwakusokoka ya unasi wetu ni Yehofa. (Aŵalanje 2 Akolinto 13:5.) Ana mpaka tutende camtuli yeleyi? Mpaka tutende yeleyi ‘mwakulilinga kuti tulole naga tukwete cikulupi.’ Kulilingaku mpaka tukutende pakuliwusya yiwusyo yakuti, ‘Ana ngusakulupilila kuti ndili mbali ja likuga lyaŵalisagwile Yehofa kuti likwanilisye lisosa lyakwe? Ana ngusatenda yiliyose yakomboleka kuti lalicileje ni kwiganya ngani syambone syakwamba ya Ucimwene mwamtawu? Ana yitendo yangu yikusalosya kuti ngusakulupilila ni mtima wosope kuti tukutama m’masiku gambesi soni kuti ulamusi wa Satana ciwumale pacangakaŵapa? Ana apano ngusamkulupilila Yehofa ni Yesu mpela munatendelaga panalipelekaga ni kubatiswa?’ (Mat. 24:14; 2 Tim. 3:1; Ahe. 3:14) Kuganicisya mwakusokoka kwanga kwa yiwusyoyi kucitukamucisya kwendelecela kulola kuti tuli mundu jwamtuli.

6. (a) Ana tukusosekwa kutenda cici kuti citupate umi wangamala? (b) Ana jwamkulungwa jwa mumpingo jwine akusakosecela wuli Cikumbucilo caka cilicose, soni ana m’weji mpaka tusyasye wuli yeleyi?

⁶ Aŵalanjeje ni kuganicisya yindu yausimu yayikusatagulila kusosekwa kwa Cikumbucilo. (Aŵalanje Yohane 3:16; 17:3.) Kuti citupate umi wangamala tukusosekwa “kulijiganya ni kumanyilila” ya Yehofa soni ‘kukulupilila’ mwa Yesu, jwali Mwanace jwakupagwa jika jwa Mlungu. Pakosecela Cikumbucilo, ana wuli ngalinganya yakuti akole ndaŵi japajika jakulijiganya ya Yehofa ni Yesu kuti ŵaŵandicile mnope? Yeleyi ni yaŵele ali mkutenda jwamkulungwa jwa mumpingo jwine jwaŵele ali mkutumicila paukumuwu kwa ndaŵi jelewu. Kwa yaka yejinji, juŵele juli mkusunga cenene ngani sya mu Sanja ja Mlonda syakutagulila ya Cikumbucilo soni cinonyelo caŵatulosisye Yehofa ni Yesu. Kuli kusigele yijuma yamnono kuti Cikumbucilo citendekwe, m’baleju akusasiŵalangasoni nganisi ni kuganicisyaga kusosekwa kwa cakutendekwaci. Naga jikopwece ngani jinesoni jakwayana ni Cikumbucilo, pambesi pakujiŵalanga akusajisungaga. M’baleju juyiweni kuti kuwilisya kuŵalanga nganisi, nambosoni kuŵalanga ni kuganicisya mwakusokoka Malemba ga pandaŵi ja Cikumbucilo, kukusamkamucisya kulijiganya yindu yasambano caka cilicose. Nambo cakusosekwa mnope kwa jwalakwe, juyiweni kuti cinonyelo cakwe pa Yehofa soni Yesu cikusakula caka cilicose. Kulijiganya  m’litala mpela lyeleli, mpaka kwakamucisye kusya cinonyelo cawo pa Yehofa soni Yesu. Nambosoni mpaka kwakamucisye kuti akapindule mnope ni Cikumbucilo.

7. (a) Ana Yesu ŵapopelele cici cilo cele ŵatandisye Cakulya Caligulo ca Ambuje? (b) Ana cici cacikulosya kuti Yehofa ajanjile lipopelo lya Yesu?

⁷ Cilo cele Yesu ŵatandisye Cakulya Caligulo ca Ambuje, jwalakwe ŵapopelele ŵakulijiganya ŵakwe kuti aŵe ŵakamulana mpela mwele jwalakwe ali jwakamulana ni Atatigwe. (Aŵalanje Yohane 17:20, 21.) Yehofa ajanjile lipopelo lya mwanagwe jwakunonyelwaju, yayikutendekasya ŵandu ŵajinji kulupilila kuti Yesu ŵatumidwe ni Yehofa. Pa misongano jetu josope, Cikumbucilo ni cacikusalosya mnope mkamulano wetu mpela Ŵamboni sya Yehofa. Ŵandu ŵa mitundu soni yilambo yakulekanganalekangana, akusasongana m’malo gakulekanganalekangana pacilambo cosope capasi. M’yilambo yine, kukusaŵa kwakusawusya kuti ŵandu ŵamitundu jakulekangana asongane pampepe. Ŵajinji akusayiwona yeleyi kuŵa yangaŵajilwa. Nambope, mwelemu ngaŵa mwakusayiwonelaga Yehofa ni Yesu.

8. Ana Yehofa ŵamsalile Esekiyele utenga wamtuli pakwamba ya mkamulano?

⁸ M’weji mpela ŵandu ŵa Yehofa, ngatukusasimonga ni mkamulano watukusasangalalaga nawo. Yeleyi ni yaŵalocesye Yehofa mkanipaŵe. Aganicisye ya utenga waŵamsalile Esekiyele wakwamba ya kupwatikanya kwa ndodo siŵili, “ndodo ja Yuda” ni “ndodo ja Yosefe.” (Aŵalanje Ezekieli 37:15-17.) Sanja ja Mlonda ja July 2016, pa ngani ja mtwe wakuti, “Yiwusyo Yakutyocela kwa Ŵakuŵalanga” jatite, “Yehofa kupitila mwa Esekiyele ŵalocesye utenga wa cembeceyo wakuti mtundu wa Yisalayeli ucikamulanasoni pawuciwujila m’Cilambo Celagucisye. Utenga welewo wasalagasoni ya kamulana kwa ŵandu ŵa Mlungu m’moŵa gambesi gano.”

9. Ana yiŵalocesye Esekiyele yikusakwanilicikwa wuli pakulola yayikusatendekwa pandaŵi ja Cikumbucilo caka cilicose?

⁹ Kutyocela mu 1919, mwapanandipanandi Yehofa ŵatandite kulinganyasoni kajende ka yindu pasikati pa ŵasagulwe, ŵakwimila ndodo “ja Yuda” nambosoni kwakamulanya. Mkupita kwa ndaŵi, ŵangondolo sine, ŵakwimila ndodo “ja Yosefe,” ŵakamulene ni ŵasagulwe. Wosopeŵa ŵaŵele “likuga limo.” (Yoh. 10:16; Zek. 8:23) Yehofa ŵalagwisye kuti ndodo siŵilisi cacisipwatikanya kuti siŵe ndodo jimo m’miyala mwakwe. (Ezek. 37:19) Apano ŵasagulwe ni ŵangondolo sine, akutumicila mwakamulana pasi pa ulamusi wa Mwenye jumo, Yesu Klistu, jwele Mlungu ŵamlocesye kuti ali mpela ‘jwakutumicila jwakwe Daudi.’ (Ezek. 37:24, 25) Mkamulano wakusangalasya wakuwukolanga m’buku ja Ezekieli, ukusawonecela cenene caka cilicose pa Cikumbucilo. Pandaŵiji ŵasagulwe ni msimu ŵasigele pacilambo capasi pampepe ni “ŵangondolo sine” akusasongana pampepe kuti akumbucile ciwa ca Yesu. Nambo ana jwalijose pajika mpaka atende wuli kuti akusye mkamulano wetu wa pacilambo cosope?

10. Ana mpaka tukusye wuli mkamulano wetu mumpingo?

¹⁰ Litala lyandanda lyampaka tukucisye mkamulano wetu lili kuŵa jwakulinandiya. Paŵaliji pacilambo capasi, Yesu ŵasalile ŵakumkuya ŵakwe kuti aŵeje ŵakulinandiya. (Mat. 23:12) Naga tuli ŵakulinandiya, tuciŵambala kulikwesya ni tucawonaga ŵane kuŵa ŵakusosekwa. Kulinandiya kucitukamucisya kuti twapikanileje ŵakusatulongolela. Yeleyi mpaka yitendekasye kuti mpingo uŵe wakamulana. Kupunda pa yosopeyi, kulinandiya kwetu kucimsangalasya Mlungu, pakuŵa jwalakwe “akusiŵasisya ŵakulikwesya, nambo akusiŵalosya umbone mtima ŵandu ŵakulinandiya.”—1 Pet. 5:5.

11. Ana kuganicisya ngopolelo sya yimanyilo ya pa Cikumbucilo mpaka kutukamucisye wuli kusya mkamulano wetu?

 ¹¹ Litala lyaŵili lyampaka tukucisye mkamulano wetu lili kulola ngopolelo sya yimanyilo ya pa Cikumbucilo. Lisiku lya Cikumbucilo mkaniliyice, soni mnopemnope pa lisiku lya Cikumbucilolyo, akusosekwa ganicisya gopolela kwa mkate wangali cakusasaŵilisya soni finyo jwamcejewu. (1 Akoli. 11:23-25) Mkate ukusajimila cilu ca Yesu cangali ulemwa cicapelecedwe mbopesi. Finyo akusajimila miyasi ja Yesu. Nambo tukusosekwa kumanyilila yinesoni, ngaŵaga kwamba kumanyilila ngopolelo jakwe ja yindu yeleyi. Akumbucileje kuti ciwombolo ca Yesu Klistu cikusapwatikamo mbali siŵili sya cinonyelo cekulungwa ca Mlungu. Mwambone, cinonyelo ciŵalosisye Mlungu pakutupa mwanagwe, soni cinonyelo ciŵalosisye Yesu pakunda kuwa m’malo mwetuwe. Pangali mundu juŵalosisyepo cinonyelo mpela celeci. Patukuganicisya ya cinonyelo ciŵatulosisyeci, yikusatutendekasyaga kumnonyela Yehofa soni Yesu. Cinonyelo cakwete jwalijose jwetuwe pa Yehofa cili mpela lukonji lwakututaŵikanya pampepe soni kulimbisya mkamulano wetu.

12. Mu citagu cakwe ca mwenye ni acikapolo ŵakwe, ana Yesu ŵasasile yamtuli pangani jakwakululucila ŵane?

¹² Kwakululucila ŵane kutyocela pasi pa mtima lili litala lyatatu lyakucisya mkamulano. Patukwakululucila ŵatulemwecesye, tukusalosya kuti tukusayamicila yaŵatesile Mlungu pakutukululucila yakulemwa yetu. Tukusosekwa kuŵalanga Matayo 18:23-34, ni kuliwusya kuti, ‘Ana ngusakamulicisya masengo yaŵajiganyisye Yesu? Ana ngusalosya kuti ndili jwakuwusimana mtima soni jwakwapikanicisya ŵakulupilila acimjangu? Ana ndili jwakoseka kwakululucila wosope ŵaŵandemwecesye?’ Kusala yisyene, yakulemwa yine yili yekulungwa kulekangana ni yine. Soni yakulemwa yine mpaka tuyiwoneje kuŵa yakusawusya kumkululucila mundu jwatulemwecesye. Nambo citagu ca Yesu cikutukamucisya kumanyilila yakusasaka Yehofa panganiji. (Aŵalanje Matayo 18:35.) Yesu ŵasasile mwakupikanika cenene kuti Yehofa ngasatukululucila yakulemwa yetu naga m’wejo ngatukwakululucila ŵane pali pana magongo gakupikanika. Jelejitu jili ngani jekulungwa jatukusosekwa kujiganicisya cenene! Kuti tuwuteteye soni kuwusunga mkamulano wetu, tukusosekwa kwakululucilaga ŵane mpela muŵatujiganyicisye Yesu.

13. Ana tukusalimbikasya wuli mkamulano ni ŵane?

 ¹³ Patukwakululucila ŵane, tukusalosya kuti tuli ŵakutamilikasya mtendele. Tukumbucileje yaŵaŵecete ndumetume Paulo kuti, ‘Alinjilile ni mtima wosope kuŵa ŵakamulana pakutama mwamtendele, pakuŵa wuli cakutaŵila cakutukamulanya.’ (Aef. 4:3) Pa Cikumbucilo cacikwisaci, mnopemnope palisiku lya Cikumbucilolyo, tukusosekwa kuganicisya mwakusokoka yatukusitwatendela ŵane. Tukusosekwa kuliwusya kuti, ‘Ana ŵandu akusamanyilila kuti ndili jwangatumbila citema naga ŵandu ŵane anguŵesye? Ana ngusamanyika kuti ndili mundu jwakulingalinga kuyikasya mtendele soni mkamulano?’ Yeleyi yili yiwusyo yakusosekwa mnope kuyiganicisya.

14. Ana mpaka tulosye mwamtuli kuti tuli ‘ŵakundililana m’cinonyelo’?

¹⁴ Litala lyamcece lyakutukamucisya kukusya mkamulano lili kwalosya ŵane cinonyelo pakumsyasya Yehofa, jwali Mlungu jwacinonyelo. (1 Yoh. 4:8) Ngatukusosekwa kuŵeceta pakwamba ya ŵakulupilila acimjetu kuti, “Ngusinanonyela wosope, nambo jwangakulupilila.” Kaganisye keleka kali kakusisyana ni yaŵasasile Paulo kuti tukusosekwa ‘kundililana m’cinonyelo.’ (Aef. 4:2) Apatu tuyiweni kuti Paulo nganagamba kusala kuti tukusosekwa ‘kundililana,’ nambo jwasasilesoni kuti tutendeje yeleyi “m’cinonyelo.” Pelepatu pana kulekangana. M’mipingo jetu mwana ŵandu ŵakulekanganalekangana ŵele Yehofa ŵawutile kwa jwalakwe. (Yoh. 6:44) Pakuŵa Yehofa ŵawutile, nikuti akusiŵanonyela. Sambano ana ŵani mwa m’weji ŵakwete ukumu wakwajelusya ŵakulambila acimjetu kuti ali ŵangaŵajilwa kwanonyela? Ngatukusosekwa kuleka kwalosya cinonyelo cele Yehofa ŵatulamwile kuti tucilosyeje.—1 Yoh. 4:20, 21.

15. Ana tukumanyilila wuli kuti lisiku line tucitenda Cikumbucilo cakumalisya?

¹⁵ Lisiku line tucitenda Cikumbucilo cakumalisya. Tukumanyilila wuli yeleyi? Mu cikalata candanda cakwawula kwa Akolinto, Paulo ŵalembele Aklistu ŵasagulwe kuti caka cilicose pakukumbucila ciwa ca Yesu, akusaŵa ali ‘mkwenesya ya ciwa ca Ambuje, mpaka pacaciyika.’ (1 Akoli. 11:26) Pelepa maloŵe gakuti “pacaciyika” gakulandana ni gaŵaŵecete Yesu paŵalocesyaga yayicitendekwa mu ndaŵi ja mbesi. Pakusala ya yisawusyo yekulungwa yayikwika pacangakaŵapa, Yesu ŵatite, “Cimanyilo ca Mwanace jwa mundu ciciwonecela kwinani. Soni ŵandu ŵa ngosyo syosope sya pacilambo capasi caciliputa ligongo lya canasa, ni cacim’wona Mwanace jwa mundu ali mkwika m’mawunde gakwinani ni macili soni lumbili lwekulungwa. Soni [Yesu] cacitumisya malayika gakwe ni kusona kwekulungwa kwa lipenga, soni cacisonganganya ŵasagulwe ŵakwe kutyocela ku mbepo mcece, kutyocela kumtepa wa kwinani mpaka kumtepa kwine.” (Mat. 24:29-31) Yesu “cacisonganganya ŵasagulwe ŵakwe” pa ndaŵi jele ŵasagulwe wosope ŵacaciŵape pacilambo capasi cacipocela mbote jawo kwinani. Yeleyi yicitendekwa pambesi pa mbali jandanda ja yisawusyo yekulungwa nambo ngondo ja Alamagedo mkanijitande. Kaneko wosope ŵa 144,000 pampepe ni Yesu caciputa ngondo jakulimbana ni mayimwene ga pacilambo capasi. (Ciu. 17:12-14) Cikumbucilo catucitenda Yesu ali asigele panandi ‘kwika’ kukwajigala ŵasagulwe ni kwawula nawo kwinani, celeco ciciŵa Cikumbucilo cakumalisya.

16. Ligongo cici wawojo ali ŵakusacilila kusimanikwa pa Cikumbucilo caka acino?

¹⁶ Kwende tutende yampaka tukombole kuti citusimanikwe ni kupindula pa Cikumbucilo cacicitendekwa pa March 31, 2018. Soni kwende tumŵendeje Yehofa kuti atukamucisye kutenda mbali jetu kuti tuyikasyeje mkamulano pasikati petu. (Aŵalanje Salimo 133:1.) Tukumbucileje kuti lisiku line tucitenda Cikumbucilo cakumalisya. Nambo pakwembeceya lisikulyo, kwende tujendelecele kulosya kuyamicila mkamulano watukusakola caka cilicose pa Cikumbucilo.