Ana mpaka ajanje yiwusyo yakuyichisyayi yayikutyochela m’magasini ga Sanja ja Mlonda ga mu 2019?

Ana maloŵe gaŵasasile Mlungu gakuti: “pangali chida chepanganyidwe ni m’magongo tichichimpweteka m’mwejo” gakusagopolela chichi? (Yes. 54:17)

Tukusakulupilila kuti Mlungu chachituchenjela kwa asilikali ŵakonangaŵa ŵali “ŵandu ŵangalwe.” (Yes. 25:4, 5, NW) Achimmagongo ŵetu ngasakombola kutujonanga.—w19.01, pp. 6-7.

Ana yaŵatendaga Mlungu ni Akanani soni Aisalaeli ŵangapikanila yalosisye chamtuli chilungamo chakwe?

Mlungu ŵapele chilango ŵandu ŵaŵatendaga chikululu soni ŵaŵatendelaga ngasa achakongwe soni ŵanache. Jwalakwe jwapele upile ŵandu ŵaŵampikanilaga soni ŵaŵatendelaga ŵane chilungamo.—w19.02, pp. 22-23.

Ana mpaka tutende wuli naga tusimanikwe pamalo pele mundu jwangakulupilila akupeleka lipopelo?

Mpaka tugambe kutama jii soni kutenda yindu mwa ulemu nambo ngatukososeka kutenda nawo “ame’ kapena kamulana magasa ni ŵane ŵali pamalogo. Mpaka tugambe kupelaka lipopelo lyetu lya mumtima.—w19.03, p. 31.

Ana ligongo chichi kwakamulila ŵanache uli ulemwa wekulungwa mnope?

Kwakamulila ŵanache kuli kwaleŵela mnope, kuwuleŵela mpingo, kugaleŵela malamusi ga boma nambosoni kumleŵela Mlungu. Naga malamusi ga boma gakusasala yakuti ŵandu asaleje ngani syakwayana ni kwakamulila ŵanache, achakulungwa ŵamumpingo akusakuya yeleyo.—w19.05, pp. 9-10.

Ana mpaka tuchenje chamtuli kaganisye ketu nambosoni mtima wetu?

Yindu yampaka yitukamuchisye yili, kupopela kwa Yehofa. Kuganichisya mwakusokoka ni chakulinga chakumanyilila patukusosekwa kuchenga. Kusagula achimjetu mwalunda.​—w19.06, p. 11.

Ana apano tukusosekwa kutenda chichi kuti chitukombole kupilila pandaŵi ja kulagasidwa?

Tukusosekwa kulimbisya unasi wetu ni Yehofa. Tukulupilileje kuti jwalakwe akusatunonyela soni kuti ngasatuleka. Tuŵalanjeje Baibulo lisiku lililyose, nambosoni tupopeleje ndaŵi syosope. Tukulupilileje kuti tuchipata upile mu Uchimwene wa Mlungu. Tujinjisyeje pamtima malemba soni nyimbo syakumlumba Mlungu.—w19.07, pp. 2-4.

Ana mpaka tutende chichi kuti twakamuchisye ŵachibale ŵetu kuti chakulupuche?

Tukusosekwa kuti twapikanichisyeje, tukundeje kuti ndamo syetu syambone situtendeleje umboni, tuŵeje ŵakuwusimana mtima soni ŵakusamala.—w19.08, pp. 15-17.

Mwakamulana ni yaŵasasile Yesu pa Mateyu 11:28, ana jwalakwe akusatupumusya chamtuli?

Tukwete ŵakutulolela ŵambone mnope, achimjetu ŵambone mnope, soni masengo gambone mnope.—w19.09, p. 23.

Ana Yehofa akusatupa chamtuli machili gakutukamuchisya kutenda yine yakwe? (Afil. 2:13)

Patukuŵalanga maloŵe ga Mlungu soni kugaganichisya mwakusokoka, Mlungu mpaka atupe machili, mpaka atupesoni mtima wakusachilila kutenda chakulinga chakwe. Soni msimu wakwe mpaka ujonjechesye lunda lwatukwete.—w19.10, p. 21.

Ana tukusosekwa kutenda chichi mkanitutende chisagula chekulungwa?

Yindu msano yakuyichisyayi mpaka yitukamuchsye. Tuwungunyeje chenene. Tuŵendeje lunda. Tuganichisyeje mnope ya chakulinga chatukwete. Tusaguleje yisyesyene yatukusaka. Tusaleje yisyesyene.—w19.11, pp. 27-29.

Ana chijiganyo chakuti ŵandu akwete msimu wangawa, chatandite pandaŵi jele Satana ŵamsalilaga Hawa kuti ngasawa?

Iyayi. Satana ŵamsalile Hawa kuti ngasawa, nganamsalila kuti chachiwa kaneko chindu chinechakwe ni kupitilisya kola umi. Yijiganyo yosope yaunami yamasile pandaŵi ja Chigumula. Komboleka kuti chijiganyo chakuti mundu akwete msimu wangawa chatandite Mlungu mkaniŵapwilinganye ŵandu ŵaŵataŵaga sanja ja Babulo.—w19.12, p. 15.