1, 2. Pamkusagula yakutenda paumi wenu, ligongo cici luli lunda kumpikanila Mkupanganya jwenu? (Alole yiwulili yayili penanipa.)

NAGA mli jwacinyamata, komboleka kuti mpocele cikamucisyo cejinji pakwamba ya sogolo jenu. Komboleka kuti aciticala soni ŵandu ŵane akusamlimbikasya kuti mkole majiganyo gapenani kapena kuti cimpate masengo ga mbiya syejinji. Nambo Yehofa ngakusamlimbikasya yeleyi. Yili yisyene kuti jwalakwe akusasaka kuti mlimbicileje sukulu kuti cimpakomboleje kupata yakusosecela ya paumi wenu, pacimcimalisya sukulupo. (Akolo. 3:23) Nambope, jwalakwe akusamanyilila kuti, pamli jwacinyamata mkusosekwa kutenda yisagula yakusosekwa mnope yayicikwaya sogolo jenu. M’yoyo, jwalakwe akusapeleka yiwundo yakuti yimlongoleleje paumi wenu soni kumkamucisya kuti mtameje ni umi mwakamulana ni matala gakwe mu ndaŵi jakumalisyaji.—Mat. 24:14.

² Mkumbucilejesoni kuti Yehofa akusamanyilila cilicose. Jwalakwe akumanyilila yaciyitendekwe pacangakaŵapa soni kuti mbesi ja cilamboci jiŵandicile. (Yes. 46:10; Mat. 24:3, 36) Yehofa akusammanyililasoni jemanja. Akusamanyilila yampaka yimtendekasye kuŵa ŵakusangalala soni yampaka yimtendekasye kuti mkasangalalaga. M’yoyo,  atamose kuti yampaka aŵecete ŵandu mpaka yiwoneceje kuŵa yambone, nambo naga ngayikukamulana ni Malemba, nikuti nganiyiŵa yalunda.—Mis. 19:21.

3, 4. Ana Adamu, Hawa soni ŵanace ŵakwe ŵasimene ni yakuyicisya yamtuli ligongo lyakupikanila yindu yangakamucisya?

³ Yindu yangakamucisya tuŵele mkuyipikana kutyocela kalakala. Satana ali mundu jwandanda kwasalila ŵandu yindu yangakamucisya. Satanaju jwamsalile Hawa kuti jwalakwe pampepe ni ŵamkwakwe akaliji ŵakusangalala yikaŵe kuti akulisagulila jika yakutenda paumi wawo. (Gen. 3:1-6) Nambo yisyene yakwe yili yakuti Satana jwaliji jwakulinonyela. Jwalakwe jwasakaga kuti Adamu ni Hawa soni ŵanace ŵakwe ŵakusogolo campikanileje jwalakwe soni kumlambila m’malo mwakulambila Yehofa. Nambo ana Satana pakwete paŵatendele jemanjaji cilicose? Yehofa ni juŵapele jemanjaji cilicose caŵakwete, kutandila mgunda wakusalala soni yilu yawo yambone yayikatendekasisye kuti atame ni umi kwangamala.

⁴ Cakutesya canasa caliji cakuti Adamu ni Hawa nganampikanila Mlungu mwamti ŵakatile unasi wawo ni jwalakwe. Yakuyicisya yakwe yaliji yakusawusya. Mpela mwayikusaŵela ni maluŵa pagakatile, Adamu ni Hawa mwapanandipanandi ŵatandite kucekulupa kaneko ŵawile. Yeleyi yatendekasisye kuti ŵanace ŵawosoni alajeje. (Alo. 5:12) Atamose yili m’yoyo, ŵandu ŵajinji akusagulape ngampikanila Mlungu. Jemanjaji akusasaka kutama ni umi mwakusacila. (Aef. 2:1-3) Yakuyicisya yakwe yikulosya kuti naga ŵandu akusisyana ni Yehofa “pangali lunda.”—Mis. 21:30.

5. Ana Mlungu jwakwete cembeceyo camtuli mwa ŵandu, soni ana cembeceyo cakweci caliji cakuŵajilwa?

⁵ Nambope, Yehofa jwamanyilile kuti ŵandu ŵane, kupwatikapo ŵacinyamata ŵajinji, cacimsosasosa jwalakwe soni cacimtumicila. (Sal. 103:17, 18; 110:3) Ŵacinyamata ŵeleŵa ali ŵakusosekwa mnope kwa Yehofa. Ana mmwejo mli mulikuga lya ŵacinyamata ŵeleŵa? Naga yili m’yoyo, mwangakayicila nikuti mkusangalala ni “yindu yambone” yakutyocela kwa Mlungu yayikumtendekasya kuti msangalaleje. (Aŵalanje Salimo 103:5; Mis. 10:22) Mu ngani ajino citukambilane yindu yamboneyi yakwana mcece. Yindu yakwe yili cakulya causimu, acimjetu ŵambone, yakulinga yambone, soni ufulu usyesyene.

6. Ligongo cici mkusosekwa kuganicisya ya yakusosecela yenu yausimu, soni ana Yehofa akusampa camtuli?

⁶ Yinyama yangasosecela yindu yausimu, kapena kuti ngayikusasosekwa kummanyilila mkupanganya jwawo. Nambo m’weji ni ŵatukusasosecela. (Mat. 4:4) Naga mkusampikanila jwalakwe, mkusamanyilila yejinji, mkusakola lunda soni mkusasangalala. Yesu jwatite, “Ŵakusangalala ali ŵandu ŵakusamanyilila yakusosecela yawo yausimu.” (Mat. 5:3 NW) Mlungu akusampa yakusosecela yenu yausimu kupitila m’maloŵe gakwe soni yakulya yausimu yejinji yakusapeleka kupitila mwa “kapolo jwakulupicika ni jwalunda.” (Mat. 24:45 NW) Tukusasangalala ni cakulya causimu celeci.—Yes. 65:13, 14.

7. Ana kulya cakulya causimu cakusapeleka Mlungu kucimkamucisya camtuli?

⁷ Cakulya causimu cakusapeleka Mlungu cicimkamucisya kuti mkole lunda soni kuti mganisyeje cenene. Yeleyi yicimkamucisya m’matala gejinji. (Aŵalanje Misyungu 2:10-14.) Mwacisyasyo, ndamosi sicimkamucisya kumanyilila yijiganyo yaunami. Cimo mwa cijiganyoci cili cakuti kwangali Mkupanganya. Yicimkamucisyasoni kumanyilila kuti nganisyo syakuti mbiya soni yindu yakucilu yikusamtendekasya mundu kusangalala, sili syaunami. Ndamosi sicimkamucisyasoni kuŵambala yakumbila kapena ndamo syampaka sim’wulasye. M’yoyo, mtende yiliyose yampaka mkombole kuti mkole lunda soni mganisyeje cenene. Naga mkulingalinga kola ndamo  syakusosekwasi, cimcimanyilila kuti Yehofa akusamnonyela soni akusamsosela yambone.—Sal. 34:8; Yes. 48:17, 18.

8. Ligongo cici mkusosekwa kumŵandicila Mlungu mnopemnope apanopano, soni ana yeleyi yicimkamucisya camtuli msogolo?

⁸ Pacangakaŵapa, cilambo ca Satanaci cacicijonanga. Pandaŵijo Yehofape ni jucacitucenjelaga. Cacitupaga yakusosecela yetu kupwatikapo yakulya ya lisiku lililyose. (Hab. 3:2, 12-19) M’yoyo, ajino jili ndaŵi jamkusosekwa kumŵandicila mnope Mtati jwenu jwakwinani soni kulimbisya cikulupi cenu mwa jwalakwe. (2 Pet. 2:9) Naga mkutenda yeleyi, cinga cimsimane ni yamtuli paumi wenu, nambo cimcilipikana mpela muŵalipikanile jwamasalimo Daudi juŵalembile kuti, “Ngumanyilila Ambuje ali ni une ndaŵi syosope; ali ciŵandika une, nipo pangali campaka cinjogoye une.”—Sal. 16:8.

9. (a) Mwakamulana ni lilemba lya Yohane 6:44, ana Yehofa akusatenda cici? (b) Ana ni cindu capajika capi cacikusatendekwa pamsimene ni mundu jwali mu usyesyene?

⁹ Pamsimene ni mundu kandanda nambo jwanganaŵa mu usyesyene, ana mkusamanyilila cilicose cakwamba mundujo? Mwine mpaka mmanyilile lina lyakwe soni kawonece kakwe nambo ngaŵa mkumanyilila yejinji yakwamba mundujo. Yeleyi yili yakulekangana ni yampaka yitendekwe pamsimangene ni mundu jwali mu usyesyene. Mkumanyilila kuti jwalakwe akusamnonyela Yehofa. Mkumanyilila kuti Yehofa ŵakaweni kanekakwe kambone mwa jwalakwe mwamti ŵam’wutile kuti aŵe m’liŵasa lya ŵakulambila ŵakwe. (Aŵalanje Yohane 6:44.) Cinga mundujo akusatyocela kwapi kapena ŵamlelite camtuli, mkusamanyilila yejinji ya jwalakwe, soni jwalakwe akusamanyilila yejinji yakwamba m’mwejo.

10, 11. Ana ŵandu ŵa Yehofa akusalandana pa yindu yapi, soni ana yeleyi yikusatukwaya camtuli?

¹⁰ Mwacisyasyo, mwacitema mkusamanyigana “ciŵeceto”, cacili “ciŵeceto ceswela.” (Zef. 3:9, NW) Yakuyicisya yakwe, mkusamanyigana yamkusakulupilila pakwamba Mlungu, ndamo, soni cembeceyo ca msogolo. Kusala yisyene, kumanyilila yindu yeleyi kucimkamucisya kuti mkulupililaneje soni kulimbisya unasi wenu wangasiwumala mpaka kalakala.

¹¹ M’yoyo, nganikuŵa kulemwa kusala kuti mpela ŵakulambila ŵa Yehofa, mkwete acimjenu  ŵambone. Acimjenuŵa akusimanikwa pacilambo cosope, atamose kuti ŵane mwa jemanjaji nganimŵe kusimana nawo. Ŵanisoni ŵakusasangalala ni mtuka welewu, kulekapo ŵandu ŵa Yehofa?

12. Ana ni yakulinga yausimu yapi yampaka mliŵicile?

¹² Aŵalanje Jwakulalicila 11:9–12:1. Ana mkwete cakulinga cilicose causimu camkulingalinga kuti mcikwanilisye? Mwine mkulingalinga kuti mŵalanjeje Baibulo lisiku lililyose. Kapena mkulingalinga kuti mpeleceje ndemanga pamisongano soni kujigalaga nawo mbali. Mwinesoni mkutenda yakuti mkamulicisyeje masengo Baibulo mwakamula mtima mu undumetume. Cinga mkwete yakulinga yamtuli, nambo ana mkusapikana uli mumtima pamkuyiwona yakuyicisya yambone ya kulingalinga kwenu kapena ŵane pakum’yamicila? Mwangakayicila mkusasangalala. Yeleyi ni yayikusosekwa kuti yimtendeceleje ligongo lyakuti mkutenda yakusasaka Yehofa kuti mtendeje mpela muŵatendele Yesu.—Sal. 40:8; Mis. 27:11.

13. Pakuwanicisya ni yakulinga ya kucilamboku, ana kumtumicila Yehofa kuli kwakamucisya camtuli?

¹³ Pamkuganicisya mnope yindu yausimu, yikusaŵa kuti mkukamula masengo gagacimtendekasya kuti msangalaleje soni kola umi wambone. Ndumetume Paulo jwalembile kuti, “Limbicilani, mŵe ŵakulimbangana, mkamule masengo ga Ambuje mwacitema masiku gosope, mcimanyililaga kuti masengo gimkusimwakamulila Ambuje ngaŵa kuti gangali mate.” (1 Akoli. 15:58) Nambo ŵandu pakuganicisya yakulinga yawo kucilamboku, mpela kola mbiya, kuŵa mundu jwakumanyika, akusaŵaga ŵangasangalala yisyesyene. Atamose kuti akwanilisye yakulinga yawoyo, akusalipikanape kuti akupelembela pane pakwe. (Luk. 9:25) Tukumanyilila yeleyi kutyocela pa cisyasyo ca Mwenye Solomoni.—Alo. 15:4.

14. Ana mpaka mlijiganye cici kutyocela pa yaŵawungunyisye Solomoni pakwamba ya yakusangalasya?

¹⁴ Solomoni juŵaliji jwamsicile soni jwamacili kupunda mundu jwalijose pacilambopa, jwalinjile kutenda yeleyi. Jwalakwe jwalembile kuti, “Linje yakulinonyelesya, nalisangalasye namsyene.” (Jwak. 2:1-10) Jwalakwe jwataŵile nyumba, jwapanganyisye migunda ja maluŵa, soni jwakwete cilicose caŵacisakaga paumi wakwe. Ana kaneko jwalipikene uli mumtima? Ana jwaliji jwakusangalala soni jwajikutile? Kwanga kwa yiwusyo yeleyi ngatukusosekwa kulaga kuganicisya. Solomoni msyenejo jwalembile kuti, “Sambano natandite kuyiganicisya yosope yinatesile . . . , nayiweni kuti yosope yeneyo yangali mate . . . Pangali cindu cakuti mundu ni kupindula naco.” (Jwak. 2:11) Ana mpaka mlijiganye kanekakwe kutyocela pa yaŵawungunyisye Solomoniyi?

15. Mpela mwalikusasalila lilemba lya Salimo 32:8, ligongo cici mkusosekwa cikulupi, soni ana cicimkamucisya camtuli?

¹⁵ Yehofa ngakusaka kuti mlijiganye yindu m’litala lyakupweteka. Kusala yisyene, mkusosekwa cikulupi kuti mumpikanileje Mlungu soni kuŵika lisosa lyakwe pamalo gandanda paumi wenu. Cikulupi celeci cili cakusosekwa soni ngasimlijimba magambo. Yehofa ngasaliŵalila “cinonyelo cimwalosisye ku lina lyakwe.” (Aheb. 6:10) M’yoyo, mtende yakomboleka kuti mlimbisye cikulupi cenu. Yeleyi yicimkamucisya kuti mliwonele mwasyene kuti Atati ŵenu wakwinani akumsosela yambone.—Aŵalanje Salimo 32:8.

16. Ligongo cici tukusosekwa kuwuwona ufulu wetu kuŵa wakusosekwa mnope soni kuti tuwukamulicisyeje masengo mwalunda?

¹⁶ Paulo jwalembile kuti, “Kwele kuli msimu wa Ambuje, kukusaŵa kwana mtendele [‘ufulu’ NW].” (2 Akoli. 3:17) Yehofa akusanonyela ufulu, m’yoyosoni ŵampanganyisye kuti nomwe ŵakwe mnonyeleje ufulu. Nambope, jwalakwe akusasaka kuti mkamulicisyeje masengo ufuluwo  mwakuŵajilwa, kuti mkasimana ni yakusawusya. Komboleka kuti mkwamanyilila ŵacinyamata acimjenu ŵane ŵakusalolela yakuŵagula kapena kugonana, kutenda mang’asi gakuŵika umi wawo pangosi kapena kumwa mitela jakusokonasya mtwe. Kusala yisyene, jemanjaji akusasangalala kwa kandaŵi kamnono. Nambope, pambesi pakwe akusasimana ni yakusawusya mpela yilwele, kulepela kulilekasya kapena ciwa. (Aga. 6:7, 8) Pelepa nikuti “ufulu” wawo ula nganiwuŵa ufulu usyesyene.—Tit. 3:3.

17, 18. (a) Ana kupikanila Mlungu kukusatupa camtuli ufulu usyesyene? (b) Ligongo cici Adamu ni Hawa ŵakwete ufulu wejinji kulekangana ni ufulu wakwete ŵandu masiku agano?

¹⁷ Ana ŵalingwa ŵamkwamanyilila kuti ŵatandite kulwala ligongo lya kukamulicisya masengo yiwundo ya m’Baibulo? Kusala yisyene, kumpikanila Yehofa kuli kwakamucisya soni uli ufulu. (Sal. 19:7-11) Naga mkusakamulicisya masengo ufulu wenu mwakuŵajilwa, mpela kutenda yindu mwakamulana ni malamusi ga Mlungu soni yiwundo yakwe, mkusalosya kwa Mlungu soni kwa acinangolo ŵenu kuti mpaka ampe ufulu wine wakonjecesya. Cakulinga ca Mlungu cili cakuti ŵape ŵakutumicila ŵakwe ŵakulupicika ufulu usyesyene, wakusawukolanga m’Baibulo kuti “ufulu ni ucimbicimbi wa ŵanace ŵa Mlungu.”—Alo. 8:21.

¹⁸ Adamu ni Hawa ŵapasisye ufuluwu. Mu mgunda wa Edeni, Mlungu ŵapele lilamusi limpepe lyakuti alikuyeje. Lilamusi lyakwe lyaliji lyakuti akalya yisogosi yakutyocela m’citela cimo. (Gen. 2:9, 17) Ana mpaka mjile kuti lilamusili lyaliji lyakusawusya kulikuya? Ata panandi! Mgambe ganicisya ya malamusi gejinji galinganyisye ŵandu ni kwakanganicisyaga ŵandu kuti agakuyeje.

19. Ana Yehofa ni Yesu akutujiganya cici, yayicitukamucisya kuti tukole ufulu?

¹⁹ Yehofa akusatenda yindu ni ŵandumetume ŵakwe mwalunda. Mmalo mwakutupa malamusi gejinji, jwalakwe mwakulitimalika akusatujiganya kuti tupikanileje lilamusi lyakwamba cinonyelo. Jwalakwe akusasaka kuti tutameje mwakamulana ni yiwundo yakwe soni kuti tuŵenganeje ni cakusakala. (Alo. 12:9) Pa Kulalicila kwa Petumbi, Yesu jwatukamucisye kupikanicisya ligongo lyakwe ŵandu akusatenda yakusakala. (Mat. 5:27, 28) Mpela Mwenye jwa Ucimwene wa Mlungu, Klistu cacijendelecela kutujiganya m’cilambo casambano kuti tuyiwoneje yindu yambone ni yakusakala mpela mwakusayiwonela jwalakwe. (Aheb. 1:9) Jwalakwe cacitukamucisya kuti tuŵe ni cilu soni nganisyo syamlama. Mgambe ganicisya mwayiciŵela pali pangali cakututendekasya kutenda cakusakala soni kulaga ligongo lya ungali umlama. Kaneko, pambesi pakwe, cimcisangalala ni “ufulu ni ucimbicimbi” waŵamlagucisye Yehofa.

20. (a) Ana Yehofa akusakamulicisya masengo camtuli ufulu wakwe? (b) Ana cisyasyo ca Mlunguci mpaka cimkamucisye camtuli?

²⁰ M’cilambo casambano ufulu wetu uciŵa wana malile. Ucilongoleledwaga ni cinonyelo cetu pa Mlungu soni ŵandu. Cakusaka Yehofa cili cakuti tumsyasyeje jwalakwe. Jwalakwe akwete ufulu wangali malile. Nambo asagwile kuti atendeje yindu ni yakupanganyikwa yakwe yalunda mwacinonyelo. (1 Yoh. 4:7, 8) Pelepa yili yakupikanika kujila kuti mpaka tuŵe ni ufulu usyesyene naga tukumsyasya Mlungu.

21. (a) Ana Daudi jwalipikanaga uli pakwamba ya Yehofa? (b) Ana mungani jakuyicisya tucikambilana cici?

²¹ Ana mkusayamicila “yindu yambone” yejinji yampele Yehofa, mpela cakulya causimu, acimjenu ŵambone, yakulinga yambone, soni ufulu usyesyene? (Sal. 103:5) Naga yili m’yoyo, mlipikaneje mpela muŵalipikanile Daudi juŵapopesile kuti, “Ŵalakwe akusandosya une litala lya ku umi, ngusasimana lukondwa pakuŵa ŵalakwe pakuŵa ali ciŵandika ni une.” (Sal. 16:11) Ngani jakuyicisya tucikambilana yindu yine yausimu yayikusimanikwa mu Salimo 16. Yeleyi yicitukamucisya kulola yampaka tutende kuti tukole umi wambone.