1. Ligongo cici ndumetume Paulo ŵasalile Aklistu ŵandanda ŵa Cihebeli kuti alimbikasyaneje mnope?

LIGONGO cici tukusosekwa kulimbikasyana mnope kupundana ni kala kose? Ndumetume Paulo jwasasile ligongo lyakwe m’cikalata cakwawula kwa Aklistu ŵa Cihebeli. Jwalakwe jwatite, “Kwende tuganicisyaneje kuti tulimbikasyane pa cinonyelo soni masengo gambone. Tukaleka kusongana pamo mpela mwakusatendela ŵane, nambo kwende tulimbikasyane jwine ni mjakwe, soni tujonjecesye kutenda yeleyi mnopemnope palikuŵandicila lisikulyo.” (Ahe. 10:24, 25) Paulo jwalembile maloŵega kuli kusigele ciŵandika yaka msano kuti Ayuda ŵa Ciklistu ŵaŵatamaga ku Yelusalemu atande kuyiwona yimanyilo yakuti “lisiku lya Yehofa” liŵandicile. M’yoyo, yimanyiloyo payatandite kuwoneka, ŵasosekwaga kopoka mu msindamo mwakamulana ni yaŵasalile Yesu. (Mase. 2:19, 20; Luk. 21:20-22) Lisiku lya Yehofalyo lyakwanilicikwe mu 70 C.E. pa ndaŵi jele Aloma ŵajonasile msinda wa Yelusalemu.

2. Ligongo cici masiku agano tukusosekwa kuganicisya mnope ya kulimbikasyana jwine ni mjakwe?

 ² Masiku agano, tukwete magongo gakupikanika gakututendekasya kulupilila kuti lisiku “lyekulungwa soni lyakutesya woga” lya Yehofa liŵandicile. (Yow. 2:11) Jwakulocesya Sefaniya jwatite, “Lisiku lyekulungwa lya Yehofa liŵandicile. Liŵandicile, soni likwanguya mnope kwisa!” (Zef. 1:14) Yakulocesyayi, yikutukalamusyasoni masiku agano. Pakuyiwona kuti lisiku lya Yehofa liŵandicile, Paulo jwatusalile kuti “tuganicisyaneje kuti tulimbikasyane pa cinonyelo soni masengo gambone.” (Ahe. 10:24) M’yoyo, tukusosekwa tutendeje lung’wanu ni abale kuti twalimbikasye naga kuli kwakusosekwa.

3. Ana Paulo jwasasile yamtuli pangani jakulimbikasyana? (Alole ciwulili cacili kundanda kwa nganiji.)

³ Baibulo jikusati, “Kudandawula kwa mundu kukusaŵa mpela cindu cakusitopesya mumtima mwakwe, nambo maloŵe gambone gakusamsangalasya.” (Miy. 12:25) Yeleyitu yili yisyene, ligongo ndaŵi ni katema wosopewe tukusasosekwa kulimbikasidwa. Paulo jwalosisye kuti atamose mundu jwakwete ukumu wakwalimbikasya ŵane nombe najo akusasosekwa kumlimbikasya. Pakwalembela Aklistu ŵa ku Loma, jwatite, “Ngusacilila ndili nam’weni jemanja kuti namgaŵile mtuka wine wakwe wausimu kuti mŵe ŵakulimba, kapena kuti citulimbikasyane m’cikulupi, cenu ni cangu.” (Alo. 1:11, 12) Atamose kuti Paulo jwalimbikasyaga ŵane, nambo ndaŵi sine jwasosekwaga kulimbikasidwa.—Aŵalanje Aloma 15:30-32.

4, 5. Ana ŵani ŵatukusosekwa kwalimbikasya masiku agano, soni ligongo cici?

⁴ Tukusosekwa kwayamicila ŵandu ŵakusalijima yejinji paumi wawo pakusaka kumtumicila Yehofa. Ŵane mwa jemanjaji ali apayiniya ŵakulupicika. Apayiniya ŵajinji alijimile mnope ni cakulinga cakuti amalileje ndaŵi jejinji pakutenda upayiniya. Yeleyi yili yakulandanasoni ni yakusatenda amishonale, ŵakutumicila pa Beteli, ŵakulolela mkuli ni aciŵamkwawo, soni ŵakusatumicila ku maofesi gagopolela mabuku. Nambope, jemanjaji akusasosekwa kwalimbikasya. Panasoni abale ni alongo ŵane ŵakusasacilila ali mkutendape undumetume wa ndaŵi syosope nambo pa magongo gane akulepela kutenda yeleyi. Jemanjajisoni tukusosekwa kwalimbikasya.

⁵ Ŵandu ŵane ŵakusosekwa kwalimbikasya, ali abale ni alongo ŵanganaŵa peŵasa ligongo lyakusaka kupikanila lilamusi lya kulombela kapena kulombedwa “mwa Ambuje.” (1 Akoli. 7:39) Mwakulandana ni yeleyi, acakongwe ŵapeŵasa akusalimbikasidwa ni aciŵamkwawo pakwasalila kuti akusiŵanonyela soni akusayamicila masengo gakusatenda. (Miy. 31:28, 31) Tukusosekwasoni kwalimbikasya Aklistu ŵakwendelecelape kuŵa ŵakulupicika atamose pakusimana ni yangalwe soni ulwele. (2 Ates. 1:3-5) Yehofa soni Yesu akusiŵalimbikasya ŵakutumicila wosope ŵakulupicika.—Aŵalanje 2 Atesalonika 2:16, 17.

6. Ana acakulungwa ŵa mumpingo akwete masengo gapi mwakamulana ni Yesaya 32:1, 2?

⁶ Aŵalanje Yesaya 32:1, 2. Yesu Klistu, akusiŵalimbikasya soni kwalongolela ŵandu ŵakusimana ni yakusawusya nambosoni yakutengusya. Akusatenda yeleyi kupitila mwa abale ‘ŵakulongolela,’ ŵali acakulungwa ŵa mumpingo ŵasagulwe nambosoni ŵa ngondolo sine. Yili m’yoyo ligongo lyakuti acakulungwa ŵa mumpingo nganaŵa “ŵakulamulila” cikulupi cetu nambo ‘ali ŵamasengo acimjetu’ kuti tuŵeje ŵakusangalala.—2 Akoli. 1:24.

7, 8. Konjecesya pakwalimbikasya ŵane ni maloŵe, ana acakulungwa ŵa mumpingo mpaka atendesoni cici?

⁷ Ndumetume Paulo jwapelece cisyasyo catukusosekwa kucisyasya. Jwalakwe jwalembele Aklistu ŵa ku Tesalonika kuti, “Pakuŵa tukusamnonyela mnope, twaliji ŵakusacilila kumsalila  ngani syambone sya Mlungu. Soni ngaŵa ngani syambonepe, nambosoni umi wetu usyesyenewo, ligongo twamnonyele mnope.”—1 Ates. 2:8.

⁸ Kwamba kuŵeceta maloŵe gakulimbikasya nganikuŵa kwakwanila. Ni ligongo lyakwe Paulo jwasalile acakulungwa ŵa mumpingo wa ku Efeso kuti, “Mkusosekwa kwakamucisya ŵandu ŵakwete macili panandi soni mkumbucileje maloŵe ga Ambuje Yesu gakuti, ‘Kupeleka kukusamtendekasya mundu kuŵa jwakusangalala kulekangana ni kupocela.’” (Mase. 20:35) Paulo ŵalipelekaga pakwalimbikasya abale soni ‘ŵakamulicisyaga masengo yindu yakwe yosope soni kupeleka umi wakwe wosope’ pakwakamucisya jemanjajo. (2 Akoli. 12:15) Mwakulandana ni yaŵasasile Pauloyi, acakulungwa ŵa mumpingo ngakusosekwa kwamba kwalimbikasya soni kwatondoya abale ŵawo ni maloŵepe, nambo akusosekwasoni kwanonyela kutyocela pasi pamtima.—1 Akoli. 14:3.

9. Ana acakulungwa ŵa mumpingo mpaka atende wuli kuti apeleceje camuko m’litala lyakulimbikasya?

⁹ Kulimbikasyana jwine ni mjakwe, mpaka kupwaticepo kupeleka camuko. Acakulungwa ŵa mumpingo akusosekwa kukuya cisyasyo ca Yesu pakupeleka camuko. Paŵajimwice kuŵawe ni kwawula kwinani, Yesu ŵajijamwice mwamacili mipingo ja ku Asia Minor. Kwende tulole muŵatendele yeleyi. Mkanapelece camukoco, jwatandite ni kujiyamicila mipingo ja ku Efeso, Pegamo, soni ku Tiyatila. (Ciu. 2:1-5, 12, 13, 18, 19) Jwalakwe ŵawusalile mpingo wa ku Laodikaya kuti, “Wosope ŵangusinanonyela, ngusinajamuka ni kwapa cilango. M’yoyo, mŵe ŵakulipeleka soni mpitikuce mtima.” (Ciu. 3:19) Acakulungwa ŵa mumpingo mpaka atende cenene kukuya cisyasyo ca Klistu pakupeleka camuko.

10. Ana wosopewe mpaka tutende wuli kuti tulimbikasyaneje?

¹⁰ Kulimbikasya nganigaŵa masengo ga acakulungwa ŵa mumpingope. Paulo jwalimbikasisye Aklistu wosope kuti aŵeceteje maloŵe ‘gakulimbikasya mpela mugakusosecela kuti gasangalasye’  ŵakugapikana. (Aef. 4:29) Jwalijose akusosekwa ganicisya ‘yakusosecela’ ya ŵane. Paulo ŵasalile Aklistu ŵa Cihebeli kuti, “Alimbisye makono gagatulwice soni malungo gagalopotwece, nambosoni ajendelecele kongola matala gele sajo syawo sikwenda, ni cakulinga cakuti mbali jelemale jikatyoka m’malumbiko mwakwe, nambo m’malo mwakwe jipole.” (Ahe. 12:12, 13) Wosopewe, kupwatikapo ŵacinyamata mpaka tukombole kuŵeceta maloŵe gakwalimbikasya ŵane.

11. Ana Marthe ŵapatile mwamtuli cikamucisyo paŵalwalaga ulwele wa nganisyo?

¹¹ Mlongo jwine lina lyakwe Marthe, * pandaŵi jine jwalwasile ulwele wa nganisyo. Mlongoju jwatite, “Lisiku line natandite kupopela kwa Yehofa kuti andumicisye mundu jwampaka alimbikasye. Palisiku lilili, nasimene ni mlongo jwine jwacikulile juŵalimbikasisye mwacinonyelo. Mlongojo jwasalilesoni kuti pakwete pasimene ni yakulandana ni yanalagaga nayoyo, mwamti pambesi pakwe nayiweni kuti nganimba jika.” Mlongo jwacikulileju nganamanyililaga kuti maloŵe gakwe mpaka gamlimbikasye Marthe.

12, 13. Ana mpaka tugakamulicisye masengo wuli maloŵe ga pa Afilipi 2:1-4?

¹² Paulo jwalimbikasisye Aklistu wosope mumpingo wa ku Filipi kuti, “Naga pasikati penu pana kulimbikasyana kulikose mwa Klistu, cinga kutondoyana kulikose kwacinonyelo, cinga msimu waganicisyana, cinga cinonyelo cekulungwa cilicose ni canasa, mtendekasye kusangalala kwangu kugumbale mwakuŵa ŵakamulana soni kola nganisyo simpepe ni cinonyelo cakulandana. Akatenda cindu cilicose mwakangana kapena mwakulinonyela, nambo mwakulinandiya ŵawoneje ŵane kuŵa ŵakwapunda. Akaganicisyaga yakusaka yawope, nambo aganicisyejesoni yakusaka ya ŵane.”—Afi. 2:1-4.

¹³ Ligongo lya yeleyi, wosopewe tukusosekwa tukoleje lung’wanu ni ŵandu ŵane. Kuti twalimbikasye abale ni alongo ŵetu, tukusosekwa ‘twatondoyeje mwacinonyelo,’ ‘tuganicisyaneje’ nambosoni tukoleje ‘cinonyelo cekulungwa ni canasa.’

14. Ana mpaka twalimbikasye ŵane m’litala line lyapi?

¹⁴ Tukusaŵaga ŵakusangalala kupikana kuti ŵandu ŵatwajiganyisye usyesyene akwendelecelape kuŵa ŵakulupicika. Ndumetume Yohane jwalembile kuti, “Pangali cacikusasangalasya mnope kupunda kupikana kuti ŵanace ŵangu akwendelecela kwenda mu usyesyene.” (3 Yoh. 4) Apayiniya ŵajinji mpaka ajiticisye kuti ŵaŵele ŵakusangalala paŵapikene kuti ŵandu ŵane ŵaŵajiganyisye usyesyene m’yaka yipiteyo, akwendelecela kuŵa ŵakulupicika, soni kuti ŵane mpaka ŵatandite upayiniya. M’yoyo, naga apayiniya atengwice, mpaka twakumbusye yindu yambone yaŵatesile pakwakamucisya ŵane.

15. Ana mpaka tutendesoni cici kuti twalimbikasye ŵandu ŵakutumicila Yehofa mwakulupicika?

¹⁵ Ŵakulolela mikuli pampepe ni aciŵamkwawo pajendele mipingo, ndaŵi syejinji abale ni alongo akusiŵalembela yikalata yakwayamicila. Yeleyi yikusaŵa yakulimbikasya mnope. M’wejisoni mpaka twalimbikasye acakulungwa ŵa mumpingo, amishonale, apayiniya, soni ŵakutumicila pa Beteli mwa kwayamicila.

16. Ana mpaka tumlimbikasye mundu m’litala lyangasawusya lyapi?

¹⁶ Mpaka kuŵe kulemwa kuganisya kuti nganituŵa tukombwele kwalimbikasya ŵane. Ndaŵi syejinji, kwalimbikasya ŵane nganikuŵa kwakusawusya. Mwine mpaka agambe kummwemwetela mundu jwine. Naga mundujo ngakwamwemwetela, nikuti cipali cacikumsawusya mwamti akusosekwa mundu kuti aŵecetane najo. Mpaka amtondoye mundujo mwakwamba kumpikanila pakuŵeceta.—Yak. 1:19.

17. Ana m’bale jwine jwacinyamata juŵalasile mnope nganisyo jwapatile camtuli cikamucisyo?

 ¹⁷ M’bale jwine jwacinyamata, lina lyakwe Henri, jwalasile mnope nganisyo ŵacibale ŵakwe soni babagwe paŵalesile usyesyene. Jwakulolela mkuli ni juŵamlimbikasisye Henri. Ŵamjigalile ku golosale ni kusuma yakumwa kaneko ni kutanda kunguluka. Henri pajwaŵecetaga, jwakulolela mkulijo ŵalingaga kumpikanicisya cenene muŵapikanilaga mumtima mwakwe. Yaŵaŵecete jwakulolela mkulijo yamtendekasisye Henri kumanyilila kuti ŵacibale ŵakwe mpaka awujile mu usyesyene naga jwalakwejo akwendelecela kuŵa jwakulupicika kwa Yehofa. Jwalakwe jwapatile citondoyo pajwaŵalasile malemba ga Salimo 46, Zefaniya 3:17, soni Maliko 10:29, 30.

18. (a) Ana Mwenye Solomoni jwalembile yamtuli pangani jakwalimbikasya ŵane? (b) Ana ndumetume Paulo jwasasile yindu yapi yakamucisya?

¹⁸ Cisyasyo ca Marthe ni Henri cikulosya kuti mpaka tumlimbikasye m’bale kapena mlongo jwakusosecela citondoyo. Mwenye Solomoni jwalembile kuti, ‘Maloŵe gakuŵecetedwa pa ndaŵi jakuŵajilwa gali gambone. Meso gakuŵala gakusatendekasya mtima kusangalala. Ngani jambone jikusajimbasya mawupa.’ (Miy. 15:23, 30) Konjecesya pelepa, mpaka tumlimbikasye mundu jwakulaga nganisyo, mwakumŵalanjila Sanja ja Mlonda kapena yindu yine yayili pa webusayiti jetu. Paulo jwalosisye kuti kwimba nyimbo sya Ucimwene ni mundu jwakulaga nganisyo mpaka kumlimbikasyesoni. Jwalakwe jwalembile kuti, “Ajendelecele kamusyangana ni kulimbikasyana ni masalimo, nyimbo syakumlumba Mlungu, nyimbo syausimu syakwimbidwa mwakuyamicila, soni amjimbileje Yehofa m’mitima jawo.”—Akolo. 3:16; Mase. 16:25.

19. Ligongo cici kulimbikasyana kuli kwakusosekwa mnope lisiku lya Yehofa “palikuŵandicila,” soni ana tukusosekwa kutenda cici apano?

¹⁹ Lisiku lya Yehofa “palikuŵandicila,” tukusosekwa kulimbikasyana mnope kupundana ni kala kose. (Ahe. 10:25) Mwakamulana ni maloŵe ga Paulo kwa Aklistu ŵa mundaŵi jakwe, kwende ‘tujendelecele kulimbikasyana soni kamucisyana, mpela mwatukutendelamu.’—1 Ates. 5:11.