MASIKU agano, ŵandu ŵajinji kuchilamboku akusasaka kuti apateje yindu yapenani soni ŵandu ŵatendeleje yindu yapadela. Atamose ŵandu ŵeleŵa ali akwete yindu yejinji, akusagamba kusaka ali apatile yine. Ŵandu ŵakusatenda yeleyi ali ŵakulinonyela soni ŵangayamika pa yindu yakwete. Mwamti ndamo jeleji jili chimanyisyo cha masiku gakumalisya.—2 Tim. 3:2.

Nambotu ndamo jakulinonyelaji nganijitanda lelo. Mwachisyasyo, Adamu ni Hawa ŵasachile kuti alisagulileje jika yayili yambone soni yakusakala. Mwamti apano wosopewe tukusalaga ligongo lya yakuyichisya ya yindu yaŵasagwile jemanjaji. Pali papitile yaka, nombe Mwenye Usiya jwa ku Yuda jwaganisyaga kuti akwete ufulu wakupeleka mbopesi syakutinisya ku nyumba ja Mlungu. Nambotu yajwatesileyi waliji ulemwa wekulungwa. (2 Mbi. 26:​18, 19) Mwakulandana ni yeleyi, nombe Afalisi ni Asaduki ŵaganisyaga kuti Mlungu jwasosekwaga kwatendela yindu yapadela ligongo lyakuti ŵaliji ŵakutyochela mu mbumba ja Abulahamu.—Mat. 3:9.

Ligongo lyakuti masiku agano m’wejisoni tusyungulilidwe ni ŵandu ŵakulinonyela, ndamo jawoji mpaka jitujambuchile. (Agal. 5:26) Mwine mpaka tutande kuganisya kuti tukusosekwa kupata yindu yapenani kapena kutendeledwa yindu yapadela. Ana mpaka tuŵambale chamti uli kaganisye keleka? Chandanda, tukusosekwa kumanyilila mwakusajiwonela Yehofa nganiji. Mwamti mfundo siŵili sya m’Baibulo syakuyichisyasi mpaka situkamuchisye mnope.

Yehofa ni jwakusasagula yindu yatukusosekwa kupochela. Aganichisye yine mwa yisyasyo ya yindu yakusasala jwalakwe kuti ni yatukusasosekwa kwembecheya kola.

•   Mu ulombela, jwamlume akusasosekwa kupochela uchimbichimbi kutyochela kwa ŵamkwakwe, nombe ŵakongwe akusasosekwa kunonyeledwa ni ŵamkwawo. (Aef. 5:33) Yehofa akusasakasoni kuti jwamlume ni jwamkongwe ŵalombane agonaneje jemanja pewo. (1 Akoli. 7:3) Achinangolo akusajembecheya kuti ŵanache ŵawo chiŵapikanileje, nombe ŵanache akusajembecheya kuti achinangolo ŵawo chiŵanonyeleje soni kwasamalila.—2 Akoli. 12:14; Aef. 6:2.

• Yehofa akusasakasoni kuti twachimbichisyeje achakulungwa ŵa mumpingo ligongo lyakamula masengo mwakulimbichila. (1 Ates. 5:12) Nambope, achakulungwaŵa ŵangasosekwaga kwalamula yakutenda abale ni alongo ŵawo.—1 Pet. 5:​2, 3.

• Mlungu ŵagapele maboma ga ŵandu udindo wakulokotela misongo soni kupochela uchimbichimbi kutyochela kwa ŵandu ŵakwalamulila.—Alo. 13:​1, 6, 7.

Mwachinonyelo, Yehofa akusatupaga yindu yejinji kupunda yatukusasosechela. Ligongo lyakuti tuli ŵandu ŵakulemwa, tukusasosekwa kuwa basi. (Alo. 6:23) Nambope, Yehofa akusatupa yindu yambone yejinji ligongo lya chinonyelo chakwe chakulupichika. (Sal. 103:​10, 11) Mwamti yindu yambone yiliyose kapena upile watukusapochela kutyochela kwa jwalakwe, akusatupa ligongo lya umbone mtima wakwe wekulungwa.—Alo. 12:​6-8; Aef. 2:8.

Tuŵambaleje kaganisye ka ŵandu ŵa kuchilamboku. Mwangamanyilila mpaka tutande kuganisya kuti Yehofa akusosekwa kututendela yindu yejinji kwapunda ŵane. Yesu jwasasile yampaka yimtendekasye mundu ganisya myoyo. Jwatesile yeleyi mwakusala ngani jakuwanichisya ja ŵakamula masengo ŵaŵapochele mbiya jimo ja dinali. Ŵandu ŵane ŵakamwile masengo pa lyuŵa lisiku lyosope, nambo ŵane ŵakamwile kwa awala jimpepe. Ŵandu ŵaŵatandite kukamula masengo kundaŵi ŵala ŵaganisyaga kuti chapochele mbiya syejinji ligongo lyakuti ŵakamwile masengo kwandaŵi jelewu. (Mat. 20:​1-16) Kupitila mu ngani jakuwanichisyaji, Yesu jwalosisye kuti ŵakumkuya ŵakwe akusasosekwa kwikutilaga ni yindu yaŵapele Yehofa.

Tuŵeje ŵakuyamichila, soni tukajembecheyaga yejinji kutyochela kwa ŵane. (1 Ates. 5:18) Chisyasyo chambone panganiji ali ndumetume Paulo. Jwalakwe nganiŵasalilaga Aklistu ŵa ku Kolinto kuti ampeje yindu yajwasosechelaga atamose kuti jwakwete  ufulu wakutenda yeleyo. (1 Akoli. 9:​11-14) Mwamti tukusasosekwa kwambaga kuyamichila yindu yambone yatupochele ni kuŵambalaga kwembecheya yejinji kutyochela kwa ŵane.

Tuŵeje ŵakulinandiya. Naga mundu akusatamila kuliganichisya mnope mpaka atande kuyiwona kuti akusosekwa yindu yejinji kupunda yakwete kala. Mwamti kulinandiya kuli mtela wakumachisya kaganisye kakogoyaka.

Jwakulochesya Daniyele jwaliji chisyasyo chambone pangani jakulinandiya. Pakujigalila liŵasa lyaŵapagwile, kawoneche kakwe, lunda lwajwakwete, soni yajwakombolaga kutenda, komboleka yikamtendekasisye Daniyele kutanda kuyiwona kuti jwaŵajilwaga kupochela yindu yapadela soni maudindo gajwakwete. (Dan. 1:​3, 4, 19, 20) Nambope, Daniyele jwaŵelepe jwakulinandiya, mwamti ndamo jeleji jamtendekasisye kuŵa jwakusosekwa mnope kwa Yehofa.—Dan. 2:30; 10:​11, 12.

Myoyo, tukusosekwa kuŵambala msimu wakulinonyela wawuwandile mnope ku chilamboku. Mmalomwakwe, tusangalaleje ni yindu yambone yakusatupa Yehofa ligongo lya umbone mtima wakwe wekulungwa.